തൊടുപുഴ: വാഴക്കുളം ഡയാലിസിസ് ക്ലബിന്റെ നേതൃത്വത്തില് ഇന്നു മുതല് 17 വരെ വൈകുന്നേരം നാലു മുതല് രാത്രി 10 വരെ വാഴക്കുളത്ത് ചായ് കാര്ണിവല് സംഘടിപ്പിക്കും. വാഴക്കുളം ചാരിറ്റബിള് ട്രസ്റ്റിന്റെയും സെന്റ് ജോര്ജ് ആശുപത്രിയുടെയും സംയുക്ത സംരംഭമായ വാഴക്കുളം സൗജന്യ ഡയാലിസിസ് സെന്ററിന്റെ പ്രചാരണത്തിനും ധനശേഖരണാര്ഥവുമായാണ് കാര്ണിവല് നടത്തുന്നതെന്ന് സംഘാടകര് പത്രസമ്മേളനത്തില് അറിയിച്ചു.
കഴിഞ്ഞ ഒക്ടോബര് മൂന്നിന് സ്പീക്കര് എ.എന്. ഷംസീര് ഉദ്ഘാടനം ചെയ്ത സൗജന്യ ഡയാലിസിസ് സെന്ററിന്റെ ദൈനംദിന നടത്തിപ്പിനായി പ്രതിമാസം നാലു ലക്ഷം രൂപയോളം ചെലവുവരുന്നുണ്ട്. പൂര്ണമായും സൗജന്യമായി ഡയാലിസിസ് ചെയ്ത് നല്കുന്ന സെന്ററില് ഇതിനോടകം രണ്ടാമത്തെ ഷിഫ്റ്റും പ്രവര്ത്തനം ആരംഭിച്ചു.
ഒരു വര്ഷത്തില് 6300 പേർക്കു ഡയാലിസിസ് ചെയ്തു നല്കാനാകുമെന്നന്ന പ്രതീക്ഷയിലാണ് സെന്റര് മുന്നോട്ടുപോകുന്നത്. അതിനുള്ള തുക കണ്ടെത്തുന്നതിനായാണ് കേരളത്തിലെ ആദ്യത്തെ ഡയാലിസിസ് ക്ലബ് രൂപീകരിച്ചത്. ഇന്ന് വൈകുന്നേരം 4.30ന് മാത്യു കുഴല്നാടന് എംഎല്എ കാര്ണിവല് ഉദ്ഘാടനം ചെയ്യും.
കാര്ണിവലിനോടനുബന്ധിച്ച് കലാപരിപാടികളും ഫുഡ് സ്ട്രീറ്റും ഒരുക്കുന്നുണ്ട്. ഇന്നു ബാന്ഡ് മ്യൂസിക്, 16ന് മാജിക് ഷോ, പഞ്ചഗുസ്തി മത്സരം, 17ന് ഗാനമേള, നൃത്തസന്ധ്യ എന്നിവയും സംഘടിപ്പിക്കും. കാര്ണിവലില്നിന്നു ലഭിക്കുന്ന വരുമാനം ഡയാലിസിസ് സെന്ററിലെ രോഗികള്ക്കായി ഉപയോഗിക്കുക എന്ന ഉദ്ദേശ്യത്തോടുകൂടിയാണ് പരിപാടി സംഘടിപ്പിച്ചിരിക്കുന്നത്.
പത്രസമ്മേളനത്തില് വാഴക്കുളം ചാരിറ്റബിള് ട്രസ്റ്റ് ചെയര്മാന് സിജു സെബാസ്റ്റ്യന്, സെന്റ് ജോര്ജ് ആശുപത്രി ഡയറക്ടര് ഫാ. ജോര്ജ് പൊട്ടയ്ക്കല്, ട്രസ്റ്റ് സെക്രട്ടറി അഡ്വ. ജോണി മെതിപ്പാറ, ട്രഷറര് സാജു പി. ജോസ്, മര്ച്ചന്റ്സ് അസോസിയേഷന് ജനറല് സെക്രട്ടറി ടോമി തോമസ് എന്നിവര് പങ്കെടുത്തു.
Tags : dialysis nattuvishesham lcoal news