ഗവ. മെഡിക്കൽ കോളജ് ആക്ഷൻ കമ്മിറ്റി യോഗം കൽപ്പറ്റയിൽ പൊതുപ്രവർത്തകൻ എസ്.എ. നസീർ ഉദ്ഘാടനം ചെയ്യുന്നു.
കൽപ്പറ്റ: വയനാട് ഗവ. മെഡിക്കൽ കോളജ് മടക്കിമലയിൽ സ്ഥാപിക്കണമെന്ന് ആവശ്യപ്പെട്ട് ശക്തമായ പ്രക്ഷോഭം സംഘടിപ്പിക്കാൻ എം.ജി.ടി ഓഡിറ്റോറിയത്തിൽ ചേർന്ന ആക്ഷൻ കമ്മിറ്റി ഭാരവാഹികളുടെയും വിവിധ സംഘടനാ പ്രതിനിധികളുടെയും സംയുക്തയോഗം തീരുമാനിച്ചു.
മെഡിക്കൽ കോളജ് വിഷയത്തിൽ മന്ത്രി ടി. സിദ്ദിഖും ഐ.സി. ബാലകൃഷ്ണൻ എംഎൽഎയും നിലപാട് വ്യക്തമാക്കുന്നില്ലെന്ന് യോഗം കുറ്റപ്പെടുത്തി. ജില്ലയിലെ എല്ലാ ഭാഗങ്ങളിലുമുള്ളവർക്ക് എളുപ്പം എത്താൻ കഴിയുന്ന മടക്കിമലയിൽ സൗജന്യമായി ലഭ്യമാകുന്ന ഭൂമിയിൽ മെഡിക്കൽ കോളജിന് സ്ഥിരനിർമാണം നടത്തുന്നതാണ് ഉചിതം. ഇതിനെതിരേ മാനന്തവാടി എംഎൽഎ ഉഷ വിജയൻ നിലപാട് സ്വീകരിക്കുകയും പ്രാദേശിക വാദം ഉയർത്തുകയും ചെയ്യുന്നതിൽ അനൗചിത്യമുണ്ടെന്ന് യോഗം അഭിപ്രായപ്പെട്ടു.
മെഡിക്കൽ കോളജിന് അന്പുകുത്തിയിലെ 28 ഏക്കർ വനഭൂമി ഏറ്റെടുക്കുമെന്നും പകരം ഇരട്ടി റവന്യു ഭൂമിയും മരവിലയുടെ മൂന്നിരട്ടിയും നൽകുമെന്ന് പറയുന്നവർ സംസ്ഥാനത്തിന്റെ ധനസ്ഥിതി മനസലാക്കാൻ ശ്രമിക്കണമെന്ന് ആവശ്യപ്പെട്ടു. പ്രക്ഷോഭത്തിന്റെ ഭാഗമായി ഈ മാസം കളക്ടറേറ്റ് പടിക്കൽ ഉപവാസം നടത്താനും യോഗത്തിൽ തീരുമാനമായി.
പൊതുപ്രവർത്തകൻ എസ്.എ. നസീർ ഉദ്ഘാടനം ചെയ്തു. എസ്എച്ച്ആർപിസി ജില്ല പ്രസിഡന്റ് കെ.എൻ. പ്രേമലത അധ്യക്ഷത വഹിച്ചു. കെ.വി. ഗോകുൽദാസ്, വി.പി. യെൽദോ, വി. ഹരിദാസ്, യു.എ. അബ്ദുൾ മനാഫ്, ജോണി പാറ്റാനി, വർഗീസ് വട്ടേക്കാട്, ടി.വി. സുന്ദരം, പി.പി. തോമസ്, പി.എൻ. രാജൻ, പി.കെ. രാജശേഖരൻ, ബലരാമൻ, സി.എച്ച്. സജിത്കുമാർ എന്നിവർ പ്രസംഗിച്ചു.
Tags : Local News Nattuvishesham Wayanad