Deepika
ADVERTISEMENT
Kerala
കൊച്ചി: ഡിജിറ്റല്‍ റീസര്‍വേയുമായി ബന്ധപ്പെട്ടു കഴിഞ്ഞ സര്‍ക്കാരിന്‍റെ കാലത്ത് ഉപകരണങ്ങള്‍ വാങ്ങിയതിലടക്കം നടന്ന ക്രമക്കേട് സംബന്ധിച്ച അന്വേഷണത്തിനു വിദഗ്ധ സമിതിയെ നിയോഗിക്കാന്‍ രണ്ടു മാസത്തിനകം തീരുമാനമെടുക്കണമെന്ന് ഹൈക്കോടതി.
ഇതുസംബന്ധിച്ച വിജിലന്‍സ് ഡയറക്ടറുടെ ശിപാര്‍ശയില്‍ തീരുമാനമെടുത്ത് കോടതിയില്‍ റിപ്പോര്‍ട്ട് സമര്‍പ്പിക്കാനും ചീഫ് ജസ്റ്റീസ് സൗമെന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരടങ്ങുന്ന ഡിവിഷന്‍ബെഞ്ച് സര്‍ക്കാരിനോട് നിര്‍ദേശിച്ചു.
കോണ്‍ഗ്രസ് നേതാവ് ഷാജി ജെ. കോടങ്കണ്ടത്ത് നല്‍കിയ ഹര്‍ജിയിലാണു നിര്‍ദേശം.
Kerala
കൊച്ചി: വഖഫ് ആക്ടിലെ വകുപ്പ് 14(6) പ്രകാരം ബോര്‍ഡ് പുനഃസംഘടിപ്പിക്കാന്‍ നടപടി തുടങ്ങിയതായി സംസ്ഥാന സര്‍ക്കാര്‍ ഹൈക്കോടതിയെ അറിയിച്ചു.
ഷിയ, സുന്നി, ബോറ, അഗഖാനി തുടങ്ങിയ വിഭാഗങ്ങളുടെ പ്രതിനിധികളെയും ബോര്‍ഡില്‍ ഉള്‍പ്പെടുത്തുന്നതിനു മുന്നോടിയായി എണ്ണം ശേഖരിക്കലടക്കം നടപടികള്‍ പൂര്‍ത്തിയാക്കാന്‍ രണ്ടാഴ്ചകൂടി സര്‍ക്കാര്‍ സമയം തേടിയതിനെത്തുടര്‍ന്ന് ചീഫ് ജസ്റ്റീസ് സൗമെന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരടങ്ങുന്ന ഡിവിഷന്‍ ബെഞ്ച് അതിന് അനുമതി നല്‍കി. തുടര്‍ന്ന് ഹര്‍ജി വീണ്ടും പത്തിന് പരിഗണിക്കാന്‍ മാറ്റി.
വഖഫ് ബോര്‍ഡില്‍ മുസ്‌ലിംകളല്ലാത്ത രണ്ട് അംഗങ്ങളെയും ഷിയ വിഭാഗത്തില്‍ നിന്നടക്കം മുസ്‌ലിംകളിലെതന്നെ ചില വിഭാഗത്തില്‍പ്പെട്ടവരെ അംഗങ്ങളെയും ഉള്‍പ്പെടുത്താത്തതു ചോദ്യം ചെയ്ത് അസംബ്ലി ഓഫ് ക്രിസ്ത്യന്‍ ട്രസ്റ്റ് സര്‍വീസസ് (ആക്‌ട്സ്) അടക്കം നല്‍കിയ ഹര്‍ജികളാണു കോടതിയുടെ പരിഗണനയിലുള്ളത്.
നടപടിക്രമങ്ങള്‍ പൂര്‍ത്തിയാക്കാന്‍ കൂടുതല്‍ സമയം ആവശ്യപ്പെട്ട് റവന്യു അഡീ. ചീഫ് സെക്രട്ടറി എ.പി.എം മുഹമ്മദ് ഹനീഷ് നല്‍കിയ സത്യവാങ്മൂലവും കോടതി പരിഗണിച്ചു. കോടതി നിര്‍ദേശപ്രകാരം നടപടികള്‍ എത്രയും വേഗം പൂര്‍ത്തിയാക്കാനും പുനഃസംഘടന നടപ്പിലാക്കാനും വഖഫ് ബോര്‍ഡില്‍നിന്നുള്ള ആവശ്യമായ റിപ്പോര്‍ട്ടുകളും രേഖകളും ലഭ്യമാക്കിയിട്ടുള്ളതായി സത്യവാങ്മൂലത്തില്‍ പറയുന്നു.
ഷിയ, സുന്നി, ബോറ, അഗഖാനി, മറ്റു പിന്നാക്ക വിഭാഗം വഖഫുകളുടെ എണ്ണമടക്കം ബോര്‍ഡിന്‍റെ കൈവശമുള്ള രേഖകളുടെ അടിസ്ഥാനത്തില്‍ നിര്‍ണയിച്ച് എത്രയും വേഗം സര്‍ക്കാരിന് റിപ്പോര്‍ട്ട് സമര്‍പ്പിക്കാന്‍ വഖഫ് ബോര്‍ഡ് ചീഫ് എക്‌സിക്യൂട്ടീവ് ഓഫിസര്‍ക്കു നിര്‍ദേശം നല്‍കിയിട്ടുണ്ട്. വഖഫ് ആക്ടിലെ 14ാം വകുപ്പ് പ്രകാരം ബോര്‍ഡ് പുനഃസംഘടിപ്പിക്കാന്‍ സര്‍ക്കാര്‍ തയാറാണ്.
കണക്കെടുപ്പ് പോലുള്ള നടപടികള്‍ പൂര്‍ത്തിയാക്കാന്‍ കൂടുതല്‍ സമയം ആവശ്യമായതിനാല്‍ രണ്ടാഴ്ചകൂടി അനുവദിക്കണമെന്നാണ് സത്യവാങ്മൂലത്തില്‍ പറയുന്നത്. വഖഫ് ബോര്‍ഡില്‍ മുസ്‌ലിം ഇതര അംഗങ്ങളെ ഉള്‍പ്പെടുത്തുന്നത് സംബന്ധിച്ച് സുപ്രീംകോടതി വിധിക്കുശേഷം തീരുമാനമെടുക്കുമെന്ന് കഴിഞ്ഞതവണ സമര്‍പ്പിച്ച സത്യവാങ്മൂലത്തില്‍ ചൂണ്ടിക്കാട്ടിയിരുന്നു.
പുതിയ സത്യവാങ്മൂലത്തില്‍ ഇക്കാര്യം പറഞ്ഞിട്ടില്ലെന്ന് ഹര്‍ജിക്കാര്‍ ചൂണ്ടിക്കാട്ടി.
Kerala
കൊടുങ്ങല്ലൂർ: അവനെയൊക്കെ മുക്കാലിയിൽ കെട്ടിയിട്ട് അടിക്കണം എന്നു കേട്ടിട്ടില്ലേ? എന്താണ് ഈ മുക്കാലിയെന്നറിയണമെങ്കിൽ കാണൂ, ഇതാണ് പണ്ട് തെറ്റുകൾ ചെയ്താൽ കെട്ടിയിട്ട് അടിച്ചിരുന്ന ആ ചരിത്രപ്രസിദ്ധമായ ‘മുക്കാലി’.
പതിറ്റാണ്ടുകളായി കൊടുങ്ങല്ലൂർ കോടതി സമുച്ചയത്തിലെ മുൻസിഫ് കോടതി വരാന്തയിൽ തലയുയർത്തി നിൽക്കുന്ന ഈ മുക്കാലി ഇനി ചരിത്രത്തിന്‍റെ ഭാഗമാകാൻ ഹൈക്കോടതി മ്യൂസിയത്തിലേക്കു യാത്രയാകുകയാണ്.
രാജഭരണകാലത്ത് കുറ്റവാളികളെ ഇതിൽ കെട്ടിയിട്ടു ശിക്ഷിച്ചിരുന്നു. പിന്നീട് ആ ശിക്ഷാരീതികൾ അവസാനിച്ചെങ്കിലും ഈ മുക്കാലി മാത്രം വരാന്തയിലെ സ്ഥാനം വിട്ടുമാറിയില്ല.
കാലം മാറി, കോടതി സമുച്ചയങ്ങൾ പുതുക്കിപ്പണിതിട്ടും മാറ്റമില്ലാതെനിന്ന ഈ അപൂർവ ചരിത്രശേഷിപ്പ്, ഹൈക്കോടതി ഒരുക്കുന്ന പുരാവസ്തു പ്രദർശനത്തിന്‍റെ ഭാഗമാകാനുള്ള തയാറെടുപ്പിലാണ്. പ്രദർശനത്തിൽ കൗതുകക്കാഴ്ചയാകാനാണ് മുക്കാലി യാത്രയാകുന്നത്. ഇതിനുള്ള ഔദ്യോഗിക ഉത്തരവ് കൊടുങ്ങല്ലൂർ കോടതിക്കു ലഭിച്ചുകഴിഞ്ഞു.
Kerala
കൊച്ചി: സ്റ്റാര്‍ പദവി പുതുക്കാന്‍ അപേക്ഷ നല്‍കി കാത്തിരിക്കുന്ന ബാര്‍ ഹോട്ടലുകള്‍ക്ക് അത് അനുവദിക്കുന്നത് താത്കാലിക ക്രമീകരണം എന്നനിലയില്‍ മാത്രമാണെന്നു സര്‍ക്കാര്‍ ഹൈക്കോടതിയെ അറിയിച്ചു.
രേഖകള്‍ കൃത്യമായി പരിശോധിച്ചശേഷം മാത്രമാണ് ലൈസന്‍സ് പുതുക്കുന്നത്. അതേസമയം, സ്റ്റാര്‍ പദവിയുടെ കാര്യത്തില്‍ ഇളവ് വരുത്തുകയോ പുതിയ ഹോട്ടലുകള്‍ക്ക് ബാര്‍ ലൈസന്‍സ് നല്‍കുകയോ ചെയ്തിട്ടില്ലെന്നും നികുതി അഡീ. സെക്രട്ടറി സമര്‍പ്പിച്ച സത്യവാങ്മൂലത്തില്‍ പറയുന്നു.
കേരള മദ്യനിരോധന സമിതി നല്‍കിയ പൊതുതാത്പര്യ ഹര്‍ജിയിലാണു വിശദീകരണം. കേന്ദ്ര വിനോദ സഞ്ചാര മന്ത്രാലയത്തിനു കീഴിലുള്ള ഹോട്ടല്‍ ആന്‍ഡ് റസ്റ്ററന്‍റ് അപ്രൂവല്‍ ആന്‍ഡ് ക്ലാസിഫിക്കേഷന്‍ കമ്മിറ്റി നടത്തുന്ന പരിശോധന വൈകുന്നതാണ് നിലവില്‍ അപേക്ഷ നല്‍കി കാത്തിരിക്കാന്‍ ഇടയാക്കുന്നത്. ഇതിന് ഹോട്ടലുടമകള്‍ ഉത്തരവാദികളല്ല.
ലൈസന്‍സ് പുതുക്കി നല്‍കാതിരുന്നാല്‍ സംസ്ഥാനത്തെ ടൂറിസം മേഖലയെയും സാമ്പത്തിക രംഗത്തെയും തൊഴിലവസരങ്ങളെയും പ്രതികൂലമായി ബാധിക്കും.
കേന്ദ്ര ടൂറിസം മന്ത്രാലയം തന്നെ ബാര്‍ ലൈസന്‍സ് അനുവദിക്കുന്നതിന് സ്റ്റാര്‍ പദവി വേണമെന്ന നിബന്ധന ഒഴിവാക്കണമെന്ന് ശിപാര്‍ശ ചെയ്തിട്ടുണ്ടെന്നും സത്യവാങ്മൂലത്തില്‍ പറയുന്നു.
Kerala
കൊച്ചി: സംസ്ഥാനത്തു പിന്നാക്ക വിഭാഗക്കാരുടെ പട്ടിക പുതുക്കുന്നതിന്‍റെ ഭാഗമായ സര്‍വേനടത്തിപ്പുമായി ബന്ധപ്പെട്ട് ഇതുവരെ സ്വീകരിച്ച നടപടികള്‍ വിശദീകരിച്ചു നാലാഴ്ചയ്ക്കകം സത്യവാങ്മൂലം സമര്‍പ്പിക്കണമെന്നു ഹൈക്കോടതി.
സാമൂഹിക സാമ്പത്തിക ജാതി സര്‍വേ സംബന്ധിച്ചാണു പിന്നാക്ക വിഭാഗ വികസന സെക്രട്ടറിക്ക് ചീഫ് ജസ്റ്റീസ് സൗമന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരടങ്ങുന്ന ഡിവിഷന്‍ ബെഞ്ച് നിര്‍ദേശം നല്‍കിയത്.
മൈനോറിറ്റി ഇന്ത്യന്‍സ് പ്ലാനിംഗ് ആന്‍ഡ് വിജിലന്‍സ് കമ്മിഷന്‍ ട്രസ്റ്റ് സമര്‍പ്പിച്ച കോടതിലക്ഷ്യ ഹര്‍ജിയിലാണ് ഉത്തരവ്. പിന്നാക്ക വിഭാഗ വികസന ഡയറക്ടര് ഡി.രഞ്ജിത് കോടതിയില്‍ നേരിട്ടു ഹാജരായി.
ജാതിസര്‍വേ നടത്തുന്നതിനോ പിന്നാക്കവിഭാഗ പട്ടിക പുതുക്കുന്നതിനോ ഡയറക്ടര് ക്കു സ്വതന്ത്രമായ അധികാരമില്ലെന്നും വകുപ്പ് സെക്രട്ടറിയും സര്‍ക്കാരുമാണ് തീരുമാനമെടുക്കേണ്ടതെന്നും വ്യക്തമാക്കി സത്യവാങ്മൂലവും ഫയല്‍ ചെയ്തു. ഇതേത്തുടര്‍ന്ന് വകുപ്പ് സെക്രട്ടറിയെ കക്ഷി ചേര്‍ത്താണു സത്യവാങ്മൂലം ഫയല്‍ ചെയ്യാന്‍ കോടതി നിര്‍ദേശിച്ചത്.
തെലുങ്കാന സര്‍ക്കാര്‍ വീടുവീടാന്തരം നടത്തുന്ന സമഗ്ര ജാതി സര്‍വേക്കായി പുറപ്പെടുവിച്ച ഉത്തരവ് അഡീഷണല്‍ അഡ്വക്കറ്റ് ജനറല്‍ പരിശോധിക്കണമെന്നും കേരളത്തിലും സമാനമായ ഉത്തരവ് പുറപ്പെടുവിക്കേണ്ടതുണ്ടോയെന്നതു പരിഗണിക്കണമെന്നും കോടതി നിര്‍ദേശിച്ചു. തുടര്‍ന്ന് ഹര്‍ജി വീണ്ടും നവംബര്‍ അഞ്ചിനു പരിഗണിക്കാന്‍ മാറ്റി.
Kerala
കൊച്ചി: സംസ്ഥാനത്തെ പൊലിസ് സംഘടനകളെ പുനഃസംഘടിപ്പിച്ച സര്‍ക്കാര്‍ ഉത്തരവ് ഹൈക്കോടതി റദ്ദാക്കി. സംഘടനകളുടെ നിയമാവലിക്കും ഭരണഘടനാപരമായ അവകാശങ്ങള്‍ക്കും വിരുദ്ധമായി അവയുടെ ഘടനയില്‍ ഇടപെടാന്‍ സര്‍ക്കാരിന് അധികാരമില്ലെന്ന് ജസ്റ്റിസ് ബെച്ചു കുര്യന്‍ തോമസ് നിരീക്ഷിച്ചു.
കേരള പൊലിസ് അസോസിയേഷന്‍, കേരള പൊലിസ് ഓഫിസേഴ്‌സ് അസോസിയേഷന്‍, കേരള സീനിയര്‍ പൊലിസ് അസോസിയേഷന്‍ എന്നീ സംഘടനകള്‍ വെട്ടിച്ചുരുക്കി രണ്ടു സംഘടനകളാക്കി ആയിരുന്നു ആഭ്യന്തര വകുപ്പിന്‍റെ പുനഃസംഘടന.
ഈ നടപടിക്കെതിരെ അസോസിയേഷനുകള്‍ സമര്‍പ്പിച്ച രണ്ടു റിട്ട് ഹര്‍ജികള്‍ പരിഗണിച്ചാണ് കോടതി സര്‍ക്കാര്‍ ഉത്തരവ് റദ്ദാക്കിയത്. അസോസിയേഷനുകളുടെ പുനഃസംഘടനയ്ക്കു പിന്നാലെ രൂപീകരിച്ച അഡ്‌ഹോക് കമ്മിറ്റികളുടെ പ്രവര്‍ത്തനവും കോടതി റദ്ദാക്കി.
1966ലെ പൊലിസ് ചട്ടങ്ങള്‍ പ്രകാരം അസോസിയേഷനുകള്‍ക്ക് അംഗീകാരം നല്‍കാനോ റദ്ദാക്കാനോ ഉള്ള അധികാരം സംസ്ഥാന പൊലിസ് മേധാവിക്കാണ്. അസോസിയേഷന്‍റെ രേഖകള്‍, ബാങ്ക് ഫണ്ട്, ആസ്തി ബാധ്യതകള്‍ എന്നിവ രണ്ട് സംഘടനകള്‍ക്കായി വീതിച്ചു നല്‍കാനുള്ള ഉത്തരവിലെ നിര്‍ദേശം നിയമവിരുദ്ധവും ബൈലോകള്‍ക്ക് വിരുദ്ധവുമാണെന്നും കോടതി വ്യക്തമാക്കി.
ജൂലൈ 27ന് ആയിരുന്നു പൊലിസ് സംഘടനകളെ വെട്ടിച്ചുരുക്കി ആഭ്യന്തര വകുപ്പ് ഉത്തരവിറക്കിയത്. യാതൊരു കൂടിയാലോചനകളും നടത്താതെയാണ് സര്‍ക്കാര്‍ ഏകപക്ഷീയമായി തീരുമാനമെടുത്തതെന്ന വാദമാണ് ഹര്‍ജിക്കാര്‍ ഉയര്‍ത്തിയത്.
Kerala
കൊച്ചി: സിഎംആര്‍എല്‍-എക്സാലോജിക് ഇടപാടില്‍ ഇഡി നല്‍കിയ കത്തില്‍ പ്രാഥമിക അന്വേഷണത്തിന് ശേഷം എഫ്ഐആര് രജിസ്റ്റർ ചെയ്ത് കേസെടുക്കാമെന്ന് സര്‍ക്കാര്‍ ഹൈക്കോടതിയില്‍. ഒരു ഡയറി മാത്രമാണ് ഇഡി നല്‍കിയത്. ഡയറി മാത്രം തെളിവാക്കി കേസെടുക്കാനാവില്ലെന്ന് അഡ്വക്കേറ്റ് ജനറല്‍ കോടതിയെ അറിയിച്ചു.
എന്നാല്‍ എഫ്ഐആര് രജിസ്റ്റര്‍ ചെയ്ത് അന്വേഷണം നടത്തണമെന്നാണ് ഇഡിയുടെ ആവശ്യം. കേസെടുക്കാന്‍ ആവശ്യമുള്ള രേഖകള്‍ നല്‍കിയിട്ടുണ്ട് എന്നാണ് ഇഡിയുടെ വാദം. കേസിലെ കണ്ടെത്തലുകളും മൊഴി പകര്‍പ്പുകളും ഇഡി കോടതിയില്‍ മുദ്ര വച്ച കവറില്‍ ഹാജരാക്കി.
സര്‍ക്കാര്‍ ആവശ്യപ്പെട്ടാല്‍ മൊഴി പകര്‍പ്പകളും നല്‍കാമെന്ന് ഇഡി വ്യക്തമാക്കി. പ്രാഥമിക പരിശോധന നടത്തി അഴിമതി നിരോധന പ്രകാരം കേസ് നിലനില്‍ക്കുമെന്ന് മനസിലായതിനാലാണ് വിവരങ്ങള്‍ സംസ്ഥാന പൊലിസിന് കൈമാറിയത്. അതില്‍ ഇനിയും പ്രാഥമിക അന്വേഷണത്തിന്‍റെ ആവശ്യമില്ലെന്നും ഇഡി വ്യക്തമാക്കി.
