കേളകം: കേളകം ഹെൽത്തി വില്ലേജ് സൊസൈറ്റിയുടെ ആദ്യ ഔട്ട്ലറ്റ്് ഫ്രഷ് ബൈ മഞ്ഞളാംപുറം യുപി സ്കൂളിന് മുന്നിൽ പ്രവർത്തനമാരംഭിച്ചു. വെഞ്ചിരിപ്പ് കർമം ചെട്ടിയാംപറമ്പ് പള്ളി വികാരി ഫാ. സെബാസ്റ്റ്യൻ പൊടിമറ്റം നിർവഹിച്ചു.
വിഷരഹിതമായ ഭക്ഷ്യവസ്തുക്കൾ ജനങ്ങളിലെത്തിക്കുക എന്ന ലക്ഷ്യത്തോടെയാണ് സൊസൈറ്റി പ്രവർത്തിക്കുന്നത്. വിഷരഹിത പച്ച മത്സ്യം, സ്വന്തം ഫാമിൽ ഉത്പാദിപ്പിച്ച ചിക്കൻ, മട്ടൻ, ബീഫ്, കർഷകരിൽ നിന്നും നേരിട്ട് വാങ്ങുന്ന ജൈവ പച്ചക്കറികൾ, തവിടു കളയാത്ത അരി, പലവ്യഞ്ജനം, പഴവർഗങ്ങൾ, പ്രദേശികമായി ഉത്പാദിപ്പിക്കുന്ന പലഹാരങ്ങൾ, അച്ചാറുകൾ, എന്നിവ ഔട്ട്ലറ്റിലൂടെ ലഭ്യമാക്കും.
ഉദ്ഘാടന ചടങ്ങിൽ ഭാരവാഹികളായ ജോസഫ് വള്ളോക്കരി, അനിൽ താഴത്തെ മുറി, ജസ്റ്റിൻ ചീരംവേലി, ബോബൻ ഇരപ്പക്കാട്ട്, ഷാജൻ കുളത്തിന്റെ മേലേതിൽ, സിബി ചേരിയിൽ, മോളി കളപ്പുര എന്നിവർ പങ്കെടുത്തു.