വെച്ചൂച്ചിറ: ഗ്രാമപഞ്ചായത്തില്‍ കുടിവെള്ളക്ഷാമം പരിഹരിക്കുന്നതിന് ജല്‍ജീവന്‍ മീഷനിലൂടെ 52.28 കോടി രൂപയുടെ പദ്ധതി നടപ്പാക്കും. 4916 പുതിയ കണക്‌ഷനുകള്‍ ഇതുവഴി നല്‍കും. പഞ്ചായത്തിലെ കുടിവെള്ള വിതരണത്തിന്‍റെ സ്ഥിതി വിലയിരുത്തുന്നതിന് പ്രമോദ് നാരായണ്‍ എംഎല്‍എയുടെയും ജനപ്രതിനിധികളുടേയും ജലവിഭവ വകുപ്പ് അധികൃതരുടെയും യോഗം ചേർന്നു.
പെരുന്തേനരുവി, കൊല്ലമുള കുടിവെള്ളപദ്ധതികളിൽ നിന്നാണ് പഞ്ചായത്തില്‍ ജലവിതരണം നടത്തുന്നത്. ജല അഥോറിറ്റി അടൂര്‍ പ്രൊജക്ട് ഡിവിഷനു കീഴിലുള്ളതാണ് കൊല്ലമുള പദ്ധതി. വെണ്‍കുറിഞ്ഞിയില്‍ ടാങ്ക് സ്ഥാപിച്ച് ഇവിടെനിന്നും തലമുട്ടിയാനി, പാമ്പിരിക്കുംപാറ, പൊനച്ചി, ഓലിക്കല്‍ എന്നിവിടങ്ങളിലെ ടാങ്കുകളില്‍ വെള്ളം എത്തിച്ച് ജലലഭ്യത ഉറപ്പാക്കും. തലമുട്ടിയാനി ടാങ്ക് നിര്‍മാണം ടെന്‍ഡര്‍ ചെയ്തെങ്കിലും ആരും കരാര്‍ ഏറ്റെടുക്കാത്തത് നിര്‍മാണത്തിന് തടസമായിട്ടുണ്ട്. മന്ദമരുതി-വെച്ചൂച്ചിറ റോഡ് നിര്‍മാണത്തിനിടെ തകര്‍ന്ന പൈപ്പുകള്‍ മാറ്റാന്‍ കിഫ്ബി തുക അനുവദിച്ചിരുന്നെങ്കിലും നിര്‍മാണ നടപടികള്‍ ഇഴഞ്ഞു നീങ്ങുന്നതിനാല്‍ അച്ചടിപ്പാറ, കുന്നം മേഖലകളില്‍ ജലവിതരണം മുടങ്ങിയിരുന്നു. ഇതും അടിയന്തരമായി പരിഹരിക്കാന്‍ യോഗത്തില്‍ തീരുമാനമായി.
ഗ്രാമപഞ്ചായത്ത് പ്രസിഡന്‍റ് ടി.കെ. ജയിംസ് അധ്യക്ഷത വഹിച്ചു. ജലഅഥോറിറ്റി പ്രോജക്ട് വിഭാഗം എക്സിക്യൂട്ടീവ് എന്‍ജിനിയര്‍ പി.ആര്‍. സുനില്‍, ജലവിഭവ വകുപ്പ് എക്സിക്യൂട്ടീവ് എന്‍ജിനിയര്‍ ടി. തുളസീധരന്‍, അസിസ്റ്റന്‍റ് എക്സിക്യൂട്ടീവ് എന്‍ജിനിയര്‍മാരായ ബാബുരാജ്, ബിന്ദു, അഞ്ജു, അസി. എന്‍ജിനിയര്‍മാരായ ആര്‍.ഡി. അനില്‍കുമാര്‍, മിനി, അശ്വിന്‍ എന്നിവര്‍ പ്രസംഗിച്ചു.
ചെറുകോല്‍ പഞ്ചായത്തില്‍ 89.61 കോടി
റാന്നി: ചെറുകോല്‍ പഞ്ചായത്തില്‍ 89.61 കോടി രൂപയുടെ ജല്‍ ജീവന്‍ മിഷന്‍ പദ്ധതി നടപ്പാക്കും. ചെറുകോല്‍ പഞ്ചായത്തിലെ ജല്‍ ജീവന്‍ മിഷന്‍ പദ്ധതിയുടെ പ്രവര്‍ത്തനങ്ങള്‍ കാര്യക്ഷമമാക്കുന്നതിന് പ്രമോദ് നാരായണ്‍ എംഎല്‍എ ജനപ്രതിനിധികളുടെയും ജല അഥോറിറ്റി അധികൃതരുടെയും യോഗം വിളിച്ചു ചേര്‍ത്തു. 3456 കണക്‌ഷനുകളാണ് ജല്‍ ജീവന്‍ മിഷനിലൂടെ ചെറുകോല്‍ പഞ്ചായത്തിൽ മാത്രം നല്‍കുക.
ചെറുകോല്‍ - നാരങ്ങാനം - റാന്നി കുടിവെള്ള പദ്ധതി വഴി ചെറുകോല്‍, നാരങ്ങാനം പഞ്ചായത്തുകളുടെ എല്ലാ മേഖലകളിലും റാന്നി പഞ്ചായത്തിലെ 11, 12, 13 വാര്‍ഡുകളിലും ശുദ്ധജലം എത്തിക്കാനാകും. പമ്പാ നദിയിലെ പുതമണ്‍ കടവില്‍ നിന്നും സംഭരിക്കുന്ന വെള്ളം 10 ലക്ഷം ലിറ്റര്‍ ശേഷിയുള്ള പുതമണ്ണിലെ പ്ലാന്‍റിലെത്തിച്ച് ശുദ്ധീകരിച്ച് മഞ്ഞപ്രമല, അന്ത്യാളന്‍ കാവ്, തോന്ന്യാമല, കണമുക്ക് ടാങ്കുകളില്‍ എത്തിച്ചാണ് വിതരണം ചെയ്യുന്നത്. പദ്ധതിയുടെ ഭാഗമായി 190 കിലോമീറ്റർ വിതരണ പൈപ്പുകള്‍ സ്ഥാപിക്കും. രണ്ടാം വാര്‍ഡിലെ കൊന്നയ്ക്കല്‍ കോളനിയിലെ വ്യാസം കുറഞ്ഞ പൈപ്പുകള്‍ മാറ്റി സ്ഥാപിക്കും. ഇനിയും കണക്‌ഷന്‍ വേണ്ട ഗുണഭോക്താക്കളെ വാര്‍ഡ് മെംബര്‍മാരുടെ സഹകരണത്തോടെ കണ്ടെത്താനും യോഗത്തില്‍ തീരുമാനമായി.
ഗ്രാമപഞ്ചായത്ത് പ്രസിഡന്‍റ് കെ.ആര്‍. സന്തോഷ് യോഗത്തില്‍ അധ്യക്ഷത വഹിച്ചു. ജലവിഭവ വകുപ്പ് അസിസ്റ്റന്‍റ് എക്സിക്യൂട്ടീവ് എന്‍ജിനിയര്‍ ബാബുരാജ്, അസിസ്റ്റന്‍റ് എന്‍ജിനിയര്‍ മിനി എന്നിവര്‍ പ്രസംഗിച്ചു.