ഹര്‍ജി കോടതി ഉത്തരവ് പറയാനായി മാറ്റി. പ്രതിപക്ഷ നേതാവ് പിണറായി വിജയന്‍, ടി. വീണ, മുഹമ്മദ് റിയാസ് എന്നിവര്‍ക്കെതിരെ അഴിമതി നിരോധന നിയമപ്രകാരം കേസ് രജിസ്റ്റര്‍ ചെയ്യണമെന്നായിരുന്നു ഇഡിയുടെ ശിപാര്‍ശ.
Kerala
കൊച്ചി: സിഎംആര്‍എല്‍-എക്സാലോജിക് ഇടപാടില്‍ സംസ്ഥാന സര്‍ക്കാരിന് നല്‍കിയ കത്തില്‍ കേസെടുക്കണമെന്ന് ഹൈക്കോടതിയില്‍ ആവര്‍ത്തിച്ച് ഇഡി. സര്‍ക്കാരിന് നല്‍കിയ കത്തും കേസിലെ കണ്ടെത്തലുകളും മൊഴിപകര്‍പ്പുകളും ഇഡി കോടതിയില്‍ മുദ്ര വച്ച കവറില്‍ ഹാജരാക്കി.
ഇഡി നല്‍കിയ കത്തിന്‍റെ അടിസ്ഥാനത്തില്‍ എഫ്ഐആര് ഇടാതെ പ്രാഥമിക അന്വേഷണമാണ് സര്‍ക്കാര്‍ നടത്തുന്നത്. എന്നാല്‍ എഫ്ഐആര് രജിസ്റ്റര്‍ ചെയ്ത് അന്വേഷണം നടത്തണമെന്നാണ് ഇഡിയുടെ ആവശ്യം. കേസില്‍ ആവശ്യമെങ്കില്‍ മൊഴിപകര്‍പ്പുകള്‍ അന്വേഷണസംഘത്തിന് കൈമാറാമെന്നും ഇഡി കോടതിയില്‍ വ്യക്തമാക്കി.
ദീപസ്തംഭം മഹാശ്ചര്യം നമുക്കും കിട്ടണം പണം എന്ന നിലപാട് ആണോ ഈ വിഷയത്തില്‍ സ്വീകരിച്ചിട്ടുള്ളതെന്ന് കോടതി ചോദിച്ചു. ഹര്‍ജിയില്‍ വാദം തുടരുകയാണ്. പ്രതിപക്ഷ നേതാവ് പിണറായി വിജയന്‍, ടി. വീണ, മുഹമ്മദ് റിയാസ് എന്നിവര്‍ക്കെതിരെ അഴിമതി നിരോധന നിയമപ്രകാരം കേസ് രജിസ്റ്റര്‍ ചെയ്യണമെന്നായിരുന്നു ഇഡിയുടെ ശിപാര്‍ശ.
Kerala
കൊച്ചി: ജീവന്‍രക്ഷാ മരുന്നുകളുടെ അമിതവില നിയന്ത്രിക്കാന്‍, പേറ്റന്‍റ് നേടിയ മരുന്നുകമ്പനികളുടെ കാര്യത്തിലും കേന്ദ്രസര്‍ക്കാരിന് ഇടപെടാമെന്നു ഹൈക്കോടതി.
ഇത്തരം സാഹചര്യത്തില്‍ പേറ്റന്‍റും ബന്ധപ്പെട്ട കണ്ടുപിടിത്തവും സര്‍ക്കാരിന് ഏറ്റെടുക്കാനും നേരിട്ടോ മറ്റ് ഏജന്‍സികള്‍ മുഖേനയോ മരുന്നു നിര്‍മിച്ചു ലാഭേച്ഛയില്ലാതെ രോഗികള്‍ക്കു ലഭ്യമാക്കാനും പേറ്റന്‍റ് നിയമത്തിലെ 100-ാം വകുപ്പ് അധികാരം നല്‍കുന്നുണ്ടെന്ന് ജസ്റ്റീസ് ഹരിശങ്കര്‍ വി. മേനോന്‍ വ്യക്തമാക്കി.
ജീവന്‍രക്ഷാ മരുന്നുകളുടെ അമിതവില ശ്രദ്ധയില്‍പ്പെട്ടാല്‍ ഇത്തരം നടപടികള്‍ സ്വീകരിക്കുന്ന കാര്യം കേന്ദ്രസര്‍ക്കാര്‍ പരിഗണിക്കണമെന്നും കോടതി നിര്‍ദേശിച്ചു. സ്തനാര്‍ബുദ ചികിത്സയ്ക്കുള്ള റിബോസിക്ലിബ് മരുന്നിന്‍റെ അമിതവില ചോദ്യം ചെയ്ത്, രോഗബാധിതയായിരുന്ന വിരമിച്ച ബാങ്ക് ഉദ്യോഗസ്ഥ നല്‍കിയ ഹര്‍ജിയിലെ ഉത്തരവിലാണ് കോടതി ഇക്കാര്യം വ്യക്തമാക്കിയത്.
കേസ് നിലനില്‍ക്കേ ഹര്‍ജിക്കാരി മരിച്ചിരുന്നു. പൊതുതാത്പര്യമുള്ള വിഷയമായതിനാല്‍ അമിക്കസ് ക്യൂറിയെ ചുമതലപ്പെടുത്തി കേസിലെ നടപടികള്‍ തുടരുകയായിരുന്നു. ഭരണഘടനയുടെ 21, 47 അനുഛേദങ്ങള്‍ പ്രകാരം ജനങ്ങളുടെ ആരോഗ്യം സംരക്ഷിക്കാനും ചികിത്സ ഉറപ്പാക്കാനും സര്‍ക്കാരിന് ബാധ്യതയുണ്ടെന്നും സാമ്പത്തികത്തിന്‍റെ പേരില്‍ ആര്‍ക്കും ചികിത്സ നിഷേധിക്കാനാകില്ലെന്നും കോടതി വ്യക്തമാക്കി.
അവശ്യമരുന്നുകള്‍ വാങ്ങാന്‍ കഴിയാത്ത സാമ്പത്തികശേഷി കുറഞ്ഞവരുടെ വിവരങ്ങള്‍ ആശുപത്രികളില്‍നിന്നു സര്‍ക്കാര്‍ ശേഖരിച്ച് പേറ്റന്‍റ് നിയമത്തിലെ പ്രത്യേക അധികാരങ്ങള്‍ ഇവര്‍ക്കുവേണ്ടി ഉപയോഗപ്പെടുത്തണം.
സ്തനാര്‍ബുദ ചികിത്സയില്‍ താരതമ്യേന വില കുറഞ്ഞ പാല്‍ബോസിക്ലിബ് മരുന്ന് റിബോസിക്ലിബിനു പകരമായി ഉപയോഗിക്കാമെന്ന വാദം രണ്ടും വ്യത്യസ്ത ഘട്ടങ്ങളിലെ ചികിത്സയ്ക്ക് ഉപയോഗിക്കുന്നതാണെന്ന വിദഗ്ധ സമിതി റിപ്പോര്‍ട്ട് പരിഗണിച്ച് കോടതി തള്ളി.
"സുകൃതം' സിനിമ ഉദ്ധരിച്ച് കോടതി
ചികിത്സയ്ക്കായി കാന്‍സര്‍ രോഗികളും അവരുടെ കുടുംബവും ജീവിതം മുഴുവന്‍ പണയപ്പെടുത്തേണ്ടിവരുന്നതും കടബാധ്യതകളില്‍ മുങ്ങിപ്പോകുന്നതും സംബന്ധിച്ച് എംടി രചിച്ച്, ഹരികുമാര്‍ സംവിധാനം ചെയ്ത "സുകൃതം' സിനിമയില്‍ മമ്മൂട്ടി അവതരിപ്പിച്ച കഥാപാത്രം ആത്മഗതം നടത്തുന്ന ഭാഗം കോടതി വിധിയില്‍ ഉദ്ധരിച്ചിട്ടുണ്ട്. സിനിമയിറങ്ങി മൂന്നു പതിറ്റാണ്ട് കഴിഞ്ഞിട്ടും ഈ ദുരിതത്തിന് മാറ്റമില്ലാത്തത് ദൗര്‍ഭാഗ്യകരമാണെന്നും കോടതി നിരീക്ഷിച്ചു.
Kerala
കൊച്ചി: പോക്സോ കേസുകളുടെ വിചാരണയ്ക്ക് എത്ര കോടതികള്‍ കൂടുതല്‍ വേണ്ടിവരുമെന്നത് ചൂണ്ടിക്കാട്ടി സത്യവാങ്മൂലം സമര്‍പ്പിക്കാന്‍ സര്‍ക്കാരിന് ഹൈക്കോടതി നിര്‍ദേശം.
സുപ്രീംകോടതി ഉത്തരവിന്‍റെ പശ്ചാത്തലത്തില്‍ ബാര്‍ അസോസിയേഷന്‍ നല്‍കിയ പൊതുതാത്പര്യ ഹര്‍ജി പരിഗണിച്ചാണ് ഡിവിഷന്‍ ബെഞ്ചിന്‍റെ ഉത്തരവ്.
പോക്സോ ആക്ട് പ്രകാരമുള്ള മാര്‍ഗനിര്‍ദേശങ്ങള്‍ പാലിക്കാതെയാണു നിലവിലെ പോക്സോ കോടതികളുടെ പ്രവര്‍ത്തനമെന്നും ആവശ്യമായ അടിയന്തര സൗകര്യം പോക്സോ കോടതികള്‍ക്ക് ഉറപ്പു വരുത്തണമെന്നും ഡിവിഷന്‍ ബെഞ്ച് നിര്‍ദേശിച്ചു.
പോക്സോ കോടതികളിലേക്ക് പ്രത്യേകം പബ്ലിക് പ്രോസിക്യൂട്ടര്മാരെ നിയമിക്കുന്നതില്‍ സര്‍ക്കാര്‍ വീഴ്ച കാട്ടുന്നതായി ഹര്‍ജിക്കാര്‍ ചൂണ്ടിക്കാട്ടി.
പബ്ലിക് പ്രോസിക്യൂട്ടര്മാര്ക്കു മതിയായ പരിശീലനം നല്‍കേണ്ടതടക്കം വിഷയത്തില്‍ വിശദീകരണത്തിന് പ്രോസിക്യൂഷന് ഡയറക്ടര് ജനറല്‍ സമയം തേടി.
Kerala
കൊച്ചി: താരസംഘടനയായ ‘അമ്മ’യിലെ തര്‍ക്കങ്ങള്‍ തീര്‍ക്കാന്‍ മാത്രം പ്രത്യേക കോടതിയുടെ ആവശ്യം വന്നിരിക്കുകയാണെന്ന് ഹൈക്കോടതി.
പാവപ്പെട്ടവരുടെ ജീവിതപ്രശ്‌നങ്ങള്‍ക്കിടെ സിനിമക്കാരുടെ തര്‍ക്കം തീര്‍ക്കാന്‍ കോടതികള്‍ക്കു സമയം കണ്ടെത്തേണ്ടിവരുന്നുവെന്നും ജസ്റ്റീസ് ജോബിന്‍ സെബാസ്റ്റ്യന്‍ വാക്കാല്‍ പറഞ്ഞു.
നടി അന്‍സിബയുടെ പരാതിയില്‍ ഹില്‍പാലസ് പൊലിസ് രജിസ്റ്റര്‍ ചെയ്ത കേസ് റദ്ദാക്കണമെന്നാവശ്യപ്പെട്ടു നടി ലക്ഷ്മിപ്രിയയും ഭര്‍ത്താവും ഫയല്‍ ചെയ്ത ഹര്‍ജി പരിഗണിക്കവെയാണു പരാമര്‍ശം.
Kerala
കൊച്ചി: ചെക്ക് കേസില്‍ മൂന്നര വര്‍ഷത്തെ തടവുശിക്ഷ ലഭിച്ച മാണി സി. കാപ്പന്‍ എംഎല്‍എയെ അയോഗ്യനാക്കണമെന്നാവശ്യപ്പെടുന്ന ഹര്‍ജി ഹൈക്കോടതി വ്യാഴാഴ്ച പരിഗണിക്കാന്‍ മാറ്റി.
ശിക്ഷ ഒരുമിച്ച് അനുഭവിക്കാന്‍ കോടതി നിര്‍ദേശിച്ചിട്ടില്ലാത്തതിനാല്‍ നാല് ചെക്കുകേസുകളിലായി മൂന്നര വര്‍ഷം തടവിനു ശിക്ഷിച്ച സാഹചര്യത്തില്‍ ജനപ്രാതിനിധ്യ നിയമപ്രകാരം അയോഗ്യനാക്കണമെന്നുമാവശ്യപ്പെട്ടു പരാതിക്കാരനായ ദിനേഷ് മേനോന്‍ നല്‍കിയ ഹര്‍ജിയാണ് ജസ്റ്റീസ് ബെച്ചു കുര്യന്‍ തോമസ് മാറ്റിയത്.
ഹര്‍ജി നിയമപരമായി നിലനില്‍ക്കില്ലെന്നും രാഷ്‌ട്രീയപ്രേരിതമാണെന്നും ചൂണ്ടിക്കാട്ടി മാണി സി. കാപ്പന്‍ എതിര്‍ സത്യവാങ്മൂലം സമര്‍പ്പിച്ചിട്ടുണ്ട്.
Kerala
കൊച്ചി: ഇഡി റിപ്പോര്‍ട്ടിന്‍റെ അടിസ്ഥാനത്തില്‍ മുന്‍ മുഖ്യമന്ത്രി പിണറായി വിജയനെതിരേയടക്കം എഫ്ഐആര് ഇട്ട് അന്വേഷണം വേണമോ വേണ്ടയോ എന്നതു സംബന്ധിച്ച നിയമപ്രശ്‌നം ഹൈക്കോടതി വിശദ വാദത്തിലൂടെ പരിശോധിക്കും.
എഫ്ഐആര് രജിസ്റ്റര്‍ ചെയ്ത് അന്വേഷണം വേണമെന്ന് ഇഡിയും എങ്ങനെ വേണമെന്നതു സര്‍ക്കാരിന്‍റെ വിവേചനാധികാരമാണെന്ന് അഡ്വക്കറ്റ് ജനറലും വാദിച്ച സാഹചര്യത്തിലാണു നിയമപ്രശ്‌നം പരിശോധനാവിധേയമാക്കുന്നത്.
ഇതിന്‍റെ ഭാഗമായി അന്വേഷണം ആവശ്യപ്പെട്ട് ഡിജിപിക്കു കൈമാറിയ റിപ്പോര്‍ട്ടിന്‍റെ പകര്‍പ്പ് മുദ്രവച്ച കവറില്‍ ഹാജരാക്കാന്‍ ഇഡിക്കു നിര്‍ദേശം നല്‍കിയ ജസ്റ്റീസ് എ. ബദറുദ്ദീന്‍ നിയമപ്രശ്‌നത്തില്‍ വിശദ വാദം കേള്‍ക്കാനായി ഹര്‍ജി 29ലേക്കു മാറ്റി.
ഇഡി റിപ്പോര്‍ട്ടിലെ നിര്‍ദേശപ്രകാരം പിണറായി വിജയന്‍, മകള്‍ ടി.വീണ, മരുമകനും മുന്‍ മന്ത്രിയുമായ പി.എ. മുഹമ്മദ് റിയാസ് എന്നിവര്‍ക്കെതിരേ അഴിമതിതടയല്‍ നിയമപ്രകാരം (പിഎംഎല്‍എ) എഫ്ഐആര് രജിസ്റ്റര്‍ ചെയ്യാത്തതു ചോദ്യം ചെയ്ത് അഡ്വ. കെ.എം. ഷാജഹാനാണ് ഹര്‍ജി നല്‍കിയിരിക്കുന്നത്.
എസ്എഫ്‌ഐഒ റിപ്പോര്‍ട്ടിന്‍റെ അടിസ്ഥാനത്തില്‍ ഇഡി നടത്തിയ അന്വേഷണത്തില്‍ അഴിമതി തടയല്‍ നിയമപ്രകാരം കേസെടുക്കാനുള്ള വസ്തുതകളുണ്ടെന്നും പിഎംഎല്‍എയിലെ 66(2) വകുപ്പ് പ്രകാരം സമര്‍പ്പിച്ച റിപ്പോര്‍ട്ടിന്‍റെ അടിസ്ഥാനത്തില്‍ നിര്‍ബന്ധമായും എഫ്ഐആര് രജിസ്റ്റര്‍ ചെയ്യേണ്ടതുണ്ടെന്ന നിലപാടാണു കോടതിയില്‍ ഇഡി സ്വീകരിച്ചത്.
2025ല്‍ത്തന്നെ ഇക്കാര്യത്തില്‍ പൊലിസിന് കത്ത് നല്‍കിയിരുന്നു. ഇപ്പോള്‍ വീണ്ടും കത്ത് നല്‍കുകയാണു ചെയ്തത്. ഇതിന്‍റെ അടിസ്ഥാനത്തില്‍ എഫ്ഐആര് രജിസ്റ്റര്‍ ചെയ്യാന്‍ സര്‍ക്കാരിനു ബാധ്യതയുണ്ടെന്നും 2025ലെ സുപ്രീംകോടതി ഉത്തരവ് ചൂണ്ടിക്കാട്ടി ഇഡി വാദിച്ചു.
എന്നാല്‍, ഇക്കാര്യത്തില്‍ തീരുമാനമെടുക്കാന്‍ സര്‍ക്കാരിനു വിവേചനാധികാരമുണ്ടെന്നും ഹര്‍ജി നിലനില്‍ക്കില്ലെന്നും പൊതുതാത്പര്യ ഹർജിയായി വേണം സമര്‍പ്പിക്കാനെന്നും അഡ്വക്കറ്റ് ജനറല്‍ വാദിച്ചു. അല്ലാത്തപക്ഷം ഇഡിയാണ് ഇക്കാര്യത്തില്‍ കോടതിയെ സമീപിക്കേണ്ടത്.
ഇഡി റിപ്പോര്‍ട്ടിന്‍റെയും അതിന്‍മേലുള്ള നിയമോപദേശത്തിന്‍റെയും അടിസ്ഥാനത്തിലാണ് പ്രാഥമികാന്വേഷണത്തിന് തീരുമാനമെടുത്തതെന്നും എജി വ്യക്തമാക്കി. മതിയായ തെളിവുണ്ടെങ്കില്‍ എഫ്ഐആര് രജിസ്റ്റര്‍ ചെയ്യണമെന്നല്ലേ സുപ്രീം കോടതി ഉത്തരവുള്ളതെന്ന് ഹൈക്കോടതി ചോദിച്ചു.
Kerala
കൊച്ചി: മരണപ്പാച്ചില്‍ നടത്തുന്ന സ്വകാര്യബസുകള്‍ക്കും നടപടിയെടുക്കാത്ത അധികൃതര്‍ക്കും ഹൈക്കോടതിയുടെ രൂക്ഷ വിമര്‍ശനം.
പൊലിസിനെയും കോടതിയെയും നിയമത്തെയും ഭയക്കാതെ നിയമം ലംഘിച്ച് എന്തും ചെയ്യാമെന്ന നിലയിലാണു സ്വകാര്യ ബസുകളെന്ന് ജസ്റ്റീസ് ദേവന്‍ രാമചന്ദ്രന്‍ വിമര്‍ശിച്ചു.
സമയം പാലിക്കണം എന്നതിന്‍റെ പേരില്‍ നിയമലംഘനം നടത്തുകയാണ്. നടപടിയെടുക്കേണ്ട അധികൃതര്‍ ഉറക്കത്തിലാണോ? ട്രാഫിക് പൊലിസിന്‍റെ പരാജയമാണിത്. കഴിഞ്ഞതവണ കോടതി ശക്തമായി നിര്‍ദേശം നല്‍കിയതിനു ശേഷവും ഇത്തരം സംഭവങ്ങള്‍ ആവര്‍ത്തിക്കുകയാണ്.
ബസുകള്‍ക്കെതിരേ നടപടിയെടുത്താല്‍ സമരം ചെയ്യുമെന്ന വെല്ലുവിളി അനുവദിക്കാനാകില്ല. 11, 12 ക്ലാസുകളില്‍ ട്രാഫിക് നിയമങ്ങള്‍ പാഠ്യപദ്ധതിയുടെ ഭാഗമാക്കേണ്ടതുണ്ടെന്നും കോടതി പറഞ്ഞു.
കൊച്ചി നഗരത്തിലും കണ്ണൂരിലും സ്വകാര്യ ബസുകള്‍ മരണപ്പാച്ചില്‍ നടത്തി അപകടമുണ്ടാക്കിയതിന്‍റെ വീഡിയോ ദൃശ്യങ്ങള്‍ കോടതിയില്‍ പ്രദര്‍ശിപ്പിച്ചാണ് കോടതി വിമര്‍ശനമുന്നയിച്ചത്.
