ഭിന്നശേഷി ഉദ്യോഗാർഥികളുടെ നിയമനത്തിൽ മാർഗനിർദേശം പുറപ്പെടുവിച്ചു
Monday, June 30, 2025 2:37 AM IST
തിരുവനന്തപുരം: സംസ്ഥാനത്തെ എയ്ഡഡ് സ്കൂളുകളിലെ ഭിന്നശേഷി നിയമനം സംബന്ധിച്ച സർക്കാർ രൂപീകരിച്ച സമിതികളുടെ പ്രവർത്തനത്തിനുള്ള മാർഗനിർദേശം പുറപ്പെടുവിച്ച് ഉത്തരവിറക്കി.
ഭിന്നശേഷി ഉദ്യോഗാർഥികളുടെ നിയമനം സ്പെഷൽ എംപ്ലോയ്മെന്റ് എക്സ്ചേഞ്ചിൽനിന്നുള്ള റാങ്ക് ലിസ്റ്റിലെ സീനിയോറിറ്റി അടിസ്ഥാനമാക്കി വേണമെന്നതാണ് പ്രധാന നിർദേശം.
ഒന്നിലധികം ഉദ്യോഗാർഥികൾ ഒരേ ഒഴിവ് ആവശ്യപ്പെട്ടാൽ ഭിന്നശേഷി നിയമപ്രകാരമുള്ള റൊട്ടേഷൻ വ്യവസ്ഥകൾക്ക് അനുസരിച്ച് എംപ്ലോയ്മെന്റ് രജിസ്ട്രേഷൻ സീനിയോറിറ്റി അടിസ്ഥാനമാക്കി നിയമനം നടത്തണം.
സമിതിയുടെ പ്രവർത്തനത്തിനായി സമന്വയ സോഫ്റ്റ്വേറിൽ പ്രത്യേക മൊഡ്യൂൾ ജൂലൈ ഒന്നിനു മുന്പ് പ്രവർത്തനസജ്ജമായെന്നു പൊതുവിദ്യാഭ്യാസ ഡയറക്ടർ ഉറത്തു വരുത്തണം.
സമന്വയ സോഫ്റ്റ്വേറിൽ സ്കൂൾ മാനേജർമാർ ഭിന്നശേഷി ഒഴിവുകൾ ജൂലൈ ഏഴിനു മുന്പ് അപ്‌ലോഡ് ചെയ്യുകയും മാനേജർമാർ റിപ്പോർട്ട് ചെയ്തിട്ടുള്ള ഒഴിവുകൾ ചട്ടപ്രകാരം ഉള്ളതാണെന്ന റിപ്പോർട്ട് ബന്ധപ്പെട്ട വിദ്യാഭ്യാസ ഓഫീസർമാർ ഉറപ്പു വരുത്തി ജില്ലാതല സമിതിക്ക് പ്രൊപ്പോസൽ സമർപ്പിക്കുകയും ചെയ്യണം. ജില്ലാതല സമിതികളുടെ പ്രവർത്തനങ്ങൾ ജൂലൈ 21ന് മുന്പ് ആരംഭിക്കണം.
വിവിധ എയ്ഡഡ് സ്കൂൾ മാനേജ്മെന്‍റുകൾ അതതു വിഭാഗങ്ങൾക്കായി നീക്കിവച്ചിരിക്കുന്ന ഒഴിവുകൾ ജില്ലാടിസ്ഥാനത്തിൽ ഒരു യൂണിറ്റായി പരിഗണിച്ച് വേണം സീനിയോറിറ്റി പട്ടിക തയാറാക്കേണ്ടത്.
ഓരോ അക്കാദമിക വർഷത്തിന്‍റെയും ആദ്യം തന്നെ ലിസ്റ്റ് പ്രസിദ്ധീകരിക്കണം. ലിസ്റ്റിൽ നിന്നു ജില്ലാതല സമിതി ശിപാർശ ചെയ്യുന്ന ഉദ്യോഗാർഥിക്ക് 15 ദിവസത്തിനകം നിയമന ഉത്തരവ് നൽകണമെന്നും ഉത്തരവിൽ വ്യക്തമാക്കുന്നു.