കുണ്ടറ: വിവാഹ ബ്രോക്കർ എന്ന വ്യാജേന വയോധികനെ ആക്രമിച്ച് സ്വർണമാല കവർന്ന കേസിലെ രണ്ടാം പ്രതിയെ കുണ്ടറ പൊലിസ് പിടികൂടി. തഴുത്തല കണ്ണനല്ലൂർ നോർത്ത് മൈലക്കാട് ജയേഷ് ഭവനത്തിൽ (മുകുളുവിള വീട്) ജിനേഷ് (26) ആണ് പിടിയിലായത്.
കൊട്ടിയം പൊലിസ് സ്റ്റേഷൻ പരിധിയിൽനിന്നാണ് ഇയാളെ പൊലിസ് സംഘം വലയിലാക്കിയത്. ഇരവിപുരം, കൊട്ടാരക്കര, കൊല്ലം വെസ്റ്റ്, കൊട്ടിയം, കല്ലമ്പലം, പാരിപ്പള്ളി, ചാത്തന്നൂർ എന്നീ പൊലിസ് സ്റ്റേഷനുകളിൽ പോക്സോ, മോഷണം ഉൾപ്പടെയുള്ള നിരവധി കേസുകൾ ഇയാൾക്കെതിരെ നിലവിലുണ്ട്.
കുണ്ടറ പൊലിസ് സ്റ്റേഷൻ എസ്എച്ച്ഒ സുനുകുമാറിന്റെ നേതൃത്വത്തിൽ എസ്ഐമാരായ പ്രിയ, ദീപു പിള്ള, അരുൺ ചന്ദ്രൻ, എഎസ്ഐ അനിൽ, എഎസ്ഐ ഷിന്റോ, സിപിഒമാരായ അൻവർ, ശ്രീജിത്ത്, ശരണ്യ എന്നിവരടങ്ങിയ പ്രത്യേക അന്വേഷണ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. ചന്ദനത്തോപ്പ് സ്വദേശിനി ഹസീനയെ മുൻപ് ഈ കേസിൽ അറസ്റ്റ് ചെയ്തിരുന്നു.