എരുമേലിയിൽ മോട്ടോർ വാഹനവകുപ്പിന്റെ റോഡ് സേഫ് സോൺ കൺട്രോൾ റൂമിന്റെ ഉദ്ഘാടനം എം.ജെ. സെബാസ്റ്റ്യൻ എംഎൽഎ നിർവഹിക്കുന്നു.
എരുമേലി: ശബരിമല തീർഥാടകരുടെ സുരക്ഷയ്ക്കായി മോട്ടോർ വാഹനവകുപ്പിന്റെ സേഫ് സോൺ പദ്ധതി എരുമേലിയിൽ ആരംഭിച്ചു. കൺട്രോൾ റൂമിന്റെ ഉദ്ഘാടനം എരുമേലി ശബരി ഹോമിൽ എം.ജെ. സെബാസ്റ്റ്യൻ എംഎൽഎ നിർവഹിച്ചു. സംസ്ഥാനത്ത് സേഫ് സോൺ പ്രവർത്തനങ്ങൾക്ക് 80 ലക്ഷം രൂപ അനുവദിച്ചിട്ടുണ്ടെന്ന് എംഎൽഎ പറഞ്ഞു.
എരുമേലി-കണമല, എരുമേലി-പൊൻകുന്നം, എരുമേലി-മുണ്ടക്കയം, കണമല-അഴുത തുടങ്ങിയ റൂട്ടുകളിലാണ് 24 മണിക്കൂറും സേവനമുള്ളത്. ഏഴ് സ്ക്വാഡുകൾ തീർഥാടനകാലം തീരുന്നതുവരെ നിരത്തിലുണ്ടാവും. കൂടാതെ അടിയന്തര ഘട്ടങ്ങളിൽ പ്രവർത്തിക്കാൻ ദ്രുതകർമ സംഘവും സജ്ജമാണ്. സേഫ് സോൺ നേതൃത്വത്തിൽ തീർഥാടന പാതകളിലെ 24 ആശുപത്രികളെയും കോട്ടയം ജില്ലയിലെ 44 ആശുപത്രികളെയും ബന്ധിപ്പിച്ച് അടിയന്തര ചികിത്സാ സൗകര്യമൊരുക്കിയിട്ടുണ്ട്. അടിയന്തര സാഹചര്യങ്ങളിൽ നേരിട്ട് വിളിക്കാവുന്ന 27 ആംബുലൻസുകളുടെ സേവനവും സജ്ജമാണ്.
ഉദ്ഘാടന യോഗത്തിൽ കോട്ടയം എൻഫോഴ്സ്മെന്റ് ആർടിഒ ഷീബ രാജൻ അധ്യക്ഷത വഹിച്ചു. കോട്ടയം ആർടിഒ ഡി. ജയരാജ്, കൊല്ലം എൻഫോഴ്സ്മെന്റ് ആർടിഒ ശങ്കരപ്പിള്ള, കാഞ്ഞിരപ്പള്ളി ജോയിന്റ് ആർടിഒ ശ്രീജിത്ത്, ജോയിന്റ് ആർടിഒ ഷാനവാസ് കരിം എന്നിവർ പങ്കെടുത്തു.
സേഫ് സോൺ കൺട്രോൾ റൂം നമ്പറുകൾ: ഇലവുങ്കൽ: 9400044991, 9562318181, എരുമേലി: 9496367974, 8547639173, കുട്ടിക്കാനം: 9446037100, 8547639176.
തീർഥാടകരുടെ തിരക്ക് നിയന്ത്രിക്കാൻ സംവിധാനം
എരുമേലി: തീർഥാടകരുടെ തിരക്ക് നിയന്ത്രിക്കാൻ പ്രത്യേക സംവിധാനം നടപ്പിലാക്കുമെന്ന് ജില്ലാ പൊലിസ് ചീഫ് സാബു മാത്യു അറിയിച്ചു. സന്നിധാനത്തും പമ്പയിലും തിരക്ക് വർധിക്കുന്നതിനനുസരിച്ച് എരുമേലിയിലും മറ്റ് ഇടത്താവളങ്ങളിലും തീർഥാടകരെ താത്കാലികമായി നിയന്ത്രിച്ചു നിർത്തുന്ന ഹോൾഡിംഗ് സംവിധാനമാണ് നടപ്പാക്കുകയെന്ന് അദ്ദേഹം പറഞ്ഞു.
