കാസര്‍ഗോഡ്: സ്ത്രീകള്‍ക്കും കുട്ടികള്‍ക്കും നേരെയുള്ള അതിക്രമങ്ങള്‍ക്കെതിരായി കാസര്‍ഗോഡ് മുതല്‍ കാഞ്ഞങ്ങാട് വരെ സൈക്ലാത്തോണ്‍ സൈക്കിള്‍ റാലി സംഘടിപ്പിച്ചു. വനിതാ-ശിശു വികസന വകുപ്പ്, മഹിളാ ശക്തികേന്ദ്ര, കാസർഗോഡ് പെഡലേഴ്സ് എന്നിവയുടെ സംയുക്താഭിമുഖ്യത്തിലാണ് പരിപാടി നടത്തിയത്.
കാസര്‍ഗോഡ് കളക്ടറേറ്റ് പരിസരത്ത് നിന്ന് ആരംഭിച്ച റാലി കളക്ടര്‍ ഡോ. ഡി. സജിത്ബാബു ഉദ്ഘാടനം ചെയ്തു. എഡിഎം എന്‍. ദേവീദാസ് അധ്യക്ഷത വഹിച്ചു. ജില്ലാ വനിതാ-ശിശുവികസന ഓഫീസര്‍ കവിതാറാണി രഞ്ജിത്, ജില്ലാ സാമൂഹ്യനീതി ഓഫീസര്‍ പി. ബിജു, ജില്ലാ ലേബര്‍ ഓഫീസര്‍ കേശവന്‍, വിദ്യാനഗര്‍ സിഐ വി.വി. മനോജ്, മഹിളാ ശക്തികേന്ദ്ര വനിതാക്ഷേമ ഓഫീസര്‍ സുന എസ്. ചന്ദ്രന്‍, ജില്ലാ കോ-ഓഡിനേറ്റര്‍മാരായ ശില്‍പ, പ്രസീത, കാസര്‍ഗോഡ് പെഡലേഴ്സ് പ്രസിഡന്‍റ് രതീഷ്, കുമ്പള ഐസിഡിഎസ് സൂപ്പര്‍വൈസര്‍ മണിയമ്മ തുടങ്ങിയവര്‍ സംബന്ധിച്ചു.
കാഞ്ഞങ്ങാട് നടന്ന സമാപന ചടങ്ങ് സബ് കളക്ടര്‍ ഡി.ആര്‍. മേഘശ്രീ ഉദ്ഘാടനം ചെയ്തു. ജില്ലാ ഇന്‍ഫര്‍മേഷന്‍ ഓഫീസര്‍ എം. മധുസൂദനന്‍ അധ്യക്ഷത വഹിച്ചു. സിഐ അനൂപ്, സിഡിപിഒ പി ബേബി, അഡീഷണല്‍ സിഡിപിഒ ഷൈനി ഇസ്ഹാഖ്, സൂപ്പര്‍വൈസര്‍മാരായ ടി.പി. ഗ്രീഷ്മ, ബിന്ദു, എന്‍.പി. ജ്യോതി, ശോഭ, സുരേഷ് കൊട്രച്ചാല്‍ തുടങ്ങിയവര്‍ സംബന്ധിച്ചു.