തൃശൂർ: സുകുമാർ അഴീക്കോടിന്റെ ജൻമശതാബ്ദിയോടനുബന്ധിച്ച് ഈവർഷം ദേശീയസെമിനാർ അടക്കമുള്ള വിവിധ പരിപാടികൾ സംഘടിപ്പിക്കുന്നതിനു സംസ്ഥാനസർക്കാർ നേതൃത്വം നൽകുമെന്നു മന്ത്രി കെ. രാജൻ. അഴീക്കോടിന്റെ 14-ാം ഓർമദിനമായ ഇന്നലെ എരവിമംഗലത്തെ സുകുമാർ അഴീക്കോട് സ്മാരകമന്ദിരത്തിൽ അനുസ്മരണയോഗം ഉദ്ഘാടനം ചെയ്യുകയായിരുന്നു അദ്ദേഹം.
അനീതിക്കെതിരേ സദാ ഉയർന്നിരുന്ന ശബ്ദമായിരുന്നു സുകുമാർ അഴീക്കോടിന്റേത്. നിലപാടുകളിൽനിന്നു വ്യതിചലിക്കാത്ത വ്യക്തിയായിരുന്നു അദ്ദേഹം.
അദ്ദേഹം ഉയർത്തിപ്പിടിച്ച മൂല്യങ്ങൾ ഉൾക്കൊണ്ടു മുന്നോട്ടുപോകാൻ വരുംതലമുറയ്ക്കു കഴിയട്ടെയെന്നും മന്ത്രി പ്രത്യാശിച്ചു.
നടത്തറ ഗ്രാമപഞ്ചായത്ത് പ്രസിഡന്റ് ജോബി ജോപ്പൻ അധ്യക്ഷത വഹിച്ചു. വൈസ് പ്രസിഡന്റ് ഷീന പൊറ്റക്കാട്, എം.സി. തൈക്കാട്, സാഹിത്യ അക്കാദമി മാനേജർ പി.കെ. മിനി, സെക്രട്ടറി സി.പി. അബൂബക്കർ, സർവോദയ ദർശൻ ചെയർമാൻ എം. പീതാംബരൻ എന്നിവർ പ്രസംഗിച്ചു.
Tags : nattu vishesham Azhikode voice raised