കെ. മാധവൻ ഇന്ത്യൻ ബ്രോഡ്കാസ്റ്റിംഗ് ആൻഡ് ഡിജിറ്റൽ ഫൗണ്ടേഷൻ പ്രസിഡന്‍റ് : Deepika.com Business News

കൊച്ചി: ഇന്ത്യൻ ബ്രോഡ്കാസ്റ്റിംഗ് ആൻഡ് ഡിജിറ്റൽ ഫൗണ്ടേഷന്‍റെ പ്രസിഡന്‍റായി ഡിസ്നി സ്റ്റാർ കൺട്രി മാനേജരും പ്രസിഡന്‍റുമായ കെ.മാധവൻ വീണ്ടും തെരഞ്ഞെടുക്കപ്പെട്ടു.

ഡൽഹിയിൽ നടന്ന ഇന്ത്യൻ ബ്രോഡ്കാസ്റ്റിംഗ് ആൻഡ് ഡിജിറ്റൽ ഫൗണ്ടേഷന്‍റെ 24-ാമത് ആനുവൽ ജനറൽ മീറ്റിംഗിൽ രജത് ശർമ, രാഹുൽ ജോഷി എന്നിവരെ വൈസ് പ്രസിഡന്‍റായും പുനിത് മിശ്രയെ ട്രഷററായും തെരഞ്ഞെടുത്തിട്ടുണ്ട്.

ഐ. വെങ്കട്ട്, അരൂൺ പുരി, എൻ.പി. സിംഗ്, നിതിൻ നദ്കർണി, പുനിത് ഗോയങ്ക, ആർ. മഹേഷ് കുമാർ, ഗൗരവ് ബാനർജി എന്നിവരാണ് മറ്റ് ഡയറക്ടർമാർ. എജിഎമ്മിന് ശേഷം നടന്ന ഐബിഡിഎഫ് ഡയറക്ടർ ബോർഡ് യോഗം ജോൺ ബ്രിട്ടാസ്, കെവിൻ വാസ് എന്നിവരെ കൂടി ബോർഡിലേക്ക് തെരഞ്ഞെടുത്തു.

യുക്രയ്നിലെ റഷ്യയുടെ അധിനിവേശം, ഇസ്രായേൽ - ഹമാസ് യുദ്ധം മൂലമുള്ള മിഡിൽ ഈസ്റ്റിലെ പ്രതിസന്ധി, സാമ്പത്തിക അസ്ഥിരത എന്നിവ പോലുള്ള പ്രശ്നങ്ങൾക്കിടയിലും ഇന്ത്യൻ സമ്പദ് വ്യവസ്ഥ പൊതുവിലും മീഡിയ ആൻഡ് എന്‍റർടൈൻമെന്‍റ് വ്യവസായം പ്രത്യേകിച്ചും അങ്ങേയറ്റം അതിജീവന സ്വഭാവം കാണിക്കുന്നുവെന്ന് എജിഎമ്മിൽ അംഗങ്ങളെ അഭിസംബോധന ചെയ്ത് ഇന്ത്യൻ ബ്രോഡ്കാസ്റ്റിംഗ് ആൻഡ് ഡിജിറ്റൽ ഫൗണ്ടേഷന്‍ പ്രസിഡന്‍റ് കെ.മാധവൻ പറഞ്ഞു.

868 ദശലക്ഷം ബ്രോഡ്ബാൻഡ് ഉപയോക്താക്കളുമായി ഇന്ത്യ ഒരു ഡിജിറ്റൽ പരിവർത്തന യാത്ര ആരംഭിച്ചുകഴിഞ്ഞു. തുടങ്ങി ഒരു വർഷത്തിനുള്ളിൽതന്നെ 5ജി സേവനങ്ങൾ 97 ശതമാനം ഇന്ത്യൻ നഗരങ്ങളിലും ലഭ്യമായതിന്‍റെ ഫലമായി ഇന്‍റർനെറ്റ് വേഗത മൂന്ന് മടങ്ങ് വർധിച്ചു.

ഇന്ത്യയിൽ വിൽക്കുന്ന ടിവി സെറ്റുകളിൽ 90 ശതമാനവും സ്മാർട്ട് ടിവികളാണ്. 2023 ഇന്ത്യൻ മീഡിയ ആൻഡ് എന്‍റർടൈൻമെന്‍റ് വ്യവസായത്തെ സംബന്ധിച്ചിടത്തോളം ഒരു നിർണായക വർഷമായിരിക്കുമെന്നും ഡിജിറ്റൽ പരസ്യ വരുമാനം പരമ്പരാഗത മാധ്യമങ്ങളിലെ പരസ്യ വരുമാനത്തെ മറികടക്കുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു.