23

വിവാഹം കഴിക്കാൻ ആഗ്രഹിക്കുന്നവർ പലപ്പോഴും തങ്ങളുടെ പങ്കാളിയെക്കുറിച്ച് ഒരു നീണ്ട പട്ടിക തന്നെ മനസിൽ സൂക്ഷിക്കാറുണ്ട്. എന്നാൽ, വിവാഹമോചിതനായ ഒരു ഐ.ഐ.ടി ബിരുദധാരി വധുവിനെ തേടി ഒരു പ്രമുഖ മാച്ച് മേക്കറെ സമീപിച്ചപ്പോൾ ഉണ്ടായ അനുഭവം ഇപ്പോൾ സോഷ്യൽ മീഡിയയിൽ വലിയ ചർച്ചയാവുകയാണ്.

ഓന്ദ്രില കപൂർ എന്ന മാച്ച് മേക്കറാണ് തനിക്ക് നേരിടേണ്ടി വന്ന അത്യന്തം വിചിത്രമായ ഈ അനുഭവം ലോകത്തോട് പങ്കുവെച്ചത്. താനുമായി സംസാരിച്ച 37 കാരനായ ഈ യുവാവ്, കമ്പനി ഡയറക്ടർ കൂടിയാണ്.

വിവാഹത്തിനായി തനിക്ക് വധുവിനെ കണ്ടെത്തി നൽകണമെന്ന് ആവശ്യപ്പെട്ട ഇദ്ദേഹം മുന്നോട്ടുവെച്ച നിബന്ധനകൾ കേട്ട് ശരിക്കും ഞെട്ടിപ്പോയെന്നാണ് ഓന്ദ്രില പറയുന്നത്.

30 വയസിൽ താഴെയുള്ളവളും, ഇതുവരെ വിവാഹം കഴിക്കാത്തവളും, മുൻപ് ഒരു തരത്തിലുമുള്ള പ്രണയബന്ധങ്ങളിൽ ഏർപ്പെടാത്തവളും ആയിരിക്കണം വധുവെന്നായിരുന്നു ഇദ്ദേഹത്തിന്‍റെ നിർബന്ധം. താൻ വിവാഹമോചിതനാണെങ്കിലും, പുരുഷനായ തനിക്ക് കഴിഞ്ഞ കാലത്തെക്കുറിച്ച് യാതൊരു ബാധ്യതയുമില്ലെന്നും അദ്ദേഹം വാദിച്ചു.

മുൻകാല ബന്ധങ്ങളുള്ള സ്ത്രീകൾ വിശ്വാസവഞ്ചന കാണിക്കാൻ സാധ്യതയുണ്ടെന്ന് ചില പഠനങ്ങൾ പറയുന്നുണ്ടെന്ന് വീമ്പിളക്കിയ ഇദ്ദേഹത്തിന്, എന്നാൽ ആ വിവരങ്ങളുടെ ഉറവിടം വെളിപ്പെടുത്താൻ കഴിഞ്ഞില്ല.

മറുപടിയായി, വിവാഹമോചിതനായ തന്നെ അത്രയും യോഗ്യതയുള്ള ഒരു യുവതി എന്തിന് വിവാഹം കഴിക്കണം എന്ന ലളിതമായ ചോദ്യം ഓന്ദ്രില തിരിച്ചു ചോദിച്ചു.

എന്തായാലും, ഇത്രയും യാഥാർഥ്യബോധമില്ലാത്തതും സ്ത്രീവിരുദ്ധവുമായ നിബന്ധനകളുമായി വരുന്ന ഒരു വ്യക്തിയെ സഹായിക്കാൻ തനിക്ക് കഴിയില്ലെന്ന് വ്യക്തമാക്കി അവർ ആ പ്രോജക്റ്റിൽ നിന്ന് പിന്മാറുകയായിരുന്നു.

ഇന്‍റർനെറ്റിൽ തരംഗമായി മാറിയ ഈ സംഭവം, വിവാഹാലോചനകളിൽ ഇന്നും നിലനിൽക്കുന്ന ഇരട്ടത്താപ്പിനെയും ലിംഗപരമായ വിവേചനങ്ങളെയും കുറിച്ചുള്ള ചൂടേറിയ ചർച്ചകൾക്ക് വഴിവെച്ചിരിക്കുകയാണ്.

പങ്കാളിയെ തിരഞ്ഞെടുക്കുമ്പോൾ ആയുസും ആരോഗ്യവും പ്രായവും സമുദായവും നോക്കുന്നതിനേക്കാൾ ഉപരിയായി, ജീവിതത്തെ ഒരുപോലെ കാണാൻ കഴിയുന്ന മാനസിക പക്വതയാണ് വേണ്ടതെന്നാണ് ഈ വാർത്തയോട് പ്രതികരിക്കുന്ന ഭൂരിഭാഗം പേരും അഭിപ്രായപ്പെടുന്നത്.

Tags : ModernDating RelationshipAdvice Matchmaking GenderEquality DoubleStandards