Trophy Boat Race
കൊല്ലം: പ്രസിഡന്റ്സ് ട്രോഫി 12-ാം എഡിഷനും ചാമ്പ്യന്സ് ബോട്ട് ലീഗ് ഫൈനലിനും ഒരുങ്ങി കൊല്ലം. 21ന് ഉച്ചയ്ക്ക് രണ്ടിന് കൊല്ലം അഷ്ടമുടി കായലില് നടക്കുന്ന വള്ളംകളിയുടെ രജിസ്ട്രേഷന് നാളെ വൈകു ന്നേരം അഞ്ചുവരെ നീട്ടി. ചെറുവള്ളങ്ങളുടെ ബോണസ് തുക ഉയര്ത്താനും കളക്ടര് ആനി ജൂല തോമസിന്റെ അധ്യക്ഷതയിലും വിഷ്ണു മോഹന് എംഎല്എയുടെ സാന്നിധ്യത്തിലും കളക്ടറേറ്റ് കോണ്ഫറന്സ് ഹാളില് ചേര്ന്ന അവലോകന യോഗത്തില് തീരുമാനമായി.
മുന്കാലങ്ങളില് വെപ്പ്, ഇരുട്ടുകുത്തി എ ഗ്രേഡ് വള്ളങ്ങള്ക്ക് 75,000 രൂപയായിരുന്ന ബോണസ് ഇത്തവണ ഒരു ലക്ഷം രൂപയാക്കി വര്ധിപ്പിച്ചു. ഈ ഇനങ്ങളില് വിജയികള്ക്ക് സമ്മാനത്തുകയായി 25,000 രൂപയും ട്രോഫിയും രണ്ടാം സ്ഥാനത്തെത്തുന്നവര്ക്ക് 20,000 രൂപയും ട്രോഫിയുമാണ് ലഭിക്കുക. ഇരുട്ടുകുത്തി ബി ഗ്രേഡ് വള്ളങ്ങള്ക്ക് 50,000 രൂപയായിരുന്ന ബോണസ് 75,000 ആക്കി വര്ധിപ്പിച്ചു. വിജയികള്ക്ക് സമ്മാനത്തുകയായി 20,000 രൂപയും ട്രോഫിയും രണ്ടാം സ്ഥാനത്തെത്തുന്നവര്ക്ക് 15,000 രൂപയും ട്രോഫിയും ലഭിക്കും. വനിതകളുടെ തെക്കനോടി വള്ളങ്ങള്ക്ക് 60,000 രൂപയായിരുന്ന ബോണസ് 75,000 രൂപയാക്കി വര്ധിപ്പിച്ചു. ഈ ഇനത്തില് വിജയികള്ക്ക് 25,000 രൂപയും ട്രോഫിയും രണ്ടാം സ്ഥാനത്തിന് 20,000 രൂപയും ട്രോഫിയുമാണ് സമ്മാനം. അഷ്ടമുടിക്കായലില് ആവേശത്തുഴയെറിയുന്ന ഒന്പതു ചുണ്ടന് വള്ളങ്ങളില് വിജയിയാകുന്ന ചുണ്ടന് പ്രസിഡന്റ്സ് ട്രോഫി സമ്മാനിക്കും. ചെറുവള്ളങ്ങളുടെ മത്സരങ്ങളില് ഏതെങ്കിലും ഇനങ്ങളില് രണ്ട് വള്ളങ്ങള് മാത്രം രജിസ്റ്റര് ചെയ്താലും മത്സരം നടത്താന് യോഗം തീരുമാനിച്ചു.
