മഞ്ചേരി: ഏറനാടിന്റെ ഈരടിയിൽ മഞ്ചേരി സ്വദേശി പ്രശാന്ത് മങ്ങാട്ടിന്റെ ടീമിന് ഒന്നാം സ്ഥാനം. കാലിക്കട്ട് യൂണിവേഴ്സിറ്റി ഇന്റർസോണ് കലോത്സവം നാടൻപാട്ട് മത്സരത്തിൽ മന്പാട് എംഇഎസ്. കോളജ് ടീമാണ് ഒന്നാം സ്ഥാനം നേടിയത്.തുടർച്ചയായി രണ്ടാം തവണയാണ് കോളജ് ടീം ഇന്റർസോണ് നാടൻ പാട്ടിൽ സമ്മാനം നേടുന്നത്.
ഏറനാടൻ പ്രദേശങ്ങളിൽ പണ്ട് കാലത്ത് അടിസ്ഥാന വിഭാഗങ്ങൾക്കിടയിൽ പ്രചാരത്തിലുണ്ടായിരുന്ന തെരണ്ട് കല്യാണ ആഘോഷ പാട്ടായ വൈത്തെരിച്ച് പാട്ടാണ് ടീം അവതരിപ്പിച്ചത്. ആദ്യ, ആരതി, ഹർഷമോൾ, അശ്വിനി, അമൃത, ആദിത്യ, ദേവനന്ദ, ഫാത്തിമ റിഫ, സിയ പഠിപ്പുര എന്നിവരാണ് ടീം അംഗങ്ങൾ. ഫോക്ലോർ അക്കാഡമി അവാർഡ് ജേതാവ് കൂടിയായ പ്രശാന്ത് മങ്ങാട്ടാണ് ഈ തനത് പാട്ട് പഴമക്കാരിൽനിന്ന് കണ്ടെത്തി കുട്ടികളെ പരിശീലിപ്പിച്ചത്. കഴിഞ്ഞ മാസം നടന്ന സി സോണ് മത്സരത്തിലും ടീം ഒന്നാം സ്ഥാനം നേടിയിരുന്നു.