Kerala
കൊച്ചി: റോഡ് സുരക്ഷയുമായി ബന്ധപ്പെട്ട് സമഗ്ര നിര്‍ദേശങ്ങളുമായി ഹൈക്കോടതി. റോഡ് സുരക്ഷയുടെ പേരില്‍ സ്വമേധയാ കേസ് രജിസ്റ്റര്‍ ചെയ്യണമെന്ന നിര്‍ദേശം ചീഫ് ജസ്റ്റീസിന് സമര്‍പ്പിച്ചതടക്കം നിര്‍ദേശങ്ങളാണു ജസ്റ്റീസുമാരായ വി. രാജ വിജയരാഘവന്‍, കെ.വി. ജയകുമാര്‍ എന്നിവരടങ്ങുന്ന ഡിവിഷന്‍ ബെഞ്ച് മുന്നോട്ടുവച്ചത്.
സംസ്ഥാനത്ത് റോഡപകടങ്ങളും ജീവഹാനിയും വര്‍ധിക്കുന്ന സാഹചര്യത്തിലാണു നടപടി. റോഡ് സുരക്ഷയുമായി ബന്ധപ്പെട്ട നിര്‍ദേശങ്ങള്‍ ഏകോപിപ്പിക്കാനുള്ള നോഡല്‍ അഥോറിറ്റിയായി ചീഫ് സെക്രട്ടറിയെ ചുമതലപ്പെടുത്തിയ കോടതി ഉത്തരവുകള്‍ നടപ്പിലാക്കിയതിന്‍റെ ആദ്യ സമഗ്ര റിപ്പോര്‍ട്ട് 75 ദിവസത്തിനകം സമര്‍പ്പിക്കാനും നിര്‍ദേശിച്ചു.
കോടതിയുടെ പ്രധാന നിർദേശങ്ങൾ
പരാതികൾക്ക് ഏകീകൃത ഡിജിറ്റൽ പ്ലാറ്റ്‌ഫോം: തകർന്ന റോഡുകളെക്കുറിച്ച് പൊതുജനങ്ങൾക്ക് പരാതി നൽകാനും സമയബന്ധിതമായി പരിഹരിക്കാനും ഏകീകൃത ഡിജിറ്റൽ സംവിധാനം ഒരുക്കണം. റോഡ് തകരാറുകൾ, കുഴികൾ, അപകടസാധ്യതാ മേഖലകൾ (ബ്ലാക്ക് സ്പോട്ടുകൾ) എന്നിവ നിരീക്ഷിക്കാൻ ആറു മാസത്തിനകം ‘ജിഐഎസ്’ അധിഷ്ഠിത ഇന്‍റഗ്രേറ്റഡ് റോഡ് സേഫ്റ്റി മോണിറ്ററിംഗ് പ്ലാറ്റ്‌ഫോം സജ്ജമാക്കണം.
സ്വകാര്യ ബസുകളുടെ സമയക്രമം: അമിതവേഗവും മത്സരയോട്ടവും തടയാൻ 60 ദിവസത്തിനകം ജിപിഎസ് അധിഷ്ഠിത പഠനം നടത്തി ഓട്ടസമയം ശാസ്ത്രീയമായി പുനർനിർണയിക്കണം.
ഉദ്യോഗസ്ഥർക്ക് വ്യക്തിഗത ഉത്തരവാദിത്വം: പൊതുമരാമത്ത്, തദ്ദേശ റോഡുകളിൽ ഉദ്യോഗസ്ഥരുടെ പ്രതിമാസ പരിശോധന നിർബന്ധമാക്കണം. കുഴികളും തകരാറുകളും പരിഹരിക്കുന്നതിൽ വീഴ്ച വരുത്തിയാൽ അതത് എൻജിനിയർമാർക്ക് വ്യക്തിഗത ഉത്തരവാദിത്വമുണ്ടായിരിക്കും.
സേവന ലൈസൻസുകൾക്ക് കർശന നിയന്ത്രണം: വാട്ടർ അഥോറിറ്റി, കെഎസ്ഇബി തുടങ്ങിയ ഏജൻസികൾ റോഡ് അഥോറിറ്റിയുടെ രേഖാമൂലമുള്ള മുൻകൂർ അനുമതിയില്ലാതെ റോഡുകൾ വെട്ടിപ്പൊളിക്കാൻ പാടില്ല.
ബ്ലാക്ക് സ്പോട്ടുകളിൽ സുരക്ഷ: അപകടസാധ്യതാ മേഖലകൾ കണ്ടെത്തി നാലു മാസത്തിനകം എൽഇഡി ലൈറ്റുകൾ, എഐ കാമറകൾ, മുന്നറിയിപ്പ് ബോർഡുകൾ എന്നിവ സ്ഥാപിക്കണം.
അടിയന്തര വൈദ്യസഹായം: സംസ്ഥാന പാതകളിൽ ഓരോ 30 കിലോമീറ്ററിലും ‘ബേസിക് ലൈഫ് സപ്പോർട്ട്’ ആംബുലൻസുകൾ സജ്ജമാക്കണം.
ഡ്രൈവർ പ്രൊഫൈലിംഗ്: പൊതുവാഹന ഡ്രൈവർമാർക്കായി കേന്ദ്രീകൃത പ്രൊഫൈലിംഗ് സംവിധാനം നടപ്പാക്കണം.
ഞെട്ടിക്കുന്ന അപകടക്കണക്കുകൾ
2025 ജനുവരി മുതല്‍ 2026 ജൂലൈ വരെ 19 മാസത്തിനിടെ 6000 വാഹനാപകട മരണങ്ങളാണ് സംസ്ഥാനത്തുണ്ടായതെന്ന് കോടതി ചൂണ്ടിക്കാട്ടി.
2025 ല് 49,889 അപകടങ്ങളില്‍ 3,733 പേര് മരിച്ചു. 56,922 പേര്‍ക്ക് പരിക്കേറ്റു. 2026 ജൂലൈ വരെ 2319 പേർ മരിക്കുകയും 36,116 പേർക്കു പരിക്കേൽക്കുകയും ചെയ്തു. 2025 വരെ സംസ്ഥാനത്തു രജിസ്റ്റര്‍ ചെയ്ത വാഹനങ്ങളുടെ എണ്ണം 1.89 കോടിയാണ്. 1000 പേര്‍ക്ക് 425 വാഹനങ്ങള്‍ എന്നതാണ് അനുപാതം.
അമിതവേഗമാണ് അപകടങ്ങളുടെ മുഖ്യകാരണം. മരിച്ചവരില്‍ 60.5 ശതമാനവും 18 നും 45 നും ഇടയില്‍ പ്രായമുള്ളവരാണ്. നാറ്റ്പാക് തയാറാക്കിയ റോഡ് സുരക്ഷാ കര്‍മപദ്ധതി പ്രകാരം ദേശീയ, സംസ്ഥാന പാതകളടക്കം സംസ്ഥാനത്ത് അപകടസാധ്യതയുള്ള 2200 കിലോമീറ്റര്‍ റോഡാണുള്ളതെന്നും കോടതി ചൂണ്ടിക്കാട്ടി.
Kerala
കൊച്ചി: കേരള ഹൈക്കോടതി വളപ്പില്‍ ഫോട്ടോയെടുക്കുന്നതിനും വീഡിയോ റിക്കാര്‍ഡിംഗിനും ലൈവ് സ്ട്രീമിംഗിനും പൂര്‍ണ നിരോധനം ഏര്‍പ്പെടുത്തി.
അഭിഭാഷകര്‍, കക്ഷികള്‍, ഇന്‍റേണ്‍സ്, അഭിഭാഷകരുടെ ക്ലര്‍ക്കുമാര്‍, രജിസ്ട്രി ഉദ്യോഗസ്ഥര്‍, സര്‍ക്കാര്‍ ഉദ്യോഗസ്ഥര്‍, മാധ്യമ പ്രവര്‍ത്തകര്‍, കരാറുകാര്‍, സന്ദര്‍ശകര്‍ തുടങ്ങി ഹൈക്കോടതിവളപ്പില്‍ പ്രവേശിക്കുന്നവര്‍ക്കെല്ലാം നിയന്ത്രണം ബാധകമാണെന്ന് രജിസ്ട്രാര്‍ ജനറലിന്‍റെ ഉത്തരവില്‍ പറയുന്നു.
കോടതി ഹാളുകള്‍കത്തും ജഡ്ജിമാരുടെ ചേംബറിലും രജിസ്ട്രി ഓഫിസുകള്‍, സെക്‌ഷനുകള്‍, റെക്കോര്‍ഡ് റൂമുകള്‍, സെക്യൂരിറ്റി കണ്ട്രോള് റൂമുകള്‍, സെര്‍വര്‍ റൂമുകള്‍ എന്നിവിടങ്ങളിലും ഔദ്യോഗിക ആവശ്യത്തിനല്ലാതെ ഫോട്ടോ, വീഡിയോ പാടില്ല. ഔദ്യോഗിക ആവശ്യത്തിനുള്ള ഫോട്ടോയും വീഡിയോയും രജിസ്ട്രി അധികാരപ്പെടുത്തുന്ന വ്യക്തികള്‍ക്കോ ഏജന്‍സികള്‍ക്കോ മാത്രമേ എടുക്കാന്‍ അനുവാദമുണ്ടാകൂ.
രജിസ്ട്രാര്‍ ജനറലിന്‍റെ അനുമതിയില്ലാതെ അവ പുറത്തുവിടാനും പാടില്ല. കോടതി വളപ്പില്‍നിന്നെടുത്ത ഫോട്ടോയോ വീഡിയോയോ ലൈവ് സ്ട്രീമോ രജിസ്ട്രാര്‍ ജനറലിന്‍റെ അനുമതിയില്ലാതെ സമൂഹമാധ്യമങ്ങളിലോ ഡിജിറ്റല്‍, ഇലക‌്ട്രോണിക് മീഡിയയിലോ അപ്‌ലോഡ് ചെയ്യാനോ പ്രസിദ്ധീകരിക്കാനോ പ്രചരിപ്പിക്കാനോ പാടില്ല. രജിസ്ട്രാര്‍ ജനറലിന്‍റെ പ്രത്യേക അനുമതിയോടെ മാത്രമേ ഔദ്യോഗിക ചടങ്ങുകളടക്കം പരിപാടികള്‍ മാധ്യമങ്ങള്‍ക്ക് കവര്‍ ചെയ്യാനാകൂ.
കോടതിനടപടികളുടെ ഫോട്ടോയെടുക്കാനും വീഡിയോ റിക്കാര്‍ഡ് ചെയ്യാനും ലൈവ് ചെയ്യാനും ചീഫ് ജസ്റ്റീസിന്‍റെ അനുമതി വേണം. ഓഡിറ്റോറിയം, ബാങ്ക്വറ്റ് ഹാള്‍, ആട്രിയം തുടങ്ങി സ്ഥലങ്ങളില്‍ പരിപാടികള്‍ നടത്തുമ്പോഴാണ് അനുമതിയോടെ ഫോട്ടോയെടുക്കാനും മറ്റും സാധ്യമാകുക. അനധികൃത ഫോട്ടോയെടുപ്പ് തടയാന്‍ രജിസ്ട്രി ഉദ്യോഗസ്ഥര്ക്കും സെക്യൂരിറ്റി വിഭാഗത്തിനും അധികാരമുണ്ടായിരിക്കുമെന്നും ഉത്തരവില്‍ പറയുന്നു.
Kerala
കൊച്ചി: വിചാരണപോലും തടസപ്പെടുത്തുന്ന സ്ഥിതിവിശേഷമുള്ളതിനാല്‍ അഴിമതി തടയല്‍ നിയമത്തിന്‍റെ ലക്ഷ്യം പരാജയപ്പെടുന്നതായി ഹൈക്കോടതി. അഴിമതി തടയല്‍ നിയമപ്രകാരം കോടതി ശിക്ഷിച്ചാലും അപ്പീലിലൂടെ ജാമ്യം നേടിയശേഷം വാദം കേള്‍ക്കാതെ വര്‍ഷങ്ങളോളം കേസ് നിശ്ചലമാകും. പിന്നീട് പ്രതി മരിക്കുന്നതോടെ കേസും തീരും. ഹൈക്കോടതി രേഖകളുടെ അടിസ്ഥാനത്തിലാണ് ഇതു പറയുന്നതെന്നും ജസ്റ്റീസ് എ. ബദറുദ്ദീന്‍ വ്യക്തമാക്കി.
അനധികൃത സ്വത്തുസമ്പാദനക്കേസില്‍ മുന്‍ ഡിജിപി ടോമിന്‍ ജെ. തച്ചങ്കരിക്കെതിരായ ശിക്ഷ മരവിപ്പിച്ചു ജാമ്യം അനുവദിക്കണമെന്ന ആവശ്യത്തില്‍ വാദം കേള്‍ക്കുമ്പോഴാണ് കോടതിയുടെ വാക്കാല്‍ നിരീക്ഷണമുണ്ടായത്.
പരിതാപകരമായ ഈ സാഹചര്യം മൂലം നിയമത്തിന്‍റെ യഥാര്‍ഥ ലക്ഷ്യമാണ് ഇല്ലാതാകുന്നതെന്നും അഴിമതി തടയല്‍ നിയമം കര്‍ശനമായി നടപ്പാക്കിയാലേ ജനങ്ങള്‍ക്കു വിശ്വാസമുണ്ടാകൂവെന്നും കോടതി പറഞ്ഞു. തുടര്‍ന്ന് ഇടക്കാല ജാമ്യം സംബന്ധിച്ച ആവശ്യത്തില്‍ ഉത്തരവിനായി ഹര്‍ജി മാറ്റി.
അനധികൃത സ്വത്തുസമ്പാദന കേസില്‍ കോട്ടയം വിജിലന്‍സ് കോടതി തച്ചങ്കരിയെ നാലുവര്‍ഷം തടവിനും 30 ലക്ഷത്തോളം രൂപ പിഴ അടയ്ക്കാനുമാണ് ശിക്ഷ വിധിച്ചത്. തെറ്റായ കണ്ടെത്തലിന്‍റെ അടിസ്ഥാനത്തിലും വസ്തുതകള്‍ വേണ്ട വിധം പരിഗണിക്കാതെയുമാണ് വിജിലന്‍സ് കോടതി ശിക്ഷിച്ചതെന്നാണു ഹര്‍ജിക്കാരന്‍റെ വാദം. എന്നാല്‍ ശിക്ഷ മരവിപ്പിക്കുന്നതിനെ സര്‍ക്കാര്‍ ശക്തമായി എതിര്‍ത്തു. ശിക്ഷ മരവിപ്പിക്കുന്നത് സ്വാഭാവിക നടപടിയല്ലെന്ന് കോടതിയും അഭിപ്രായപ്പെട്ടു.
Kerala
കൊച്ചി: ശബരിമലയിലെ ആടിയശിഷ്‌ടം നെയ്യ് ക്രമക്കേടില്‍ വിജിലന്‍സ് പ്രതി ചേര്‍ത്തിരുന്ന ദേവസ്വം ഉദ്യോഗസ്ഥരടക്കം 42 പേര്‍ക്കെതിരായ ക്രിമിനല്‍ നടപടി ഒഴിവാക്കാന്‍ ഹൈക്കോടതിയുടെ അനുമതി.
ക്രമക്കേടില്‍ വ്യക്തിപരമായി ആര്‍ക്കെതിരേയും ക്രിമിനല്‍ നടപടി സ്വീകരിക്കാനാകില്ലെന്നും അതിനാല്‍ ഉത്തരവാദിത്വം ആര്‍ക്കാണെന്നു കണ്ടെത്താനായിട്ടില്ലെന്നും വ്യക്തമാക്കി വിജിലന്‍സ് റിപ്പോര്‍ട്ട് നല്‍കിയ സാഹചര്യത്തിലാണ് ജസ്റ്റീസുമാരായ വി. രാജ വിജയരാഘവന്‍, കെ.വി. ജയകുമാര്‍ എന്നിവരടങ്ങുന്ന ദേവസ്വം ബെഞ്ചിന്‍റെ അനുമതി.
മനഃപൂര്‍വം പണം തട്ടിയെടുക്കാന്‍ ഗൂഢാലോചന നടത്തിയതിനു നിലവില്‍ തെളിവുകളില്ലെന്നും റിപ്പോര്‍ട്ടില്‍ പറയുന്നു.
നെയ്യ് സംഭരണം, വിതരണം എന്നിവയില്‍ മേല്‍നോട്ടക്കുറവും ജീവനക്കാരുടെ ഭാഗത്തുനിന്ന് അശ്രദ്ധയുമുണ്ടായതാണ് നഷ്‌ടമുണ്ടാകാന്‍ കാരണമായത്. 2025 നവംബര്‍ 17 മുതല്‍ ഡിസംബര്‍ 27 വരെയുള്ള മണ്ഡലകാലയളവില്‍ ആടിയ ശിഷ്‌ടം നെയ്യ് വില്പനയില്‍ 17.14 ലക്ഷം രൂപയുടെ നഷ്‌ടം ദേവസ്വം ബോര്‍ഡിന് ഉണ്ടായതായാണു വിജിലന്‍സ് പ്രത്യേകസംഘം കണ്ടെത്തിയത്.
നെയ്യ് വിതരണത്തിനു നിയോഗിച്ച 39 ഉദ്യോഗസ്ഥരില് 20 പേര് 2025 നവംബറില്‍ മാത്രം ജോലിയില്‍ പ്രവേശിച്ചവരായിരുന്നു. ലാസ്റ്റ് ഗ്രേഡ് തസ്തികയില്‍ ജോലിയില്‍ പ്രവേശിച്ചവരാണ് സ്ഥാനക്കയറ്റത്തിലൂടെ പിന്നീട് മാനേജീരിയല്‍ തസ്തികയില്‍ പ്രവര്‍ത്തിക്കുന്നതെന്നും വിജിലന്‍സ് ചൂണ്ടിക്കാട്ടി.
റിപ്പോര്‍ട്ടിന്‍റെ അടിസ്ഥാനത്തില്‍ കുറ്റാരോപിതരായ ജീവനക്കാര്‍ക്കെതിരേ വകുപ്പുതല അച്ചടക്ക നടപടി സ്വീകരിക്കാനും ദേവസ്വംബെഞ്ച് തിരുവിതാംകൂര്‍ ദേവസ്വം ബോര്‍ഡിന് അനുമതി നല്‍കി.
മതിയായ യോഗ്യതയും പരിശീലനവും ലഭിച്ച ഉദ്യോഗസ്ഥരെ കരാറടിസ്ഥാനത്തിലെങ്കിലും ഉയര്‍ന്ന തസ്തികകളില്‍ നിയമിക്കുന്നത് പരിഗണിക്കണമെന്ന് കോടതി നിര്‍ദേശിച്ചു. തുടര്‍ന്ന് ഹര്‍ജി ഒക്ടോബര്‍ 23ന് പരിഗണിക്കാന്‍ മാറ്റി.
പ്രവര്‍ത്തനരേഖ മൂന്നാഴ്ചയ്ക്കകം സമര്‍പ്പിക്കാനും ദേവസ്വംബെഞ്ച് ഉത്തരവിട്ടു.
Kerala
കൊച്ചി: കശുവണ്ടി കോര്‍പറേഷന്‍ അഴിമതിക്കേസില്‍ പ്രോസിക്യൂഷന് നടപടികള്‍ക്ക് അനുമതി നല്‍കിയ സിംഗിള്‍ ബെഞ്ച് ഉത്തരവിനെതിരായ അപ്പീലുകള്‍ ഹൈക്കോടതി 28ന് പരിഗണിക്കാന്‍ മാറ്റി.
കോടതിയലക്ഷ്യ ഹര്‍ജിയിലെ ഉത്തരവിനെത്തുടര്‍ന്ന് സര്‍ക്കാര്‍ പ്രോസിക്യൂഷന് അനുമതി നല്‍കിയതു തെറ്റാണെന്ന വാദമുയര്‍ത്തി മുഖ്യപ്രതികളായ ആര്‍. ചന്ദ്രശേഖരനും കെ.എ. രതീഷുമാണ് ഡിവിഷന്‍ ബെഞ്ചില്‍ അപ്പീലുകള്‍ സമര്‍പ്പിച്ചിട്ടുള്ളത്.