ഓളപ്പരപ്പിലെ ആവേശപ്പോരാട്ടങ്ങള്ക്ക് മുന്നോടിയായി ഇന്ന് മുതല് കലാസാംസ്കാരിക പരിപാടികള് ഇന്ന് ആരംഭിക്കും. പ്രസിഡന്റ്സ് ട്രോഫി വള്ളംകളിയുടെയും ചാമ്പ്യന്സ് ബോട്ട് ലീഗ് ഫൈനലിന്റെയും പ്രചാരണാര്ഥമുള്ള ഫുട്ബോള് മത്സരങ്ങള് ഇന്ന് വൈകുന്നേരം നാലിന് ആശ്രാമം മൈതാനത്ത് മേയര് എ.കെ. ഹഫീസ് ഉദ്ഘാടനം ചെയ്യും. ഇന്ന് ലീഗ് മത്സരങ്ങളും നാളെ ഫൈനല് മത്സരങ്ങളുമാണ് നടക്കുന്നത്. ലീഗ് മത്സരങ്ങളില് മന്ത്രി ബിന്ദു കൃഷ്ണയുടെ ടീമും കളക്ടര്, മേയര്, സ്പോര്ട്സ് കൗണ്സില് എന്നിവരുടെ ടീമുകളും ഏറ്റുമുട്ടും.
ജലോത്സവത്തോടനുബന്ധിച്ച് നാളെ നാല് മണിക്ക് പിഡബ്ല്യൂഡി റസ്റ്റ് ഹൗസ് പരിസരം മുതല് പ്രസിഡന്റ്സ് ട്രോഫി പവലിയന് വരെ വര്ണാഭമായ സാംസ്കാരിക ഘോഷയാത്ര നടക്കും. മന്ത്രിമാര്, ജനപ്രതിനിധികള്, മേയര്,കളക്ടർ, കലാകായിക സാംസ്കാരിക രംഗത്തെ പ്രമുഖര്, എന് എസ് എസ്, എസ്പിസി, എന്സിസി കേഡറ്റുകള്, കുടുംബശ്രീ പ്രവര്ത്തകര്, നാട്ടുകാര് തുടങ്ങിയവരും ഘോഷയാത്രയില് അണിചേരും. നാളെ രാവിലെ 6.30ന് മേയര്, കളക്ടര്, ജനപ്രതിനിധികള് എന്നിവരുടെ നേതൃത്വത്തില് ഡിടിപിസി, കോര്പറേഷന്, ഹരിതകര്മസേന, ബോട്ട് ഓപ്പറേറ്റേഴ്സ് അസോസിയേഷന് തുടങ്ങിയവരുടെ സഹകരണത്തോടെ വള്ളംകളി നടക്കുന്ന കായല് പ്രദേശം ശുചീകരിക്കും.
മികച്ച മീഡിയ കവറേജിന് പുരസ്കാരം
പ്രസിഡന്റ്സ് ട്രോഫി 12-ാം എഡിഷന്റെ ഭാഗമായി മികച്ച മാധ്യമ കവറേജിന് പുരസ്കാരങ്ങള് നല്കും. അച്ചടി മാധ്യങ്ങളിലെയും ദൃശ്യമാധ്യമങ്ങളിലെയും മികച്ച റിപ്പോര്ട്ടിംഗിനും അച്ചടി മാധ്യമങ്ങളിലെ മികച്ച ഫോട്ടോഗ്രാഫര്ക്കും ദൃശ്യമാധ്യമങ്ങളിലെ മികച്ച ക്യാമറാമാനുമാണ് അവാര്ഡ് നല്കുന്നത്. വള്ളംകളിയുമായി ബന്ധപ്പെട്ട് പത്രങ്ങളില് പ്രസിദ്ധീകരിച്ച റിപ്പോര്ട്ടുകളും ചിത്രങ്ങളും ദൃശ്യമാധ്യമങ്ങളില് സംപ്രേഷണം ചെയ്ത റിപ്പോര്ട്ടുകളും മികച്ച ദൃശ്യങ്ങളുമാണ് അവാര്ഡിനായി പരിഗണിക്കുക.
അച്ചടി മാധ്യമങ്ങളില് പ്രസിദ്ധീകരിച്ച വാര്ത്തകളുടെയും ചിത്രങ്ങളുടെയും അസലാണ് അവാര്ഡിനായി നല്കേണ്ടത്. ദൃശ്യമാധ്യമ സ്റ്റോറികള് പരമാവധി രണ്ട് മിനിറ്റില് കൂടാന് പാടില്ല. വീഡിയോ പെന്ഡ്രൈവില് സമര്പ്പിക്കണം.
