ADVERTISEMENT

ADVERTISEMENT

പിണറായി സര്‍ക്കാരിനെ കെട്ടുകെട്ടിക്കാനുള്ള ദൗത്യം സ്ത്രീകള്‍ ഏറ്റെടുത്തു: ജെബി മേത്തര്‍

ചേര്‍ത്തല: ജനവിരുദ്ധ പിണറായി സര്‍ക്കാരിനെ കെട്ടുകെട്ടിക്കാനുള്ള ദൗത്യം സ്ത്രീജനങ്ങള്‍ ഏറ്റെടുത്തു കഴിഞ്ഞെന്നും അതിന്‍റെ തെളിവാണ് നിലമ്പൂര്‍ ഉപതെരഞ്ഞെടുപ്പു ഫലമെന്നും മഹിളാ കോണ്‍ഗ്രസ് സംസ്ഥാന പ്രസിഡന്‍റ് ജെബി മേത്തര്‍ എംപി.

മഹിളാ സാഹസ് കേരള യാത്രയ്ക്ക് വയലാര്‍, പട്ടണക്കാട്, വെട്ടക്കല്‍, കടക്കരപ്പള്ളി, അരീപറമ്പ്, കഞ്ഞിക്കുഴി, മുഹമ്മ, തണ്ണീര്‍മുക്കം, കോക്കമംഗലം, ചേര്‍ത്തല എന്നിവിടങ്ങളില്‍ നല്‍കിയ സ്വീകരണത്തില്‍ സംസാരിക്കുകയായിരുന്നു അവര്‍. കെപിസിസി ജനറല്‍ സെക്രട്ടറിമാരായ എ.എ. ഷുക്കൂര്‍, എം.ജെ. ജോബ്, യുഡിഎഫ് ജില്ലാ ചെയര്‍മാന്‍ സി.കെ. ഷാജിമോഹന്‍, കെപിസിസി സെക്രട്ടറി എസ്. ശരത്, കെപിസിസി മുന്‍ നിര്‍വാഹകസമിതിയംഗം കെ.ആര്‍. രാജേന്ദ്രപ്രസാദ് എന്നിവര്‍ വിവിധ സ്വീകരണ സമ്മേളനങ്ങള്‍ ഉദ്ഘാടനം ചെയ്തു.

മഹിളാ കോണ്‍ഗ്രസ് ജില്ലാ പ്രസിഡന്‍റ് ബബിത ജയന്‍, സംസ്ഥാന ഭാരവാഹികളായ ജയലക്ഷ്മി ദത്തന്‍, രാധാ ഹരിദാസ്, രമാ തങ്കപ്പന്‍, ഉഷാ സദാനന്ദന്‍, ജയാസോമന്‍, കോണ്‍ഗ്രസ് നേതാക്കളായ ടി.എസ്. രഘുവരന്‍, കെ.സി. ആന്‍റണി, ടി. സുബ്രഹ്മണ്യദാസ്, സി.ഡി. ശങ്കര്‍, എന്‍. ശ്രീകുമാര്‍, ആര്‍. ശശിധരന്‍, സജി കുര്യാക്കോസ് തുടങ്ങിയവര്‍ പ്രസംഗിച്ചു.

ADVERTISEMENT

ജില്ലാ കൃഷിത്തോട്ടത്തിലെ ഉരുളി മോഷണം പോയി

മാങ്കാംകുഴി: തഴക്കര പഞ്ചായത്തിലെ കോട്ടമുക്കിലെ നൂറേക്കർ ജില്ലാ കൃഷിത്തോട്ടത്തിൽനിന്നു വലിയ ഉരുളി മോഷണം പോയി. ഏകദേശം അരലക്ഷം രൂപ വിലവരുന്ന 38 കിലോ തൂക്കം വരുന്ന ഇന്‍റാലിയത്തിന്‍റെ വലിയ ഉരുളിയാണ് കഴിഞ്ഞദിവസം മോഷണം പോയത്. എ ബ്ലോക്കിലെ എസി കെട്ടിടത്തിലെ ഹാളിലാണ് ഉരുളി സൂക്ഷിച്ചിരുന്നത്. ഉരുളി കാണാതായ വിവരം എ ബ്ലോക്കിലെ തൊഴിലാളികളെ കൃഷി ഓഫീസർ വാട്സ് ആപ് ഗ്രൂപ്പിലൂടെ അറിയിച്ചു. തൊഴിലാളികൾക്ക് ആർക്കെങ്കിലും ഉരുളി മാറ്റിവച്ചതുമായി ബന്ധപ്പെട്ട് വിവരം ഉണ്ടങ്കിൽ ഉടൻ അറിയിക്കണം എന്നാണ് അറിയിച്ചത്. എന്നാൽ, തൊഴിലാളികളെ മാത്രം സംശയിക്കുന്നതിനെതിരേ തൊഴിലാളികളും രംഗത്തെത്തി. ഉദ്യോഗസ്ഥർ അറിയാതെ ഉരുളി കാണാതാവില്ല എന്ന് തൊഴിലാളികളും പ്രതികരിച്ചു. തുടർന്നാണ് കൃഷിത്തോട്ടം അധികൃതർ മാവേലിക്കര പോലീസിൽ പരാതി നൽകിയത്. പോലീസിൽ പരാതി നൽകിയെന്നും അന്വേഷണത്തിന് പോലീസ് എത്തുമെന്നും തൊഴിലാളികളെയും മറ്റ് ഉദ്യോഗസ്ഥരെയും വാട്സ് ആപ് ഗ്രൂപ്പിലൂടെ ഓഫീസർ വീണ്ടും അറിയിച്ചതിനു പിന്നാലെയാണ് പുതിയ ഉരുളി പ്രത്യക്ഷപ്പെട്ടത്. ജില്ലാ കൃഷിത്തോട്ടത്തിന്‍റെ പടിഞ്ഞാറ് ഭാഗത്തെ കാട് നിറഞ്ഞ പ്രദേശത്തുനിന്നു ഇന്നലെ രാവിലെ മെഷീൻ ഉപയോഗിച്ച് പുല്ലുവെട്ടുന്ന തൊഴിലാളികളാണ് പുതിയ ഉരുളി കണ്ടെത്തിയത്. ജില്ലാ കൃഷിത്തോട്ടത്തിനുള്ളിൽ മോഷണം പതിവാണ്. ഏതാനും മാസങ്ങൾക്കു മുമ്പ് മോട്ടോറുകൾ മോഷണം പോയി. കൂടാതെ മറ്റ് വിലപിടിപ്പുള്ള സാധനങ്ങളും മോഷണം പോകാറുണ്ട്. എന്നാൽ, മോഷണം പോയത് കണ്ടെത്താനും മോഷ്ടാക്കളെ പിടികൂടാനും കൃത്യമായ അന്വേഷണം നടത്താറില്ലെന്നാണ് ആക്ഷേപം. അതിനാലാണ് വീണ്ടും ഇവിടെ മോഷണം നടക്കുന്നതെന്നാണ് പരാതി ഉയരുന്നത്.

കർഷകരെ കൈവെടിയരുത്; ഏത്തവാഴ ഉത്പന്നങ്ങള്‍ക്ക് താങ്ങുവില പ്രഖ്യാപിക്കണം

എടത്വ: ഏത്തവാഴ കര്‍ഷകരുടെ ഉത്പന്നങ്ങള്‍ക്ക് താങ്ങുവില പ്രഖ്യാപിക്കണമെന്ന് കര്‍ഷകര്‍. കുട്ടനാട്ടിലെ നൂറുകണക്കിന് കര്‍ഷകരുടെ ഉപജീവനമാര്‍ഗമാണ് ഏത്തവാഴകൃഷി. അടിക്കടിയുണ്ടാകുന്ന പ്രകൃതിക്ഷോഭത്തില്‍ ഏത്തവാഴ കൃഷി അപ്പാടെ നശിക്കുകയാണെന്നും ഉത്പന്നങ്ങള്‍ സംഭരിക്കാന്‍ സര്‍ക്കാര്‍ സംവിധാനങ്ങള്‍ ഒരുക്കണമെന്നുമാണ് കര്‍ഷകര്‍ ആവശ്യപ്പെടുന്നത്. കാലവര്‍ഷക്കെടുതിയിലും വേനല്‍ മഴയിലും ഒരുപോലെ പ്രതിസന്ധിയിലായിരിക്കുകയാണ് കര്‍ഷകര്‍. ഓണം സീസണ്‍ മുന്നില്‍കണ്ടാണ് ഒട്ടുമിക്ക കര്‍ഷകരും ഏത്തവഴ കൃഷി ഇറക്കുന്നത്. സീസണ്‍ അടുക്കുന്നതിന് മുന്‍പ് തന്നെ വേനല്‍ മഴയും തുടര്‍ന്ന് കാലവര്‍ഷവും എത്തും. ഇതോടെ കര്‍ഷകര്‍ കടുത്ത പ്രതിസന്ധിയാണ് അനുഭവിക്കുന്നത്. നഷ്ടപരിഹാരം ഇക്കുറി കാലവര്‍ഷം കര തൊടുന്നതിന് മുന്‍പേ ശക്തമായ കാറ്റും പേമാരിയും അടിച്ച് നിരവധി ഏത്തവാഴയാണ് കുട്ടനാട്ടില്‍ നിലംപറ്റിയത്. ഇന്‍ഷ്യുറന്‍സ് പരിരക്ഷ ലഭ്യമാണന്ന് കൃഷിവകുപ്പ് പറയുമ്പോഴും മുന്‍കാലങ്ങളിലെ കൃഷിനാശത്തിന്‍റെ നഷ്ടപരിഹാരം പലര്‍ക്കും ലഭിച്ചിട്ടില്ല. ഓരോ സീസണിലും പ്രതീക്ഷയോടു കൂടിയാണ് കര്‍ഷകര്‍ കൃഷി ഇറക്കുന്നത്. തമിഴ്നാട്ടില്‍നിന്ന് കുട്ടനാട്ടില്‍ എത്തുന്ന ഏത്തവാഴ വിത്ത് 70 രൂപയ്ക്ക് വാങ്ങിയാണ് കൃഷി ആരംഭിക്കുന്നത്. സ്വന്തമായി ഭൂമിയില്ലാത്ത കര്‍ഷകര്‍ പാട്ടത്തിന് സ്ഥലമെടുത്ത് കൃഷി ആരംഭിക്കുമ്പോള്‍ തുടങ്ങുന്ന അധ്വാനമാണ് വിളവെടുപ്പ് എത്തിക്കാന്‍ കഴിയാതെ നഷ്ടപ്പെടുന്നത്. തൊഴില്‍ കൂലി, വളം, കീടനാശിനികള്‍, കുലച്ചു തുടങ്ങിയാല്‍ താങ്ങി നിര്‍ത്തുന്ന മുളംകമ്പ്, വേനല്‍ കാലത്ത് തോട്ടം നനയ്ക്കാനുള്ള പമ്പിംഗ് എന്നിങ്ങനെ ഭാരിച്ച ചെലവാണ് കര്‍ഷകര്‍ വഹിക്കുന്നത്. പ്രതിസന്ധി ഏത്തവാഴ വിളവെടുത്താല്‍ തന്നെ കര്‍ഷകരുടെ മുടക്കുമുതല്‍ തിരിച്ചു പിടിക്കാന്‍ പോലും കഴിയാറില്ല. പ്രകൃതി ക്ഷോഭത്തെ തരണം ചെയ്ത് വിളവെടുപ്പ് നടത്തിയാല്‍ തന്നെ സീസണ്‍ അടുക്കുമ്പോള്‍ അന്യ സംസ്ഥാനത്ത് നിന്ന് എത്തുന്ന ഏത്തയ്ക്ക വിപണി കീഴടക്കും. ഇതോടെ തുശ്ചമായ വിലയ്ക്ക് ഏത്തയ്ക്ക കൊടുക്കേണ്ട അവസ്ഥയിലാകും കര്‍ഷകര്‍. അടിക്കടിയുണ്ടാകുന്ന പ്രകൃതിക്ഷോഭവും വില തകര്‍ച്ചയും നേരിടാന്‍ സര്‍ക്കാര്‍ തലത്തില്‍ ഉത്പന്നങ്ങള്‍ സംഭരിക്കണമെന്നാണ് കര്‍ഷകര്‍ ആവശ്യപ്പെടുന്നത്. പ്ലാസ്റ്റിക് ഉത്പന്നങ്ങള്‍ക്ക് കടുത്ത നിയന്ത്രണം നടപ്പിലാക്കുന്ന കാലത്ത് കായ്കള്‍ മാത്രമല്ല ഇലകളും സംഭരിച്ച് ഹോട്ടല്‍ ആവശ്യങ്ള‍ക്ക് വിതരണം ചെയ്യണം. കൂടാത വാഴ നൂലില്‍ നിന്ന് വിവിധ ഉത്പന്നങ്ങള്‍ നിര്‍മിക്കുന്ന കാലഘട്ടത്തില്‍ ഇവയുടെ സംഭരണവും സര്‍ക്കാര്‍ ഏറ്റെടുക്കണം. ഏത്തവാഴ കൃഷിയില്‍ കടുത്ത പ്രതിസന്ധി നേരിടുന്ന ഈ കാലത്ത് കൃഷിഭവന്‍ വഴി പുതിയ പദ്ധതികള്‍ ആസൂത്രണം ചെയ്ത് ഏത്തവാഴ കര്‍ഷകരുടെ ദുരിതത്തിന് ശാശ്വത പരിഹാരം കണ്ടെത്തണമെന്നാണ് കര്‍ഷകര്‍ ആവശ്യപ്പെടുന്നത്.

