നയൻതാര
തെന്നിന്ത്യയുടെ സ്വന്തം 'ലേഡി സൂപ്പർസ്റ്റാർ' നയൻതാര ഇന്ന് 42-ാം പിറന്നാൾ ആഘോഷിക്കുകയാണ്. ഒരു സാധാരണ കുടുംബത്തിൽ നിന്ന് വന്ന്, മലയാളത്തിലൂടെ കരിയർ ആരംഭിച്ച്, ഇന്ന് തെന്നിന്ത്യൻ സിനിമാലോകത്തെ ഏറ്റവും സ്വാധീനമുള്ള നായികയായി മാറിയ നയൻതാരയുടെ ജീവിതയാത്ര സിനിമാസ്വാദകർക്ക് എന്നും ഒരു പ്രചോദനമാണ്.
2003-ൽ സത്യൻ അന്തിക്കാട് സംവിധാനം ചെയ്ത 'മനസിനക്കരെ' എന്ന ചിത്രത്തിലൂടെയാണ് ഡയാന മറിയം കുര്യൻ എന്ന നയൻതാര സിനിമയിലെത്തുന്നത്. ആദ്യ ചിത്രത്തിലെ അഭിനയം ശ്രദ്ധിക്കപ്പെട്ടെങ്കിലും, പിന്നീട് തമിഴ്, തെലുങ്ക് ഇൻഡസ്ട്രികൾ അവരെ ഇരുകൈയും നീട്ടി സ്വീകരിക്കുകയായിരുന്നു. 'ചന്ദ്രമുഖി', 'ബില്ല' തുടങ്ങിയ ചിത്രങ്ങളിലൂടെ നയൻതാര തമിഴിലെ മുൻനിര നായികയായി ഉയർന്നു.
ഒരു കാലത്ത് ഗ്ലാമർ വേഷങ്ങളിൽ ഒതുങ്ങിനിന്നിരുന്ന നയൻതാര, പിന്നീട് തന്റെ കരിയറിന്റെ ഗ്രാഫ് പൂർണമായും മാറ്റിമറിച്ചു. സ്വന്തം പേരിൽ തിയേറ്ററുകളിൽ ആളുകളെ കയറ്റാൻ കഴിയുന്ന താരമായി വളർന്നു. 'അറം', 'കോലമാവ് കോകില' തുടങ്ങി നിരവധി ചിത്രങ്ങൾ ഇതിന് തെളിവാണ്.
ഷാരൂഖ് ഖാനോപ്പം അറ്റ്ലീ സംവിധാനം ചെയ്ത 'ജവാൻ' എന്ന ചിത്രത്തിലൂടെ ബോളിവുഡിലും നയൻതാര തന്റെ സാന്നിധ്യം അറിയിച്ചു. ചിത്രത്തിലെ പ്രകടനവും വലിയ രീതിയിൽ പ്രശംസിക്കപ്പെട്ടു. ഇന്ത്യയിലെ ഏറ്റവും പ്രതിഫലം വാങ്ങുന്ന നായികമാരിൽ ഒരാളായ നയൻതാര, നിർമാതാവായും തന്റെ സാന്നിധ്യം അടയാളപ്പെടുത്തിയിട്ടുണ്ട്.
വ്യക്തിജീവിതത്തിലും കരിയറിലും നിരവധി വിവാദങ്ങളെയും പ്രതിസന്ധികളെയും നേരിടേണ്ടി വന്നിട്ടുണ്ട് നയൻതാരയെന്ന നടിയ്ക്ക്. എന്നാൽ എല്ലാ പ്രതിസന്ധികളെയും അതിജീവിച്ച് കൂടുതൽ കരുത്തോടെ താരം തിരിച്ചു വന്നു. സംവിധായകൻ വിഘ്നേഷ് ശിവനുമായുള്ള വിവാഹവും ഇരട്ടക്കുട്ടികളുടെ അമ്മയായതും കഴിഞ്ഞ കാലങ്ങളിൽ ഏറെ ചർച്ച ചെയ്യപ്പെട്ട ഒന്നാണ്. 'നയൻതാര: ബിയോണ്ട് ദി ഫെയറി ടേൽ' എന്ന ഡോക്യുമെന്ററി താരത്തിന്റെ ജീവിതത്തിലെ സന്തോഷങ്ങളും പോരാട്ടങ്ങളും ആരാധകർക്ക് മുന്നിൽ തുറന്നുകാട്ടിയിരുന്നു. തെന്നിന്ത്യൻ സിനിമ ആസ്വാദകരുടെ പ്രിയ നടി നയൻതാര കൂടുതൽ മികച്ച കഥാപാത്രങ്ങളുമായി ഇനിയും മുന്നോട്ട് കുതിക്കട്ടെ എന്ന് ആശംസിക്കാം.
Tags : Nayanthara Birthday LadySuperstar