നി​രീ​ക്ഷ​ണ​ത്തി​ലാ​യി​രു​ന്ന സ​ഹോ​ദ​ര​ങ്ങ​ള്‍ വീ​ട്ടി​ലെ​ത്തി: ബ​ലം പ്ര​യോ​ഗി​ച്ച് വീണ്ടും ആ​ശു​പ​ത്രി​യി​ലാ​ക്കി
Thursday, July 9, 2020 10:28 PM IST
ച​വ​റ: ര​ണ്ട് ദി​വ​സ​ത്തി​ന് മു​മ്പ് വീ​ട്ടി​ലെ​ത്തി നി​രീ​ക്ഷ​ണ​ത്തി​ല്‍ ക​ഴി​യാ​ന്‍ വി​സ​മ്മ​തി​ച്ച സ​ഹോ​ദ​ര​ങ്ങ​ളെ നീ​രീ​ക്ഷ​ണ​ത്തി​നാ​യി ആ​ശു​പ​ത്രി​യി​ലെ​ത്തി​ച്ചെങ്കി​ലും അ​വി​ടെ നി​ന്ന് ക​ട​ന്ന് ക​ള​ഞ്ഞ് ഇ​വ​ര്‍ വീ​ണ്ടും വീ​ട്ടി​ലെ​ത്തി​യ​ത് അ​ധി​കൃ​ത​രെ വ​ല​ച്ചു.​ച​വ​റ ന​ല്ലേ​ഴ്ത്ത് മു​ക്കി​ന് സ​മീ​പ​ത്തെ വീ​ട്ടി​ലെ യു​വാ​ക്ക​ളാ​ണ് വി​ല​ക്ക് ലം​ഘി​ച്ച് ക​റ​ങ്ങി ന​ട​ന്ന​ത്.
സ​ഹോ​ദ​ര​ങ്ങ​ളി​ൽ ഒ​രാ​ൾ അ​ന്യ സം​സ്ഥാ​ന​ത്തി​ൽ നി​ന്ന് വ​ന്ന​താ​ണ്. ഇ​യാ​ളു​മാ​യി ഇ​ട​പ​ഴ​കി​യ സ​ഹോ​ദ​ര​നും വ​ന്ന ആ​ളും നി​രീ​ക്ഷ​ണ​ത്തി​ല്‍​ക്ക​ഴി​യ​ണ​മെ​ന്ന് പോ​ലീ​സും ആ​രോ​ഗ്യ വ​കു​പ്പ​ധി​കൃ​ത​രും പ​റ​ഞ്ഞെങ്കിലും സ​ഹോ​ദ​ര​ങ്ങ​ള്‍ വെ​ളി​യി​ല​റ​ങ്ങി ന​ട​ക്കു​ന്ന​ത് ശ്ര​ദ്ധ​യി​ല്‍​പ്പെ​ട്ടു.​ തു​ട​ര്‍​ന്ന് അ​ധി​കൃ​ത​ർ ഇ​വ​രു​ടെ വീ​ട്ടി​ലെ​ത്തി സ​ഹോ​ദ​ര​ങ്ങ​ളു​ടെ എ​തി​ര്‍​പ്പ് അ​വ​ഗ​ണി​ച്ച് ബു​ധ​നാ​ഴ്ച്ച രാ​ത്രി​യോ​ടെ ജി​ല്ലാ ആ​ശു​പ​ത്രി​യി​ലെ​ത്തി​ച്ചി​രു​ന്നു.
എ​ന്നാ​ല്‍ ഇന്നലെ പു​ല​ര്‍​ച്ചെ യു​വാ​ക്ക​ള്‍ ആ​ശു​പ​ത്രി അ​ധി​കൃ​ത​രു​ടെ ക​ണ്ണ് വെ​ട്ടി​ച്ച് ന​ല്ലേ​ഴ്ത്ത് മു​ക്കി​ലു​ള​ള ഇ​വ​രു​ടെ വീ​ട്ടി​ലെ​ത്തി.​ സം​ഭ​വം അ​റി​ഞ്ഞ ച​വ​റ പോ​ലീ​സ് ഇ​വ​രെ പി​ടി​കൂ​ടാ​നാ​യി കെഎ​സ്ആ​ര്‍ടിസി ​ബ​സു​ള്‍​പ്പെ​ടെ പ​രി​ശോ​ധി​ച്ചെ​ങ്കി​ലും യു​വാ​ക്ക​ളെ ക​ണ്ടെ​ത്താ​ന്‍ സാ​ധി​ച്ചി​ല്ല. ഇ​തി​നി​ട​യി​ല്‍ ഇ​വ​ര്‍ വീ​ണ്ടും വീ​ട്ടി​ലെ​ത്തി പു​റ​ത്തി​റ​ങ്ങി എ​ന്ന വി​വ​രം ല​ഭി​ച്ച​തി​നെ തു​ട​ര്‍​ന്ന് പോ​ലീ​സെ​ത്തി ഇ​വ​രോ​ട് നി​രീ​ക്ഷ​ണ​ത്തി​ല്‍ പോ​കാ​ന്‍ പ​റ​ഞ്ഞെ​ങ്കി​ലും നി​രീ​ക്ഷ​ണ​ത്തി​ല്‍ പോ​കാ​ന്‍ ഇ​വ​ർ ത​യ്യാ​റാ​യി​ല്ല.​
തു​ട​ര്‍​ന്ന് കൂ​ടു​ത​ല്‍ പോ​ലീ​സെ​ത്തി ബ​ലം പ്ര​യോ​ഗി​ച്ച് സ​ഹോ​ദ​ര​ങ്ങ​ളാ​യ യു​വാ​ക്ക​ളെ കൊ​ല്ലം ജി​ല്ലാ ആ​ശു​പ​ത്രി​യി​ലെ​ത്തി​ക്കു​ക​യാ​യി​രു​ന്നു .ര​ണ്ട് പ്രാ​വ​ശ്യം നി​യ​മ ലം​ഘ​നം ന​ട​ത്തി​യ​തി​നാ​ൽ സ​ഹോ​ദ​ര​ങ്ങ​ളു​ടെ പേ​രി​ല്‍ കേ​സെ​ടു​ക്കു​മെ​ന്ന് പോ​ലീ​സ് അ​റി​യി​ച്ചു.