രഞ്ജിതയ്ക്കു യാത്രാമൊഴിയേകാൻ നാട് ഒഴുകിയെത്തി

പുല്ലാട്: കുറഞ്ഞ ദിവസങ്ങൾക്കുള്ളിൽ നാടിന്‍റെ കണ്ണീരോർമയായ രഞ്ജിത ജി. നായർക്ക് യാത്രമൊഴിയേകാൻ പുല്ലാട്ടേക്ക് വൻ ജനപ്രവാഹം. അഹമ്മദാബാദ് വിമാനാപകടത്തില്‍ മരിച്ച പുല്ലാട് സ്വദേശിനി രഞ്ജിത ജി. നായരുടെ മൃതദേഹം ഇന്നലെ ജന്മനാട്ടിലെത്തിച്ചപ്പോൾ അന്ത്യാഞ്ജലി അർപ്പിക്കാനായി വൻ ജനാവലിയാണ് തടിച്ചുകൂടിയത്. രാവിലെ തിരുവനന്തപുരം വിമാനത്താവളത്തിൽ എത്തിച്ച മൃതദേഹം സംസ്ഥാന മന്ത്രിമാരായ വി.എൻ. ശിവൻകുട്ടിയും ജി.ആർ. അനിലും വിവിധ രാഷ്ട്രീയ നേതാക്കളും ഉൾപ്പെടെയുള്ളവർ ചേർന്നാണ് ബന്ധുക്കൾക്കൊപ്പം ഏറ്റുവാങ്ങിയത്. വിമാനത്താവളത്തിൽ അന്തിമോപചാരം അർപ്പിക്കാൻ സൗകര്യം ഒരുക്കിയിരുന്നു. പിന്നീട് വിലാപയാത്രയായി പുല്ലാട്ടേക്ക് പുറപ്പെട്ടു. 9.20ന് രഞ്ജിതയുടെ മാതൃവിദ്യാലയമായ പുല്ലാട് ശ്രീ വിവേകാനന്ദ ഹൈസ്കൂളിൽ വിലാപയാത്ര എത്തി. ആംബുലൻസിൽ നിന്നും മൃതദേഹ പേടകം പുറത്തെടുത്ത് സ്കൂൾ അങ്കണത്തിൽ തയാറാക്കിയ പന്തലിലേക്ക് നീക്കി. മൃതദേഹത്തെ അഹമ്മദാബാദിൽ നിന്നും അനുഗമിച്ച സഹോദരൻ രഞ്ജിത്തും ബന്ധു ഉണ്ണിക്കൃഷ്ണനും മറ്റൊരു സഹോദരനായ രതീഷും മറ്റു ബന്ധുക്കളും ബ്ലോക്ക് പഞ്ചായത്ത് മുൻഅംഗം അജയകുമാർ വല്ല്യുഴത്തിലും അടക്കം മൃതദേഹം ഏറ്റുവാങ്ങി. രഞ്ജിതയോടൊപ്പം സ്കൂളിലും നഴ്സിംഗ് കോളജിലും പഠിച്ചവരും നേരത്തെ ജോലി ചെയ്ത ഗൾഫ് രാജ്യങ്ങളിലുള്ളവരും ബന്ധുക്കളും സ്കൂൾ അധ്യാപകരും അടക്കം നിറകണ്ണുകളോടെ പേടകത്തിൽ ആദരാഞ്ജലി അർപ്പിച്ചു. സംസ്ഥാന സര്‍ക്കാരിന്‍റെ പ്രതിനിധിയായി മന്ത്രിമാരായ വി.എൻ. വാസവനും സജി ചെറിയാനും അന്തിമോപചാരം അര്‍പ്പിച്ചു. ഉച്ചവരെ നീണ്ടു നിന്ന പൊതുദർശനത്തിൽ ജീവിതത്തിന്‍റെ നാനാതുറകളിൽപ്പെട്ടവർ എത്തി. ജില്ലാ കളക്ടര്‍ എസ്. പ്രേംകൃഷ്ണന്‍ പുല്ലാട് സ്കൂളിലും വീട്ടിലും എത്തി അന്തിമോപചാരം അർപ്പിച്ചു. കളക്ടറുടെ നിര്‍ദ്ദേശ പ്രകാരം തിരുവല്ല സബ് കളക്ടര്‍ സുമിത് കുമാര്‍ ഠാക്കൂർ, ഡെപ്യൂട്ടി കളക്ടർ രാജലക്ഷ്മി, തഹസില്‍ദാര്‍ സിനിമോള്‍ മാത്യു എന്നിവര്‍ ക്രമീകരണങ്ങൾക്ക് നേതൃത്വം നൽകി. രഞ്ജിതയുടെ മക്കളായ ഇന്ദുചൂഡന്‍ പഠിക്കുന്ന ശ്രീവിവേകാനന്ദ സ്കൂളിലെ പത്താം ക്ലാസിലെ കുട്ടികളും മകള്‍ ഇന്ദിതയുടെ വിദ്യാലയമായ ഇരവിപേരൂർ ഒഇഎം സ്കൂളിലെ കൂട്ടുകാരികളും യൂണിഫോം അണിഞ്ഞ് പ്രണാമവുമായി എത്തിയത് കണ്ടു നിന്നവരെ ഈറനണിയിച്ചു. രഞ്ജിതയുടെ ഓർമകളിൽ കൂട്ടുകാരികളും അധ്യാപകരും പുല്ലാട്: രഞ്ജിതയുടെ ഭൗതീക ശരീരത്തിനരുകില്‍ മണിക്കൂറുകളോളം നിറമിഴികളോടെ ഇരുന്നവരിൽ അധ്യാപകരും സഹപാഠികളും സുഹൃത്തുക്കളുമുണ്ടായിരുന്നു. രഞ്ജിതയുടെ സഹപാഠി കൂടിയായ ദീപ്തി ടീച്ചറുടെ മനസിലൂടെ കടന്നു പോയത് പ്രിയ കൂട്ടുകാരിക്കൊപ്പം കളിച്ചു വളര്‍ന്ന കുട്ടിക്കാലത്തിന്‍റെ ഓർമകളായിരുന്നു. പരസ്പരം കൈകോര്‍ത്ത്, പാഠ്യ വിഷയങ്ങള്‍ അയവിറക്കി നടന്ന സ്‌കൂള്‍ അങ്കണത്തില്‍ പ്രത്യേകം തയാറാക്കിയ പന്തലില്‍ രഞ്ജിതയുടെ ഭൗത‌ിക ശരീരം എത്തിയപ്പോള്‍ മുതല്‍ പ്രിയ കൂട്ടുകാരിക്കരികില്‍ വേര്‍പാടിന്‍റെ നൊമ്പരവുമായി ദീപ്തി മോഹനും ഇടം പിടിച്ചിരുന്നു. കൂട്ടുകാരി എന്നതിനുപരി അയല്‍ക്കാരി കൂടിയായിരുന്നു ദീപ്തി. കുട്ടിക്കാലം മുതല്‍ നിറ ചിരിയോടുകൂടി മാത്രമേ രഞ്ജിതയെ കണ്ടിട്ടുള്ളൂ. പാട്ടുപാടിയും നൃത്തമാടിയും ചെലവഴിച്ച വിദ്യാഭ്യാസ കാലത്ത് അധ്യാപകര്‍ മിടുമിടുക്കി എന്ന് വിശേഷിപ്പിച്ചത് രഞ്ജിതയെ മാത്രം. ഒന്നിനും മാറ്റി നിര്‍ത്താതെ മുന്‍ നിരയില്‍ നിന്ന വിദ്യാർഥിനിയായിരുന്നു അവളെന്ന് ദീപ്തി അനുസ്മരിച്ചു. മൃതദേഹം ഉള്‍ക്കൊണ്ട പെട്ടിക്ക് മുകളില്‍ സ്ഥാപിച്ച രഞ്ജിതയുടെ ചിത്രത്തിലേക്ക് മിഴി തിരിക്കുന്പോൾ വിതുന്പുകയായിരുന്നു അവർ. പുല്ലാട് വിവേകാനന്ദ സ്‌കൂളിലും തുരുത്തിക്കാട് ബിഎഎം കോളജിലുമായിരുന്നു രഞ്ജിതയുടെ വിദ്യാഭ്യാസം. പന്തളം എന്‍എസ്എസ് മെഡിക്കല്‍ മിഷനില്‍ നഴ്‌സിംഗ് പഠനം. രഞ്ജിത പഠനം പൂര്‍ത്തിയാക്കിയപ്പോഴേക്കും ദീപ്തി കിടങ്ങന്നൂര്‍ എസ് വിജിവി എച്ച്എസ്എസില്‍ അധ്യാപികയായി ജോലിയില്‍ പ്രവേശിച്ചു കഴിഞ്ഞിരുന്നു. എങ്കിലും ഇടയ്ക്ക് കാണും. മനസിലെ വേദന മറച്ചുകൊണ്ടുള്ള ചിരിയുമായി എത്തുന്ന രഞ്ജിതയ്ക്ക് ഒരു പാട് കാര്യങ്ങള്‍ പറയാക്കാന്‍ ബാക്കിയുണ്ടായിരുന്നു. എങ്കിലും ആ ചിരിയില്‍ എല്ലാം അടങ്ങിയിരുന്നതായി ദീപ്തി ഓര്‍ക്കുന്നു. വിവാഹ ശേഷം രഞ്ജിത ജോലി തേടി കുവൈറ്റിലേക്ക് പോയി. ഒപ്പം മൂത്തമകന്‍ ഇന്ദുചൂഡനും ഉണ്ടായിരുന്നു. എട്ടാം ക്ലാസുവരെ ഇന്ദുചൂഡന്‍ കുവൈറ്റിലാണ് പഠിച്ചത്. മടങ്ങി എത്തിയതോടെ തന്‍റെ മകന്‍ മാധവിന്‍റെ പ്രിയ കൂട്ടുകാരനായി ഇന്ദുചൂഡന്‍ മാറി. ഇടയ്ക്ക് ഇന്ദുചൂഡന്‍ വീട്ടില്‍ വരും. അമ്മയുടെ വിശേഷങ്ങള്‍ പറയും. തങ്ങളെ പോലെ പുല്ലാട് വിവേകാനന്ദ സ്‌കൂളിലാണ് ഇരുവരും പഠിച്ചത്. രഞ്ജിതയുടെ ചേതനയറ്റ ശരീരം പേടകത്തിനുള്ളിലായിരിക്കുന്പോഴും നിറചിരി അവരുടെ മനസിൽ നിന്നു മാഞ്ഞിരുന്നില്ല. പ്രിയ കൂട്ടുകാരിയെ അവസാനമായി ഒരു നോക്കു കാണാൻ പലുമായില്ലല്ലോയെന്ന വ്യഥയിൽ അവർ വിട ചൊല്ലി. സ്വപ്ന ഗൃഹം ഒടുവിൽ രഞ്ജിതയ്ക്കു യാത്രമൊഴിയേകി... പുല്ലാട്: താൻ ഏറെ മോഹിച്ച സ്വന്തം ഭവനത്തിലെ പാലുകാച്ചലിനാണ് അടുത്ത വരവെന്നു പറഞ്ഞുപോയ രഞ്ജിത ഒടുവിൽ നിശ്ചലയായി ആ വീടിനുള്ളിൽ പ്രവേശിച്ചു. ഇന്നലെ ഉച്ചയോടെ വീട്ടിലേക്ക് രഞ്ജിതയുടെ മൃതദേഹം അടക്കം ചെയ്ത പേടകം കയറ്റുന്പോൾ ബന്ധുക്കൾക്കും സുഹൃത്തുക്കൾക്കും സങ്കടം അടക്കാനായില്ല. ഇതേ വീട്ടുമുറ്റത്ത് സ്വപ്നങ്ങൾ ബാക്കിയാക്കി വൈകുന്നേരം രഞ്ജിത എരിഞ്ഞടങ്ങുകയും ചെയ്തു. നല്ല ഒരു വീട്, മക്കൾക്ക് മെച്ചപ്പെട്ട വിദ്യാഭ്യാസം എന്നിവയായിരുന്നു രഞ്ജിതയുടെ സ്വപ്നങ്ങൾ. ഗൾഫിൽ ജോലിയെടുക്കുന്നതിനിടെ സംസ്ഥാന ആരോഗ്യ വകുപ്പിൽ നഴ്സായി ജോലി ലഭിച്ചെങ്കിലും അവധിയെടുത്ത് യുകെയിലേക്ക് പോകാൻ തീരുമാനിച്ചതു തന്നെ ജീവിത പാരാബ്ധങ്ങളോടുള്ള വെല്ലുവിളിയുടെ ഭാഗമായാണ്. കഴിഞ്ഞ 11ന് ഉച്ചയോടെ പുല്ലാട്ടെ കൊഞ്ഞോൺ വീട്ടിൽ നിന്നും യുകെയിലേക്കുള്ള യാത്രയ്ക്കായി പുറപ്പെടുന്പോൾ രഞ്ജിത തന്‍റെ സ്വപ്നങ്ങൾ പൂവണിയുന്നതിന്‍റെ ആശ്വാസത്തിലായിരുന്നു. കുടുംബവീടിനോടു ചേർന്നുള്ള പുതിയ വീടിന്‍റെ പാലുകാച്ചൽ ചിങ്ങത്തിൽ നടത്തണമെന്ന ആഗ്രഹത്തിലായിരുന്നു രഞ്ജിത. നിർമാണം മുഴുവൻ പൂർത്തിയായില്ലെങ്കിലും രണ്ട് മുറികൾ പൂർത്തീകരിച്ച് അമ്മയെയും മക്കളെയും പുതിയ വീട്ടിലേക്ക് മാറ്റണമെന്ന ആഗ്രഹവും കരാറുകാരനോട് പങ്കുവച്ചിരുന്നു. പുതിയ വീടും അവിടുത്തെ താമസവും സ്വപ്നം കണ്ട രഞ്ജിത നാട്ടിൽ തിരികെയെത്തി സർക്കാർ സർവീസിൽ തിരികെ കയറണമെന്ന താത്പര്യത്തിലുമായിരുന്നു. ഇതിനായുള്ള നടപടിക്രമങ്ങളുടെ ഭാഗമായാണ് അഞ്ചുദിവസത്തെ അവധിയെടുത്ത് രഞ്ജിത നാട്ടിലെത്തിയത്. കോഴഞ്ചേരിയിലെ ജില്ലാ ആശുപത്രിയിൽ നഴ്സിംഗ് ഓഫീസർ തസ്തികയിൽ നിന്ന് അവധിയെടുത്ത് വിദേശത്തേക്കു പോയതുമായി ബന്ധപ്പെട്ട ചില രേഖകളിൽ ഒപ്പുവയ്ക്കാൻ വേണ്ടി മാത്രമുള്ളതായിരുന്നു ആ യാത്ര. അഹമ്മദാബാദിൽ നിനനാണ് യുകെയിലേക്കുള്ള വിമാനം ലഭിച്ചതെന്നതിനാൽ നെടുന്പാശേരിയിൽ നിന്നും ചെന്നൈയിലേക്ക് 11നു പുറപ്പെട്ടു. അവിടെനിന്ന് അഹമ്മദാബാദിലെത്തിയാണ് യാത്ര പ്ലാൻ ചെയ്തിരുന്നത്. 12ന് ഉച്ചയ്ക്ക് അഹമ്മദാബാദ് വിമാനത്താവളത്തിൽ നിന്നു പറന്നു പൊങ്ങിയ എയര്‍ ഇന്ത്യ വിമാനം അധികം വൈകാതെ അപകടത്തിൽപ്പെടുകയും ചെയ്തു. പൂര്‍ണമായി കത്തിക്കരിഞ്ഞ മൃതദേഹത്തില്‍ നിന്നും രഞ്ജിത ധരിച്ച വസ്ത്രത്തിന്‍റെ അവശിഷ്ടങ്ങളും പാദരക്ഷകളും ലഭിച്ചിരുന്നു. ആന്തരിക അവയവയങ്ങളുടെ പരിശോധനയിലൂടെയാണ് സ്ഥിരീകരണം ഉണ്ടായത്. ഇതിനായി നാട്ടില്‍ നിന്ന് മാതാവ് തുളസിയുടെയും മകന്‍ ഇന്ദുചൂഡന്‍റെയും രക്തസാമ്പിളുകള്‍ ശേഖരിച്ച് അഹമ്മദാബാദിലെത്തിച്ചിരുന്നു.

ഭരണിക്കാവ് പഞ്ചായത്തിൽ തെരുവുനായയുടെ ആക്രമണം: മൂന്നു പേർക്കുകൂടി കടിയേറ്റു

കറ്റാനം: വീട്ടുമുറ്റത്ത് കളിച്ചുകൊണ്ടിരുന്ന ഒമ്പതു വയസുകാരിയെ ആക്രമിച്ചതിനു പിന്നാലെ കറ്റാനം ഭരണിക്കാവ് പഞ്ചായത്തിൽ വീണ്ടും തെരുവുനായയുടെ ആക്രമണം. മൂന്നു പേർക്കുകൂടി കടിയേറ്റു. ഭരണിക്കാവ് പഞ്ചായത്ത് രണ്ടാം വാർഡിൽ കടുവിനാത്ത് മുരളീധരൻ ഉണ്ണിത്താൻ, കരിമുടത്ത് ബിജു, ഭാര്യ അനിത എന്നിവർക്കാണ് കടിയേറ്റത്. ഇവരെ കായംകുളം താലൂക്ക് ആശുപത്രിയിൽ പ്രവേശിപ്പിച്ചു. കഴിഞ്ഞ ദിവസം വീട്ടുമുറ്റത്ത് കളിച്ചുകൊണ്ടിരുന്ന കറ്റാനം ഭരണിക്കാവ് പുതുക്കാട്ട് വീട്ടിൽ നിഷാദ് -ധന്യ ദമ്പതികളുടെ മകൾ ദയ(9)യെ തെരുവുനായ ആക്രമിച്ചിരുന്നു. കുട്ടിയുടെ കഴുത്തിലും മുഖത്തും പരിക്കേറ്റിരുന്നു. ഭരണിക്കാവ് പഞ്ചായത്തിൽ തെരുവുനായ ശല്യം രൂക്ഷമായിട്ടും പഞ്ചായത്ത് നടപടി സ്വീകരിക്കുന്നില്ലെന്ന് നാട്ടുകാർ ആരോപിച്ചു. പഞ്ചായത്തിലെ സ്‌കൂളുകൾക്കും അങ്കണവാടികൾക്കും സമീപം ഇപ്പോൾ തെരുവുനായ ശല്യം രൂക്ഷമാണ്. അതിനാൽ രക്ഷിതാക്കളും ആശങ്കയിലാണ്. ഒമ്പതുവയസുകാരി ദയയെ ആക്രമിച്ച അതെ നായതെന്നെയാണ് ബാക്കി മൂന്നുപേരെ കൂടി കടിച്ചതെന്ന് നാട്ടുകാർ പറഞ്ഞു.

ഓൺലൈൻ തട്ടിപ്പിലൂടെ ലക്ഷങ്ങൾ കവർന്ന കേസിൽ പ്രതി റിമാൻഡിൽ

ആലപ്പുഴ: ഓൺലൈൻ ജോലിയിലൂടെ വീട്ടിൽ ഇരുന്ന് വൻതുക സമ്പാദിക്കാമെന്നു പറഞ്ഞു വിശ്വസിപ്പിച്ച് ആലപ്പുഴ സ്വദേശിയായ യുവാവിൽനിന്ന് ഏഴു ലക്ഷത്തോളം രൂപ തട്ടിയെടുത്ത സംഘത്തിലെ പ്രതികളിലൊരാളായ മുഹമ്മദ് റാഫി റിമാൻഡിലായി. മലപ്പുറം ജില്ലയിൽ വേങ്ങര പഞ്ചായത്തിൽ കള്ളിയത്ത് വീട്ടിൽ മുഹമ്മദ് റാഫി എന്ന യുവാവാണ് റിമാൻഡിൽ. ആലപ്പുഴ സൈബർ ക്രൈം പോലീസ് സ്റ്റേഷൻ ഇൻസ്പെക്ടർ ഏലിയാസ് പി. ജോർജിന്‍റെ നേതൃത്വത്തിലുള്ള പോലീസ് സംഘം മലപ്പുറം ജില്ലയിലെ വിവിധ സ്ഥലങ്ങളിൽ അന്വേഷണം നടത്തിയപ്പോൾ പ്രതി സമാന സാമ്പത്തിക തട്ടിപ്പുകേസിൽ പ്രതിയായി പാലാ സബ് ജയിലിൽ റിമാൻഡിലാണെന്ന് അറിഞ്ഞു. തുടർന്ന് ആലപ്പുഴ ചീഫ് ജുഡീഷ്യൽ മജിസ്ട്രേറ്റ് കോടതി പ്രൊഡക്ഷൻ വാറണ്ട് ഉത്തരവ് പുറപ്പെടുവിക്കുകയും പ്രതിയെ പാലയിൽനിന്ന് ആലപ്പുഴയിൽ എത്തിക്കുകയുമായിരുന്നു. തുടർന്ന് ആലപ്പുഴ സൈബർ ക്രൈം പോലീസ് സ്റ്റേഷൻ ഹൗസ് ഓഫീസറുടെ അപേക്ഷ പ്രകാരം പ്രതിയെ കോടതി റിമാൻഡ് ചെയ്യുകയായിരുന്നു. പ്രതി ഇത്തരം തട്ടിപ്പുകളിലെ ഒരു കണ്ണിയാണെന്ന് സംശയിക്കുന്നു. പരാതിക്കാരനെ ടെലിഗ്രാം അക്കൗണ്ട് വഴി ഫീനിക്സ് മിൽസ് എന്ന സ്ഥാപനത്തിന്‍റെ എച്ച്ആർ ആണെന്ന് പറഞ്ഞ് വിശ്വസിപ്പിച്ചാണ് തട്ടിപ്പ് നടത്തിയത്. പരാതിക്കാരന്‍റെ യും പ്രതികളുടെയും ഉൾപ്പെടെ നിരവധി ബാങ്ക് അക്കൗണ്ടുകളും ഫോൺ കോളുകളും ഓൺ ലൈൻ ബാങ്കിംഗ് ഇടപാടുകളുടെ ഐപി വിവരങ്ങളും ഫോൺ നമ്പരുകളുടെ ഉടമസ്ഥാവകാശ വിവരങ്ങളും പരിശോധിച്ചാണ് പ്രതിയെ കണ്ടെത്തിയത്. 2024 നംവബർ, ഡിസംബർ മാസത്തിലെ വിവിധ തീയതികളിൽ ഏഴു തവണകളായി പരാതിക്കാരൻ 6,97,551 രൂപയാണ് തട്ടിയെടുത്തത്. ഈ കേസിലെ മറ്റു രണ്ടു പ്രതികളെ മുൻപ് ആലപ്പുഴ സൈബർ ക്രൈം പോലീസ് അറസ്റ്റ് ചെയ്തിരുന്നു. സാമൂഹ്യ മാധ്യമങ്ങൾ വഴിയും പരസ്യങ്ങൾ വഴിയും ഓൺലൈൻ വഴിയും ജോലി ചെയ്ത ലാഭം ഉണ്ടാക്കാം എന്ന് പറഞ്ഞ് വിശ്വസിച്ച് വഞ്ചനയിൽ പെടുത്തുകയും പണം തട്ടുകയുമാണ് ഇത്തരം സംഘങ്ങൾ ചെയ്യുന്നത്. ഇത്തരത്തിൽ ഓൺലൈനിലൂടെ സാമ്പത്തിക കുറ്റകൃത്യങ്ങൾക്ക് ഇരയാവുകയാണെങ്കിൽ കേന്ദ്ര ആഭ്യന്തര മന്ത്രാലയത്തിന്‍റെ കീഴിൽ പ്രവർത്തിക്കുന്ന 1930 എന്ന ടോൾഫ്രീ നമ്പറിലോ https://cybercrime.gov.in എന്ന സൈബർ ക്രൈം റിപ്പോർട്ടിംഗ് പോർട്ടലിലോ പരാതി രജിസ്ട്രർ ചെയ്യേണ്ടതാണ്.