സിംഗിള്‍ ബെഞ്ചിന്‍റെ ഇടക്കാല ഉത്തരവ് ഡിവിഷന്‍ ബെഞ്ച് നേരത്തേ സ്റ്റേ ചെയ്തിരുന്നു.
National
ന്യൂഡൽഹി: കേരളമുൾപ്പടെ വിവിധ ഹൈക്കോടതികളിലായി 12 അഡീഷണൽ ജഡ്ജിമാരെ സ്ഥിരം ജഡ്ജിമാരായി നിയമിക്കാൻ സുപ്രീംകോടതി കൊളീജിയം കേന്ദ്രസർക്കാരിന് ശിപാർശ ചെയ്തു.
കേരള ഹൈക്കോടതിയിലെ അഡീഷണൽ ജഡ്ജിമാരായ പി. കൃഷണ കുമാർ, കെ.വി. ജയകുമാർ, എസ്. മുരളീ കൃഷണ, ജോബിൻ സെബാസ്റ്റ്യൻ, പി.വി. ബാലകൃഷ്ണൻ തുടങ്ങി അഞ്ചുപേരെയാണ് സ്ഥിരം ജഡ്ജിമാരായി നിയമിക്കാൻ ശിപാർശ ചെയ്തത്.
ആന്ധ്രപ്രദേശ് ഹൈക്കോടതിയിൽനിന്ന് അഞ്ചുപേരെയും ഉത്തരാഖണ്ഡ്, ഗോഹട്ടി ഹൈക്കോടതികളിൽനിന്ന് ഓരോരുത്തരെ വീതവും ശിപാർശ ചെയ്തിട്ടുണ്ട്.
ചീഫ് ജസ്റ്റീസ് സൂര്യകാന്തിന്‍റെ അധ്യക്ഷതയിൽ ബുധനാഴ്ച ചേർന്ന സുപ്രീംകോടതി കൊളീജിയത്തിന്‍റേതാണ് തീരുമാനം.
Kerala
കൊച്ചി: പാസ്‌പോര്‍ട്ടില്‍നിന്നു ജീവിതപങ്കാളിയുടെ പേര് നീക്കാന്‍ വിവാഹമോചന ഉത്തരവ് ഹാജരാക്കേണ്ടതില്ലെന്നു ഹൈക്കോടതി.
പാസ്‌പോര്‍ട്ട് ചട്ടത്തില്‍ ഇത്തരത്തിലൊരു നിര്‍ദേശമില്ലെന്ന് വിലയിരുത്തിയാണ് ത്വലാഖ് വഴി വിവാഹമോചനം നേടിയ തൃശൂര്‍ സ്വദേശിനിയായ ഇരുപത്തിയെട്ടുകാരിയുടെ ഹര്‍ജിയില്‍ ജസ്റ്റീസ് മുരളി പുരുഷോത്തമന്‍ ഉത്തരവിട്ടത്.
മുന്‍ ഭര്‍ത്താവിന്‍റെ പേര് നീക്കാന്‍ കോടതിയില്‍നിന്നുള്ള വിവാഹമോചന ഉത്തരവ് ഹാജരാക്കണമെന്ന പാസ്‌പോര്‍ട്ട് അധികൃതരുടെ നിര്‍ദേശം ചോദ്യം ചെയ്തായിരുന്നു ഹര്‍ജി.
പങ്കാളിയുടെ പേര് നീക്കാന്‍ കോടതി ഉത്തരവ് ആവശ്യമാണെന്നതു സംബന്ധിച്ച് 2024ല് ഓഫിസ് മെമ്മോറാണ്ടം പുറപ്പെടുവിച്ചിട്ടുണ്ടെന്നായിരുന്നു കേന്ദ്രസര്‍ക്കാരിന്‍റെ വാദം.
എന്നാൽ, പാസ്‌പോര്‍ട്ട് ചട്ടത്തില്‍ ഇത്തരമൊരു നിര്‍ദേശമില്ലെന്നത് കോടതി ചൂണ്ടിക്കാട്ടി. ഹര്‍ജിക്കാരിയുടെ അപേക്ഷ വീണ്ടും പരിഗണിച്ച് ഉചിതമായ ഉത്തരവ് പുറപ്പെടുവിക്കാന്‍ പാസ്‌പോര്‍ട്ട് അഥോറിറ്റിക്കു കോടതി നിര്‍ദേശം നല്‍കി.
Kerala
കൊച്ചി: കേരള വെയര്‍ഹൗസിംഗ് കോര്‍പറേഷനില്‍നിന്നു വിരമിച്ചവരുടെ പരിഷ്‌കരിച്ച പെന്‍ഷന്‍ ആനുകൂല്യങ്ങള്‍ മുന്‍ഗണനാക്രമത്തില്‍ വിതരണം ചെയ്യണമെന്ന ഉത്തരവ് അധികൃതര്‍ മനഃപൂര്‍വം അവഗണിക്കാന്‍ ശ്രമിക്കുകയാണെന്ന് ഹൈക്കോടതി.
സര്‍ക്കാര്‍ അനുമതി ലഭിച്ചാല്‍ മാത്രമേ ഉത്തരവ് നടപ്പാക്കാനാകൂവെന്നു വ്യക്തമാക്കി കോര്‍പറേഷന്‍ മാനേജിംഗ് ഡയറക്ടര് തോമസ് സാമുവല്‍ നല്‍കിയ സത്യവാങ്മൂലം തള്ളിയാണ് ജസ്റ്റീസ് ദേവന്‍ രാമചന്ദ്രന്‍, ജസ്റ്റീസ് ബസന്ത് ബാലാജി എന്നിവരടങ്ങുന്ന ഡിവിഷന്‍ ബെഞ്ചിന്‍റെ നിരീക്ഷണം.
ഈ വിശദീകരണം വിശ്വാസത്തിലെടുക്കാനാകില്ലെന്ന് വ്യക്തമാക്കിയാണ് സത്യവാങ്മൂലം തള്ളിയത്. ഉത്തരവ് നടപ്പാക്കാത്തതില്‍ കടുത്ത അതൃപതി രേഖപ്പെടുത്തിയ കോടതി ഒക്ടോബര്‍ ആറിന് കേസ് വീണ്ടും പരിഗണിക്കുമ്പോള്‍ എംഡി നേരിട്ട് ഹാജരാകാനും നിര്‍ദേശം നല്‍കി.
വെയര്‍ഹൗസിംഗ് കോര്‍പറേഷന്‍ പെന്‍ഷനേഴ്‌സ് അസോസിയേഷനടക്കം നല്‍കിയ കോടതിയലക്ഷ്യ ഹര്‍ജികളാണ് കോടതിയുടെ പരിഗണനയിലുള്ളത്.
Kerala
കൊച്ചി: സംസ്ഥാന പ്ലാനിംഗ് ബോര്‍ഡ് ചീഫ് തസ്തികയിലേക്കുള്ള നിയമന ക്രമക്കേടുമായി ബന്ധപ്പെട്ട പരാതിയിന്‍മേലുള്ള ക്രൈംബ്രാഞ്ച് അന്വേഷണ ഉത്തരവും ഇതിന്‍റെ അടിസ്ഥാനത്തിലുള്ള എഫ്‌ഐആറും റദ്ദാക്കണമെന്നാവശ്യപ്പെട്ട് പിഎസ്‌സി ഹൈക്കോടതിയില്‍.
പിഎസ്‌സി അംഗങ്ങള്‍ക്കും ജീവനക്കാര്‍ക്കുമെതിരേ അന്വേഷണത്തിന് ഉത്തരവിടാന്‍ സര്‍ക്കാരിന് അധികാരമില്ലെന്നു ചൂണ്ടിക്കാട്ടിയാണു ഹര്‍ജി.
ക്രൈംബ്രാഞ്ച് രജിസ്റ്റര്‍ ചെയ്ത എഫ്‌ഐആറില്‍ കുറ്റകൃത്യത്തിന്‍റെ വിശദാംശങ്ങള്‍ വ്യക്തമാക്കിയിട്ടില്ലെന്നു ഹര്‍ജിയില്‍ പറയുന്നു. നിയമനവുമായി ബന്ധപ്പെട്ട് ചില ചോദ്യങ്ങളുടെ മൂല്യനിര്‍ണയം നടത്താതെ പോയത് മനഃപൂര്‍വമല്ല.
അംഗങ്ങളടക്കമുള്ളവര്‍ക്കു ചോദ്യംചെയ്യലിനു ഹാജരാകാന്‍ നോട്ടീസ് നല്‍കിയിട്ടുണ്ട്. ഹര്‍ജി തീര്‍പ്പാകുംവരെ അന്വേഷണം സ്റ്റേ ചെയ്യണമെന്ന ഇടക്കാല ആവശ്യവും ഉന്നയിച്ചിട്ടുണ്ട്.
Kerala
കൊച്ചി: നിക്ഷേപകരുടെ പണം തിരിച്ചുപിടിക്കുന്നതിനായി സ്വത്തുക്കള്‍ കണ്ടുകെട്ടാനുള്ള കോടതി ഉത്തരവ് നടപ്പാക്കാത്തതില്‍ കോടതിയലക്ഷ്യത്തിന്‍റെ ഭാഗമായി ആഭ്യന്തര സെക്രട്ടറിക്ക് ഹൈക്കോടതിയുടെ വാറന്‍റ്.
തിരുവനന്തപുരം സിറ്റി പൊലിസ് കമ്മിഷണര്‍ മുഖേന വാറന്‍റ് നടപ്പാക്കാന്‍ ജസ്റ്റീസ് എം.എ. അബ്ദുല്‍ ഹക്കീം രജിസ്ട്രിക്കു നിര്‍ദേശം നല്‍കി.
കേസ് അടുത്ത തവണ പരിഗണിക്കുന്ന 28ന് ആഭ്യന്തര സെക്രട്ടറി നേരിട്ട് ഹാജരായി വിശദീകരണം നല്‍കാനും നിര്‍ദേശിച്ചു. അഞ്ചു ലക്ഷം രൂപയുടെ ബോണ്ടില്‍ ഉദ്യോഗസ്ഥനു ജാമ്യം അനുവദിക്കാമെന്നും ഉത്തരവില്‍ പറയുന്നു.
കേരളം, തമിഴ്‌നാട്, കര്‍ണാടക തുടങ്ങിയ സംസ്ഥാനങ്ങളിലായി കോടിക്കണക്കിനു രൂപയുടെ തട്ടിപ്പ് നടത്തിയ യൂണിവേഴ്‌സല്‍ ട്രേഡിംഗ് സൊലൂഷന്‍സില്‍ പണം നിക്ഷേപിച്ച് വഞ്ചിതരായവര്‍ നല്‍കിയ ഹര്‍ജിയാണ് കോടതി പരിഗണിച്ചത്. കമ്പനിയുടെ ബാങ്ക് അക്കൗണ്ടുകള്‍ ബഡ്‌സ് ആക്ട് പ്രകാരം കണ്ടുകെട്ടാന്‍ മാര്‍ച്ച് മൂന്നിനു കോടതി ഉത്തരവിട്ടിരുന്നു.
എന്നാല്‍, ആറു മാസം പിന്നിട്ടിട്ടും ഉത്തരവ് നടപ്പാക്കുകയോ റിപ്പോര്‍ട്ട് സമര്‍പ്പിക്കുകയോ ചെയ്യാത്തതിനെത്തുടര്‍ന്ന് ഉത്തരവ് നടപ്പാക്കാത്തപക്ഷം നേരിട്ട് ഹാജരാകാന്‍ ബഡ്‌സ് ആക്ട് നടപടികളുടെ ചുമതലയുള്ള ആഭ്യന്തര സെക്രട്ടറിക്ക് കോടതി നിര്‍ദേശം നല്‍കിയിരുന്നു. ഇതു പാലിക്കപ്പെടാത്ത സാഹചര്യത്തിലാണു കോടതി സ്വമേധയാ കോടതിയലക്ഷ്യ നടപടി സ്വീകരിച്ചത്.
Kerala
കൊച്ചി: വാഹന മോഡിഫിക്കേഷനെതിരെ രൂക്ഷവിമർശനവുമായി ഹൈക്കോടതി. ജനങ്ങളുടെ സുരക്ഷ ഉറപ്പാക്കാതെയാണ് സംസ്ഥാനത്ത് പല കാര്യങ്ങളും ചെയ്യുന്നതെന്ന് ഹൈക്കോടതി ഡിവിഷൻ ബഞ്ച് വിമർശിച്ചു.
ദേശീയപാതയിലെ തുടർച്ചയായ അപകടങ്ങളിലും വാഹന മോഡിഫിക്കേഷനിലെ പ്രശ്നങ്ങളെ തുടർന്നും ഹൈക്കോടതി സ്വമേധയാ രജിസ്റ്റർ ചെയ്ത കേസിലാണ് വിമർശനം. ജനങ്ങളുടെ സുരക്ഷയെ ബാധിക്കുന്ന എല്ലാ കാര്യങ്ങളും സൂക്ഷ്മമായി പരിശോധിക്കണമെന്ന് കോടതി നിർദേശിച്ചു.
ജീപ്പുകളിൽ വലിയ ടയറുകൾ ഘടിപ്പിക്കുന്നത് തുടർച്ചയായ അപകടങ്ങൾക്ക് വഴിവയ്ക്കുന്നുവെന്നും കോടതി നിരീക്ഷിച്ചു. കോട്ടയം, കാസർഗോഡ് ജില്ലകളിലെ അപകടങ്ങൾ ചൂണ്ടിക്കാണിച്ചായിരുന്നു വിമർശനം.
Kerala
കൊച്ചി: ഭര്‍ത്താവ് മരിക്കുന്നതിനുമുമ്പ് ശീതീകരിച്ചു സൂക്ഷിച്ച ബീജം ഉപയോഗിച്ച് ഗര്‍ഭധാരണം നടത്താന്‍ യുവതിക്ക് അനുമതി നല്‍കി ഹൈക്കോടതി.
2021 മാര്‍ച്ചില്‍ ഭര്‍ത്താവ് മരിച്ചതിനെത്തുടര്‍ന്ന് വന്ധ്യതാ ചികിത്സയുടെ ഭാഗമായി ശീതീകരിച്ചു സൂക്ഷിച്ചിരുന്ന ഭ്രൂണം കൃത്രിമ ഗര്‍ഭധാരണത്തിനു കൈമാറാന്‍ വിസമ്മതിച്ച തിരുവനന്തപുരം എസ്എടി ആശുപത്രിയുടെ നടപടി ചോദ്യം ചെയ്തു ആലപ്പുഴ ചെറിയനാട് സ്വദേശിനിയായ 43കാരി നല്‍കിയ ഹര്‍ജി പരിഗണിച്ചാണ് ജസ്റ്റീസ് ഹരിശങ്കര്‍ വി. മേനോന്‍റെ ഉത്തരവ്.
അസിസ്റ്റഡ് റീപ്രൊഡക്ടീവ് ടെക്‌നോളജി (റെഗുലേഷന്‍) ആക്ട് പ്രകാരം ഭര്‍ത്താവിന്‍റെ രേഖാമൂലമുള്ള പ്രത്യേക അനുമതിയില്ലാതെ ഭ്രൂണം ഉപയോഗിക്കാന്‍ കഴിയില്ലെന്നായിരുന്നു ആശുപത്രിയുടെ വാദം. ഭ്രൂണം ശീതീകരിച്ച് സൂക്ഷിക്കുമ്പോള്‍, ദമ്പതികള്‍ക്ക് തങ്ങളുടെ മരണശേഷം അതെങ്ങനെ ഉപയോഗിക്കണമെന്നു രേഖപ്പെടുത്താന്‍ മൂന്ന് ഓപ്ഷനുകളുണ്ട്.
ജീവിച്ചിരിക്കുന്ന പങ്കാളിക്ക് കൈമാറുക, ഗവേഷണ ആവശ്യത്തിന് ഉപയോഗിക്കുക, നശിക്കാന്‍ അനുവദിക്കുക എന്നിവയാണ് ഓപ്ഷനുകള്‍. ദമ്പതികള്‍ പൂരിപ്പിച്ചു നല്‍കേണ്ട നിശ്ചിത അപേക്ഷയല്ല ആശുപത്രി അധികൃതര്‍ നല്‍കിയതെന്നും അവരുടെ വീഴ്ചയ്ക്കു തന്നെ ഇരയാക്കരുതെന്നും അവര്‍ വാദിച്ചു.
ഭര്‍ത്താവിന്‍റെ രേഖാമൂലമുള്ള അനുമതിയില്ലാതെ മരണശേഷം ഭ്രൂണം ഉപയോഗിക്കാന്‍ അനുവദിക്കുന്നത് നിയമപരവും ധാര്‍മികവുമായി സങ്കീര്‍ണതകൾ ഉണ്ടാക്കുമെന്നതിനു പുറമെ സ്വത്ത് കൈമാറ്റവുമായി ബന്ധപ്പെട്ട തര്‍ക്കങ്ങള്‍ക്കു കാരണമാകുമെന്നായിരുന്നു കേന്ദ്ര സര്‍ക്കാരിന്‍റെ വാദം.
ബീജം ഉപയോഗിക്കണമെന്നായിരുന്നു ഭര്‍ത്താവിന്‍റെ യഥാര്‍ഥ ഉദ്ദേശ്യമെന്നും അമ്മയാകാനുള്ള യുവതിയുടെ ആഗ്രഹത്തിന് മുന്‍തൂക്കം നല്‍കേണ്ടതുണ്ടെന്നും വ്യക്തമാക്കിയ കോടതി തുടര്‍ന്ന് ആവശ്യം അനുവദിക്കുകയായിരുന്നു.
Kerala
കൊച്ചി: ടിവി പരിപാടിക്കിടയിലെ പരാമർശവുമായി ബന്ധപ്പെട്ട് സൈബർ ആക്രമണവും വധഭീഷണിയും നേരിടുന്നുവെന്ന പരാതിയിൽ ബിഗ് ടിവി സീനിയർ കോ ഓർഡിനേറ്റിംഗ് എഡിറ്റർ അപർണ കുറുപ്പിന് പൊലിസ് സംരക്ഷണം നൽകാൻ ഹൈക്കോടതി ഉത്തരവിട്ടു.
താമസസ്ഥലത്തും പരിസരപ്രദേശങ്ങളിലും ക്രമസമാധാനം ഉറപ്പുവരുത്താൻ കൊച്ചി സിറ്റി പൊലിസ് കമ്മിഷണർക്കു ജസ്റ്റീസ് ബെച്ചു കുര്യൻ തോമസ് നിർദേശം നൽകി. ഹർജി തീർപ്പാക്കുന്നതുവരെ സംരക്ഷണം തുടരാനാണു നിർദേശം.
മുസ്‌ലിം സ്ത്രീകളുമായി ബന്ധപ്പെട്ട് കാന്തപുരം എ.പി. അബൂബക്കർ മുസ്‌ല്യാർ നടത്തിയ പരാമർശങ്ങളുടെ അടിസ്ഥാനത്തിൽ നടത്തിയ ടിവി പരിപാടിക്കു പിന്നാലെയുള്ള സാഹചര്യം ചൂണ്ടിക്കാട്ടി അപർണ നൽകിയ ഹർജിയാണു കോടതി പരിഗണിച്ചത്. കോടതി ഒക്‌ടോബർ 26ന് കേസ് പരിഗണിക്കാനായി മാറ്റി.
Kerala
കൊച്ചി: തൊട്ടാല്‍ പൊള്ളുമെന്ന് പേടിയുള്ള കേസുകള്‍ തെക്കുവടക്ക് തട്ടിക്കളിക്കുന്നതാണു സ്ഥിതിയെന്ന് ഹൈക്കോടതി.
കേസുകള്‍ ചിലര്‍ക്കെതിരേയാകുമ്പോള്‍ തീരുമാനം വേഗത്തിലും മറ്റുചിലരുടെ കാര്യത്തില്‍ തീരുമാനങ്ങളില്ലാത്ത രീതിയിലുമായിരിക്കും. കൈകളില്‍ ചങ്ങലക്കെട്ടില്ലാത്തതിനാല്‍ കോടതിക്ക് ഇത് അനുവദിക്കാനാകില്ലെന്നും ജസ്റ്റീസ് എ. ബദറുദ്ദീന്‍ പറഞ്ഞു.
എസ്എന്‍ഡിപി മൈക്രോ ഫിനാന്‍സ് തട്ടിപ്പുകേസില്‍ പ്രോസിക്യൂഷന് അനുമതിയുമായി ബന്ധപ്പെട്ട ഫയലുകള്‍ തനിക്ക് വ്യാഴാഴ്ചയാണു ലഭിച്ചതെന്ന് പിന്നാക്ക വിഭാഗ വികസന അഡീ. ചീഫ് സെക്രട്ടറി വീണ എന്‍. മാധവന്‍ അറിയിച്ചതിനെത്തുടര്‍ന്നാണ് കോടതി ഈ നിരീക്ഷണം നടത്തിയത്.
