കത്തോലിക്ക കോണ്ഗ്രസ് അന്താരാഷ്‌ട്രസമ്മേളനം ഇന്നും നാളെയും
Saturday, May 17, 2025 2:06 AM IST
പാലക്കാട്: സീറോമലബാർ സഭയുടെ സമുദായസംഘടനയായ കത്തോലിക്ക കോണ്ഗ്രസ് രൂപീകൃതമായി 107 വർഷം പൂർത്തിയാകുന്നതോടനുബന്ധിച്ച് ഇന്നും നാളെയും അന്താരാഷ്‌ട്രസമ്മേളനവും അവകാശപ്രഖ്യാപനറാലിയും നടത്തുമെന്നു ഭാരവാഹികൾ പത്രസമ്മേളനത്തിൽ പറഞ്ഞു. പ്രതിനിധിസമ്മേളനവും ഛായാചിത്ര-പതാകപ്രയാണവും ഉണ്ടാകും.
ഇന്നു വൈകുന്നേരം അഞ്ചിനു പാലയൂർ തീർഥാടനകേന്ദ്രത്തിൽനിന്നു വിശുദ്ധ തോമാശ്ലീഹായുടെ ഛായാചിത്രം വഹിച്ചുകൊണ്ടുള്ള പ്രയാണവും താമരശേരി കത്തീഡ്രലിൽനിന്നു കത്തോലിക്ക കോണ്ഗ്രസിന്റെ പതാക വഹിച്ചുകൊണ്ടുള്ള വിളംബരജാഥയും പാലക്കാട് കത്തീഡ്രൽ സ്ക്വയറിലുള്ള മാർ ജോസഫ് ഇരിന്പൻ നഗറിൽ എത്തിച്ചേരും. ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ പതാക ഉയർത്തി ഛായാചിത്രം പ്രതിഷ്ഠിക്കും. തുടന്നു വർക്കിംഗ് കമ്മിറ്റി യോഗം ചേരും.
നാളെ ഉച്ചയ്ക്കു രണ്ടിനു പതിനായിരങ്ങൾ പങ്കെടുക്കുന്ന അവകാശപ്രഖ്യാപനറാലി പാലക്കാട് കോട്ടമൈതാനത്തുനിന്നാരംഭിച്ച് പാലക്കാട് സെന്‍റ് റാഫേൽസ് കത്തീഡ്രൽ അങ്കണത്തിലെ മാർ ജോസഫ് ഇരിന്പൻ നഗറിൽ എത്തിച്ചേരും.
വിവിധ ഫ്ലോട്ടുകളുടെ അകന്പടിയോടെയുള്ള റാലിയിൽ എല്ലാ രൂപതയിൽനിന്നുള്ള അംഗങ്ങളും പാലക്കാട് രൂപതയിലെ എല്ലാ ഇടവകകളിൽനിന്നുള്ളവരും പങ്കെടുക്കും. തുടർന്നു നടക്കുന്ന പൊതുസമ്മേളനം സീറോമലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ ഉദ്ഘാടനം ചെയ്യും. പ്രഫ. രാജീവ് കൊച്ചുപറന്പിൽ അധ്യക്ഷനാകും.
കേരളത്തിനുപുറമേ ഇന്ത്യയിലെ എല്ലാ സംസ്ഥാനത്തുനിന്നുമുള്ള പ്രതിനിധികളും ഫ്രാൻസ്, ഓസ്ട്രേലിയ, യുകെ, അയർലൻഡ്, അമേരിക്ക, ഇറ്റലി, ഗൾഫ് രാജ്യങ്ങൾ, മറ്റ് ഏഷ്യൻ രാജ്യങ്ങൾ എന്നിവിടങ്ങളിൽനിന്നുള്ള പ്രതിനിധികളും പ്രവർത്തകരും പങ്കെടുക്കും.
ജസ്റ്റീസ് ജെ.ബി. കോശി കമ്മീഷൻ റിപ്പോർട്ട് നടപ്പാക്കണമെന്നും വന്യജീവി ആക്രമണത്തിനു ശാശ്വതപരിഹാരം കാണണമെന്നും ലഹരിവസ്തുക്കളുടെ വ്യാപനം തടയാൻ നടപടി സ്വീകരിക്കണമെന്നും കാർഷികവിലത്തകർച്ചയ്ക്കു പരിഹാരം കാണണമെന്നും അന്തർദേശീയസമ്മേളനം പ്രമേയത്തിലൂടെ ആവശ്യപ്പെടും.
പത്രസമ്മേളനത്തിൽ പാലക്കാട് രൂപത ബിഷപ് പീറ്റർ കൊച്ചുപുരയ്ക്കൽ, കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് പ്രഫ. രാജീവ് കൊച്ചുപറന്പിൽ, ജനറൽ സെക്രട്ടറി ഡോ. ജോസുകുട്ടി ഒഴുകയിൽ, ഡയറക്ടർ റവ. ഡോ. ഫിലിപ്പ് കവിയിൽ, രൂപത ഡയറക്ടർ ഫാ. ചെറിയാൻ ആഞ്ഞിലിമൂട്ടിൽ, പ്രസിഡന്‍റ് അഡ്വ. ബോബി ബാസ്റ്റിൻ, ഗ്ലോബൽ വൈസ് പ്രസിഡന്‍റുമാരായ ട്രീസ ലിസ് സെബാസ്റ്റ്യൻ, രാജേഷ് തുടങ്ങിയവർ പങ്കെടുത്തു.