കുമരകത്ത് നടന്ന വിവാഹ ചടങ്ങുകളുടെ ദൃശ്യം
കുമരകം: സെന്റ് ജോൺസ് ആറ്റാമംഗലം പള്ളിയിൽ ഇന്നലെ നടന്ന വിവാഹവും വിവാഹാനന്തര ചടങ്ങുകളും കൗതുക കാഴ്ചയും പുത്തൻ അനുഭവവുമായി. ഇന്ത്യൻ നേവി എയർ ഫോഴ്സ് വിംഗിലെ ലെഫ്റ്റനന്റ്് കമാൻഡറും പാറമ്പുഴ മൈലപ്പള്ളിൽ അജിത് തോമസ് ചാക്കോയുടെയും മിനി അജിത് തോമസിന്റെയും മകനുമായ ജോയൽ തോമസിന്റെ വിവാഹ ചടങ്ങുകളാണ് വേറിട്ട അനുഭവമായി മാറിയത്.
ഡൽഹി ഓൾ ഇന്ത്യ മെഡിക്കൽ സയൻസിലെ ഹെൽത്ത് കെയർ പ്രഫഷണലായ അപർണ സുനജയായിരുന്നു വധു. ഡൽഹി സ്വദേശികളായ സതീഷ് കുമാറിന്റെയും ആഷ്ന റാണിയുടേയും മകളാണ് അപർണ. ഇന്നലെ ഉച്ചകഴിഞ്ഞ് മൂന്നിനായിരുന്നു വിവാഹം. വിവാഹാനന്തര ചടങ്ങുകൾ എല്ലാം നിയന്ത്രിച്ചത് നേവിയിലെ സഹപ്രവർത്തകരായിരുന്നു. വാളുകൾ കൈകളിലേന്തി നിൽക്കുന്ന നേവി ഉദ്യോഗസ്ഥരെ കടന്ന് വധുവുമായി ഒന്നിക്കാനുള്ള വരന്റെ കഷ്ടപ്പാടുകൾ കണ്ടു തന്നെ അറിയണം.
കാവൽക്കാരെപ്പോലെ നിൽക്കുന്ന പട്ടാളക്കാർ ആവശ്യപ്പെടുന്ന വ്യായാമങ്ങൾക്കൊടുവിൽ വധുവിനെ എടുത്തു കൊണ്ടുപോകണം. കുമരകം ചാണാഞ്ചേരിൽ സി.ടി. തോമസിന്റെ മകളുടെ മകനാണ് വരൻ. യാക്കോബായ സഭ കോട്ടയം ഭദ്രാസനാധിപൻ ഡോ. തോമസ് മാർ തീമോത്തിയോസ് മെത്രാപ്പോലിത്തയാണ് വിവാഹ ശുശ്രൂഷകൾക്ക് നേതൃത്വം നൽകിയത്.
Tags : Local News Nattuvishesham Kottayam