കൊരട്ടി സെന്ററിൽനടന്ന എൽഡിഎഫ് തെരഞ്ഞെടുപ്പ് പൊതുയോഗം എ. വിജയരാഘവൻ ഉദ്ഘാടനംചെയ്യുന്നു.
കൊരട്ടി: സംസ്ഥാന സർക്കാരിന്റെ അധികാരത്തിനുമേൽ കേന്ദ്രം കൈകടത്തുന്നുവെന്നും ഇടതുപക്ഷത്തിനുനേരെ വൻ ഗൂഢാലോചനയാണ് കേരളത്തിൽ നടക്കുന്നതെന്നും സിപിഎം പോളിറ്റ് ബ്യൂറോ അംഗം എ. വിജയരാഘവൻ.
കൊരട്ടി സെന്ററിൽ നടന്ന എൽഡിഎഫ് തെരഞ്ഞെടുപ്പ് പൊതുയോഗം ഉദ്ഘാടനംചെയ്തു പ്രസംഗിക്കുകയായിരുന്നു അദ്ദേഹം. ഓരോ ഗൂഢാലോചനകൾക്കും പിന്നിൽ പ്രവർത്തിക്കുന്നവർക്കുനേരേ തന്നെയാണ് വൻ തിരിച്ചടികൾ ഉണ്ടാകുന്നതെന്നും അദ്ദേഹം തുടർന്നു. ജാതീയത പറഞ്ഞ് അധികാരത്തിലേറുന്നവർ പിന്നാക്കസമുദായങ്ങളെ അവഗണിക്കുന്നുവെന്നും അദ്ദേഹം കുറ്റപ്പെടുത്തി.
ഇതരമതസ്ഥരുടെ ആരാധാനാലയം പൊളിച്ച് തങ്ങളുടെ ആരാധാനാലയം പണിയണമെന്ന് വാശിപിടിക്കുന്ന അപരിഷ്കൃതരീതികളാണ് കേന്ദ്ര ഭരണകൂടത്തിന്റേതെന്നും വിജയരാഘവൻ കൂട്ടിച്ചേർത്തു. സിപിഐ ജില്ലാകമ്മിറ്റി അംഗം ടി.വി. രാമകൃഷ്ണൻ അധ്യക്ഷതവഹിച്ചു. താളമേളങ്ങളുടെ അകമ്പടിയോടെ നൂറുകണക്കിനുപേർ പങ്കെടുത്ത പൊതുറാലി കിൻഫ്രാ പാർക്ക്, മഞ്ഞളിക്കെട്ട് എന്നിവിടങ്ങളിൽനിന്ന് ആരംഭിച്ച് കൊരട്ടിയിൽ സമാപിച്ചു.
ജില്ലാപഞ്ചായത്ത് സ്ഥാനാർഥി കെ.ആർ. സുമേഷ്, നേതാക്കളായ കെ.പി. തോമസ്, കെ.എ. ജോജി, ഡെന്നീസ് കെ. ആന്റണി, ജോർജ് ഐനിക്കൽ, ഡേവീസ് മാമ്പ്ര, എ.എ. ബിജു, കെ.കെ. രാജൻ, പി.സി. ബിജു, എം.ജെ ബെന്നി എന്നിവർ പ്രസംഗിച്ചു.
Tags : A. Vijayaraghavan nattuvisesham locl news