നിലയ്ക്കലിൽ തീർഥാടകർ തിങ്ങിനിറയുന്ന സാഹചര്യമുണ്ടായാൽ എരുമേലിയിലും അഴുതക്കടവ്, കാളകെട്ടി എന്നിവിടങ്ങളിലുമായി ഭക്തരെ ക്രമീകരിക്കും. തിരക്കേറിയ നാല്-അഞ്ച് ദിവസങ്ങളിൽ മാത്രമായിരിക്കും ഇത്തരത്തിൽ താത്കാലിക നിയന്ത്രണങ്ങൾ ഏർപ്പെടുത്തുക. ഇതിനായി വിവിധ ജില്ലകളിലെ പൊലിസ് ഉദ്യോഗസ്ഥരെ ഏകോപിപ്പിച്ച് പ്രത്യേക വാട്സ്ആപ്പ് ഗ്രൂപ്പ് പ്രവർത്തിക്കും. കണമല ഇറക്കത്തിലും അട്ടിവളവിലും അപകടരഹിത യാത്രയ്ക്ക് മുൻഗണന നൽകുന്നതിന്റെ ഭാഗമായി സുരക്ഷാക്രമീകരണങ്ങൾ വർധിപ്പിച്ചെന്ന് അറിയിച്ചു.
വെർച്വൽ ക്യൂ ബുക്കിംഗ് രേഖ നിർബന്ധം
എരുമേലി: ശബരിമല തീർഥാടകർക്ക് പമ്പയിലേക്ക് കെഎസ്ആർടിസി ടിക്കറ്റ് ലഭിക്കണമെങ്കിൽ വെർച്വൽ ക്യൂ ബുക്കിംഗ് രേഖ ഹാജരാക്കണമെന്ന് നിർദേശം. രേഖയില്ലാത്തവർക്ക് നിലയ്ക്കൽ വരെ മാത്രമായിരിക്കും ടിക്കറ്റ് അനുവദിക്കുക. വെർച്വൽ ക്യൂ ബുക്കിംഗ് ലഭിക്കാത്തവർക്ക് നിലയ്ക്കലിലെ കൗണ്ടറിൽ സ്പോട്ട് ബുക്കിംഗ് നടത്താനുള്ള സൗകര്യമുണ്ട്. പമ്പയിൽ ഇത്തവണ സ്പോട്ട് ബുക്കിംഗ് ഇല്ലാത്തതിനാലാണ് ഈ ക്രമീകരണം ഏർപ്പെടുത്തുന്നത്.
മാലിന്യം: ദേവസ്വത്തിന് 5000 രൂപ പിഴ
എരുമേലി: ടൗണിൽ വലിയമ്പലത്തിന് സമീപം പാർക്കിംഗ് മൈതാനത്ത് നീക്കം ചെയ്യാതെ മാലിന്യങ്ങൾ കൂട്ടിയിട്ടതിന് ദേവസ്വം ബോർഡിന് എരുമേലി പഞ്ചായത്ത് 5000 രൂപ പിഴ ചുമത്തി. അതേസമയം മാലിന്യം നീക്കേണ്ട ചുമതല പഞ്ചായത്തിന്റേതാണെന്നിരിക്കേ പഞ്ചായത്തിന്റെ വീഴ്ചയ്ക്ക് ദേവസ്വം ബോർഡ് പിഴ അടയ്ക്കേണ്ട കാര്യമില്ലെന്ന് ദേവസ്വം അധികൃതർ പറയുന്നു.
ദേവസ്വം ലേലം ചെയ്ത കടകളിലും പാർക്കിംഗ് ഗ്രൗണ്ടുകളിലും മൂന്നു ബിന്നുകളിൽ പ്രത്യേകമായി മാലിന്യങ്ങൾ വേർതിരിച്ചിടുമെന്നും ഇത് ദേവസ്വത്തിന്റെ ചുമതലയിൽ നീക്കി പഞ്ചായത്തിന് കൈമാറുമെന്നുമാണ് ഇക്കഴിഞ്ഞ ഒക്ടോബർ 12നു നടന്ന മുന്നൊരുക്ക യോഗത്തിൽ ദേവസ്വം ബോർഡ് പ്രസിഡന്റ് കെ. ജയകുമാർ അറിയിച്ചിരുന്നത്. എന്നാൽ, ഇതുപ്രകാരം ദേവസ്വം ബോർഡ് നടപടികൾ സ്വീകരിച്ചിട്ടില്ലെന്ന് പഞ്ചായത്ത് അധികൃതർ പറയുമ്പോൾ മാലിന്യങ്ങൾ കൊണ്ടുപോകാൻ പഞ്ചായത്ത് നടപടിയെടുക്കുന്നില്ലെന്നാണ് ദേവസ്വം ബോർഡിന്റെ വിശദീകരണം.
Tags : Sabarimala Nattuvishesham DistrictNews