പ്രതീകാത്മക ചിത്രം
ശ്രീനഗർ: കുൽഗാം ഭീകരാക്രമണത്തിന്റെ പശ്ചാത്തലത്തിൽ സിആർപിഎഫ് ജവാന്മാർക്ക് സുരക്ഷാ ക്രമീകരണങ്ങളിൽ കർശന നിർദേശങ്ങൾ. ഡ്യൂട്ടി സമയത്ത് ജവാന്മാർ മൊബൈൽ ഫോൺ ഉപയോഗിക്കുന്നതിന് കർശന നിയന്ത്രണം ഏർപ്പെടുത്തിയിട്ടുണ്ട്.
സിആർപിഎഫ് മേധാവി ജി.പി. സിംഗ് നടത്തിയ ഉന്നതതല സുരക്ഷാ അവലോകന യോഗത്തിന് പിന്നാലെയാണ് ജവാന്മാരുടെ സുരക്ഷ മുൻനിർത്തി പുതിയ നിർദേശങ്ങൾ പുറപ്പെടുവിച്ചത്. ജമ്മു കാഷ്മീരിൽ ഡ്യൂട്ടിയിലുള്ള എല്ലാ ജവാന്മാർക്കും ബുള്ളറ്റ് പ്രൂഫ് ജാക്കറ്റുകളും ഹെഡ് ഗിയറുകളും നിർബന്ധമാക്കി.
സായുധരായ ഭീകരർ പതിയിരുന്ന് ആക്രമിക്കുമ്പോൾ ജവാന്മാർക്ക് പരിക്കേൽക്കുന്നത് തടയാൻ ബുള്ളറ്റ് പ്രൂഫ് ജാക്കറ്റുകളും ഹെഡ് ഗിയറുകളും പ്രധാനമാണ്. ഇതോടൊപ്പം ചെക്ക് പോസ്റ്റുകളിൽ മൊബൈൽ ബുള്ളറ്റ് പ്രൂഫ് ബങ്കറുകളുടെ ലഭ്യത ഉറപ്പാക്കണമെന്നും നിർദേശമുണ്ട്.
ചെക്ക് പോസ്റ്റുകളിലെ സുരക്ഷാ ശക്തമാക്കാനും കുടുതൽ ലൈറ്റിംഗ് സൗകര്യം ഏർപ്പെടുത്താനും നിർദേശമുണ്ട്. പുതിയ മാർഗനിർദേശം പ്രകാരം കമാൻഡർമാർക്ക് മാത്രമായിരിക്കും ഔദ്യോഗിക ആവശ്യങ്ങൾക്കായി ഫോൺ ഉപയോഗിക്കാൻ അനുമതിയുണ്ടാവുക. സുരക്ഷാ ഭീഷണി കണക്കിലെടുത്ത് ജവാന്മാർ ഒരേ സ്ഥലത്ത് ദീർഘനേരം നിലയുറപ്പിക്കരുതെന്നും നിർദേശത്തിൽ പറയുന്നു.
Tags : Kashmir CRPF Srinagar NewsUpdate Headlines