വോട്ടിംഗ് മെഷീനുകളുടെ കമ്മീഷനിംഗ് ജില്ലാ കളക്ടർ അർജുൻ പാണ്ഡ്യൻ വിലയിരുത്തുന്നു.
തൃശൂർ: തദ്ദേശസ്വയംഭരണ തെരഞ്ഞെടുപ്പിനോടനുബന്ധിച്ചുളള വോട്ടിംഗ് മെഷീനുകളുടെ കമ്മീഷനിംഗ് റിട്ടേണിംഗ് ഉദ്യോഗസ്ഥരുടെ നേതൃത്വത്തിൽ ആരംഭിച്ചു. തളിക്കുളം, പുഴയ്ക്കൽ ബ്ലോക്കുകളിലും കുന്നംകുളം നഗരസഭയിലുമാണ് ഇന്നലെ കമ്മിഷനിംഗ് നടന്നത്.
പുഴയ്ക്കൽ ബ്ലോക്കിലെ ഇവിഎം കമ്മിഷനിംഗ് കേന്ദ്രമായ പുറനാട്ടുകര ശ്രീ ശാരദ ഗേൾസ് സ്കൂളിലെയും തളിക്കുളം ബ്ലോക്കിലെ ഇവിഎം കമ്മീഷനിംഗ് കേന്ദ്രമായ നാട്ടിക ശ്രീനാരായണ കോളജിലെയും കമ്മീഷനിംഗ് കളക്ടർ അർജുൻ പാണ്ഡ്യൻ നേരിട്ടെത്തി വിലയിരുത്തി.
ചാവക്കാട്, ചൊവ്വന്നൂർ, വടക്കാഞ്ചേരി, പഴയന്നൂർ, ഒല്ലൂക്കര, മതിലകം, അന്തിക്കാട്, ചേർപ്പ്, ഇരിങ്ങാലക്കുട, വെള്ളാങ്കല്ലൂർ, മാള, ചാലക്കുടി എന്നീ ബ്ലോക്ക് പഞ്ചായത്തുകളുടെ പരിധിയിൽ വരുന്ന തദ്ദേശസ്ഥാപനങ്ങളിലേക്കുള്ള വോട്ടിംഗ് മെഷീനുകളുടെയും കോർപറേഷൻ, ചാലക്കുടി, ഇരിങ്ങാലക്കുട, കൊടുങ്ങല്ലൂർ, ചാവക്കാട്, ഗുരുവായൂർ, വടക്കാഞ്ചേരി നഗരസഭകളുടെയും വോട്ടിംഗ് മെഷീനുകളുടെയും കമ്മീഷനിംഗ് ഇന്നു നടക്കും.
കൊടകര ബ്ലോക്ക് പഞ്ചായത്ത് പരിധിയിൽ വരുന്ന അളഗപ്പനഗർ, കൊടകര, മറ്റത്തൂർ, നെൻമണിക്കര, പുതുക്കാട്, തൃക്കൂർ, വരന്തരപ്പിള്ളി ഗ്രാമപഞ്ചായത്തുകളിലെ വോട്ടിംഗ് മെഷീനുകളുടെ കമ്മീഷനിംഗ് നാളെ നടക്കും.
കമ്മിഷനിംഗ് ചെയ്യുന്ന മെഷീനുകൾ റിട്ടേണിംഗ് ഓഫീസർമാർ സ്ട്രോംഗ് റൂമുകളിൽ പോലീസ് സുരക്ഷയിൽ സൂക്ഷിക്കും. ജില്ലയിൽ ആകെ 24 വിതരണ സ്വീകരണ കേന്ദ്രങ്ങളും സ്ട്രോംഗ് റൂമുകളുമാണ് ഉളളത്.