കായംകുളം താലൂക്ക് ആശുപത്രിയിൽ ശൗചാലയത്തിൽ കയറിയാൽ പുറത്ത് കാവലിന് ആളുവേണം

കായംകുളം: താലൂക്ക് ആശുപത്രിയിലെ അത്യാഹിത വിഭാഗത്തിലെ ശൗചാലയത്തിന്‍റെ കതകിന് കുറ്റിയും കൊളുത്തുമില്ല. അകത്തുകയറിയാൽ കയറുന്നവർ ഒന്നുകിൽ പാട്ടുപാടണം. അല്ലെങ്കിൽ ആരെയെങ്കിലും പുറത്തു കാവൽ നിർത്തണം. ആരോ സഹികെട്ട് പ്ലാസ്റ്റിക് ചെരിപ്പിന്‍റെ വള്ളി കുറ്റിയിൽ കൊളുത്തിയിട്ടുണ്ട്. അതുകൊണ്ട് കാറ്റടിച്ചാൽ കതകു തുറക്കില്ല. അത്യാഹിതവിഭാഗത്തിൽ ചികിത്സതേടിയെത്തുന്ന സ്ത്രീകളും കുട്ടികളും കൂട്ടിരിപ്പുകാരും ഉപയോഗിക്കുന്നത് ഈ ശൗചാലയമാണ്. അത്യാഹിതവിഭാഗത്തിൽ പത്തു കിടക്കകളാണുള്ളത്. അപകടത്തിൽ പരിക്കേറ്റ് എത്തുന്നവരെയും അടിയന്തര ചികിത്സ തേടി എത്തുന്നവരെയും ഇവിടെയാണ് പ്രവേശിപ്പിക്കുന്നത്. കതകിന് ഒരു പുതിയ കുറ്റിയും കൊളുത്തും വാങ്ങിയിടാൻ അമ്പത് രൂപയിൽ താഴെയേ വരൂ. എന്നിട്ടും അധികൃതർ ആരും തയാറായിട്ടില്ല. നേരത്തേ ആശു പത്രിയിലെ ലാബിലെ ശൗചാലയത്തിൽ കുറ്റിയും കൊളുത്തുമില്ലായിരുന്നു. പരാതികേട്ട് പൊതുപ്രവർത്തകർ കുറ്റിയും കൊളുത്തും വാങ്ങി നൽകി പ്രശ്നം പരിഹരിക്കുകയായിരുന്നു.

എണ്ണവില കൂടിയതോടെ കലർപ്പുള്ള എണ്ണ വ്യാപകം; നോക്കുകുത്തിയായി ഭക്ഷ്യസുരക്ഷാവകുപ്പ്

അന്പലപ്പുഴ: ഭക്ഷ്യ സുരക്ഷാവകുപ്പ് നോക്കുകുത്തിയാകുന്നു. തട്ടുകടകളിലടക്കം പഴകിയ എണ്ണ വ്യാപകമായി ഉപയോഗിക്കുന്നു. നാട്ടിലിപ്പോൾ എല്ലായിടത്തും തട്ടുകടകളും പൊരിക്കടകളുമാണ്. എന്നാൽ, ഇവിടങ്ങളിലെ ല്ലാം ആഴ്ചകൾ പഴക്കമുള്ള എണ്ണ ഉപയോഗിച്ചാണ് ഭക്ഷണം പാകം ചെയ്യുന്നത്. വെളിച്ചെണ്ണയ്ക്ക് ഇപ്പോൾ കൊക്കിലൊതുങ്ങാത്ത തരത്തിൽ വില 400 ആയി. ഇതോടെയാണ് പഴകിയ എണ്ണയിൽ പലഹാരങ്ങൾ നിർമിക്കുന്നത്. തട്ടുകടകളിലും ഇത്തരത്തിൽ ദിവസങ്ങൾ പഴക്കമുള്ള എണ്ണയാണ് ഉപയോഗിക്കുന്നത്. എന്നാൽ, ഇവയൊന്നും പരിശോധിക്കാൻ ഭക്ഷ്യസുരക്ഷാ വിഭാഗം ഉദ്യോഗസ്ഥർ തയാറായിട്ടില്ല. കാൻസർ ഉൾപ്പെടെയുള്ള മാരകരോഗങ്ങൾക്കു കാരണമാകുന്ന തരത്തിലുള്ള പഴകിയ എണ്ണയുടെ ഉപയോഗം വ്യാപകമായിട്ടും ഭക്ഷ്യ സുരക്ഷാ വിഭാഗം യാതൊരു നടപടിയും സ്വീകരിച്ചിട്ടില്ല. പഴകിയ പലഹാരങ്ങൾ വിൽക്കുന്നതു കൂടാതെ ആഴ്ചകൾ പഴക്കമുള്ള മത്സ്യ വ്യാപാരവും വ്യാപകമാണ്. രാസവസ്തുക്കൾ കലർന്ന പഴകിയ മത്സ്യമാണ് പലയിടത്തും വിൽക്കുന്നത്. ഇതും ഭക്ഷ്യ സുരക്ഷാ വിഭാഗം പരിശോധിക്കാൻ തയാറായിട്ടില്ല. സർക്കാർ അനുവദിക്കുന്ന ഫണ്ടുകളുപയോഗിച്ച് വർഷത്തിൽ ചില ദിവസങ്ങളിൽ മറ്റേതെങ്കിലും സംഘടനയുമായി സഹകരിച്ച് സെമിനാറുകൾ നടത്തുന്നതല്ലാതെ മറ്റൊരു പ്രവർത്തനവും ഭക്ഷ്യ സുരക്ഷാവകുപ്പ് നടത്താറില്ല. യാതൊരു മാനദണ്ഡങ്ങളും പാലിക്കാതെയാണ് തട്ടുകടകളും പൊരിക്കടകളും പ്രവർത്തിക്കുന്നത്. ജനങ്ങളുടെ ആരോഗ്യത്തിന് ദോഷകരമായി പ്രവർത്തിക്കുന്ന ഇത്തരം സ്ഥാപനങ്ങളിൽ ആഴ്ചയിലൊരിക്കലെങ്കിലും പരിശോധന നടത്താൻ ഭക്ഷ്യ സുരക്ഷാ വകുപ്പ് തയാറാകണമെന്ന ആവശ്യമുയരുകയാണ്.

കുട്ടനാട്ടില്‍ വെള്ളം കയറിയ എല്ലാ കുടുംബങ്ങള്‍ക്കും 10,000 രൂപ അടിയന്തര സഹായം നല്‍കണം

എടത്വ: കുട്ടനാട്ടില്‍ തുടര്‍ച്ചയായുണ്ടായ രണ്ടു വെള്ളപ്പൊക്കം മൂലം കഷ്ടത അനുഭവിക്കുന്ന എല്ലാ കുടുംബങ്ങള്‍ക്കും പതിനായിരം രൂപ അടിയന്തര സഹായം അനുവദിക്കണമെന്ന് കേരള കോണ്‍ഗ്രസ് ആവശ്യപ്പെട്ടു. നെല്ലിന്‍റെ വില അടിയന്തരമായി കൊടുത്തുതീര്‍ക്കണമെന്നും പ്രകൃതിക്ഷോഭം മൂലം കരകൃഷി നശിച്ച കര്‍ഷകര്‍ക്ക് അടിയന്തര നഷ്ടപരിഹാരം നല്‍കാന്‍ സര്‍ക്കാര്‍ തയാറാകണമെന്നും ആവശ്യപ്പെട്ട് കേരള കോണ്‍ഗ്രസ് നടത്തിയ പ്രതിഷേധ യോഗം സംസ്ഥാന ജനറല്‍ സെക്രട്ടറി തോമസുകുട്ടി മാത്യു ചീരംവേലില്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് തോമസ് സി. ജോസഫ് ചിറയില്‍പറമ്പില്‍ അധ്യക്ഷത വഹിച്ചു. വെള്ളപ്പൊക്കത്തില്‍ ഏത്തവാഴ, മരച്ചീനി, പച്ചക്കറി തുടങ്ങിയ കരകൃഷി പൂര്‍ണമായി നശിച്ചു. മുട്ടാര്‍, തലവടി, എടത്വ, വിയപുരം, തകഴി ഉള്‍പ്പെടെ കുട്ടനാടിന്‍റെ വിവിധ പഞ്ചായത്തുകളിലായി നാലു ലക്ഷത്തിലധികം ഏത്തവാഴകളാണ് നശിച്ചത്. അടിയന്തരമായി കൃഷിവകുപ്പിലെ ഉന്നത ഉദ്യോഗസ്ഥര്‍ അതതു പഞ്ചായത്തിലെ ജനപ്രതിനിധികളുമായി നാശനഷ്ടങ്ങളുടെ കണക്കെടുപ്പ് നടത്തി നഷ്ടപരിഹാര തുക നല്‍കണം. പഞ്ചായത്തംഗങ്ങളായ ഡോളി സക്കറിയ ചീരംവേലില്‍, ബിന്‍സി ഷാബു മുട്ടുംപ്പുറം, ചാച്ചപ്പന്‍ മാവേലി തുരുത്തേല്‍, ജോര്‍ജ് തോമസ് മണലില്‍, മാത്യു എം. വര്‍ഗീസ് മുണ്ടയ്ക്കല്‍, ജോസഫ് മാത്യു ശ്രാമ്പിക്കല്‍, എ.ഡി. അലക്‌സാണ്ടര്‍ ആറ്റുപ്പുറം, കുഞ്ഞുമോന്‍ മണലിപ്പറമ്പില്‍, ജേക്കബ് പി. മാത്യു തോട്ടയ്ക്കാട്ടുപുത്തന്‍കളം, ലൗലേഷ് സി. വിജയന്‍, സേവ്യര്‍കുട്ടി മോളിപ്പടവില്‍, ബാബു പാക്കള്ളി, എം.പി. ആന്‍റണി മുണ്ടയ്ക്കല്‍ എന്നിവര്‍ പ്രസംഗിച്ചു.

സർക്കാർ മത്സ്യത്തൊഴിലാളികളെ വഞ്ചിക്കുന്നു: ജെബി മേത്തർ എംപി

ആലപ്പുഴ: കപ്പൽ കമ്പനികളുമായി ഒത്തുകളിച്ച് സർക്കാർ മത്സ്യത്തൊഴിലാളികളെ വഞ്ചിക്കുകയാണെന്ന് മഹിള കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എംപി പറഞ്ഞു. കപ്പൽ കത്തിയ സംഭവത്തിലും മുങ്ങിയതിലും പ്രയാസം അനുഭവിക്കുന്ന മത്സ്യത്തൊഴിലാളികൾക്ക് കൃത്യമായ ആശ്വാസ ധനസഹായം വാങ്ങിച്ചു കൊടുക്കാതെ സർക്കാർ അവരെ പറ്റിക്കുകയാണ്. രണ്ടു സംഭവങ്ങളിലും പാരിസ്ഥിതിക പ്രശ്നങ്ങളുണ്ടായിട്ടും സർക്കാർ കൃത്യമായി കേസെടുക്കുകയോ കമ്പനികൾക്കെതിരേ നടപടി എടുക്കുകയോ ചെയ്യുന്നില്ല. കോടതി വിമർശനം വന്നശേഷം പേരിനൊരു കേസെടുത്തിരിക്കുകയാണ്. പാരിസ്ഥിതിക പ്രശ്നം മൂലം മത്സ്യസമ്പത്ത് നശിക്കുകയും മത്സ്യത്തൊഴിലാളികളുടെ ഉപജീവനമാർഗം തടസപ്പെട്ടിരിക്കുകയുമാണ്. ജനങ്ങളെ സഹായിക്കുന്നതിനു പകരം ഒത്തുകളി സർക്കാരായി പിണറായി സർക്കാർ മാറിയിരിക്കുകയാണെന്നും അവർ പറഞ്ഞു. മഹിള സാഹസ് കേരള യാത്രയ്ക്ക് മാരാരിക്കുളം, കണിച്ചുകുളങ്ങര, വളവനാട്, കാട്ടൂർ, പാതിരപ്പള്ളി, കലവൂർ, മണ്ണഞ്ചേരി, ആര്യാട്, തുമ്പോളി, കോട്ടുംകുളങ്ങര, പൂന്തോപ്പ്, സനാതനം, തത്തംപള്ളി, കളർകോട്, ബീച്ച്, മുല്ലയ്ക്കൽ, പുത്തനങ്ങാടി എന്നീ മണ്ഡലങ്ങളിലെ സ്വീകരണ യോഗങ്ങളിൽ സംസാരിക്കുകയായിരുന്നു അവർ. കെപിസിസി ജനറൽ സെക്രട്ടറിമാരായ എം. ലിജു, എം.ജെ. ജോബ്, കെ.പി. ശ്രീകുമാർ എന്നിവർ സ്വീകരണ സമ്മേളനങ്ങൾ ഉദ്ഘാടനം ചെയ്തു. ജില്ലാ പ്രസിഡന്‍റ് ബബിത ജയൻ, സംസ്ഥാന ഭാരവാഹികളായ ജയലക്ഷ്മി ദത്തൻ, രമ തങ്കപ്പൻ, ബിന്ദു ചന്ദ്രൻ, സുജാ ജോൺ, പ്രേമ അനിൽകുമാർ, ഉഷാ സദാനന്ദൻ, ജയാസോമൻ എന്നിവർ പ്രസംഗിച്ചു.

മലിനജലത്തിൽ മുങ്ങി വീട്: രോഗങ്ങളുടെ കൂമ്പാരമായി പരിസരം

വീയപുരം: വീയപുരം കൃഷിഭവന്‍റെ പരിധിയിലുള്ള അച്ചനാരി കുട്ടങ്കേരി പാടശേഖരത്തിന്‍റെ ചുറ്റും താമസിക്കുന്നവരാണ് ദുരിതം അനുഭവിക്കുന്നത്. വീടിനു ചുറ്റും മലിനജലം കെട്ടിക്കിടക്കുന്നതിനാൽ സാംക്രമിക രോഗഭീതിയിൽ കുടുംബങ്ങൾ. രണ്ടാഴ്ചയായി വെള്ളം കെട്ടിക്കിടക്കുകയാണ്. ശുചിമുറി പോലും ഉപയോഗിക്കാൻ കഴിയാത്ത സ്ഥിതിയാണ്. വെള്ളത്തിന് ദുർഗന്ധവുമുണ്ട്. വെള്ളത്തിൽ ചവിട്ടിയാൽ‌ ചൊറിച്ചിൽ അനുഭവപ്പെടുന്നതായി നാട്ടുകാർ പറഞ്ഞു. കുട്ടികൾക്ക് വീടിനു പുറത്ത് ഇറങ്ങാൻ പോലും കഴിയുന്നില്ല. പ്രദേശത്ത് കൊതുകുശല്യവും രൂക്ഷമാണ്. അച്ചനാരി കുട്ടങ്കേരി പാടശേഖരത്തിലെ മോട്ടർ തറയിലെ പെട്ടിയും പറയും മാറ്റാത്തതാണ് വെള്ളം ഒഴുകി മാറുന്നതിന് തടസമാകുന്നത്. മറ്റു പാടശേഖരങ്ങളിൽ കൃഷി കഴിഞ്ഞപ്പോൾ പെട്ടിയും പറയും മാറ്റി നീരൊഴുക്ക് സുഗമമാക്കി. ഈ പാടശേഖരത്തിലെ വെള്ളം പുത്തൻതുരുത്ത് വട്ടടിച്ചിറ തോട്ടിലേക്ക് ഒഴുകി മാറുന്നതിന് പെട്ടിയും പറയും തടസമായിരിക്കുകയാണ്. ‌പാടശേഖരസമിതിയും പമ്പിംഗ് കരാറുകാരനും തമ്മിലുള്ള തർക്കമാണ് പെട്ടിയും പറയും മാറ്റാത്തതിനു കാരണം. പ്രശ്നം പരിഹരിക്കുന്നതിന് കൃഷിവകുപ്പിലും ആരോഗ്യവകുപ്പ് അധികൃതർക്കും പരാതി നൽകുമെന്ന് നാട്ടുകാർ പറഞ്ഞു.

പിക്കപ്പ് വാനിൽ കടത്തിക്കൊണ്ടുവന്ന നിരോധിത പുകയില ഉത്പന്നങ്ങൾ പിടികൂടി

കായംകുളം: കെപി റോഡിൽ പിക്കപ്പ് വാനിൽ കടത്തിക്കൊണ്ടുവന്ന നിരോധിത പുകയില ഉത്പന്നങ്ങൾ ഹൈവേ പോലീസ് പിടികൂടി. വാനിൽ ഉണ്ടായിരുന്നവർ ഓടി രക്ഷപ്പെട്ടു. ഇന്നലെ പുലർച്ചെ കായംകുളം-പുനലൂർ റോഡിൽ കറ്റാനം ഭാഗത്ത് വാഹനപരിശോധനയ്ക്കിടെയാണ് ചാരുംമൂട് ഭാഗത്തുനിന്നു കായംകുളം ഭാഗത്തേക്ക് വന്ന ബോലോറോ പിക്കപ്പ് വാഹനം ഹൈവേ പോലീസ് കൈ കാണിച്ച് നിർത്തിച്ച് പരിശോധിക്കാൻ ശ്രമിച്ചത്. ഈ സമയം വാഹനത്തിന്‍റെ ഡ്രൈവറും സഹായിയും വണ്ടി ഉപേക്ഷിച്ച് ഇറങ്ങി ഓടി. വാഹനം പരിശോധിച്ചപ്പോൾ പിൻവശം ടാർപോളിൻ ഉപയോഗിച്ച് മൂടിയനിലയിൽ കാണപ്പെട്ടു. തുടർന്ന് നടത്തിയ പരിശോധനയിൽ ഇരുപത് ചണച്ചാക്കുകളിലും ആറ് പ്ലാസ്റ്റിക്ക് ചാക്കുകളിലായും സൂക്ഷിച്ചിരുന്ന നിരോധിത പുകയില ഉത്പന്നങ്ങളായ ഹൻസ്, കൂൾ ലിപ്പ് എന്നിവ പോലീസ് കണ്ടെത്തി. തുടർന്ന് സ്ഥലത്തെത്തിയ വള്ളികുന്നം പോലീസിന് വാഹനം കൈമാറുകയും പോലീസ് കേസ് രജിസ്റ്റർ ചെയ്ത് പ്രതികൾക്കായി അന്വേഷണം ആരംഭിച്ചു. എസ്ഐ എസ്.കെ. അനിൽകുമാർ, സിവിൽ പോലീസ് ഓഫീസർമാരായ രജ്ഞുനാഥ്, ആദർശ് എന്നിവരാണ് ഹൈവേ പോലീസ് വാഹന പരിശോധനയ്ക്ക് നേതൃത്വം നൽകിയത്.

ചെങ്ങന്നൂർ ബസ് അപകടം: കെഎസ്ആർടിസി ഡ്രൈവറുടെ ലൈസൻസ് റദ്ദാക്കും

ചെങ്ങന്നൂർ: ചെങ്ങന്നൂർ ക്രിസ്ത്യൻ കോളജ് ജംഗ്ഷനിൽ കഴിഞ്ഞ ഞായറാഴ്ച രാവിലെ കെഎസ്ആർടിസി സ്വിഫ്റ്റ് സൂപ്പർഫാസ്റ്റ് ബസും വിവാഹനിശ്ചയ സംഘം സഞ്ചരിച്ചിരുന്ന ടൂറിസ്റ്റ് ബസും കൂട്ടിയിടിച്ചുണ്ടായ അപകടത്തിൽ കെഎസ്ആർടിസി ഡ്രൈവറുടെ ലൈസൻസ് ആറു മാസത്തേക്ക് സസ്പെൻഡ് ചെയ്യാനും ടൂറിസ്റ്റ് ബസിന്‍റെ ഫിറ്റ്നസ് റദ്ദാക്കാനും മോട്ടോർ വാഹന വകുപ്പ് തീരുമാനിച്ചു. സുരക്ഷാ ക്രമീകരണങ്ങൾ പാലിക്കാത്തതിനാലാണ് ഈ നടപടിയെന്ന് അധികൃതർ അറിയിച്ചു. അപകടത്തിൽ 66 പേർക്കാണ് പരിക്കേറ്റത്. ഇതിൽ ആറു പേർ കോട്ടയം മെഡിക്കൽ കോളജിൽ ചികിത്സയിലാണ്. മറ്റുള്ളവരെ ചെങ്ങന്നൂർ ജില്ലാ ആശുപത്രിയിലും സമീപത്തെ സ്വകാര്യ ആശുപത്രികളിലും പ്രവേശിപ്പിച്ചിരിക്കുകയാണ്. അപകടകാരണം: സുരക്ഷാ ലംഘനങ്ങൾ അടിമാലിയിൽനിന്നും തിരുവനന്തപുരത്തേക്കു പോയ കെഎസ്ആർടിസി സ്വിഫ്റ്റ് സൂപ്പർഫാസ്റ്റ് ബസ് മുന്നിലുണ്ടായിരുന്ന കാറുമായി കൂട്ടിയിടിക്കുന്നത് ഒഴിവാക്കാൻ ശ്രമിക്കുന്നതിനിടെയാണ് എതിർ ദിശയിൽനിന്ന് വന്ന ടൂറിസ്റ്റ് ബസുമായി കൂട്ടിയിടിച്ചത്. അപകടത്തിൽ ഇരു ബസുകളിലെയും യാത്രക്കാർക്കാണ് പരിക്കേറ്റത്. അപകടത്തെത്തുടർന്ന് മോട്ടോർ വാഹനവകുപ്പ് അധികൃതർ ഇരു വാഹനങ്ങളും വിശദമായി പരിശോധിച്ചു. ഈ പരിശോധനയിലാണ് ടൂറിസ്റ്റ് വാഹനത്തിന്‍റെ ഗുരുതരമായ സുരക്ഷാ ലംഘനങ്ങൾ കണ്ടെത്തിയത്. ടൂറിസ്റ്റ് ബസിന്‍റെ എമർജൻസി എക്സിറ്റ് വെൽഡ് ചെയ്ത നിലയിലും പിന്നിലെ ചില്ലുകൾ ഉപയോഗിക്കേണ്ട സ്ഥലത്ത് തകരഷീറ്റുകൾ വെച്ച് മറച്ചതായും കണ്ടെത്തി. ഈ കണ്ടെത്തലുകൾ ദീപിക പത്രം കഴിഞ്ഞദിവസം റിപ്പോർട്ട് ചെയ്തിരുന്നു. ഇതിനെത്തുടർന്നാണ് ടൂറിസ്റ്റ് ബസിന്‍റെ ഫിറ്റ്നസ് റദ്ദാക്കാൻ മോട്ടോർ വാഹന വകുപ്പ് തീരുമാനിച്ചത്. കെഎസ്ആർടിസി ഡ്രൈവറുടെ ലൈസൻസ് ആറു മാസത്തേക്ക് സസ്പെൻഡ് ചെയ്യാനുള്ള തീരുമാനം ചെങ്ങന്നൂർ ജോയിന്‍റ് ആർടിഒ അറിയിച്ചു. കെഎസ്ആർടിസി ബസിന്‍റെ കൂടുതൽ പരിശോധനകൾ നടക്കാനുണ്ടെന്നും അതിനുശേഷം തുടർനടപടികൾ കൈക്കൊള്ളുമെന്നും ആർടിഒ വ്യക്തമാക്കി. അപകടത്തിനന്‍റെ പശ്ചാത്തലത്തിൽ, ഹെവി കോൺട്രാക്ട് ക്യാരേജുകളായ ബസുകളിൽ ഇനിമുതൽ കർശന പരിശോധനകൾ നടത്താൻ മോട്ടോർ വാഹനവകുപ്പ് തീരുമാനിച്ചിട്ടുണ്ട്. ഇത്തരം സംഭവങ്ങൾ ആവർത്തിക്കാതിരിക്കാൻ കർശന നടപടി സ്വീകരിക്കുമെന്ന് അധികൃതർ അറിയിച്ചു.

കാവാലം ലിസ്യു പ്രദേശത്ത് സാമൂഹ്യവിരുദ്ധശല്യം

മങ്കൊമ്പ്: കാവാലം ലിസ്യു പ്രദേശത്ത് സാമൂഹ്യവിരുദ്ധശല്യം അതിരൂക്ഷമാകുന്നുവെന്ന് നാട്ടുകാരുടെ പരാതി. രാത്രികാലങ്ങളിൽ നാട്ടുകാരുടെ വസ്തുവകകൾ നശിപ്പിക്കുന്നതു പതിവു സംഭവമായതോടെയാണ് നാട്ടുകാർ പരാതിയുമായി രംഗത്തെത്തുന്നത്. കഴിഞ്ഞയാഴ്ച മുതൽ ലിസ്യു എഫ്‌സിസി കോൺവന്‍റ് സ്ഥാപിച്ചിരുന്ന ബോർഡ് പലവട്ടം സാമൂഹ്യവിരുദ്ധർ നശിപ്പിച്ചു. ലിസ്യു പള്ളിക്കു സമീപമുള്ള കലുങ്കിനോടു ചേർന്നു സ്ഥാപിച്ചിരുന്ന ബോർഡാണ് കഴിഞ്ഞയാഴ്ച സാമൂഹ്യവിരുദ്ധർ ഇളക്കിമാറ്റിയത്. മഠം അധികൃതർ വീണ്ടും ബോർഡ് യഥാസ്ഥാനത്തു സ്ഥാപിച്ചെങ്കിലും രാത്രിയിൽ ആരോ ഇതു ചതുപ്പിൽ വലിച്ചെറിഞ്ഞു. ഇരുമ്പു പൈപ്പിൽ സ്ഥാപിച്ചിരുന്ന ബോർഡ് പിന്നീട് മഠത്തിനു സമീപത്തുള്ള അടഞ്ഞുകിടക്കുന്ന കടയ്ക്കുമുന്നിൽ സൂക്ഷിച്ചിരുന്ന ബോർഡ് കഴിഞ്ഞദിവസം കാണാതായി. മഠം അധികൃതർ കൈനടി പോലീസിൽ പരാതി നൽകി. ഇതിനു പുറമേ രണ്ടു ഏജൻസികളുടെ ഇന്‍റർനെറ്റ് കേബിളുകളും പലയിടത്തും മുറിച്ചുനീക്കി. കോൺവന്‍റിനു സമീപത്തെയും കലുങ്കിനു സമീപത്തുമുള്ള കേബിളുകളാണ് മുറിച്ചുകളഞ്ഞത്. പ്രദേശത്തു രാത്രികാലങ്ങളിൽ പൊതുസ്ഥലത്തുള്ള മദ്യപാനവും ലഹരിവസ്തുക്കളുടെ ഉപയോഗവും വ്യാപകമാണെന്നു പരാതിയുണ്ട്. ദൂരെ സ്ഥലങ്ങളിൽനിന്നുപോലും ധാരളമാളുകൾ ഇവിടേക്കെത്തുന്നതായി നാട്ടുകാർക്കു പരാതിയുണ്ട്. നാട്ടുകാർ പലവട്ടം പരാതിപ്പെട്ടെങ്കിലും പോലീസ് ആവശ്യമായ നടപടികൾ സ്വീകരിക്കുന്നില്ലെന്നാണ് നാട്ടുകാരുടെ പരാതി. ഇവിടെ വാഹനപരിശോധനയും രാത്രികാല പട്രോളിംഗും ആവശ്യമാണെന്നാണ് നാട്ടുകാർ ആവശ്യപ്പെടുന്നത്.

കഞ്ഞിക്കുഴിയില്‍ ഇനി കറുത്തപൊന്നു വിളയും; കുരുമുളക് ഗ്രാമം പദ്ധതിക്കു തുടക്കം

ആലപ്പുഴ: കറുത്ത പൊന്നിനായി ഒന്നിച്ചിറങ്ങി കഞ്ഞിക്കുഴി പഞ്ചായത്ത്. കുരുമുളക് കൃഷിയില്‍ സ്വയംപര്യാപ്തതയെന്ന ലക്ഷ്യത്തോടെ പഞ്ചായത്തിലെ മുഴുവന്‍ വീടുകളിലേക്കും കുരുമുളക് തൈ എത്തിക്കാനുള്ള കുരുമുളക് ഗ്രാമം പദ്ധതിക്കു തുടക്കം കുറിച്ചിരിക്കുകയാണിവിടെ. കൃഷിക്ക് ഏറ്റവും അനുയോജ്യമായ ജൂണ്‍, ജൂലൈ മാസങ്ങളില്‍ 19 വാര്‍ഡുകളിലെ എല്ലാ വീടുകളിലും കൃഷി ആരംഭിക്കും. ഇതിനായി ഓരോ വീട്ടിലേക്കും അയല്‍ക്കൂട്ടങ്ങള്‍ വഴി എട്ട് തൈകള്‍ വീതം വിതരണം ചെയ്യുന്നത് അതിവേഗം പുരോഗമിക്കുകയാണ്. അധികം പരിചരണം ആവശ്യമില്ലാത്തതും ഗുണമേന്മയുള്ള വിളവ് നല്‍കുന്നതുമായ പന്നിയൂര്‍ ഇനത്തില്‍പ്പെട്ട തൈകളാണ് വിതരണത്തിനായി എത്തിച്ചിരിക്കുന്നത്. പഞ്ചായത്ത് പരിധിയിലെ 9000ത്തിലധികം കുടുംബങ്ങളിലേക്ക് സൗജന്യമായാണ് തൈകള്‍ നല്‍കുന്നത്. വാര്‍ഷിക പദ്ധതിയില്‍ ഉള്‍പ്പെടുത്തി അഞ്ചര ലക്ഷം രൂപയാണ് ഇതിനായി വകയിരുത്തിയതെന്ന് പഞ്ചായത്ത് പ്രസിഡന്‍റ് ഗീതാ കാര്‍ത്തികേയന്‍ പറഞ്ഞു. ഒരു കുടുംബത്തിന് ആവശ്യമുള്ള കുരുമുളക് വീട്ടുവളപ്പില്‍ തന്നെ ഉത്പാദിപ്പിക്കുക എന്നതാണ് പദ്ധതി ലക്ഷ്യം വയ്ക്കുന്നതെന്നും ചെടികളുടെ തുടര്‍പരിചരണത്തിനാവശ്യമായ എല്ലാ സഹായങ്ങളും കൃഷിഭവന്‍ മുഖേന ഉറപ്പാക്കുമെന്നും കൃഷി ഓഫീസര്‍ റോസ്മി ജോര്‍ജ് പറഞ്ഞു.

പി.എന്‍. പണിക്കര്‍ അനുസ്മരണവും വായനവാരാഘോഷത്തിന്‍റെ ഉദ്ഘാടനവും

കളര്‍കോട്: കുട്ടനാട് ഇന്‍റഗ്രല്‍ ഡെവലപ്‌മെന്‍റ് സൊസൈറ്റിയുടെ സഹകരണത്തോടെ കുട്ടനാടന്‍ സാംസ്‌കാരിക വേദിയുടെ ആഭിമുഖ്യത്തില്‍ പി.എന്‍. പണിക്കര്‍ അനുസ്മരണവും വായനവാരാഘോഷത്തിന്‍റെ തുടക്കവും കുറച്ചു. സൊസൈറ്റി ഹാളില്‍ കൂടിയ അനുസ്മരണ സമ്മേളനത്തില്‍ പ്രസിഡന്‍റ് പ്രദീപ് കൂട്ടാല അധ്യക്ഷത വഹിച്ചു. കുട്ടനാടന്‍ സാംസ്‌കാരിക വേദി ചെയര്‍മാന്‍ ബേബി പാറക്കാടന്‍ സമ്മേളനം ഉദ്ഘാടനം ചെയ്തു. കേരള സര്‍വോദയ മണ്ഡലം ജില്ലാ സെക്രട്ടറി രാജു പള്ളിപ്പറമ്പില്‍ മുഖ്യപ്രഭാഷണം നടത്തി. മങ്കൊമ്പ് സദാശിവന്‍ നായര്‍, ഹക്കീം മുഹമ്മദ് രാജാ, തോമസ് കുര്യന്‍, സജി ജോസഫ്, സന്തോഷ് മാത്യു, ലൈസമ്മ ബേബി എന്നിവര്‍ പ്രസംഗിച്ചു. കെ.ടി. ആന്‍റണി കണ്ണാട്ടുമഠം പി.എന്‍. പണിക്കര്‍ അനുസ്മരണ കവിത അവതരിപ്പിച്ചു.

ദേശീയ ഗ്രാമീണ തൊഴിലുറപ്പു പദ്ധതി റോഡുപണികള്‍ ജില്ലയില്‍ നിലച്ചു

ആലപ്പുഴ: മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതിയിലെ റോഡുപണികള്‍ ജില്ലയില്‍ നിലച്ചു. തൊഴില്‍ദിനം കണക്കാക്കിയതിലെ വീഴ്ചമൂലം ക്വാറിമക്ക് ഉപയോഗിച്ചുള്ള നിര്‍മാണത്തിനുള്ള എസ്റ്റിമേറ്റ് തയാറാക്കല്‍ ഓംബുഡ്‌സ്മാന്‍ തടഞ്ഞതോടെയാണ് പ്രതിസന്ധി. തദ്ദേശതെരഞ്ഞെടുപ്പ് അടുത്തിരിക്കെ റോഡുനിര്‍മാണം നിലച്ചത് പഞ്ചായത്തു ഭരണസമിതികളെ ചൊടിപ്പിച്ചു. തൊഴില്‍ദിനം കണക്കാക്കിയതില്‍ വീഴ്ചയുണ്ടെന്ന കാര്യം ചില പഞ്ചായത്തുകള്‍ തൊഴിലുറപ്പ് ജില്ലാ മിഷന്‍ അധികൃതരെ നേരത്തേ അറിയിച്ചിരുന്നു. വിഷയത്തില്‍ ഇടപെടാന്‍ അവര്‍ തയാറാകാതിരുന്നതാണ് പ്രശ്‌നം വഷളാക്കിയതെന്നാണ് ജനപ്രതിനിധികളുടെ ആരോപണം. തൊഴില്‍ദിനങ്ങള്‍ കൃത്യമായി കണക്കാക്കി മാത്രമേ ഇനി പുതിയ എസ്റ്റിമേറ്റ് തയാറാക്കാനാകൂ. അതിന് സെക്യുര്‍ സോഫ്റ്റ്‌വേറിലടക്കം മാറ്റം വരുത്തണം. ഇതിനുള്ള സമയം നീളുന്നതാണ് പഞ്ചായത്ത് അധികൃതരെ കുഴക്കുന്നത്. റോഡുപണി നിലച്ചത് പഞ്ചായത്തു ഭരണസമിതികള്‍ക്കു തലവേദനയായി. പ്രതിപക്ഷം അത് ആയുധമാക്കിയാല്‍ വരുന്ന തദ്ദേശതെരഞ്ഞെടുപ്പില്‍ തിരിച്ചടിയാകും. അതിനാല്‍ പ്രശ്‌നം പരിഹരിച്ച് റോഡുനിര്‍മാണം പുനരാരംഭിക്കാന്‍ നടപടിയെടുക്കണമെന്നാണ് ആവശ്യം. കൂടുതല്‍ തൊഴില്‍ദിനം ഉപയോഗിച്ചു ചെയ്യേണ്ട ജോലിക്ക് കുറച്ചു തൊഴില്‍ദിനം ഉപയോഗിച്ചതിലൂടെ തൊഴില്‍ചൂഷണം നടന്നതായി തെളിഞ്ഞതോടെയാണ് ഓംബുഡ്‌സ്മാന്‍ എസ്റ്റിമേറ്റ് തയാറാക്കല്‍ നിര്‍ത്തിവയ്ക്കാന്‍ നിര്‍ദേശിച്ചത്. തൊഴിലുറപ്പ് ജില്ലാ മിഷന്‍ അധികൃതര്‍ക്കു പുറമേ സംസ്ഥാന മിഷന്‍ അധികൃതര്‍ക്കും വീഴ്ചയുണ്ടായിട്ടുണ്ടെന്ന് ഓംബുഡ്‌സ്മാന്‍ കണ്ടെത്തിയിരുന്നു. തൊഴിലുറപ്പു പദ്ധതിയിലെ സാമ്പത്തിക ക്രമക്കേടുകള്‍ സംബന്ധിച്ച കേസന്വേഷണം പോലീസിനു കൈമാറാന്‍ ഓംബുഡ്‌സ്മാന്‍ നിര്‍ദേശിച്ചിട്ടും ജില്ലയിലെ ഭൂരിഭാഗം പഞ്ചായത്തുകളും തയാറായിട്ടില്ല. സെക്രട്ടറിമാരാണ് പോലീസിനെ അറിയിച്ച് കേസെടുപ്പിക്കേണ്ടത്.സെക്രട്ടറി ചെയ്തില്ലെങ്കില്‍ ബ്ലോക്കുതല ഉദ്യോഗസ്ഥനോ ജില്ലാതല ഉദ്യോഗസ്ഥനോ ചെയ്യണം. ഇനിയും വൈകിയാല്‍ കടുത്ത നടപടിയിലേക്ക് ഓംബുഡ്‌സ്മാന്‍ നീങ്ങുമെന്നാണു വിവരം.

ഒരുവർഷം നീണ്ട നിയമപോരാട്ടം: ഫേസ് ബുക്ക് പേജ് തിരികെ ലഭിച്ചു

അന്പലപ്പുഴ: ഒരുവർഷത്തിലധികം നീണ്ടുനിന്ന നിയമപോരാട്ടത്തിനൊടുവിൽ വാർത്താ ചാനലിന്‍റെ ഫേസ് ബുക്ക് പേജ് തിരികെ ലഭിച്ചു. തിരികെ ലഭിച്ചത് കേരള ഹൈക്കോടതിയുടെ ഇടപെടലിനെത്തുടർന്ന്. അമ്പലപ്പുഴയിലെ പ്രാദേശിക ചാനലായ യുസിവി ന്യൂസിന്‍റെ യുസിവി ലൈവ് എന്ന ഫേസ് ബുക്ക് പേജാണ് കഴിഞ്ഞ മാർച്ചിൽ ഹാക്ക് ചെയ്യപ്പെട്ടത്. തുടർന്ന് ഫേസ് ബുക്ക് പേജ് അഡ്മിൻ ബിനു ദാമോദരൻ സൈബർ സെൽ, ആലപ്പുഴ ജില്ലാ പോലീസ് ചീഫ് എന്നിവർക്കു പരാതി നൽകിയെങ്കിലും പേജ് തിരികെ ലഭിക്കുന്ന തരത്തിൽ യാതൊരു നടപടിയുമുണ്ടായില്ല. ഇതോടെ ബിനു ദാമോദരൻ പേജ് തിരികെ ലഭ്യമാക്കാൻ അഡ്വ. സഞ്ജീവ് കുമാർ മുഖേനെ ഫേസ് ബുക്ക് പേജ് ഉടമസ്ഥരായ മെറ്റാ പ്ലാറ്റ്ഫോമിനെ പ്രതിയാക്കി ഹൈക്കോടതിയിൽ ഹർജി നൽകി. ഹർജി പരിഗണിച്ച ഹൈക്കോടതി ഹാക്ക് ചെയ്തവർ പേജിൽ പോസ്റ്റു ചെയ്ത അശ്ലീല വീഡിയോകൾ നീക്കം ചെയ്യാൻ അടിയന്തര നടപടി സ്വീകരിക്കണമെന്ന് ഇവർക്ക് നിർദേശം നൽകി. ഇതിനുശേഷം ഹൈക്കോടതിയുടെ ശക്തമായ ഇടപെടലിനെത്തുടർന്നാണ് ഒരുവർഷം നീണ്ടുനിന്ന നിയമപോരാട്ടത്തിനൊടുവിൽ ഫേസ് ബുക്ക് പേജ് പഴയരീതിയിൽ തിരികെ ലഭിച്ചത്. പ്രാദേശിക, ജില്ലാ വാർത്തകൾ ലഭ്യമായിരുന്ന ഈ പേജിന് 16 കെ. സബ്സ്ക്രൈബറുണ്ടായിരുന്നു. യുസിവി ലൈവ് എന്ന ഫേസ് ബുക്ക് പേജിലൂടെ പ്രാദേശിക, ജില്ലാ വാർത്തകൾ പഴയരീതിയിൽ ഇനി ലഭ്യമാകുമെന്ന് അഡ്മിൻ ബിനു ദാമോദരൻ അറിയിച്ചു. ഹാക്ക് ചെയ്യപ്പെട്ട വാർത്താ ചാനലിന്‍റെ ഫേസ് ബുക്ക് പേജ് ഹൈക്കോടതി ഇടപെടലിനെത്തുടർന്ന് തിരികെ ലഭിക്കുന്നത് ഇതാദ്യമാണ്.

വിദ്യാർഥികൾക്ക് സന്തോഷവും അദ്ഭുതവും; പ്രിയ കഥാകൃത്ത് മുന്നിൽ

അമ്പലപ്പുഴ: പാഠപുസ്തകങ്ങളിലും കഥകളിലും മാത്രം കണ്ടുപരിചയിച്ച പ്രശസ്ത കഥാകൃത്തിനെ നേരിൽക്കണ്ടപ്പോൾ വിദ്യാർഥികൾക്ക് സന്തോഷവും അദ്ഭുതവും. തന്‍റെ കഥാപാത്രങ്ങളെ ക്ലാസ് ചുവരുകളിൽ കണ്ടപ്പോൾ കഥാകൃത്തിനും അദ്ഭുതവും സന്തോഷവും. പ്രശസ്ത കഥാകാരൻ അംബികാ സുതൻ മാങ്ങാടാണ് നീർക്കുന്നം എസ്ഡിവി ഗവ. യുപി സ്കൂളിൽ വിദ്യാർഥികളുമായി സംവദിക്കാനെത്തിയത്. കാസർഗോട്ടെ എൻഡോസൾഫാൻ ദുരിതം പ്രമേയമാക്കി ‘എൻമകളെ’ എന്ന കൃതിയിലൂടെയാണ് അംബികാ സുതൻ മാങ്ങാട് മലയാള സാഹിത്യലോകത്ത് ഇടം നേടിയത്. ഓടക്കുഴൽ അവാർഡ് ഉൾപ്പെടെ നിരവധി പുരസ്കാരങ്ങൾ നേടിയ അംബികാ സുതൻ മാങ്ങാട് എൻഡോസൾഫാനെതിരേ തന്‍റെ കൃതികളിലൂടെ ശക്തമായി പ്രതികരിച്ചിരുന്നു. വായന വാരാചരണ പരിപാടിയുടെ ഭാഗമായാണ് ഈ കഥാകൃത്ത് കാസർകോഡ്നിന്ന് നീർക്കുന്നത്തെ വിദ്യാലയത്തിലെത്തിയത്. പരിസ്ഥിതി സംബന്ധമായ തന്‍റെ നിരവധി കൃതികളിലെ കഥാപാത്രങ്ങൾ ക്ലാസ് മുറികളിൽ വരച്ചിട്ടിരിക്കുന്നത് കണ്ടപ്പോൾ കഥാകൃത്തിന് അദ്ഭുതവും സന്തോഷവും. കഥാകൃത്തിന്‍റെ കഥകളും കഥാപാത്രങ്ങളും പുരസ്കാരങ്ങളുമൊക്കെ കടലാസിൽ വരച്ചിട്ട് നിർമിച്ച മരവും കഥാകൃത്ത് നേരിൽക്കണ്ടു. പരിപാടി എച്ച്. സലാം എംഎൽഎ ഉദ്ഘാടനം ചെയ്തു.

നഷ്ടപരിഹാരം നല്‍കണം: കെ.സി. വേണുഗോപാല്‍ എംപി

ആലപ്പുഴ: കപ്പലപകടങ്ങളെത്തുടര്‍ന്ന് കടലില്‍ പതിച്ച കണ്ടയ്‌നറുകളില്‍ തട്ടി വലകള്‍ക്കും ബോട്ടുകള്‍ക്കും നാശനഷ്ടം സംഭവിച്ച മത്സ്യത്തൊഴിലാളികള്‍ക്ക് അര്‍ഹമായ നഷ്ടപരിഹാരം സര്‍ക്കാര്‍ നല്‍കണമെന്ന് കെ.സി. വേണുഗോപാല്‍ എംപി. കൂടാതെ കപ്പല്‍ കമ്പനികളില്‍നിന്ന് നഷ്ടപരിഹാരം ലഭ്യമാക്കാന്‍ കേടുപാടുകള്‍ സംഭവിച്ച മത്സ്യബന്ധന യാനങ്ങളുടെ പ്രവര്‍ത്തന പരിധിയില്‍ ഉള്‍പ്പെട്ട തീരദേശ പോലീസ് സ്റ്റേഷനുകളില്‍ തന്നെ കപ്പലപകടങ്ങള്‍ മൂലമുണ്ടാകുന്ന നഷ്ടങ്ങള്‍ സംബന്ധിച്ച പരാതികള്‍ സ്വീകരിക്കുകയും കേസെടുക്കുകയും ചെയ്യണമെന്നും അദ്ദേഹം ആവശ്യപ്പെട്ടു. ഇക്കാര്യങ്ങള്‍ ചൂണ്ടിക്കാട്ടി കെ.സി. വേണുഗോപാല്‍ എംപി മുഖ്യമന്ത്രിക്ക് കത്തു നല്‍കി. കപ്പലപകടങ്ങളെത്തുടര്‍ന്ന് കടലിന്‍റെ ആവാസ വ്യവസ്ഥയ്ക്കുണ്ടാകാവുന്ന പരിസ്ഥിതി സംബന്ധമായ നഷ്ടവും മത്സ്യത്തൊഴിലാളികള്‍ക്ക് തൊഴിലിനു പോകാന്‍ പറ്റാത്ത നഷ്ടവും കണക്കാക്കി നഷ്ടപരിഹാരം കപ്പല്‍ കമ്പനിയില്‍നിന്ന് വാങ്ങിയെടുക്കുന്നതിന് മത്സ്യബന്ധന യാനങ്ങളുടെ ഉടമകള്‍ ഇതുസംബന്ധിച്ച പരാതി തീരദേശ പോലീസ് സ്റ്റേഷനില്‍ നല്‍കേണ്ടതുണ്ട്. തോട്ടപ്പള്ളിക്ക് പടിഞ്ഞാറ് ഭാഗത്ത് 14.6 നോട്ടിക്കൽ മൈല്‍ ദൂരെ അപകടത്തില്‍പ്പെട്ട എംഎസ്‌സി എല്‍സ3 എന്ന ചരക്ക് കപ്പലില്‍നിന്ന് 700 ഓളം കണ്ടയ്‌നറുകളും ബേപ്പൂര്‍ തുറമുഖത്തിന് പടിഞ്ഞാറ് ഭാഗത്തായി 106 നോട്ടിക്കല്‍ മൈലില്‍ സിങ്കപ്പൂര്‍ വാന്‍ ഹായി- 503 എന്ന കപ്പലില്‍നിന്ന് 600 ഓളം കണ്ടയ്‌നറുകളും കടലിന്‍റെ വിവിധ ഭാഗങ്ങളില്‍ പതിച്ചിട്ടുണ്ട്. ഈ കണ്ടെയ്‌നറുകളില്‍ ഭൂരിഭാഗവും എറണാകുളം, ആലപ്പുഴ, കൊല്ലം, തിരുവനന്തപുരം ഭാഗത്തെ കടലിന്‍റെ വിവിധ ഭാഗങ്ങളില്‍ അടിത്തട്ടില്‍ കിടക്കുകയാണ്. കണ്ടെയ്‌നറുകള്‍ കിടക്കുന്നതു കാരണം കൊല്ലം, ആലപ്പുഴ ജില്ലകളില്‍ ഉള്‍പ്പെട്ട ബോട്ടുകള്‍ക്കും വള്ളങ്ങള്‍ക്കും മത്സ്യബന്ധനം നടത്താന്‍ പറ്റാത്ത സാഹചര്യമാണെന്നും വേണുഗോപാല്‍ ചൂണ്ടിക്കാട്ടി.