സ്ഥാപന മേലധികാരിയുടെ സാക്ഷ്യപത്രവും പാസ് പോര്ട്ട് സൈസ് ഫോട്ടോയും ഫോണ്നമ്പരും സഹിതമാണ് അപേക്ഷിക്കേണ്ടത്. എന്ട്രികള് 28ന് വൈകുന്നേരം അഞ്ചുവരെ ജില്ലാ ഇന്ഫര്മേഷന്ഓഫിസില് സ്വീകരിക്കും. ലഭിച്ച എന്ട്രികളില്നിന്ന് മികച്ചതായി ജൂറി തെരഞ്ഞെടുക്കുന്നവയ്ക്കാണ് അവാര്ഡ് നല്കുക. ചുരുങ്ങിയത് നാല് എന്ട്രികളെങ്കിലും ഉണ്ടെങ്കിലേ അവാര്ഡ് നല്കുകയുള്ളൂ.
വ്ലോഗര്മാരുടെ യോഗം വിളിച്ചു
പ്രസിഡന്റ്സ് ട്രോഫി 12-ാം എഡിഷന് സാമൂഹ്യമാധ്യമങ്ങളില് മികച്ച കവറേജ് ഉറപ്പാക്കുന്നതിന്റെ ഭാഗമായി ജില്ലയിലെ വ്ളോഗര്മാരുടെ യോഗം വിളിച്ചു.
ഇന്ന് ഉച്ചയ്ക്ക് രണ്ടിന് ഡിടിപിസി ഓഫിസിലാണ് യോഗം. താത്പര്യമുള്ള വ്ലോഗര്മാര്ക്ക് പങ്കെടുക്കാം. സോഷ്യല് മീഡിയയില് തരംഗമാകുന്ന മികച്ച വ്ളോഗുകള് തയാറാക്കുന്ന വ്ലോഗര്ക്ക് പുരസ്കാരവും നല്കും.
സാംസ്കാരിക പരിപാടികൾ ഇന്നു മുതൽ
കൊല്ലം: സിബിഎൽ, പ്രസിഡന്റ്സ് ട്രോഫി വള്ളംകളിയോടനുബന്ധിച്ച് ഇന്ന് മുതൽ 20 വരെ വിവിധ കലാസാംസ്കാരിക പരിപാടികൾ സംഘടിപ്പിക്കാൻ ജില്ലാ പ്ലാനിംഗ് ഓഫിസിൽ കൂടിയ കൾച്ചറൽ കമ്മിറ്റി യോഗം തീരുമാനിച്ചു.
ഇന്ന് വൈകുന്നേരം 6.30ന് കെഎസ്ആർടിസിക്ക് സമീപമുള്ള ഡിടിപിസി വേദിയിൽ കലാമണ്ഡലം രതീഷ് ഭാസും സംഘവും മിഴാവ് തായമ്പകം അവതരിപ്പിക്കും.
നാളെ വൈകുന്നേരം 6.30ന് ആശ്രാമം ശ്രീനാരായണഗുരു സാംസ്കാരിക സമുച്ചയത്തിൽ ജോബ് കുര്യൻ ലൈവ് സംഗീത നിശ അവതരിപ്പിക്കും.
20ന് വൈകുന്നേരം 6.30ന് കെഎസ്ആർടിസിക്ക് സമീപമുള്ള ഡിടിപിസി വേദിയിൽ പാട്ടുപുര മത്തായി സുനിലും സംഘവും നാടൻപാട്ട് അവതരിപ്പിക്കും. രാത്രി 7.30ന് കീഴില്ലം ഉണ്ണിക്കൃഷ്ണനും സംഘവും മുടിയേറ്റ് അവതരിപ്പിക്കും.
Tags : Boat Race Nattuvishesham Districtnews