പ്രോസിക്യൂഷന് അനുമതിയുടെ കാര്യത്തില്‍ 18നകം തീരുമാനമെടുക്കാന്‍ അഡീ. ചീഫ് സെക്രട്ടറിക്കു നിര്‍ദേശം നല്‍കിയ കോടതി അതിനകം തീരുമാനമുണ്ടായില്ലെങ്കില്‍ വിശദീകരണം നല്‍കാന്‍ അന്നേദിവസം വീണ്ടും നേരിട്ടു ഹാജരാകണമെന്നും നിര്‍ദേശിച്ചു.
ഈമാസം പത്തിനകം പ്രോസിക്യൂഷന് അനുമതി കാര്യത്തില്‍ തീരുമാനമെടുക്കണമെന്ന ഓഗസ്റ്റ് 14ലെ ഉത്തരവ് പാലിക്കാത്ത സാഹചര്യത്തില്‍ വെള്ളിയാഴ്ച സെക്രട്ടറി നേരിട്ടു ഹാജരാകാന്‍ കോടതി വ്യാഴാഴ്ച നിര്‍ദേശിച്ചിരുന്നു.
കേസന്വേഷണം വേഗത്തിലാക്കണമെന്നാവശ്യപ്പെട്ടു പരാതിക്കാരനായ മാരാരിക്കുളം സ്വദേശി എം.എസ്. അനില്‍ നല്‍കിയ ഉപഹര്‍ജിയാണു കോടതിയുടെ പരിഗണനയിലുള്ളത്. കോടതിനിര്‍ദേശം കൈമാറാന്‍ വൈകിയത് തീരുമാനമെടുക്കാതിരിക്കാനുള്ള തന്ത്രമാണെന്ന് അഡീ. ചീഫ് സെക്രട്ടറിയുടെ വിശദീകരണത്തെത്തുടര്‍ന്ന് കോടതി അഭിപ്രായപ്പെട്ടു. പ്രോസിക്യൂഷന് അനുമതിയുടെ കാര്യത്തില്‍ നിയമപരമായ തീരുമാനമെടുക്കാനാണു നിര്‍ദേശിച്ചത്.
ഫയല്‍ എത്തിക്കുന്ന കാര്യത്തില്‍ സര്‍ക്കാര്‍ അഭിഭാഷകനു വീഴ്ചയുണ്ടായതായും കോടതി പറഞ്ഞു. എന്നാല്‍, ഫയല്‍ കൈമാറാന്‍ വിട്ടുപോയതാണെന്നായിരുന്നു വിജിലന്‍സ് അഭിഭാഷകന്‍റെ വിശദീകരണം. തുടര്‍ച്ചയായി ഇത്തരം വീഴ്ചയുണ്ടാകുമ്പോള്‍ കരുതിക്കൂട്ടിയാണെന്നേ കരുതാനാകൂവെന്ന് കോടതി വ്യക്തമാക്കി.
എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍, യോഗം പ്രസിഡന്‍റ് എന്‍. സോമന്‍, മൈക്രോഫിനാന്‍സ് കോ-ഓര്‍ഡിനേറ്റര്‍ കെ.കെ. മഹേശന്‍ എന്നിവര്‍ കെഎസ്ബിസിഡിസി ഉദ്യോഗസ്ഥരുടെ ഒത്താശയോടെ വ്യാജ രേഖകള്‍ ഹാജരാക്കി ക്രമക്കേട് നടത്തിയെന്നാരോപിച്ച് മുന്‍ മുഖ്യമന്ത്രി വി.എസ്.അച്യുതാനന്ദന്‍ നല്‍കിയ പരാതിയിലാണു കേസെടുത്ത് അന്വേഷണം നടക്കുന്നത്.
Kerala
കൊച്ചി: എസ്എന്‍ഡിപി യോഗം മൈക്രോ ഫിനാന്‍സ് തട്ടിപ്പുകേസുമായി ബന്ധപ്പെട്ട് പിന്നാക്ക വികസന അഡീ. ചീഫ് സെക്രട്ടറി നേരിട്ടു ഹാജരാകാന്‍ ഹൈക്കോടതിയുടെ ഉത്തരവ്.
കേസിലെ പ്രോസിക്യൂഷന് അനുമതി തീരുമാനം വൈകുന്നതുമായി ബന്ധപ്പെട്ട് നേരിട്ടു വിശദീകരണം നല്‍കാനാണ് സെക്രട്ടറി ഇന്നു ഹാജരാകാന്‍ ജസ്റ്റീസ് എ. ബദറുദ്ദീന്‍റെ ഉത്തരവ്.
തീരുമാനമെടുക്കാന്‍ സര്‍ക്കാര്‍ രണ്ടാഴ്ചകൂടി സമയം തേടിയെങ്കിലും ഈമാസം പത്തിനകം തീരുമാനം നിര്‍ദേശം നല്‍കിയിട്ട് രണ്ടാഴ്ച പിന്നിട്ടതായി ചൂണ്ടിക്കാട്ടിയ കോടതി ഈ ആവശ്യം നിരസിച്ചു.
Kerala
കൊച്ചി: സൈന്യത്തില്‍ ചേരുന്ന സമയത്ത് ആരോഗ്യപ്രശ്‌നങ്ങളില്ലാത്തയാള്‍ക്കു സര്‍വീസ് കാലയളവിനിടെയുണ്ടാകുന്ന അസുഖങ്ങള്‍ ജോലിയുടെ ഭാഗമായുണ്ടായതായി കണക്കാക്കണമെന്ന് ഹൈക്കോടതി. അല്ലാത്തപക്ഷം അതു തെളിയിക്കേണ്ട ബാധ്യത തൊഴിലുടമയായ സേനയ്ക്കാണ്.
1970ല് സൈന്യത്തില്‍ ചേര്‍ന്നു 2005ല് വിരമിച്ച മലപ്പുറം സ്വദേശിയായ ലഫ്. കേണല്‍ സണ്ണി തോമസിന് ഡിസെബിലിറ്റി പെന്‍ഷന്‍ തുക നല്‍കാനുള്ള ആംഡ് ഫോഴ്‌സ് ട്രൈബ്യൂണലിന്‍റെ വിധി ശരിവച്ചുകൊണ്ടാണ് ജസ്റ്റീസുമാരായ കെ. നടരാജന്‍, ജോണ്‍സണ്‍ ജോണ്‍ എന്നിവരടങ്ങുന്ന ഡിവിഷന്‍ ബെഞ്ചിന്‍റെ നിരീക്ഷണം.
ജോലിയുമായി ബന്ധപ്പെട്ട കഠിനമായ സമ്മര്‍ദം മൂലം ഉയര്‍ന്ന രക്തസമ്മര്‍ദം ബാധിച്ചതായും ഇത് 30 ശതമാനം വൈകല്യമായി കണക്കാക്കാമെന്നും മെഡിക്കല്‍ ബോര്‍ഡ് റിപ്പോര്‍ട്ട് നല്‍കിയെങ്കിലും സൈനിക സേവനവുമായി ബന്ധപ്പെട്ട അസുഖമല്ലെന്നു ചൂണ്ടിക്കാട്ടി അധികൃതര്‍ ഡിസെബിലിറ്റി പെന്‍ഷന്‍ നിഷേധിച്ചു. തുടര്‍ന്നു നല്‍കിയ ഹര്‍ജിയില്‍ വൈകല്യം 50 ശതമാനമായി ഉയര്‍ത്തി നിശ്ചയിക്കാനും വിരമിച്ച തീയതി മുതല്‍ കുടിശിക നല്‍കാനുമാണ് ട്രൈബ്യൂണല്‍ ഉത്തരവിട്ടത്.
നാലു മാസത്തിനകം തുക നല്‍കണമെന്നും അല്ലാത്തപക്ഷം ഒമ്പത് ശതമാനം പലിശയും ചേര്‍ത്തു നല്‍കണമെന്നും നിര്‍ദേശിച്ചിരുന്നു. ട്രൈബ്യൂണല്‍ വിധിക്കെതിരേ കേന്ദ്രസര്‍ക്കാരും കരസേന മേധാവിയുമടക്കം നല്‍കിയ അപ്പീല്‍ ഹര്‍ജിയാണ് ഹൈക്കോടതി പരിഗണിച്ചു തള്ളിയത്.
മെഡിക്കല്‍ ബോര്‍ഡ് നല്‍കിയ അനുകൂല റിപ്പോര്‍ട്ട് മറ്റു തെളിവുകളൊന്നുമില്ലാതെ തള്ളി പെന്‍ഷന്‍ നിഷേധിച്ച സൈനിക അധികൃതരുടെ നടപടിയെ കോടതി വിമര്‍ശിച്ചു. അപ്പീല്‍ നല്‍കാനുള്ള സമയപരിധി കഴിഞ്ഞാണ് അധികൃതര്‍ കോടതിയെ സമീപിച്ചതെന്നും ചൂണ്ടിക്കാട്ടി.
Kerala
കൊച്ചി: സ്വര്‍ണക്കടത്തു കേസില്‍ കസ്റ്റംസ് ഉദ്യോഗസ്ഥരടക്കമുള്ള പ്രതികളുടെ വിടുതല്‍ ഹര്‍ജികള്‍ തള്ളിയ എറണാകുളം സിബിഐ കോടതി ഉത്തരവ് ഹൈക്കോടതി ശരിവച്ചു.
2013 ല് കൊച്ചി വിമാനത്താവളം വഴി 56 കിലോ സ്വര്‍ണം കടത്തിയെന്ന കേസില്‍ പ്രതികളായ കസ്റ്റംസ് മുന്‍ ഡെപ്യൂട്ടി കമ്മിഷണര്‍ സി. മാധവന്‍, അസി. കമ്മിഷണര്‍ ഡോ. എസ്. അനില്‍കുമാര്‍, സ്വര്‍ണക്കടത്ത് സംഘാംഗം അഹമ്മദ് സുഹൈല്‍ എന്നിവര്‍ നല്‍കിയ റിവിഷന്‍ ഹര്‍ജികള്‍ തള്ളിയാണ് ജസ്റ്റീസ് എ. ബദറുദ്ദീന്‍റെ ഉത്തരവ്.
വകുപ്പുതല നടപടികളില്‍ കുറ്റവിമുക്തരാക്കപ്പെട്ടു എന്നത് ക്രിമിനല്‍ കേസുകളില്‍നിന്ന് ഒഴിവാകാനുള്ള കാരണമല്ലെന്നു കോടതി വ്യക്തമാക്കി. പ്രതികള്‍ക്കെതിരേ പ്രഥമദൃഷ്‌ട്യാ തെളിവുകളുണ്ടെന്നും വിചാരണ നേരിടണമെന്നും കോടതി പറഞ്ഞു. ആറു മാസത്തിനകം വിചാരണ പൂര്‍ത്തിയാക്കാനും പ്രത്യേക കോടതിക്ക് നിര്‍ദേശം നല്‍കി.
ലക്ഷക്കണക്കിനു രൂപയും എല്‍ഇഡി ടിവി ഉള്‍പ്പടെയുള്ള സമ്മാനങ്ങളും കൈപ്പറ്റി 17.86 കോടി രൂപ മൂല്യം വരുന്ന സ്വര്‍ണം കടത്താന്‍ ഒത്താശ ചെയ്‌തെന്നാണു ഉദ്യോഗസ്ഥര്ക്കെതിരായ ആരോപണം.
പ്രതി സി. മാധവന്‍ സ്വര്‍ണക്കടത്തിനു സൗകര്യമൊരുക്കിയെന്നും എസ്. അനില്‍കുമാര്‍ തന്‍റെ വിവാഹ ആവശ്യങ്ങള്‍ക്കായി പ്രതികളില്‍നിന്നു വാഹനം ഉള്‍പ്പടെയുള്ള സഹായങ്ങള്‍ സ്വീകരിച്ചെന്നും സിബിഐ കണ്ടെത്തിയിട്ടുള്ളതായി പ്രോസിക്യൂഷന് ചൂണ്ടിക്കാട്ടി.
Kerala
കൊച്ചി: തന്നെ സംരക്ഷിക്കാന്‍ മരുമകള്‍ക്കും 22 വയസുള്ള പേരക്കുട്ടിക്കും ബാധ്യതയുണ്ടെന്ന വാദവുമായി കൊച്ചി സ്വദേശിനിയായ മുന്‍ ഉദ്യോഗസ്ഥ നല്‍കിയ ഹര്‍ജി ഹൈക്കോടതി തള്ളി.
സര്‍വീസിലിരിക്കെ മരിച്ച മകന്‍റെ പെന്‍ഷന്‍ ആനുകൂല്യങ്ങള്‍ മരുമകള്‍ക്ക് ലഭിക്കുന്നതിനൊപ്പം തനിക്കുകൂടി ഓഹരി ലഭിക്കണമെന്നതടക്കം ആവശ്യവുമായി കടവന്ത്ര സ്വദേശി തങ്കമ്മ നല്‍കിയ ഹര്‍ജിയാണു തള്ളിയത്.
യുക്തിരഹിതമായ ആവശ്യം മുത്തശിയില്‍നിന്നു പ്രതീക്ഷിക്കുന്നില്ലെന്ന നിരീക്ഷണത്തോടെയാണ് ഉത്തരവ്.
Kerala
കൊച്ചി: സര്‍ക്കാര്‍ മാനസികാരോഗ്യ കേന്ദ്രങ്ങളുടെ പേര് ഹാപ്പിനസ് ആന്‍ഡ് വെല്‍നെസ് സെന്‍ററുകള്‍ എന്നാക്കുന്നതില്‍ ഇന്ത്യന്‍ മെഡിക്കല്‍ അസോസിയേഷനും (ഐഎംഎ), ഇന്ത്യന്‍ സൈക്യാട്രിക് സൊസൈറ്റിക്കുമുള്ള (ഐപിഎസ്) എതിര്‍പ്പ് അധികൃതര്‍ പരിഗണിക്കണമെന്ന് ഹൈക്കോടതി.
വിഷയം ഹൈക്കോടതിയുടെ ശ്രദ്ധയില്‍പ്പെട്ടതിനെ തുടര്‍ന്നാണ് ജസ്റ്റീസുമാരായ ദേവന്‍ രാമചന്ദ്രന്‍, ബസന്ത് ബാലാജി എന്നിവരുള്‍പ്പെട്ട ഡിവിഷന്‍ ബെഞ്ചിന്‍റെ നിര്‍ദേശം. സംസ്ഥാനത്തെ മാനസികാരോഗ്യ കേന്ദ്രങ്ങളുടെ പ്രവര്‍ത്തനവുമായി ബന്ധപ്പെട്ട് ഹൈക്കോടതി സ്വമേധയാ എടുത്ത ഹര്‍ജിയാണു പരിഗണനയിലുള്ളത്.
ഈ സംഘടനകള്‍ നല്‍കുന്ന എതിര്‍പ്പുകളും നിര്‍ദേശങ്ങളും രേഖാമൂലം 14നകംആരോഗ്യ പ്രിന്‍സിപ്പല്‍ സെക്രട്ടറിയെ അറിയിക്കണമെന്നും കോടതി നിര്‍ദേശിച്ചു.
Kerala
കൊച്ചി: വ്യക്തമായ തെളിവുകളില്ലാതെ, രേഖകളുടെ അഭാവംകൊണ്ടു മാത്രം പട്ടിക വിഭാഗക്കാരുടെ ഭരണഘടനാപരമായ ആനുകൂല്യങ്ങള്‍ നിഷേധിക്കരുതെന്ന് ഹൈക്കോടതി. പ്രായോഗിക ബുദ്ധിമുട്ടിന്‍റെ പേരില്‍ ജാതി തെളിയിക്കാന്‍ സാധിച്ചില്ലെന്ന കാരണത്താല്‍ ആനുകൂല്യങ്ങള്‍ നിഷേധിക്കാനാകില്ല.
സര്‍ട്ടിഫിക്കറ്റിലും മറ്റും തട്ടിപ്പ് നടന്നതായി സര്‍ക്കാരിന്‍റെ പക്കല്‍ തെളിവുകള്‍ ഇല്ലാത്തിടത്തോളം ആനുകൂല്യങ്ങള്‍ക്ക് അവര്‍ അര്‍ഹരാണെന്നും ജസ്റ്റീസുമാരായ എ.കെ. ജയശങ്കരന്‍ നമ്പ്യാര്‍, എ.കെ. പ്രീത എന്നിവരടങ്ങുന്ന ഡിവിഷന്‍ ബെഞ്ച് വ്യക്തമാക്കി. പട്ടികവര്‍ഗ ആനുകൂല്യങ്ങള്‍ക്കായി വ്യാജ ജാതി സര്‍ട്ടിഫിക്കറ്റ് ഹാജരാക്കിയെന്നാരോപിച്ചു തൃശൂര്‍ സ്വദേശി വി. ബാലനെ സര്‍വീസില്‍നിന്ന് നീക്കിയ നടപടി റദ്ദാക്കിയ ഉത്തരവിലാണ് നിരീക്ഷണം.
ഹര്‍ജിക്കാരന്‍റെ പരാതി പരിഗണിച്ച് ആറുമാസത്തിനകം പുതിയ തീരുമാനമെടുക്കാന്‍ സ്‌ക്രൂട്ടിനി കമ്മിറ്റിക്ക് കോടതി നിര്‍ദേശം നല്‍കി. അതുവരെ ബാലന്‍റെ താത്കാലിക പെന്‍ഷന്‍ തുടരാനും നിര്‍ദേശിച്ചു.
Kerala
കൊച്ചി: കോടതിയലക്ഷ്യ നടപടിയുടെ ഭാഗമായി നേരിട്ടു ഹാജരാകുന്നതില്‍നിന്ന് കെഎസ്ആര്‍ടിസി മാനേജിംഗ് ഡയറക്ടര് പ്രമോജ് ശങ്കര്‍, എക്‌സിക്യൂട്ടീവ് ഡയറക്ടര് (അഡ്മിനിസ്‌ട്രേഷന്‍) ജി.പി. പ്രദീപ് കുമാര്‍ എന്നിവരെ ഹൈക്കോടതി തത്കാലത്തേക്ക് ഒഴിവാക്കി.
വിലക്കു ലംഘിച്ച് എംപാനല്‍ഡ് ഡ്രൈവര്‍ നിയമനം തുടരുന്നതു സംബന്ധിച്ച കോടതിയലക്ഷ്യ കേസില്‍ നേരിട്ടു ഹാജരാകാന്‍ നേരത്തേ കോടതി നിര്‍ദേശിച്ചിരുന്നു. വിഷയത്തില്‍ കെഎസ്ആര്‍ടിസി സത്യവാങ്മൂലം നല്‍കിയതിനെത്തുടര്‍ന്നാണ് ഇവര്‍ക്ക് ഇളവ് നല്‍കിയത്.
വിശദീകരണം തൃപ്തികരമല്ലെങ്കിലും സ്റ്റാന്‍ഡിംഗ് കോണ്‍സല്‍ നല്‍കിയ ഉറപ്പുകള്‍കൂടി പരിഗണിച്ചാണ് ഇളവ് നല്‍കുന്നതെന്ന് ജസ്റ്റീസ് ഹരിശങ്കര്‍ വി. മേനോന്‍ വ്യക്തമാക്കി. നേരില്‍ ഹാജരാകുന്നത് ഒഴിവാക്കണമെന്നാവശ്യപ്പെട്ട് ഉദ്യോഗസ്ഥര്‍ നല്‍കിയ അപേക്ഷയിലാണ് ഉത്തരവ്.
ഡ്രൈവര്‍മാരുടെ തസ്തികയില്‍ സ്ഥിരനിയമനം നടത്താതെ താത്കാലിക നിയമനം തുടരുന്നത് നിയമവിരുദ്ധമാണെന്ന് കോടതി നേരത്തേ ഉത്തരവിട്ടിരുന്നു. എന്നിട്ടും എംപാനല്‍ നിയമനം തുടരുകയാണെന്ന് ആരോപിച്ചു പിഎസ്‌സി റാങ്ക് ലിസ്റ്റിലുള്ള ഉദ്യോഗാര്ഥികള് നല്‍കിയ കോടതിയലക്ഷ്യ ഹര്‍ജിയാണു കോടതി പരിഗണിക്കുന്നത്.
