ഇത്തിപ്പുഴ പാലം അപകടക്കെണിയാകുന്നു : Deepika.com Nattu Visesham

KOTTAYAM

ഇത്തിപ്പുഴ പാലം അപകടക്കെണിയാകുന്നു

Tuesday, January 25, 2022 1:13 AM IST

വൈക്കം: എറണാകുളം-വൈക്കം റോഡിലെ വീതി കുറഞ്ഞ ഇത്തിപ്പുഴ പാലത്തിൽ നടപ്പാതയുമില്ലാത്തത് വാഹന യാത്രികർക്കും കാൽനടക്കാർക്കും അപകടക്കെണിയാകുന്നു. വീതികുറഞ്ഞ പാലത്തിൽ വാഹനങ്ങളുടെ അനിയന്ത്രിത പ്രവാഹമാണ്. 1956ൽ പണികഴിപ്പിച്ച പാലം കാലപ്പഴക്കത്താൽ ജീർണാവസ്ഥയിലാണ്. പാലം നിർമിച്ച കാലത്തുണ്ടായിരുന്ന ഗതാഗതത്തിന്‍റെ നൂറിരട്ടിയായി വർധിച്ചു. പാലത്തിലേക്കുള്ള സമീപറോഡ് മൂന്നു തവണ തകർന്നു. തലനാരിഴയ്ക്കാണ് ദുരന്തമൊഴിവായത്.

നടപ്പാതയില്ലാത്തതിനാൽ പാലത്തിലൂടെയുള്ള കാൽനട യാത്ര ഏറെ അപകടകരമാണ്. വലിയ വാഹനങ്ങൾ പാലത്തിലേറുന്പോൾ വാഹനം ദേഹത്ത് തട്ടാതെ തലനാരിഴയ്ക്കാണ് കാൽനട യാത്രക്കാർ ജീവൻ രക്ഷിച്ചെടുക്കുന്നത്. നൂറുകണക്കിന് വിദ്യാർഥികളാണ് രാവിലെയും വൈകുന്നേരവും പാലത്തിലൂടെ സഞ്ചരിക്കുന്നത്. ഇവരുടെ യാത്രയും ഏറെ ദുരിതം നിറഞ്ഞതാണ്.
പാലത്തിൽ നടപ്പാത സ്ഥാപിക്കണമെന്ന ആവശ്യത്തിന് വർഷങ്ങളുടെ പഴക്കമുണ്ട്. ഇതു സംബന്ധിച്ച് മറവൻതുരുത്ത്, ഉദയനാപുരം പഞ്ചായത്ത് അധികൃതരും പൊതുജനങ്ങളും പൊതുമരാമത്തു വകുപ്പിന് നിരവധി തവണ പരാതി നൽകിയിട്ടുണ്ടെങ്കിലും തുടർ നടപടിയുണ്ടായില്ല. പാലത്തിൽ വഴിവിളക്കില്ലാത്തതും അപകട സാധ്യത വർധിപ്പിക്കുകയാണ്. ഇരുൾ വീണാൽ പാലം ഇരുട്ടിലാണ്. ഇത് കാൽനടയാത്രക്കാരെയാണ് ഏറെ ദുരിതത്തിലാക്കുന്നത്. പാലത്തിന്‍റെ ഇരുവശങ്ങളിലുമുള്ള ഗ്രാമീണ റോഡുകളിൽനിന്നും പ്രധാന നിരത്തിലേക്കുവരുന്ന വാഹനങ്ങൾക്കും വഴിവിളക്കില്ലാത്തത് ബുദ്ധിമുട്ടുണ്ടാക്കുന്നു.

പാലത്തിൽ വഴിവിളക്കുകൾ സ്ഥാപിക്കാൻ ഉദയനാപുരം, മറവൻതുരുത്ത് പഞ്ചായത്തുകൾ ഫണ്ട് അനുവദിക്കാൻ തയാറാണെങ്കിലും വൈദ്യുതി വകുപ്പ് അനുഭാവപൂർവം പരിഗണിക്കുന്നില്ലെന്ന് നാട്ടുകാർ ആരോപിക്കുന്നു.

അതേസമയം സമീപ റോഡിൽ മുന്പ് രൂപപ്പെട്ട ഗർത്തത്തിന്‍റെ അപാകതകൾ പൂർണമായും പരിഹരിക്കാൻ സാധിക്കാത്തതിനാൽ നടപ്പാത ഉൾപ്പെടെ സ്ഥാപിച്ച് പാലം പുനർനിർമിക്കണമെന്നാണ് നാട്ടുകാരുടെ ആവശ്യം.