പ്രതീകാത്മക ചിത്രം
വാഷിംഗ്ടൺ: ചൈനീസ് ചാരവനിതയുമായുള്ള ബന്ധം ഉൾപ്പെടെയുള്ള വ്യക്തിപരമായ വിവാദങ്ങളെത്തുടർന്ന് എൻവിഡിയ സിഇഒ സ്ഥാനം രാജിവച്ച ജെൻസൻ ഹുവാംഗ് കുടുംബത്തോട് മാപ്പ് അപേക്ഷിച്ചു. തന്റെ പ്രസ്താവനയുടെ അവസാന വരിയിൽ കുടുംബത്തോടുള്ള സ്നേഹവും കുറ്റസമ്മതവും അദ്ദേഹം പങ്കുവെച്ചു. "എന്റെ കുടുംബത്തിന്: ഞാൻ നിങ്ങളെ സ്നേഹിക്കുന്നു, നിങ്ങളുടെ സ്നേഹത്തിന് അർഹനാകാൻ എന്റെ ജീവിതത്തിലെ ബാക്കി സമയം ഞാൻ വിനിയോഗിക്കും," എന്നാണ് ഹുവാംഗ് എക്സിൽ പങ്കുവെച്ച 277 വാക്കുകളുള്ള പ്രസ്താവനയിൽ കുറിച്ചത്.
ചൈനീസ് ക്ലൗഡ് കമ്പ്യൂട്ടിംഗ് സ്ഥാപനമായ മെഗാസ്പീഡിന്റെ എക്സിക്യൂട്ടീവ് ആയ ആലീസ് ഹുവാംഗ് ഉൾപ്പെടെയുള്ളവരുമായുള്ള അവിഹിത ബന്ധങ്ങൾ പുറത്തുവന്നതിനെത്തുടർന്നാണ് നവംബർ 12-ന് ഹുവാംഗ് സിഇഒ പദവി ഒഴിഞ്ഞത്. 41 വർഷമായി കൂടെയുള്ള ഭാര്യ ലോറി മിൽസും മക്കളും തനിക്ക് നൽകിയ പിന്തുണയെക്കുറിച്ചും എന്നാൽ താൻ അവരെ നിരാശപ്പെടുത്തിയെന്നും അദ്ദേഹം പ്രസ്താവനയിൽ വ്യക്തമാക്കി.
"ഞാൻ ചെയ്തതിന് ന്യായീകരണമില്ല. എന്റെ പ്രവൃത്തികൾ അവരെ വേദനിപ്പിച്ചു. എന്റെ കുടുംബത്തിന് വീണ്ടും എന്നിൽ വിശ്വാസമുണ്ടാകാൻ ഞാൻ ശ്രമിക്കും," ഹുവാംഗ് പറഞ്ഞു. തന്റെ രാജിക്ക് ശേഷം ജീവനക്കാരും നിക്ഷേപകരും അടക്കം നിരവധി പേർ തിരിച്ചുവരാൻ ആവശ്യപ്പെടുന്നുണ്ടെന്നും ബോർഡ് തീരുമാനിക്കുകയാണെങ്കിൽ സിഇഒ സ്ഥാനത്തേക്ക് മടങ്ങിയെത്താൻ തയ്യാറാണെന്നും അദ്ദേഹം ആവർത്തിച്ചു.
ബോർഡിന്റെ സ്വതന്ത്ര അന്വേഷണവുമായി പൂർണമായി സഹകരിക്കുമെന്നും അദ്ദേഹം വ്യക്തമാക്കി. അതേസമയം, അമേരിക്കൻ ചിപ്പുകൾ ചൈനയ്ക്ക് ലഭിച്ചതുമായി ബന്ധപ്പെട്ട ദേശീയ സുരക്ഷാ ആശങ്കകളിൽ ഡിസംബർ ഒന്നിന് യുഎസ് ഹൗസ് കമ്മിറ്റികൾക്ക് മുന്നിൽ ഹുവാംഗ് ഹാജരായി ചോദ്യം ചെയ്യലിനെ നേരിടേണ്ടതുണ്ട്. വിവാദങ്ങൾക്കിടയിലും യുഎസ് പ്രസിഡന്റ് ഡോണൾഡ് ട്രംപും ടെസ്ല മേധാവി ഇലോൺ മസ്കും ഉൾപ്പെടെയുള്ള പ്രമുഖർ ഹുവാംഗിന് പിന്തുണയുമായി രംഗത്തെത്തിയിട്ടുണ്ട്.
Tags : JensenHuang Jensen Huang Nvidia Apology Note Lori Mills Family Extramarital Affairs Alice Huang CEO Resignation Elon Musk Donald Trump US House Committee