Kerala
കൊച്ചി: മുട്ടിൽ മരംമുറിയുമായി ബന്ധപ്പെട്ട വഞ്ചനാ കേസിൽ പ്രതികളായ അഗസ്റ്റിൻ സഹോദരൻമാർ വിചാരണയ്ക്ക് ഹാജരാകാത്തതിൽ മുന്നറിയിപ്പ് നൽകി ചോറ്റാനിക്കര മജിസ്ട്രേറ്റ് കോടതി. വിചാരണയ്ക്ക് തടസമായി ഏതെങ്കിലും തരത്തിലുള്ള സ്റ്റേ ഉണ്ടെങ്കിൽ ഹാജരാക്കണമെന്നും കോടതി അറിയിച്ചു.
കേസിൽ കുറ്റപത്രം വായിച്ചുകേൾപ്പിക്കുന്നതിനായി പ്രതികൾ ഇന്ന് കോടതിയിൽ ഹാജരാകാൻ നിർദേശമുണ്ടായിരുന്നു. വീഡിയോ കോൺഫറൻസിംഗ് വഴി ഹാജരാകാൻ മൂന്ന് പ്രതികൾക്കും അനുമതിയുണ്ടായിരുന്നെങ്കിലും പ്രതികൾ ഹാജരായിരുന്നില്ല.
പ്രതികൾ വെള്ളിയാഴ്ച വിചാരണയ്ക്ക് ഹാജരാകണമെന്നാണ് നിർദേശിച്ചു. അതേസമയം ചോറ്റാനിക്കര കോടതിയിലെ വിചാരണ നടപടികൾ നിർത്തിവയ്ക്കണമെന്ന് ആവശ്യപ്പെട്ട് പ്രതികൾ ഹൈക്കോടതിയിൽ ഹർജി നൽകിയിട്ടുള്ളതായി അഭിഭാഷകൻ അറിയിച്ചു.
ഇതോടെയാണ് ചോറ്റാനിക്കര മജിസ്ട്രേറ്റ് കോടതി നിലപാട് കടുപ്പിച്ചത്. എങ്കിൽ ഹൈക്കോടതിയുടെ സ്റ്റേ ഉത്തരവ് ഹാജരാക്കണമെന്നും അല്ലെങ്കിൽ വീഡിയോ കോൺഫറൻസിംഗ് വഴി ഹാജരാകാനുള്ള അനുമതി റദ്ദാക്കുമെന്നും കോടതി പറഞ്ഞു.
Kerala
കൊച്ചി: ജില്ലാ ജുഡീഷറിയില്‍ മിനിസ്റ്റീരിയല്‍ വിഭാഗത്തില്‍ ശേഷിക്കുന്ന തസ്തികകള്‍ ഈമാസം ഒന്പതിനകം സൃഷ്‌ടിക്കണമെന്നു ഹൈക്കോടതി.
ഇല്ലെങ്കില്‍ കോടതിയലക്ഷ്യ നടപടി സ്വീകരിക്കുമെന്നും ചീഫ് ജസ്റ്റീസ് സൗമെന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരുള്‍പ്പെട്ട ഡിവിഷന്‍ ബെഞ്ച് വ്യക്തമാക്കി.
നിലവില്‍ ചീഫ് സെക്രട്ടറിയായ ബിശ്വനാഥ് സിന്‍ഹ അഡീഷണല്‍ ചീഫ് സെക്രട്ടറിയായിരിക്കെ കേരള സിവില്‍ ജുഡീഷല്‍ സ്റ്റാഫ് ഓര്‍ഗനൈസേഷന്‍ നല്‍കിയ കോടതിയലക്ഷ്യ ഹര്‍ജിയിലാണു തസ്തിക സൃഷ്‌ടിക്കാന്‍ ഡിവിഷന്‍ ബെഞ്ചിന്‍റെ ഉത്തരവുണ്ടായത്.
Kerala
കൊച്ചി: 2023 മുതല്‍ 2026 വരെ തൃശൂര്‍ പൂരം പ്രദര്‍ശന നടത്തിപ്പുമായി ബന്ധപ്പെട്ട മൂന്നു വര്‍ഷത്തെ കണക്കുകളുടെ സമഗ്ര പരിശോധനയ്ക്കു ഹൈക്കോടതി നിര്‍ദേശം.
2022ലെ ഓഡിറ്റ് പൂര്‍ത്തിയായെങ്കിലും തുടര്‍ന്നുള്ള വര്‍ഷങ്ങളിലെ രേഖകള്‍ ലഭ്യമായിട്ടില്ലെന്ന് ഓഡിറ്റ് ഡെപ്യൂട്ടി ഡയറക്ടര് കെ. മനോജ്കുമാര്‍ അറിയിച്ചതിനെത്തുടര്‍ന്നാണ് ജസ്റ്റീസുമാരായ വി. രാജാ വിജയരാഘവന്‍, കെ.വി. ജയകുമാര്‍ എന്നിവരടങ്ങുന്ന ഡിവിഷന്‍ ബെഞ്ചിന്‍റെ ഉത്തരവ്.
ബന്ധപ്പെട്ട വര്‍ഷങ്ങളിലെ പൂരം പ്രദര്‍ശനവുമായി ബന്ധപ്പെട്ട മുഴുവന്‍ രേഖകളും ഈ മാസം പത്തിന് കേരള സ്റ്റേറ്റ് ഓഡിറ്റ് ഡിപ്പാര്‍ട്ട്‌മെന്‍റ് ഡെപ്യൂട്ടി ഡയറക്ടറുടെ മുന്നില്‍ ഹാജരാക്കാന്‍ പാറമേക്കാവ്, തിരുവമ്പാടി ദേവസ്വങ്ങളോടു കോടതി നിര്‍ദേശിച്ചു.
പ്രദര്‍ശന കമ്മിറ്റിയുടെ ബൈലോ, തൃശൂര്‍ കോര്‍പറേഷനുമായുള്ള കരാറുകള്‍, ടിക്കറ്റ് വിവരങ്ങള്‍, സ്റ്റോക്ക് രജിസ്റ്റര്‍, ബാങ്ക് പാസ്ബുക്കുകള്‍, ഇരു ദേവസ്വങ്ങളുടെയും മിനിറ്റ്‌സ് ബുക്കുകള്‍ തുടങ്ങിയ 14 തരം രേഖകളാണു പ്രധാനമായും പരിശോധിക്കുക.
രേഖകള്‍ ഹാജരാക്കുന്നതില്‍ തടസമില്ലെന്ന് ദേവസ്വം ഭാരവാഹികള്‍ കോടതിയെ അറിയിച്ചു. ലഭ്യമാകുന്ന രേഖകള്‍ ഓഡിറ്റിന് പര്യാപ്തമാണോയെന്നു വ്യക്തമാക്കി റിപ്പോര്‍ട്ട് നല്‍കാന്‍ ഡെപ്യൂട്ടി ഡയറക്ടറോട് കോടതി നിര്‍ദേശിച്ചു. തുടര്‍ന്ന് വിഷയം 17ന് പരിഗണിക്കാന്‍ മാറ്റി.
Kerala
കൊച്ചി: കാലടി സംസ്കൃത സർവകലാശാല വൈസ് ചാൻസലർ ഡോ. സിസ തോമസിനെ തടഞ്ഞുവച്ച് അതിക്രമിച്ചെന്ന കേസിൽ 17 എസ്എഫ്ഐ പ്രവർത്തകരെ 11 വരെ അറസ്റ്റ് ചെയ്യുന്നത് ഹൈക്കോടതി വിലക്കി.
കാലടി പൊലിസ് രജിസ്റ്റർ ചെയ്ത കേസിൽ മുൻകൂർ ജാമ്യം തേടി പി.എസ്. അർച്ചനയടക്കം നൽകിയ ഹർജി 11ന് പരിഗണിക്കാനായി മാറ്റിയതിനെത്തുടർന്നാണ് അതുവരെ അറസ്റ്റ് തടഞ്ഞു ജസ്റ്റീസ് കൗസർ എടപ്പഗത്ത് ഇടക്കാല ഉത്തരവ് പുറപ്പെടുവിച്ചത്.
Kerala
കൊച്ചി: ശബരിമല ശ്രീകോവിൽ കട്ടിളപ്പാളി സ്വർണക്കൊള്ള കേസിൽ 25നകം കുറ്റപത്രം സമർപ്പിക്കണമെന്നു പ്രത്യേക അന്വേഷണ സംഘത്തിന് (എസ്ഐടി) ഹൈക്കോടതി നിർദേശം.
ദ്വാരപാലക ശില്പങ്ങളിൽനിന്ന് സ്വർണം കവർന്ന കേസിലും എത്രയും വേഗം അന്വേഷണം പൂർത്തിയാക്കി വിചാരണക്കോടതിയിൽ അന്തിമ റിപ്പോർട്ട് സമർപ്പിക്കാനും ജസ്റ്റീസുമാരായ വി. രാജാ വിജയരാഘവൻ, കെ.വി. ജയകുമാർ എന്നിവരടങ്ങുന്ന ദേവസ്വം ബെഞ്ച് ഉത്തരവിട്ടു. എസ്ഐടി സമർപ്പിച്ച അന്വേഷണപുരോഗതി റിപ്പോർട്ട് പരിശോധിച്ച കോടതി അന്വേഷണം ഏറെ മുന്നേറിയിട്ടുള്ളതായി വിലയിരുത്തി.
കട്ടിളപ്പാളി കേസിൽ അന്വേഷണം ഏകദേശം പൂർത്തിയായതായി കോടതിയിൽ ഹാജരായ അന്വേഷണ ഉദ്യോഗസ്ഥൻ എസ്പി. എസ്.ശശിധരൻ അറിയിച്ചു. പാളികളിൽനിന്നു സ്വർണം ചോർത്തിയെടുക്കാൻ പ്രതികൾ ഉപയോഗിച്ച സ്ട്രിപ്പിംഗ് സാൾട്ടും ക്ലീനിംഗ് സാൾട്ടും രാസപരിശോധനയ്ക്കായി ജംഷഡ്പുരിലെ നാഷണൽ മെറ്റലർജിക്കൽ ലാബിലേക്ക് അയച്ചിട്ടുണ്ടെന്നും രണ്ടാഴ്ചയ്ക്കകം ഫലം ലഭിക്കുമെന്നും ഉദ്യോഗസ്ഥൻ അറിയിച്ചു. ഇതോടെ കട്ടിളപ്പാളി കേസിൽ അന്തിമ റിപ്പോർട്ട് തയാറാക്കാനാകും.
ദ്വാരപാലക കേസിൽ 2019ലെ കേസിനൊപ്പം 2025ലെ സ്വർണം പൂശലും അന്വേഷിക്കുന്നതിനാൽ കുറെ നടപടികൾകൂടി ശേഷിക്കുന്നുണ്ട്. എങ്കിലും വൈകാതെതന്നെ ഇതിലെ അന്വേഷണവും പൂർത്തിയാക്കാനാകുമെന്ന് എസ്പി അറിയിച്ചു. ഹർജി ഒക്‌ടോബർ ഏഴിന് പരിഗണിക്കും.
Kerala
കൊച്ചി: നെടുമങ്ങാട് ക്രൂരമായ മര്‍ദനത്തിനിരയായി ഒന്നര വയസുകാരന്‍ അര്‍ഷിദ് മരിക്കാനിടയായ സംഭവത്തില്‍ അന്വേഷണം പൂര്‍ത്തിയാക്കി പ്രത്യേക കോടതിയില്‍ കുറ്റപത്രം സമര്‍പിച്ചതായി സര്‍ക്കാര്‍ ഹൈക്കോടതിയില്‍.
കേസിലെ പ്രതികളായ മരിച്ച അര്‍ഷിദിന്‍റെ അമ്മ അഖിലയും രണ്ടാനഛന്‍ അഷ്‌കറും റിമാന്‍ഡിലാണെന്നും സര്‍ക്കാര്‍ അറിയിച്ചു.
തുടര്‍ന്ന് അന്തിമ അന്വേഷണ പുരോഗതി റിപ്പോര്‍ട്ടും കുറ്റപത്ര സമര്‍പ്പണ റിപ്പോര്‍ട്ടും മുദ്രവച്ച കവറില്‍ ഹാജരാക്കാനും തുടര്‍നടപടികളുടെ പുരോഗതി അറിയിക്കാനും ചീഫ് ജസ്റ്റീസ് സൗമെന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരടങ്ങുന്ന ഡിവിഷന്‍ ബെഞ്ച് നിര്‍ദേശിച്ചു. ഹര്‍ജി വീണ്ടും നാലാഴ്ചയ്ക്കുശേഷം പരിഗണിക്കാന്‍ മാറ്റി.
Kerala
കൊച്ചി: കെഎസ്ആര്‍ടിസിയെ ഗ്രാറ്റുവിറ്റി നിയമപരിധിയില്‍നിന്ന് ഒഴിവാക്കുന്ന വിജ്ഞാപനം റദ്ദാക്കിയതു ശരിവച്ച് ഹൈക്കോടതി ഡിവിഷന്‍ ബെഞ്ചും.
വിജ്ഞാപനം റദ്ദാക്കി നേരത്തേ സിംഗിള്‍ബെഞ്ച് പുറപ്പെടുവിച്ച ഉത്തരവ് ചോദ്യം ചെയ്ത് കെഎസ്ആര്‍ടിസി നല്‍കിയ അപ്പീല്‍ തള്ളിയാണ് ജസ്റ്റീസുമാരായ ദേവന്‍ രാമചന്ദ്രന്‍, ബസന്ത് ബാലാജി എന്നിവരടങ്ങുന്ന ഡിവിഷന്‍ ബെഞ്ചിന്‍റെ ഉത്തരവ്.
Kerala
കൊച്ചി: കശുവണ്ടി അഴിമതിക്കേസിലെ പ്രോസിക്യൂഷന് അനുമതി ഉത്തരവ് അന്നു തന്നെ പ്രതികളുടെ പക്കലെത്തിയത് ഏതു മാര്‍ഗത്തിലൂടെയാണെന്ന് അറിയിക്കണമെന്നു ഹൈക്കോടതി.
കോടതിയെ കുറ്റപ്പെടുത്തി സര്‍ക്കാര്‍ ആദ്യമിറക്കുകയും പിന്നീട് പിന്‍വലിക്കുകയും ചെയ്ത ഉത്തരവ് പ്രതികള്‍ക്കു ലഭിച്ചത് രജിസ്ട്രേഡ് തപാല്‍, ഇമെയില്‍, വാട്‌സാപ്, ഇന്‍സ്റ്റഗ്രാം തുടങ്ങി ഏതു സേവനത്തിലൂടെയാണെന്ന് ഒരാഴ്ചയ്ക്കകം അറിയിക്കാന്‍ ജസ്റ്റീസ് എ. ബദറുദ്ദീന്‍ വിജിലന്‍സിന് നിര്‍ദേശം നല്‍കി. ഹര്‍ജി വീണ്ടും 11ന് പരിഗണിക്കും.
Kerala
പത്തനംതിട്ട: പ്രളയക്കെടുതിയിൽ സഹായത്തിനിറങ്ങിയ ഓഫ് റോഡ് വാഹനത്തിന് പിഴ ചുമത്തിയതിനെ തുടർന്നുണ്ടായ വിവാദത്തിൽ ഹൈക്കോടതി ഉത്തരവ് നടപ്പാക്കി മോട്ടോർ വാഹന വകുപ്പ്. ഓഫ് റോഡ് വാഹന ഉടമയ്ക്ക് നിയമലംഘനങ്ങളെല്ലാം ചേർത്ത് പിഴ ചുമത്തി നോട്ടീസ് നൽകി.
ഹൈക്കോടതി നിർദേശപ്രകാരമാണ് നടപടി. പത്തനംതിട്ട ഉള്ളന്നൂർ സ്വദേശിയുടെ വാഹനത്തിന് 50,000 രൂപയാണ് പിഴ ചുമത്തിയിരിക്കുന്നത്. അനധികൃത ലൈറ്റിന് 5,000 രൂപയാണ് ആദ്യം പിഴ ചുമത്തിയത്.
എന്നാൽ പ്രളയക്കെടുതിയിൽ സഹായത്തിനിറങ്ങിയ വാഹനത്തിന് പിഴ ചുമത്തിയെന്ന പേരിൽ രണ്ട് ഉദ്യോഗസ്ഥരെ സസ്പെൻഡ് ചെയ്യുകയും പിന്നീട് തിരിച്ചെടുക്കുകയും ചെയ്തിരുന്നു. വിഷയത്തിൽ സ്വമേധയാ ഇടപെട്ട ഹൈക്കോടതി ഉദ്യോഗസ്ഥ നടപടി ശരിവച്ച് കൂടുതൽ പിഴ ഈടാക്കാൻ നിർദേശം നൽകുകയായിരുന്നു.
Kerala
കൊച്ചി: അനാശാസ്യകേന്ദ്രങ്ങളില്‍ ഇരകളെ തേടിയെത്തുന്ന ഇടപാടുകാരനും (കസ്റ്റമര്‍) അനാശാസ്യപ്രവര്‍ത്തന നിരോധന നിയമപ്രകാരം കുറ്റക്കാരനാകുമെന്ന് ഹൈക്കോടതി.
നടത്തിപ്പുകാരനും കസ്റ്റമറും ഉണ്ടെങ്കില്‍ മാത്രമേ അനാശാസ്യകേന്ദ്രങ്ങളില്‍ ചൂഷണം നടക്കുകയുള്ളൂവെന്നതിനാല്‍ ഇടപാടുകാരനും പ്രതിയായേ പറ്റൂ. അല്ലാത്തപക്ഷം നിയമത്തിന്‍റെ ഉദ്ദേശ്യലക്ഷ്യത്തെ നേര്‍മിപ്പിക്കുന്നതിനു തുല്യമാകും.
ക്രിമിനല്‍ ബാധ്യതയില്‍നിന്ന് ഇടപാടുകാരെ ഒഴിവാക്കാനാകില്ലെന്നും ജസ്റ്റീസുമാരായ രാജ വിജയരാഘവന്‍, കെ.വി. ജയകുമാര്‍ എന്നിവരടങ്ങുന്ന ഡിവിഷന്‍ ബെഞ്ച് വ്യക്തമാക്കി.
നേരത്തേ ഈ വിഷയവുമായി ബന്ധപ്പെട്ട ഹര്‍ജികളില്‍ വിവിധ സിംഗിള്‍ ബെഞ്ചുകള്‍ ഇടപാടുകാർക്ക് അനുകൂലമായും പ്രതികൂലമായും വ്യത്യസ്തമായ വിധികള്‍ പുറപ്പെടുവിച്ച സാഹചര്യത്തില്‍ ചീഫ് ജസ്റ്റീസ്, വിഷയം ഡിവിഷന്‍ ബെഞ്ചിന്‍റെ പരിഗണനയ്ക്കു വിടുകയായിരുന്നു. സാഹചര്യങ്ങളുടെ സമ്മര്‍ദത്താല്‍ ലൈംഗിക തൊഴിലാളികളായി മാറുന്നവരെ സാമ്പത്തികനേട്ടത്തിനായി ചൂഷണം ചെയ്യുന്ന വാണിജ്യകേന്ദ്രങ്ങളാണ് അനാശാസ്യകേന്ദ്രങ്ങളെന്ന് കോടതി ചൂണ്ടിക്കാട്ടി.
ഇടപാടിലൂടെ നടത്തിപ്പുകാരന്‍ വന്‍ ലാഭമുണ്ടാക്കുകയാണ്. ഇത്തരം കേന്ദ്രങ്ങളില്‍നിന്നു സേവനം തേടിയെത്തുന്ന വ്യക്തികള്‍ നിയമവിരുദ്ധമായി പ്രവര്‍ത്തിക്കുന്ന ആ സ്ഥാപനത്തെ പ്രോത്സാഹിപ്പിക്കുകയാണ്.
അനാശാസ്യകേന്ദ്രത്തിലെത്തുന്ന ഇടപാടുകാര്‍ കുറ്റവാളിയല്ലെന്ന സിംഗിള്‍ ബെഞ്ച് ഉത്തരവുകള്‍ റദ്ദാക്കിയ കോടതി മറിച്ചുള്ള ഉത്തരവുകള്‍ ശരിവച്ചു.
Kerala
കൊച്ചി: ഭാര്യയാണെങ്കിലും 18 വയസിൽ താഴെയുള്ള പെൺകുട്ടിയുമായി ശാരീരികബന്ധത്തിൽ ഏർപ്പെടുന്നത് പോക്സോ നിയമപ്രകാരം കുറ്റകരമെന്നു ഹൈക്കോടതി.
