പ്രതീകാത്മക ചിത്രം
ന്യൂയോർക്ക്: പ്രമുഖ ടെക് ഭീമന്മാരായ ആപ്പിളിന്റെയും ഗൂഗിളിന്റെയും പ്രധാന ഓൺലൈൻ സേവനങ്ങൾ തടസപ്പെട്ടത് ലോകമെമ്പാടുമുള്ള ഉപഭോക്താക്കളെ വലച്ചു. ഐക്ലൗഡ്, ആപ്പ് സ്റ്റോർ, ആപ്പിൾ വാലറ്റ്, ജിമെയിൽ, ഗൂഗിൾ സെർച്ച് എന്നീ സേവനങ്ങൾ ഉപയോഗിക്കാൻ കഴിയുന്നില്ലെന്ന് കാട്ടി നിരവധി പേർ പരാതിപ്പെട്ടു. ലോഗിൻ ചെയ്യുന്നതിലെ തടസങ്ങളും കണക്ഷൻ എററുകളുമാണ് പല പ്ലാറ്റ്ഫോമുകളിലും നേരിട്ടത്.
സേവന തടസങ്ങൾ നിരീക്ഷിക്കുന്ന വെബ്സൈറ്റായ 'ഡൗൺഡിറ്റക്ടർ' നൽകുന്ന വിവരമനുസരിച്ച്, ഇന്ത്യൻ സമയം രാത്രി പത്ത് മണിയോടെയാണ് പരാതികൾ ഉയർന്നുതുടങ്ങിയത്. ഒരു മണിക്കൂറിനുള്ളിൽ തന്നെ 1,500 മുതൽ 2,000 വരെ പരാതികൾ രേഖപ്പെടുത്തി. ഐക്ലൗഡ്, ആപ്പിൾ പേ എന്നിവയെയാണ് തകരാർ ഏറ്റവും കൂടുതൽ ബാധിച്ചത്. ഇതിന് പിന്നാലെ ജിമെയിൽ, ഗൂഗിൾ സെർച്ച്, ആപ്പ് സ്റ്റോർ എന്നിവയുടെ പ്രവർത്തനവും താളംതെറ്റി.
അക്കൗണ്ടുകളിൽ ലോഗിൻ ചെയ്യാനും, മെസ്സേജുകൾ അയക്കാനും, ഇമെയിലുകൾ പരിശോധിക്കാനും, പണമിടപാടുകൾ നടത്താനും കഴിയാത്ത അവസ്ഥയുണ്ടായി. ആപ്പിൾ പേ പ്രവർത്തിക്കുന്നില്ലെന്നും ആപ്പിൾ അക്കൗണ്ട് വെരിഫിക്കേഷൻ പരാജയപ്പെടുന്നുവെന്നും ചൂണ്ടിക്കാട്ടി നിരവധി ഉപഭോക്താക്കൾ സോഷ്യൽ മീഡിയ പ്ലാറ്റ്ഫോമായ എക്സിൽ പ്രതികരണങ്ങളുമായി എത്തി.
കഴിഞ്ഞ ഒരാഴ്ചയായി വിവിധ ഡിജിറ്റൽ പ്ലാറ്റ്ഫോമുകളിൽ തുടർച്ചയായി സാങ്കേതിക തടസ്സങ്ങൾ നേരിടുകയാണ്. കഴിഞ്ഞ ആഴ്ച മൈക്രോസോഫ്റ്റിന്റെ ഔട്ട്ലുക്ക് ഇമെയിൽ സേവനങ്ങൾ തടസ്സപ്പെട്ടിരുന്നു. ഇതിന് പിന്നാലെ ഈ ആഴ്ച ആദ്യം ജെപി മോർഗൻ ചേസ് ഉൾപ്പെടെയുള്ള പ്രമുഖ ബാങ്കുകളുടെ ഓൺലൈൻ സേവനങ്ങളും പണമിടപാടുകളും സാങ്കേതിക തകരാർ മൂലം സ്തംഭിച്ചിരുന്നു. ഇതിന് പിന്നാലെയാണ് ഇപ്പോൾ ആപ്പിൾ, ഗൂഗിൾ സേവനങ്ങളിലും തടസ്സം നേരിട്ടിരിക്കുന്നത്.
Tags : Google Deepika DeepikaNewspaper BreakingNews NewsUpdate Headlines CurrentAffairs GlobalNews DailyNews InDepth NewsFlash