മെഡിക്കൽ കോളജ് വളപ്പ് താവളമാക്കിരിക്കുന്ന നായ.
മെഡിക്കൽ കോളജിലും കുടയംപടിയിലും തെരുവുനായ ആക്രമണം
ആശുപത്രി വളപ്പിൽ അഞ്ച് വയസുകാരിക്ക് നായയുടെ കടിയേറ്റു
അമ്പാടി, കുടയംപടി, ചുങ്കം ഭാഗങ്ങളിൽ പത്തോളം പേർക്കും കടിയേറ്റു
ഗാന്ധിനഗർ: മെഡിക്കൽ കോളജ് ആശുപത്രിയിൽ തെരുവുനായ ശല്യം വീണ്ടും രൂക്ഷമാകുന്നു. കഴിഞ്ഞ ദിവസം ആശുപത്രി വളപ്പിൽ ലോട്ടറി വിൽപനയ്ക്കെത്തിയ യുവതിക്കൊപ്പമുണ്ടായിരുന്ന അഞ്ചു വയസുകാരി മകളെ തെരുവ് നായ കടിച്ചു. പട്ടിത്താനം സ്വദേശി ബിന്നുവിന്റെ മകളെയാണ് നായ കടിച്ചത്. ചെവിയുടെ പുറകുവശത്ത് കടിയേറ്റ കുട്ടി ഇപ്പോൾ മെഡിക്കൽ കോളജ് കുട്ടികളുടെ ആശുപത്രിയിൽ ചികിത്സയിലാണ്.
മാസങ്ങൾക്ക് മുമ്പ് കുട്ടികളുടെ ആശുപത്രിയുടെ സമീപത്തുവച്ച് മെഡിക്കൽ വിദ്യാർഥികൾക്കും തെരുവുനായയുടെ കടിയേറ്റിരുന്നു. രോഗികൾക്കും കൂട്ടിരിപ്പുകാർക്കും ഡോക്ടർമാർക്കും നഴ്സുമാരാടക്കമുള്ള ജീവനക്കാർക്കും മെഡിക്കൽ വിദ്യാർഥികൾക്കും തെരുവുനായ ഭീഷണിയായിരിക്കുകയാണ്. ആശുപത്രിയിലെ ഫാർമസിയുടെ ഭാഗം, ഫാർമസിക്ക് സമീപത്തെ ഇൻഷ്വറൻസ് ഓഫിസ് പ്രവർത്തിക്കുന്നിടം, രോഗികൾക്ക് ഉച്ചഭക്ഷണം നൽകുന്ന സ്ഥലം, വാഹനങ്ങൾ പാർക്ക് ചെയ്യുന്നിടം, കാൻസർ വിഭാഗത്തിന്റെ പരിസരം എന്നിവടങ്ങളിലാണ് കൂടുതലായും നായകൾ താവളമാക്കിരിക്കുന്നത്.
ചില സമയങ്ങളിൽ കൂട്ടമായി നായ്ക്കളെത്തി കടിപിടി കൂടുകയും ആളുകൾക്കിടയിലൂടെ പാഞ്ഞോടുന്നതും വലിയ ഭീഷണി ഉയർത്തിരിക്കുകയാണ്. മുമ്പ് തെരുവുനായ ശല്യം രൂക്ഷമായ സമയത്ത് ആർപ്പൂക്കര പഞ്ചായത്തിന്റെ നേതൃത്വത്തിൽ നായശല്യം ഒഴിവാക്കാൻ ഇടപെടൽ നടത്തിയിരുന്നു. മെഡിക്കൽ കോളജ് അധികൃതരുടെ നേതൃത്വത്തിൽ നായ ശല്യം ഒഴിവാക്കുന്നതിന് പ്രത്യേകം പദ്ധതി നടപ്പാക്കാൻ തീരുമാനമുണ്ടെങ്കിലും നടപ്പായിട്ടില്ല.
കുടയംപടി ഭാഗത്തും കഴിഞ്ഞ ദിവസം തെരുവുനായ ആക്രമണമുണ്ടായി. അമ്പാടി, കുടയംപടി, ചുങ്കം ഭാഗങ്ങളിൽ പത്തോളം പേരെ കടിച്ച നായ ഇന്നലെ രാവിലെ ആർപ്പൂക്കര അങ്ങാടിയിലും രണ്ടുപേരെ കടിച്ചതായാണ് വിവരം. തുടർന്ന് നടത്തിയ തെരച്ചിലിൽ നായയെ പിടികൂടി. നിലവിൽ നായ നിരീക്ഷണത്തിലാണ്.
നായയുടെ കടിയേറ്റ മറ്റ് നായ്ക്കൾ പ്രദേശത്ത് ഉണ്ടാകാനുള്ള സാധ്യതയുള്ളതിനാൽ നാട്ടുകാർ അതീവ ജാഗ്രത പാലിക്കണമെന്ന് അയ്മനം പഞ്ചായത്ത് അധികൃതർ നിർദേശിച്ചു.
പ്രതികരണം
എന്റെ കുട്ടിക്ക് കടിയേറ്റത് പോലെ മാറ്റാർക്കും സംഭവിക്കരുത്. മെഡിക്കൽ കോളജ് പരിസരത്തെ തെരുവുനായ ശല്യത്തിന് അറുതി വരുത്തണം.
തെരുവുനായയുടെ കടിയേറ്റ അഞ്ചു വസുകാരിയുടെ അമ്മ
ബിന്നു