18 വയസിൽ താഴെയുള്ള ആരെയും കുട്ടിയെന്ന നിലയിലാണു നിയമം കാണുന്നതെന്നതിനാൽ വിവാഹിതയാണോ അല്ലയോ എന്നതിനു പ്രസക്തിയില്ലെന്ന് ജസ്റ്റീസ് ജോബിൻ സെബാസ്റ്റ്യൻ വ്യക്തമാക്കി.
മുസ്‌ലിം വ്യക്തിനിയമപ്രകാരം വിവാഹം ചെയ്ത പെൺകുട്ടിയുമായി ശാരീരികബന്ധം പുലർത്തിയെന്ന പേരിൽ തനിക്കെതിരേയെടുത്തിട്ടുള്ള പോക്സോ കേസും ലൈംഗികാതിക്രമ കേസും റദ്ദാക്കണമെന്നാവശ്യപ്പെട്ട് പാലക്കാട് മണ്ണാർക്കാട് സ്വദേശിയായ 27കാരൻ സമർപ്പിച്ച ഹർജി തള്ളിയാണ് കോടതി ഉത്തരവ്.
കുട്ടികൾക്കെതിരായ ലൈംഗിക അതിക്രമങ്ങൾ തടയാൻ ലക്ഷ്യമിടുന്ന പോക്സോ നിയമത്തിന് വ്യക്തിനിയമങ്ങളേക്കാൾ മുൻഗണനയുണ്ടെന്ന് കോടതി പറഞ്ഞു.
പതിനേഴുകാരിയെ തട്ടിക്കൊണ്ടുപോയി പീഡിപ്പിച്ചുവെന്നാരോപിച്ച് 2022ലാണ് പോലീസ് കേസെടുത്തത്. എന്നാൽ പെൺകുട്ടി നിയമപരമായി തന്‍റെ ഭാര്യയാണെന്നും 15 വയസ് കഴിഞ്ഞ ഭാര്യയുമായുള്ള ലൈംഗികബന്ധത്തിന് ഭാരതീയ ശിക്ഷാനിയമത്തിൽ ഇളവുണ്ടെന്നുമായിരുന്നു ഹർജിക്കാരന്‍റെ വാദം.
ഭാര്യക്ക് 15 വയസ് തികഞ്ഞാൽ ലൈംഗികബന്ധം കുറ്റകരമല്ലെന്ന ഐപിസിയിലെ വ്യവസ്ഥ സുപ്രീംകോടതി മുന്പുതന്നെ ഭേദഗതി ചെയ്തിട്ടുണ്ടെന്നും ഈ പ്രായപരിധി 18 വയസാക്കി ഉയർത്തിയിട്ടുണ്ടെന്നും ഹൈക്കോടതി ചൂണ്ടിക്കാട്ടി.
ഹർജിക്കാരൻ ചെയ്ത കുറ്റം പ്രഥമദൃഷ്‌ട്യാ നിലനിൽക്കുന്നതിനാൽ പട്ടാമ്പി ഫാസ്റ്റ് ട്രാക്ക് സ്പെഷൽ കോടതിയുടെ പരിഗണനയിലുള്ള കേസിൽ തുടർനടപടികളാകാമെന്നും ഹൈക്കോടതി വ്യക്തമാക്കി.
Kerala
കൊച്ചി: വന്യജീവി ആക്രമണത്തിന് ഇരയാകുന്നവര്‍ക്ക് ന്യായവും യുക്തിസഹവുമായ നഷ്‌ടപരിഹാരം ഉറപ്പാക്കണമെന്നു ഹൈക്കോടതി.
1980ലെ നഷ്‌ടപരിഹാര ചട്ടങ്ങളിലേതുപോലെ സംസ്ഥാനസര്‍ക്കാര്‍ നല്‍കേണ്ട ഏറ്റവും കുറഞ്ഞ തുകയ്ക്കു പകരം മനുഷ്യജീവന്‍റെ മൂല്യവും പരിക്കിന്‍റെയും നഷ്‌ടത്തിന്‍റെയും തീവ്രതയും കണക്കാക്കി സര്‍ക്കാര്‍ നഷ്‌ടപരിഹാരം നല്‍കണം. അല്ലാത്തപക്ഷം കോടതികള്‍ക്ക് ഇടപെടാനുള്ള അധികാരമുണ്ടെന്ന് ജസ്റ്റീസ് സി.പി. മുഹമ്മദ് നിയാസ് വ്യക്തമാക്കി.
കാട്ടാനയുടെ ആക്രമണത്തില്‍ ഗൃഹനാഥന്‍ കൊല്ലപ്പെട്ട സംഭവത്തില്‍ ആശ്രിതര്‍ക്കുള്ള നഷ്‌ടപരിഹാരം 20,000 രൂപയില്‍നിന്ന് 1.98 ലക്ഷമായി ഉയര്‍ത്തിയ സുല്‍ത്താന്‍ ബത്തേരി സബ്‌കോടതി ഉത്തരവും അതു ശരിവച്ച വയനാട് ജില്ലാകോടതി വിധിയും ചോദ്യം ചെയ്തു വനംവകുപ്പ് നല്‍കിയ അപ്പീല്‍ ഹര്‍ജി തള്ളിയാണ് നിരീക്ഷണം.
സര്‍ക്കാര്‍ അനുവദിച്ച നഷ്‌ടപരിഹാരത്തുക അപര്യാപ്തമാണെന്നു ചൂണ്ടിക്കാട്ടി 2001ല് കാട്ടാന ആക്രമണത്തില്‍ കൊല്ലപ്പെട്ട വയനാട് ചാമപ്പാറ സ്വദേശി സ്‌കറിയയുടെ ഭാര്യ സാറമ്മയും മക്കളും നല്‍കിയ ഹര്‍ജിയിലാണ് കോടതികളുടെ ഉത്തരവുണ്ടായത്.
Kerala
കൊച്ചി: മുഖ്യമന്ത്രി വി.ഡി. സതീശനിൽനിന്നടക്കം പോലീസ് സംരക്ഷണം വേണമെന്നാവശ്യപ്പെട്ടു കോൺഗ്രസ് നേതാവായിരുന്ന സിമി റോസ് ബെൽ ജോൺ നൽകിയ ഹർജി ഹൈക്കോടതി തള്ളി.
സതീശൻ, സഹോദരൻ വി.ഡി. അജയകുമാർ എന്നിവരിൽനിന്ന് തനിക്കും സ്വത്തിനും ഭീഷണിയുണ്ടെന്ന് ആരോപിക്കുന്ന ഹർജിയാണു തള്ളിയത്. ആരോപണങ്ങൾക്ക് അനുബന്ധമായ തെളിവുകൾ ഹാജരാക്കാൻ ഹർജിക്കാരിക്കു കഴിഞ്ഞില്ലെന്നു വ്യക്തമാക്കിയാണ് ജസ്റ്റീസ് ബെച്ചു കുര്യൻ തോമസിന്‍റെ ഉത്തരവ്.
എറണാകുളം ജില്ലയിലെ മുതിർന്ന രാഷ്‌ട്രീയനേതാക്കളെ വി.ഡി. സതീശൻ അകാരണമായി പുറത്താക്കിയെന്നും ജീവനു ഭീഷണിയുണ്ടെന്നുമാണ് മുൻ പിഎസ്‌സി അംഗം കൂടിയായ സിമി റോസ് ബെൽ വാദിച്ചത്. തന്‍റെ മകൻ ഡൽഹിയിൽ വച്ച് ആക്രമിക്കപ്പെട്ടതിനു പിന്നിലും സതീശനാണെന്ന് ഹർജിയിൽ ആരോപിച്ചിരുന്നു. തന്‍റെ സഹായിക്കുനേരേ ആക്രമണമുണ്ടായതും ചൂണ്ടിക്കാട്ടിയിരുന്നു. എന്നാൽ എറണാകുളം സൗത്ത് പോലീസ് നടത്തിയ അന്വേഷണത്തിൽ നിലവിൽ ഭീഷണിയുള്ളതായി കണ്ടെത്താനായില്ലെന്ന് സർക്കാർ അറിയിച്ചിരുന്നു.
സിമിയുടെ മകനുനേരേയുണ്ടായ ആക്രമണത്തിൽ കേസുകളൊന്നും രജിസ്റ്റർ ചെയ്തിട്ടില്ലെന്നും ഇതുമായി ബന്ധപ്പെട്ട രേഖകൾ ഹാജരാക്കാൻ ഹർജിക്കാരിക്കു കഴിഞ്ഞില്ലെന്നും കോടതി നിരീക്ഷിച്ചു.
സഹായിക്കുനേരേയുണ്ടായ ആക്രമണത്തിനു കാരണം കുടുംബ പ്രശ്നങ്ങളാണെന്നാണു പോലീസ് കണ്ടെത്തിയത്. ഹർജി ഫയൽ ചെയ്യുമ്പോൾ പ്രതിപക്ഷനേതാവായിരുന്ന വി.ഡി. സതീശൻ നിലവിൽ മുഖ്യമന്ത്രിയാണെന്നും വ്യക്തിപരമായ വിരോധത്തിന്‍റെ പേരിലാകാം ഹർജിയെന്നും കോടതി വിലയിരുത്തി.
Kerala
കൊച്ചി: തൃശൂർ അയ്യന്തോളിൽ ലുലു മാളിനുവേണ്ടി ഏറ്റെടുത്ത ഭൂമി തരം മാറ്റുന്നതുമായി ബന്ധപ്പെട്ട അപേക്ഷ പുനഃപരിശോധിച്ച് നിയമപരമായ തീരുമാനമെടുക്കണമെന്ന് ഹൈക്കോടതി.
ലുലു ഹൈപ്പർ മാർക്കറ്റ് പ്രൈവറ്റ് ലിമിറ്റഡ് നൽകിയ അപ്പീലിലാണ് ജസ്റ്റീസ് ദേവൻ രാമചന്ദ്രൻ, ജസ്റ്റീസ് ബസന്ത് ബാലാജി എന്നിവരടങ്ങുന്ന ഡിവിഷൻ ബെഞ്ച് റവന്യു അധികൃതർക്ക് നിർദേശം നൽകിയത്.
ഭൂമി പൂർവസ്ഥിതിയിലാക്കണമെന്ന ജില്ലാ കളക്ടറുടെ ഉത്തരവ് റദ്ദാക്കുകയും ചെയ്തു. ഭൂമി ഡാറ്റാ ബാങ്കിൽനിന്ന് ഒഴിവാക്കിയ ആഡിഒയുടെ നടപടി റദ്ദാക്കിയ സിംഗിൾ ബെഞ്ച് ഉത്തരവ് ഡിവിഷൻ ബെഞ്ച് ശരിവച്ചു.
നടപടിക്കുമുമ്പ് കൃഷി ഓഫീസറുടെ റിപ്പോർട്ട് തേടണമെന്ന ചട്ടം ആർഡിഒ പാലിച്ചില്ലെന്ന് വിലയിരുത്തിയാണിത്.ലുലുവിന്‍റെ അപേക്ഷയിൽ കൃഷി ഓഫീസർ ഒരു മാസത്തിനകം റിപ്പോർട്ട് നൽകണമെന്ന് കോടതി നിർദേശിച്ചു.
റിപ്പോർട്ടുകൾ പരിശോധിച്ച് ആർഡിഒ 30 ദിവസത്തിനകം തീരുമാനമെടുക്കണം. തരംമാറ്റത്തിൽ വ്യക്തത വന്നശേഷം കളക്ടർക്ക് തുടർനടപടി സ്വീകരിക്കാം. പരാതിയുന്നയിച്ച വേലൂപ്പാടം ടി.എൻ. മുകുന്ദന്‍റെ വാദങ്ങളും ആർഡിഒ കേൾക്കണമെന്ന് ഉത്തരവിൽ പറയുന്നു.
Kerala
കൊച്ചി: കേസന്വേഷണത്തിന്‍റെ ഭാഗമായി ഔദ്യോഗിക അറസ്റ്റില്ലാതെതന്നെ ഒരാളെ കസ്റ്റഡിയിൽ വയ്ക്കാൻ നിയമപരമായി അനുമതിയുണ്ടെങ്കിൽ സാധ്യമാണെന്ന് ഹൈക്കോടതി. കസ്റ്റംസ്, കള്ളപ്പണം വെളുപ്പിക്കൽ, എൻഡിപിഎസ് തുടങ്ങിയ നിയമങ്ങൾ അറസ്റ്റില്ലാതെതന്നെ തടങ്കലിൽ ചോദ്യം ചെയ്യൽ അനുവദിക്കുന്ന വ്യവസ്ഥകളോടെയുള്ളതാണ്.
ബിഎൻഎസിലെ 179(1) വകുപ്പ് പ്രകാരം മുൻകൂർ നോട്ടീസ് നൽകി വിളിപ്പിക്കുന്നത് നിയമവിരുദ്ധ കസ്റ്റഡിയാകില്ലെന്നും ജസ്റ്റീസ് കൗസർ എടപ്പഗത്ത് വ്യക്തമാക്കി.
ഭരണഘടന വാഗ്ദാനം ചെയ്യുന്ന പൗരസ്വാതന്ത്ര്യം ഉറപ്പാക്കുന്നതിനൊപ്പം കാര്യക്ഷമമായ അന്വേഷണവും അനിവാര്യമാണെന്ന് കോടതി ചൂണ്ടിക്കാട്ടി.
ഓരോ കേസും പ്രത്യേകം പരിഗണിച്ചു വേണം നിയമവിരുദ്ധമായ കസ്റ്റഡിയാണോയെന്നു പരിശോധിക്കാനെന്നും കോടതി വ്യക്തമാക്കി. അറസ്റ്റ് ചെയ്ത് 24 മണിക്കൂറിനകം കോടതിയിൽ ഹാജരാക്കാത്തതിനാൽ ജാമ്യം തേടി മയക്കുമരുന്ന് കേസുകളിലെയടക്കം പ്രതികൾ സമർപ്പിച്ച ഹർജികൾ തീർപ്പാക്കിയാണ് ഉത്തരവ്.
പ്രതിയെ തടങ്കലിൽ വയ്ക്കുന്നതിനുള്ള കൃത്യമായ നടപടിക്രമങ്ങൾ അന്വേഷണസംഘം പാലിക്കേണ്ടതുണ്ടെന്ന് കോടതി പറഞ്ഞു. മുൻകൂർ നോട്ടീസ് നൽകൽ, തടങ്കലിലാക്കിയ സമയവും അറസ്റ്റ് ചെയ്ത സമയവും രേഖപ്പെടുത്തൽ, ഔദ്യോഗിക അറസ്റ്റിന് ശേഷം 24 മണിക്കൂറിനകം മജിസ്ട്രേറ്റ് മുമ്പാകെ ഹാജരാക്കൽ, അറസ്റ്റിന്‍റെ കാരണങ്ങൾ കൃത്യമായി അറിയിക്കൽ തുടങ്ങി ഒട്ടേറെ നടപടിക്രമങ്ങൾ പാലിക്കേണ്ടതുണ്ട്.
തടങ്കലിലാക്കിയ സമയം കൃത്യമായി രേഖപ്പെടുത്തിയില്ലെന്ന കാരണത്താൽ തൃശൂർ സ്വദേശി ടി.വി. അനീഷിന് കോടതി ജാമ്യം അനുവദിച്ചു.
അതേസമയം, കൊലപാതകക്കേസിലെ പ്രതി മലപ്പുറം സ്വദേശി മുജീബ് റഹ്‌മാൻ, മയക്കുമരുന്ന് കേസിലെ പ്രതികളായ മുവാറ്റുപുഴ സ്വദേശി അരുൺ കെ. തോമസ്, കണ്ണൂർ സ്വദേശി വി.എ. സർഫാസ്, മലപ്പുറം സ്വദേശി റഷാദ് മുഹമ്മദ്, കോഴിക്കോട് സ്വദേശി പി.കെ. മുഹമ്മദ് ആഷിൽ എന്നിവരുടെ ജാമ്യഹർജികൾ തള്ളി.
Kerala
കൊച്ചി: പശ്ചിമഘട്ടമടക്കമുള്ള പ്രദേശങ്ങൾ പരിസ്ഥിതിലോലമായി പ്രഖ്യാപിച്ച കേന്ദ്രസർക്കാരിന്‍റെ കരട് വിജ്ഞാപനം പത്തു ദിവസത്തിനകം പ്രസിദ്ധീകരിക്കണമെന്ന് ഹൈക്കോടതി.
കോഴിക്കോട് സ്വദേശികളായ സാലി ജോസ് അടക്കം നൽകിയ ഹർജിയിലാണ് ജസ്റ്റീസ് സി. ജയചന്ദ്രന്‍റെ ഉത്തരവ്. കരട് വിജ്ഞാപനം മലയാളത്തിൽ ലഭ്യമല്ലാത്തതിനാൽ എതിർപ്പറിയിക്കാൻ സാധിക്കുന്നില്ലെന്നു ചൂണ്ടിക്കാട്ടി നൽകിയ ഹർജിയാണ് കോടതി പരിഗണിച്ചത്.
മുമ്പ് ഇത്തരം സാഹചര്യമുണ്ടായപ്പോൾ കരട് വിജ്ഞാപനം മലയാളത്തിൽ പ്രസിദ്ധീകരിക്കാൻ ഉത്തരവിട്ടിട്ടുള്ളതായും ഹർജിക്കാർ ചൂണ്ടിക്കാട്ടി.സംസ്ഥാനത്ത് ഔദ്യോഗിക ഭാഷ നിയമനിർമാണ കമ്മീഷൻ പ്രവർത്തിക്കുന്നുണ്ടെന്നും കരട് വിജ്ഞാപനം മലയാളത്തിൽ പ്രസിദ്ധീകരിക്കേണ്ടത് അവരാണെന്നും കേന്ദ്രസർക്കാർ ചൂണ്ടിക്കാട്ടി.
ഇതേത്തുടർന്നാണ് എതിർപ്പറിയിക്കാൻ അനുവദിച്ചിട്ടുള്ള സമയപരിധി ഉടൻ അവസാനിക്കുന്ന സാഹചര്യംകൂടി കണക്കിലെടുത്ത് പത്തു ദിവസത്തിനകം മലയാളത്തിൽ വിജ്ഞാപനം പ്രസിദ്ധീകരിക്കാനുള്ള ഉത്തരവ് കോടതി പുറപ്പെടുവിച്ചത്.
National
ന്യൂഡൽഹി: 2021ലെ കേരള മിനറൽസ് (വെസ്റ്റിംഗ് ഓഫ് റൈറ്റ്സ്) ആക്ട് ഭരണഘടനാവിരുദ്ധമായി പ്രഖ്യാപിക്കുകയും ഭൂവുടമകളിൽനിന്ന് ഈടാക്കിയ റോയൽറ്റി തുക തിരികെ നൽകാൻ നിർദേശിക്കുകയും ചെയ്ത കേരള ഹൈക്കോടതി ഡിവിഷൻ ബെഞ്ചിന്‍റെ ഉത്തരവ് സുപ്രീംകോടതി സ്റ്റേ ചെയ്തു.
മലബാറിലെ ഖനന റോയൽറ്റി തർക്കത്തിലാണ് സംസ്ഥാന സർക്കാരിന് ആശ്വാസകരമായ ഉത്തരവ് ചീഫ് ജസ്റ്റീസ് സൂര്യകാന്ത്, ജസ്റ്റീസുമാരായ ജോയ്മല്യ ബാഗ്ചി, വി. മോഹന എന്നിവരുടെ ബെഞ്ച് പുറപ്പെടുവിച്ചത്.
പുതിയ ഉത്തരവ് ഉണ്ടാകുന്നതുവരെ നിയമപ്രകാരം സംസ്ഥാനം ഏതെങ്കിലും തരത്തിലുള്ള റോയൽറ്റി ഈടാക്കുകയോ തിരിച്ചുപിടിക്കുകയോ ചെയ്യരുതെന്നും ബെഞ്ച് ഉത്തരവിട്ടു. ധാതുക്കളുടെ ഉടമസ്ഥാ വകാശം നഷ്‌ടപരിഹാരം കൂടാതെ നിയമത്തിലൂടെ കവർന്നെടുക്കാൻ കഴിയില്ലെന്ന കണ്ടെത്തലിന്‍റെ അടിസ്ഥാനത്തിലാണ് 2021 ലെ കേരള ധാതു എറ്റെടുക്കൽ നിയമം ഹൈക്കോടതി ഡിവിഷൻ ബെഞ്ച് റദ്ദാക്കിയത്.
മലബാർ മേഖലയിൽ സർക്കാർ റോയൽറ്റി വാങ്ങാൻ പാടില്ലെന്നും അടച്ച റോയൽറ്റി സർക്കാർ ക്വാറി ഉടമകൾക്കു തിരികെ നൽകണമെന്നും ഹൈക്കോടതി ഉത്തരവിട്ടിരുന്നു.
എന്നാൽ ധാതു ഏറ്റെടുക്കൽ, ഭൂമിയേറ്റെടുക്കുന്നതുമായി താരതമ്യപ്പെടുത്താൻ കഴിയില്ലെന്നും ഭരണഘടനയുടെ 39 (ബി) പ്രകാരമുള്ള പ്രത്യേക പരിഗണന ധാതുക്കൾക്കുണ്ടെന്നും അതിനാൽ സുപ്രീകോടതി മുൻ വിധികളുടെ അടിസ്ഥാനത്തിൽ 2021ലെ നിയമം നിലനിൽക്കുമെന്നാണ് കേന്ദ്രസർക്കാർ സുപ്രീംകോടതിയെ അറിയിച്ചത്.
ഹൈക്കോടതി വിധിയിലൂടെ റോയൽറ്റി ഇനത്തിൽ 1200 കോടി രൂപയുടെ നഷ്‌ടം സംഭവിക്കുമെന്നും സർക്കാർ സുപ്രീംകോടതിയെ അറിയിച്ചു.
തുടർന്നാണ് നടപടികൾ സുപ്രീംകോടതി സ്റ്റേ ചെയ്തത്. എന്നാൽ നിയമം നിലനിർത്തണമെങ്കിൽ നഷ്‌ടപരിഹാരത്തിനുള്ള വകുപ്പുകൾ പുതുതായി ചേർക്കേണ്ടിവരുമെന്നും ഭരണഘടനയുടെ ഒമ്പതാം ഷെഡ്യൂളിൽ ഉൾപ്പെടുത്തേണ്ടിവരുമെന്നും ചീഫ് ജസ്റ്റീസ് വാക്കാൽ പരാമർശിച്ചു. പിരിച്ചെടുത്ത റോയൽറ്റി തുക കോടതിയിൽ കെട്ടിവയ്ക്കണമെന്നു ക്വാറി ഉടമകൾ കോടതിയിൽ വാദിച്ചപ്പോൾ സംസ്ഥാനത്തിന്‍റെ ധനസ്ഥിതിയെക്കുറിച്ച് ബെഞ്ച് ഓർമപ്പെടുത്തി.
Kerala
കൊച്ചി: എച്ച്‌ഐവി ബാധിതര്‍ കക്ഷികളായ കേസുകള്‍ക്ക് മുന്‍ഗണന നല്‍കാനും വ്യക്തിത്വം രഹസ്യമാക്കി വിവരങ്ങള്‍ ശേഖരിക്കാനും ഹൈക്കോടതിയില്‍ പുതിയ ക്രമീകരണം.
സുപ്രീംകോടതിയുടെ നിര്‍ദേശപ്രകാരം എച്ച്‌ഐവി ബാധിതരായ കക്ഷികള്‍ക്ക് തങ്ങളുടെ വിവരങ്ങള്‍ വെളിപ്പെടുത്താന്‍ ഇ-ഫയലിംഗ് പോര്‍ട്ടലില്‍ പുതിയ സംവിധാനം ഏര്‍പ്പെടുത്തി.
വ്യക്തിഗതമായി കേസുകള്‍ ഫയല്‍ ചെയ്യുന്നവരുടെ വിവരങ്ങള്‍ അതീവരഹസ്യമായി സൂക്ഷിക്കുമെന്നും കക്ഷികളുടെ സ്വകാര്യത പൂര്‍ണമായും സംരക്ഷിക്കുമെന്നും ഹൈക്കോടതി രജിസ്ട്രാര്‍ ജനറലിന്‍റെ സര്‍ക്കുലറില്‍ പറയുന്നു.
ഹര്‍ജികള്‍ ഫയല്‍ ചെയ്യുന്ന സമയത്തുതന്നെ ഈ വിവരങ്ങള്‍ രേഖപ്പെടുത്താന്‍ സൗകര്യമുണ്ടാകുമെന്നും വ്യക്തമാക്കിയിട്ടുണ്ട്.
Kerala
കൊച്ചി: മാനസികാരോഗ്യ കേന്ദ്രം എന്നു കേള്‍ക്കുമ്പോഴുണ്ടാകുന്ന അസ്വസ്ഥത ഒഴിവാക്കാന്‍ ഇത്തരം കേന്ദ്രങ്ങളുടെ പേരുമാറ്റം സര്‍ക്കാര്‍ പരിഗണിക്കണമെന്ന് ഹൈക്കോടതി.
ഇക്കാര്യത്തില്‍ സെപ്റ്റംബര്‍ 15നകം നിലപാട് അറിയിക്കാന്‍ ജസ്റ്റീസുമാരായ ദേവന്‍ രാമചന്ദ്രന്‍, ബസന്ത് ബാലാജി എന്നിവരടങ്ങുന്ന ഡിവിഷന്‍ ബെഞ്ച് നിര്‍ദേശം നല്‍കി.
സംസ്ഥാനത്തെ മൂന്ന് മാനസികാരോഗ്യ കേന്ദ്രങ്ങളിലും കോടതി നേരിട്ടു പരിശോധന നടത്തിയശേഷം വിഷയം പരിഗണിച്ചപ്പോള്‍ അമിക്കസ് ക്യൂറി സത്യശ്രീ പ്രിയയാണ് മാനസികാരോഗ്യ കേന്ദ്രം എന്ന പേര് മാറ്റണമെന്ന നിര്‍ദേശം മുന്നോട്ടുവച്ചത്.
ഇന്‍സ്റ്റിറ്റ്യൂട്ട് ഓഫ് ബിഹേവിയറല്‍ മാനേജ്മെന്‍റ് എന്ന രീതിയിലാകണം പേരുമാറ്റമെന്നും നിര്‍ദേശിച്ചു. പേരൊന്നും മുന്നോട്ടുവയ്ക്കുന്നില്ലെങ്കിലും ആശുപത്രികള്‍ക്കു സെന്‍റര്‍ ഫോര്‍ ഫിസിക്കല്‍ ഹെല്‍ത്ത് എന്നതരത്തിലുള്ള പേരുകള്‍ ഉചിതമല്ലെന്നും നയപരമായ തീരുമാനത്തിന്‍റെ ഭാഗമായതിനാല്‍ വിഷയം സര്‍ക്കാര്‍തന്നെ പരിഗണിക്കട്ടെയെന്നും കോടതി വ്യക്തമാക്കി.
Kerala
കൊച്ചി: മലപ്പുറം കുരുളായി ആയുധപരിശീലന കേസില്‍ എന്‍ഐഎ അറസ്റ്റ് ചെയ്ത മാവോവാദി നേതാവ് തമിഴ്‌നാട് സ്വദേശി അയ്യപ്പന്‍റെ ജാമ്യഹര്‍ജി ഹൈക്കോടതി തള്ളി.
2022 ജൂണ്‍ 24ന് അറസ്റ്റിലായ അയ്യപ്പന്‍ അന്നുമുതല്‍ ജയിലിലാണ്. നാലു വര്‍ഷമായി ജയിലിലാണെന്നതിന്‍റെ പേരില്‍ മാത്രം ജാമ്യം അനുവദിക്കാനാകില്ലെന്ന് ജസ്റ്റീസുമാരായ സതീഷ് നൈനാന്‍, പി. കൃഷ്ണകുമാര്‍ എന്നിവർ വ്യക്തമാക്കി. മൂന്നു മാസത്തിനകം കേസിന്‍റെ വിചാരണ പൂര്‍ത്തിയാകുമെന്ന എന്‍ഐഎയുടെ വിശദീകരണവും കോടതി കണക്കിലെടുത്തു.
2016 കാലഘട്ടത്തില്‍ മലപ്പുറം കുരുളായി വനമേഖലയില്‍ രാജ്യവിരുദ്ധ പ്രവര്‍ത്തനങ്ങള്‍ക്കായി ആയുധപരിശീലനം നടത്തിയെന്നാണ് അയ്യപ്പനെതിരായ കേസ്. ആറു മാസത്തിനകം വിചാരണ പൂര്‍ത്തിയാക്കിയില്ലെങ്കില്‍ വീണ്ടും ജാമ്യഹര്‍ജി സമര്‍പ്പിക്കാന്‍ ഹര്‍ജിക്കാരനു സ്വാതന്ത്ര്യമുണ്ടെന്ന് കോടതി വ്യക്തമാക്കി.
Kerala
കൊച്ചി: കോടതിനടപടികള്‍ അനുമതിയില്ലാതെ റിക്കാർഡ് ചെയ്തു യുട്യൂബില്‍ പ്രചരിപ്പിച്ച അഭിഭാഷകന് കാരണംകാണിക്കല്‍ നോട്ടീസ് നല്‍കി ഹൈക്കോടതി.
രജിസ്ട്രി സമര്‍പ്പിച്ച റിപ്പോര്‍ട്ടിന്‍റെ അടിസ്ഥാനത്തില്‍ സ്വമേധയാ സ്വീകരിച്ച കോടതിയലക്ഷ്യ നടപടിയുടെ ഭാഗമായി അഭിഭാഷകനായ മാത്യൂസ് ജെ. നെടുമ്പാറയ്ക്കാണ് ചീഫ് ജസ്റ്റീസ് സൗമെന്‍ സെന്‍, ജസ്റ്റീസ് വി.എം. ശ്യാംകുമാര്‍ എന്നിവരടങ്ങുന്ന ഡിവിഷന്‍ ബെഞ്ച് സെപ്റ്റംബര്‍ ഏഴിനകം വിശദീകരണം നല്‍കാന്‍ നിര്‍ദേശിച്ചു നോട്ടീസ് നല്‍കിയത്.
ഇനിയൊരു ഉത്തരവ് ഉണ്ടാകുംവരെ കേരളത്തിലെ കോടതികളില്‍ ഓണ്‍ലൈനായോ വെര്‍ച്വലായോ ഹാജരാകുന്നതില്‍നിന്ന് മാത്യൂസ് നെടുമ്പാറയെ കോടതി വിലക്കി.
Kerala
കൊച്ചി: സ്തനാർബുദ ചികിത്സയ്ക്ക് കുറഞ്ഞ വിലയുള്ള പാൽബൊസിക്ലിബ് എന്ന മരുന്ന് ഉപയോഗിക്കാനാകുമോയെന്ന് അറിയിക്കാൻ ഡൽഹി എയിംസിലെ ദേശീയ കാൻസർ ഇൻസ്റ്റിറ്റ്യൂട്ട്, കോൽക്കത്തയിലെ ചിത്തരഞ്ജൻ നാഷണൽ കാൻസർ ഇൻസ്റ്റിറ്റ്യൂട്ട് എന്നീ സ്ഥാപനങ്ങൾക്കു ഹൈക്കോടതി നിർദേശം.
റിബോസിക്ലിബ് എന്ന വിലകൂടിയ മരുന്ന് ഉപയോഗിക്കുന്നതുമൂലം ഒരു മാസത്തെ ചികിത്സയ്ക്കായി 58,000 രൂപയോളം ചെലവ് വരുന്ന സാഹചര്യത്തിലാണു ജസ്റ്റീസ് ഹരിശങ്കർ വി. മേനോൻ ഇതുസംബന്ധിച്ച് നിലപാട് തേടുന്നത്.
ചികിത്സിക്കുന്ന ഡോക്ടറാണ് മരുന്ന് ഉപയോഗ കാര്യത്തിൽ തീരുമാനമെടുക്കേണ്ടതെന്ന് തിരുവനന്തപുരം റീജണൽ കാൻസർ സെന്‍ററും (ആർസിസി) പാൽബൊസിക്ലിബ് മരുന്ന് റിബോസിക്ലിബിനു പകരമായി ഉപയോഗിക്കാനാകില്ലെന്ന് കോടതി ചമതലപ്പെടുത്തിയ അമിക്കസ് ക്യൂറിയും അറിയിച്ചിരുന്നു. ഇക്കാര്യങ്ങൾ കൂടി പരിഗണിച്ചാണ് കോടതി ദേശീയസ്ഥാപനങ്ങളുടെ നിലപാടുകൂടി ആരായുന്നത്.
സ്തനാർബുദ ബാധിതയായ സ്ത്രീ നൽകിയ ഹർജി അവരുടെ മരണത്തെത്തുടർന്ന് കോടതി സ്വമേധയാ പരിഗണിക്കുകയാണ്. കേസിൽ കക്ഷിചേരാനുള്ള മലപ്പുറം സ്വദേശിനിയായ രോഗബാധിതയുടെ അപേക്ഷ കോടതി അനുവദിച്ചു. ഹർജി വീണ്ടും സെപ്റ്റംബർ മൂന്നിന് പരിഗണിക്കും.
Kerala
കൊച്ചി: തെരുവുനായ് നിയന്ത്രണം സംബന്ധിച്ച കേസിൽ സംസ്ഥാനത്തെ എല്ലാ തദ്ദേശ സ്ഥാപനങ്ങളെയും കക്ഷിചേർക്കാൻ ഹൈക്കോടതി ഉത്തരവ്.
സുപ്രീംകോടതിയുടെ മാർഗനിർദേശങ്ങൾ പാലിക്കുന്നുണ്ടോയെന്ന് ഉറപ്പുവരുത്തുന്നതിന്‍റെ ഭാഗമായാണ് ഹൈക്കോടതി സ്വമേധയാ സ്വീകരിച്ചിട്ടുള്ള കേസിൽ തദ്ദേശസ്ഥാപനങ്ങളെ കക്ഷി ചേർക്കുന്നത്.
ഇതിനുള്ള അപേക്ഷ വ്യാഴാഴ്ചയ്ക്കകം സമർപ്പിക്കാൻ ജസ്റ്റീസുമാരായ എ.കെ. ജയശങ്കരൻ നമ്പ്യാർ, എ.കെ. പ്രീത എന്നിവരടങ്ങുന്ന ഡിവിഷൻ ബെഞ്ച് സർക്കാരിനോട് നിർദേശിച്ചു. ഹർജി വെള്ളിയാഴ്ച പരിഗണിക്കും.
Kerala
കൊച്ചി: അഞ്ചരക്കണ്ടി ദന്തൽ കോളജ് വിദ്യാർഥി നിതിൻ രാജിന്‍റെ മരണവുമായി ബന്ധപ്പെട്ട കേസിലെ മുഖ്യപ്രതിയെ ആദ്യം രക്ഷപ്പെടാൻ അനുവദിച്ച അന്വേഷണ ഉദ്യോഗസ്ഥനെതിരേ നടപടിയില്ലാത്തതിൽ ആഭ്യന്തരവകുപ്പിനെ വിമർശിച്ചു ഹൈക്കോടതി.
ഇത്തരമൊരു ഉദ്യോഗസ്ഥനെതിരേ ഇതുവരെ നടപടിയെടുക്കാത്തത് ആഭ്യന്തരവകുപ്പിന്‍റെ ഗുരുതര വീഴ്ചയാണെന്നും ഓപ്പറേഷൻ തൂഫാനല്ലാത്ത ആഭ്യന്തരവകുപ്പിന്‍റെ മറ്റു നടപടികളെല്ലാം പക്ഷപാതപരമാണെന്നും ജസ്റ്റീസ് എ. ബദറുദ്ദീൻ വിമർശിച്ചു.
അന്വേഷണ ഉദ്യോഗസ്ഥനായ ഡിവൈഎസ്പി സുധീർ കല്ലൻ സർവീസിൽ തുടരുന്നതു സംബന്ധിച്ച് കോടതി ആരാഞ്ഞപ്പോൾ, സസ്പെൻഷൻ സംബന്ധിച്ച നടപടിക്രമങ്ങൾ പാലിക്കേണ്ടതിനാലാണ് ഉദ്യോഗസ്ഥനെതിരായ തീരുമാനം വൈകുന്നതെന്നായിരുന്നു വിജിലൻസ് അഭിഭാഷകന്‍റെ വാദം. നടപടിയുടെ കാര്യത്തിൽ ഇരട്ടത്താപ്പാണു കാട്ടുന്നതെന്ന് കോടതി ചൂണ്ടിക്കാട്ടി.
സ്വാതന്ത്ര്യദിന ക്വിസിൽ സവർക്കറെക്കുറിച്ചു ചോദ്യം എഴുതിയ അധ്യാപകനെയും തിരുവനന്തപുരം കോർപറേഷൻ വിഷയത്തിൽ കത്തയച്ച അണ്ടർ സെക്രട്ടറിയെയും എഡിജിപി അജിത്‌കുമാറിനെയും സസ്പെൻഡ് ചെയ്തത് ഇത്തരം നടപടിക്രമങ്ങൾ പാലിച്ചാണോയെന്നു കോടതി ചോദിച്ചു. ഈ കേസിൽ എന്താണ് ഇത്രയേറെ നപടിക്രമങ്ങൾ വേണ്ടിവരുന്നത്.
ഉയർന്ന ഉദ്യോഗസ്ഥർ പറഞ്ഞതുകൊണ്ടാണ് റാമിന്‍റെ അറസ്റ്റിൽ വീഴ്ച വരുത്തിയതെന്നറിയാമെന്നും കോടതി ചൂണ്ടിക്കാട്ടി. തുടർന്ന് അന്വേഷണത്തിലെ വീഴ്ചകളടക്കം വ്യക്തമാക്കി നിതിൻ രാജിന്‍റെ മാതാപിതാക്കൾ നൽകിയ ഉപഹർജി കോടതിയുടെ ഉത്തരവിനായി മാറ്റി.
Kerala
കൊച്ചി: എൽപി സ്കൂൾ വിദ്യാർഥികൾക്കുള്ള ഫ്രീഡം ക്വിസിൽ വി.ഡി സർവർക്കറെ പുകഴ്ത്തി ചോദ്യാവലി തയാറാക്കിയ അധ്യാപകനെ സസ്പെൻഡ് ചെയ്തതിന്‍റെ കൃത്യമായ കാരണം സംസ്ഥാന സർക്കാർ ഇന്ന് ഹൈക്കോടതിയെ അറിയിക്കും.
സസ്പെൻഷൻ നടപടി റദ്ദാക്കണമെന്ന് ആവശ്യപ്പെട്ട് കാസർഗോഡ് പള്ളത്തടുക്ക എയുപി സ്കൂൾ അധ്യാപകനായ കെ. ഗുരുപ്രസാദ് നൽകിയ ഹർജിയിലാണ് ജസ്റ്റിസ് വിജു എബ്രഹാം ഉൾപ്പെട്ട ബഞ്ച് സർക്കാരിനോട് വിശദീകരണം തേടിയത്.
ഫ്രീഡം ക്വിസിൽ സവർക്കറെ പുകഴ്ത്തിയുള്ള ചോദ്യം വന്നതിൽ പ്രതിഷേധം ശക്തമായിരുന്നു. മഞ്ചേശ്വരം, കുമ്പള, കാസർഗോഡ് ഉപജില്ലകളിലെ സ്കൂളുകളിലേക്ക്‌ നൽകിയ ചോദ്യാവലിയാണ് വിവാദമായത്. എൽപി സ്കൂൾ കുട്ടികൾക്കായി നടത്തിയ ക്വിസ് പരിപാടിയിലാണ് ബ്രിട്ടീഷുകാരിൽ നിന്ന് ഏറ്റവും കൂടുതൽ ശിക്ഷ അനുഭവിക്കേണ്ടിവന്ന സ്വാതന്ത്ര്യ സമര സേനാനിയായി വി.ഡി. സവർക്കറെ ഉൾപ്പെടുത്തിയത്.
സംഭവം വിവാദമായതോടെ അധ്യാപകനെ സസ്പെൻഡ് ചെയ്യുകയായിരുന്നു. അധ്യാപകന്‍റെ സസ്പെൻഷൻ സ്റ്റേ ചെയ്യാൻ കഴിഞ്ഞ തവണ തയാറാകാതിരുന്ന കോടതി, സർക്കാരിന്‍റെ വിശദീകരണം കേട്ട ശേഷമായിരിക്കും തുടർ ഉത്തരവ് പുറപ്പെടുവിക്കുക.
ADVERTISEMENT
ADVERTISEMENT
SPACE FOR ADVERTISEMENT
Contact Numbers :
+91 481 2566706, 2566707, 2566708
About Us Feedback Privacy Policy Terms and Conditions for Online Payment
E-paper LOGIN
LOGIN