പ്രതീകാത്മക ചിത്രം
കൊച്ചി: കുതിപ്പിനുശേഷം സംസ്ഥാനത്തു സ്വർണവില ഒരു ലക്ഷം രൂപയ്ക്കു താഴെയെത്തി. ഇന്നലെ ഗ്രാമിന് 70 രൂപയും പവന് 560 രൂപയും കുറഞ്ഞതോടെ ഗ്രാമിന് 12,470 രൂപയും പവന് 99,760 രൂപയുമായി വില. ചരിത്രത്തിലെ ഉയർന്ന നിലവാരത്തിൽനിന്നു സ്വർണവില താഴ്ന്നത് ഉപയോക്താക്കൾക്ക് ആശ്വാസമായി. രാജ്യാന്തര വിപണിയിൽ വില കുറഞ്ഞതോടെയാണ് കേരളത്തിലും മാറ്റം.
ഡോളർ ശക്തിപ്പെട്ടതും നിക്ഷേപകർ വ്യാപകമായി ലാഭമെടുത്തതും പലിശനിരക്കുകളെക്കുറിച്ചുള്ള പ്രതീക്ഷകളിലെ മാറ്റവുമാണ് വിലയിടിവിനു പ്രധാന കാരണം.
അല്പം ആശ്വാസം
വില കുറഞ്ഞത് വിവാഹാവശ്യങ്ങൾക്കായി സ്വർണം വാങ്ങാൻ കാത്തിരിക്കുന്ന കുടുംബങ്ങൾക്കുൾപ്പടെ ആശ്വാസമാണ്. എന്നാൽ വില ഇനിയും കുറയുമെന്ന പ്രതീക്ഷയിൽ വാങ്ങൽ മാറ്റിവയ്ക്കുന്നവരുമുണ്ട്. ഉയർന്ന വിലയ്ക്കു സ്റ്റോക്ക് ചെയ്ത വ്യാപാരികൾക്കു നിലവിലെ വിലയിടിവ് തിരിച്ചടിയായിട്ടുണ്ട്.
അമേരിക്കൻ ഫെഡറൽ റിസർവിന്റെ പലിശനിരക്ക് തീരുമാനങ്ങൾ, ഡോളറിന്റെ മൂല്യം, രൂപയുടെ വിനിമയനിരക്ക്, ആഗോള രാഷ്ട്രീയ സാഹചര്യങ്ങൾ എന്നിവയായിരിക്കും വരുംദിവസങ്ങളിൽ സ്വർണവിലയുടെ ഗതി നിർണയിക്കുക.ഈ വർഷം ഇതു രണ്ടാം തവണയാണു പവൻ വില ഒരു ലക്ഷം രൂപയിൽ താഴെയെത്തുന്നത്. ഇതിനു മുന്പ് മാർച്ച് 23നാണ് വില താഴ്ന്നത്. അന്നു പവന് 99,480 രൂപയിലേക്കാണു താഴ്ന്നത്.
സ്ഥാനത്തു സ്വർണവില ചരിത്രത്തിലെ ഏറ്റവും ഉയർന്ന നിരക്കായ പവന് 1,31,160 രൂപ വരെ എത്തിയിട്ടുണ്ട്. കഴിഞ്ഞ ജനുവരി 29ന് രാവിലെയാണ് 22 കാരറ്റ് സ്വർണത്തിന് (എട്ടു ഗ്രാം) ഈ സർവകാല റിക്കാർഡ് വില രേഖപ്പെടുത്തിയത് (ഗ്രാമിന് 16,395 രൂപ). 2025 ഡിസംബർ 23നാണ് സംസ്ഥാനത്തു സ്വർണവില ആദ്യമായി ഒരു ലക്ഷം രൂപ പിന്നിട്ടത് (1,01,600 രൂപ).
Tags : Gold price Falls Business Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash