ചിത്രത്തിന്റെ പോസ്റ്റർ
സണ്ണി ഡിയോൾ നായകനായി മലയാളത്തിന്റെ പ്രിയ സംവിധായകൻ എം. പത്മകുമാർ ഒരുക്കിയ ബോളിവുഡ് ചിത്രം 'സൂര്യാ- അന്ത് സേ ആരംഭ് തക്' റിലീസ് മാറ്റിവച്ചു. സെൻട്രൽ ബോർഡ് ഓഫ് ഫിലിം സർട്ടിഫിക്കേഷൻ സർട്ടിഫിക്കറ്റ് ലഭിക്കുന്നതിലുണ്ടായ കാലതാമസമാണ് ചിത്രത്തിന്റെ റിലീസ് വൈകാൻ കാരണം. ഈ മാസം 20-ാം തീയതിയായിരുന്നു ചിത്രം ആഗോളതലത്തിൽ റിലീസ് ചെയ്യാൻ നിശ്ചയിച്ചിരുന്നത്. സെൻസർ നടപടികൾ പൂർത്തിയായി സർട്ടിഫിക്കറ്റ് ലഭിക്കുന്ന മുറയ്ക്ക് പുതിയ റിലീസ് തീയതി പ്രഖ്യാപിക്കുമെന്ന് നിർമാതാക്കളായ എം.എം. മൂവീസ് അറിയിച്ചു.
ചിത്രത്തിന്റെ റിലീസുമായി ബന്ധപ്പെട്ട് ഡൽഹി ഹൈക്കോടതിയിൽ നിന്നും അണിയറപ്രവർത്തകർക്ക് അനുകൂലമായ വിധിയും വന്നിട്ടുണ്ട്. ഈ ചിത്രം സ്വകാര്യ ആശുപത്രികൾക്കും ഡോക്ടർമാരുടെ സേവനത്തിനും അപകീർത്തികരമാണെന്ന് ആരോപിച്ച് ഏതാനും ഡോക്ടർമാർ സമർപ്പിച്ച ഹർജി ഡൽഹി ഹൈക്കോടതി തള്ളി.
തുടർന്ന് ചിത്രത്തെക്കുറിച്ച് വന്ന വിവാദങ്ങളിൽ വിശദീകരണവുമായി സംവിധായകൻ എം. പത്മകുമാർ രംഗത്തെത്തി. ചിത്രം ആതുര സേവന രംഗത്തിനോ ആരോഗ്യ പ്രവർത്തകരുടെ മഹത്തായ സേവനങ്ങൾക്കോ എതിരല്ലെന്ന് അദ്ദേഹം വ്യക്തമാക്കി. സമൂഹത്തിലെ മറ്റേതൊരു രംഗത്തുമുള്ളതുപോലെ ആരോഗ്യ രംഗത്തും പ്രവർത്തിക്കുന്ന ചില അനാശാസ്യ പ്രവണതകളെയും ക്രമക്കേടുകളെയും തുറന്നുകാട്ടുക മാത്രമാണ് സിനിമയിലൂടെ ഉദേശിച്ചിട്ടുള്ളതെന്നും അദ്ദേഹം പ്രസ്താവനയിലൂടെ അറിയിച്ചു.
Tags : SensorCertificate Delay Release MPadmakumar