30

കോഴിക്കോട്: തദ്ദേശ ഉപതെരഞ്ഞെടുപ്പ് ഫലത്തിന്‍റെ പശ്ചാത്തലത്തിൽ യുഡിഎഫ് സര്‍ക്കാരിന് മുന്നറിയിപ്പുമായി സമസ്ത മുഖപത്രമായ സുപ്രഭാതം. ഭരണത്തിന്‍റെ ആദ്യ നാളുകളില്‍ തന്നെ ജനമനസില്‍ രൂപപ്പെട്ട പ്രതിച്ഛായയെക്കുറിച്ച് യുഡിഎഫ് ആത്മപരിശോധന നടത്തണമെന്ന് സുപ്രഭാതം മുഖപ്രസംഗം ചൂണ്ടിക്കാട്ടുന്നു.

യുഡിഎഫിന് സിറ്റിംഗ് സീറ്റുകള്‍ നഷ്ടപ്പെട്ടു എന്നുമാത്രമല്ല ജയിച്ചിടത്തും തോറ്റിടത്തും വോട്ട് ഗണ്യമായി കുറയുകയും ചെയ്തു. തദ്ദേശ സ്ഥാപന വാര്‍ഡുകളിലെ ഉപതെരഞ്ഞെടുപ്പ് ഫലം സര്‍ക്കാരിന്‍റെ ജനപിന്തുണ അളക്കാന്‍ പര്യാപ്തമല്ലെങ്കിലും തെരഞ്ഞടുപ്പ് ഫലം നല്‍കുന്ന രാഷ്ട്രീയ സന്ദേശം അവഗണിക്കുന്നത് ശരിയല്ലെന്ന് മുഖപ്രസംഗം പറയുന്നു.

നാല് മാസം കൊണ്ട് സര്‍ക്കാരിന് എങ്ങനെ തിളക്കം നഷ്ടമായി ? ഉയര്‍ന്നു വന്ന വിവാദങ്ങളില്‍ വ്യക്തവും സ്വീകാര്യവുമായ വിശദീകരണം നല്‍കാന്‍ സര്‍ക്കാരിന് കഴിഞ്ഞോ ? സാധാരണക്കാരെ ഇത് ആശയക്കുഴപ്പത്തിലാക്കിയെങ്കില്‍ കുറ്റം പറയാനാകില്ല. സര്‍ക്കാരിനെ ചുറ്റിപ്പറ്റി ഉണ്ടായത് വലിയ വിവാദങ്ങളാണ്. ഇത് സര്‍ക്കാരിന്‍റെ സുതാര്യതയെ കുറിച്ചുള്ള ചര്‍ച്ചകള്‍ക്ക് വഴിവച്ചുവെന്നും മുഖപ്രസംഗം ചൂണ്ടിക്കാട്ടുന്നു.

ജനങ്ങള്‍ നല്‍കുന്ന പിന്തുണ അധികാരത്തിന്റെ സ്ഥിരം അവകാശമല്ല. വിവാദങ്ങളില്‍ നിന്ന് പാഠം ഉള്‍ക്കൊള്ളണം. ജനവിധിയിലെ ചെറിയ മാറ്റങ്ങള്‍ പലപ്പോഴും വലിയ രാഷ്ട്രീയ മുന്നറിയിപ്പുകളുടെ തുടക്കമാകാറുണ്ട്. സ്വകാര്യ സൗകര്യങ്ങള്‍ ഉപയോഗിക്കുന്ന കാര്യത്തില്‍ കൂടുതല്‍ സുതാര്യത സര്‍ക്കാരിന് ഉണ്ടാകണം. നയപരമായ മാറ്റങ്ങളില്‍ വ്യക്തത വേണമെന്നും സമസ്ത മുന്നറിയിപ്പ് നല്‍കുന്നു.

Tags : Samastha Suprabhatam Editorial UDF Government VDSatheesan LocalbodyBypolls