ആഴക്കടലില്‍ ഉടക്കില്‍ കുടുങ്ങി വല കീറുന്നതായി പരാതി

അമ്പലപ്പുഴ: മത്സ്യബന്ധന വള്ളങ്ങളുടെ വല ആഴക്കടലില്‍ ഉടക്കില്‍ കുടുങ്ങി കീറി വന്‍തോതില്‍ നഷ്ടം ഉണ്ടാകുന്നതായി പരാതി. മുങ്ങിയ കപ്പലില്‍നിന്നു കടലില്‍ വീണ കണ്ടെയ്‌നറുകളില്‍ വല കുടുങ്ങി കീറുന്നവെന്നാണ് വള്ളം ഉടമകള്‍ തോട്ടപ്പള്ളി തീരദേശ പോലീസ് സ്റ്റേഷനില്‍ നല്‍കിയ പരാതിയിൽ പറയുന്നത്. 15 മുതല്‍ 28 ലക്ഷം രൂപയുടെ വരെ നഷ്ടം അവര്‍ ഉന്നയിക്കുന്നു. എന്നാല്‍, ഫോര്‍ട്ട് കൊച്ചി പോലീസ് സ്റ്റേഷനിലാണ് കപ്പല്‍ മുങ്ങിയതുമായി ബന്ധപ്പെട്ട കേസുകളുള്ളത് എന്നതിനാല്‍ തോട്ടപ്പള്ളിയില്‍ കിട്ടിയ അഞ്ചു പരാതികളും ഫോര്‍ട്ട് കൊച്ചി സ്റ്റേഷനിലേക്ക് അയച്ചതായി സ്റ്റേഷന്‍ ഓഫീസര്‍ കെ.പി. വിനോദ് പറഞ്ഞു. വലവിരിച്ച് മീന്‍ കയറിയശേഷമാണ് വലകള്‍ ഉടക്കില്‍ വീഴുന്നതെന്ന് തൊഴിലാളികള്‍ പറയുന്നു. നേരത്തേ കടലിലുള്ള ഉടക്കുകള്‍ മത്സ്യത്തൊഴിലാളികള്‍ ജിപിഎസില്‍ സെറ്റ് ചെയ്തിട്ടുള്ളതിനാല്‍ അറിയാന്‍ കഴിയുമായിരുന്നു. ആ ഭാഗങ്ങള്‍ ഒഴിവാക്കിയാണ് വലയിട്ടിരുന്നത്. എന്നാല്‍, ഇപ്പോള്‍ ഉടക്കുമെന്ന് ഒരു പ്രതീക്ഷയുമില്ലാത്ത കടലിലാണ് വല ഉടക്കുന്നത്. മത്സ്യബന്ധന മേഖല വന്‍ നഷ്ടത്തിലായ സാഹചര്യത്തില്‍ ട്രോളിംഗ് നിരോധന കാലത്താണ് പരമ്പരാഗത മത്സ്യത്തൊഴിലാളികള്‍ക്ക് പ്രതീക്ഷയുള്ളത്. ആ സമയത്ത് വലകള്‍ ഉടക്കി നശിച്ച് ലക്ഷക്കണക്കിനു രൂപ നഷ്ടം ഉണ്ടാകുന്നത് വള്ളം ഉടമകളെയും തൊഴിലാളികളെയും കൂടുതല്‍ ദുരിതത്തിലാക്കുന്നു. ഒട്ടേറെ മത്സ്യത്തൊഴിലാളികളുടെ പ്രയത്‌നത്തിന്‍റെ ഭാഗമായിട്ടാണ് വല മത്സ്യബന്ധനത്തിനു പോകാന്‍ കഴിയുന്നതരത്തില്‍ തയാറാക്കി എടുക്കുന്നത്. കീറിയ വല തകരാര്‍ പരിഹരിച്ച് എടുക്കാന്‍ രണ്ടാഴ്ച വേണ്ടിവരും. അതുവരെ മത്സ്യത്തൊഴിലാളികള്‍ക്ക് ജോലിയും ഇല്ലാതാകുന്ന സ്ഥിതിയാണ്.

മഴയ്‌ക്കൊപ്പം ആഫ്രിക്കന്‍ ഒച്ചുമെത്തി; ജാഗ്രത വേണമെന്ന് കീട നിരീക്ഷണ കേന്ദ്രം

ആലപ്പുഴ: മഴക്കാലം ആരംഭിച്ചതോടെ ജില്ലയിലെ വിവിധ പ്രദേശങ്ങളില്‍ ആഫ്രിക്കന്‍ ഒച്ചിന്‍റെ (ജയന്‍റ് ആഫ്രിക്കന്‍ സ്നേല്‍) വ്യാപകമായ സാന്നിധ്യം ശ്രദ്ധയില്‍പ്പെട്ടതായും വിള നശിപ്പിക്കുന്ന ഇവയ്ക്കെതിരേ കര്‍ഷകരും പൊതുജനങ്ങളും ജാഗ്രത പാലിക്കണമെന്നും കീടനിരീക്ഷണ കേന്ദ്രം പ്രോജക്ട് ഡയറക്ടര്‍ അറിയിച്ചു. ആഫ്രിക്കന്‍ ഒച്ചിന്‍റെ സ്രവങ്ങളില്‍ കാണപ്പെടുന്ന പരാദവിര മനുഷ്യരില്‍ രോഗബാധയ്ക്ക് കാരണമാകുമെന്നതിനാല്‍ ഇവയെ വളരെ ശ്രദ്ധാപൂര്‍വം നിയന്ത്രിക്കേണ്ടതുണ്ട്. എലി നിയന്ത്രണത്തിലെന്നപോലെ കൂട്ടായ സാമൂഹികാടിസ്ഥാനത്തിലുള്ള നിയന്ത്രണ മാർഗങ്ങള്‍ അവലംബിച്ചാല്‍ മാത്രമേ ഇവയെ ഫലപ്രദമായി ഇല്ലാതാക്കാന്‍ കഴിയൂ. ആഫ്രിക്കന്‍ ഒച്ചുകളുടെ സ്രവങ്ങളില്‍ കാണുന്ന നാടവിരകള്‍ മനുഷ്യരില്‍ മസ്തിഷ്‌കജ്വരം ഉണ്ടാക്കാന്‍ സാധ്യതയുള്ളതിനാല്‍ ഇതൊരു സാമൂഹികാരോഗ്യ പ്രശ്നമായി കൂടി പരിഗണിച്ച്, തദ്ദേശഭരണ സ്ഥാപനങ്ങള്‍, കൃഷി, ആരോഗ്യ വകുപ്പുകള്‍, സന്നദ്ധ സംഘടനകള്‍, കാര്‍ഷിക കൂട്ടായ്മകള്‍ എന്നിവയുടെയെല്ലാം നേതൃത്വത്തില്‍ വിപുലമായ ബോധവത്കരണവും നിയന്ത്രണ പ്രവര്‍ത്തനങ്ങളും ഏറ്റെടുത്തു നടത്തണമെന്നും കീടനിരീക്ഷണ കേന്ദ്രം പ്രോജക്ട് ഡയറക്ടര്‍ പറഞ്ഞു. വാഴ, കിഴങ്ങുവര്‍ഗങ്ങള്‍, ഇഞ്ചി, മഞ്ഞള്‍, പപ്പായ, നാരകം, ഇലവര്‍ഗ പച്ചക്കറികള്‍ മുതലായ വ്യത്യസ്ത കാര്‍ഷിക വിളകളെ ആക്രമിച്ച് വിളനാശമുണ്ടാക്കുന്നവയാണ് ആഫ്രിക്കന്‍ ഒച്ചുകള്‍. വാഴയിലയ്ക്കാണ് ഏറ്റവുമധികം നാശമുണ്ടാക്കുന്നത്. ഇവയുടെ പ്രത്യുത്പാദനശേഷിയും വളരെ കൂടുതലാണ്. ഒരു ഒച്ച് ശരാശരി 900 മുട്ടകളെങ്കിലുമിടും. ഇവയില്‍ 90 ശതമാനവും വിരിഞ്ഞിറങ്ങുകയും ചെയ്യും. അനുകൂല സാഹചര്യങ്ങളില്‍ ഏഴു മുതല്‍ പത്തു വര്‍ഷം വരെ ജീവിക്കുന്ന ഇവയുടെ വംശവര്‍ധന ഭീമമായ തോതില്‍ നടക്കുകയും ചുരുങ്ങിയ സമയത്തിനുള്ളില്‍ പ്രദേശമാകെ പെരുകുകയും ചെയ്യും. ഇവയുടെ ഷെല്‍ നിര്‍മിതിക്ക് കൂടിയ അളവില്‍ കാത്സ്യം ആവശ്യമായതിനാലാണ് മതിലുകള്‍, ചുമരുകള്‍, സിമന്‍റ് തേച്ച സ്ഥലങ്ങള്‍ മുതലായ ഇടങ്ങളില്‍ കൂട്ടമായി കാണപ്പെടുന്നത്. നിയന്ത്രണ മാര്‍ഗങ്ങള്‍ 4ജൈവ അവശിഷ്ടങ്ങള്‍ കൂട്ടിയിടാതിരിക്കുക, കാടുകയറി കിടക്കുന്ന പറമ്പുകള്‍ വൃത്തിയാക്കുക. 4രാത്രികാലങ്ങളിലാണ് ഇവ കൂട്ടമായി പുറത്തേക്കുവരുന്നത്. പപ്പായയുടെ ഇല, തണ്ട്, മുരിങ്ങയില, കാബേജ് ഇലകള്‍ മുതലായവ ഒരു നനഞ്ഞ ചണച്ചാക്കിലാക്കി ഒരു ദിവസം വച്ച ശേഷം പുറത്തുവയ്ക്കുക. ഇവയിലേക്ക് ആകര്‍ഷിക്കപ്പെടുന്ന ഒച്ചുകളെ ഒരു കുഴിയിലിട്ട് ഉപ്പ് വിതറിയോ, തുരിശ് ലായനി തളിച്ചോ നശിപ്പിക്കാം. പിന്നീട് തെങ്ങിന്‍ ചുവട്ടില്‍ കുഴിച്ചിട്ടാല്‍ വളമായും മാറും. 4ഗ്ലൗസ് ഇടാതെ ഒച്ചിനെ കൈകാര്യം ചെയ്യരുത്. കൈകള്‍ സോപ്പിട്ട് കഴുകണം. 4മണ്ണില്‍ ഒരടി താഴ്ചയില്‍ കുഴിയെടുത്ത്, അതില്‍ ഒരു ദിവസം പുളിപ്പിച്ച പൈനാപ്പിള്‍, പഴം, പപ്പായ എന്നിവ ശര്‍ക്കരയും യീസ്റ്റും ചേര്‍ത്ത് ഇട്ടുകൊടുക്കുക. ഇതിലേക്ക് ആകര്‍ഷിച്ചെത്തുന്ന ഒച്ചുകളെ ഉപ്പ് വിതറി നശിപ്പിച്ചതിന് ശേഷം കുഴി മൂടുക. 460 ഗ്രാം തുരിശ് ഒരു ലിറ്റര്‍ വെള്ളത്തില്‍ എന്ന തോതില്‍ കലര്‍ത്തി തളിച്ചാല്‍ മതിലുകളിലും തടികളിലും മറ്റുമുള്ള ഒച്ചുകളെ നശിപ്പിക്കാം. പറമ്പുകളിലാണെങ്കില്‍ 10 ഗ്രാം തുരിശ് ഒരു ലിറ്റര്‍ വെള്ളത്തില്‍ എന്ന തോതില്‍ കലര്‍ത്തി തളിക്കുക. 4മഴ മാറി വേനല്‍ തുടങ്ങുമ്പോള്‍ ഒച്ചുകള്‍ മണ്ണിനടിയില്‍ സുഷുപ്താവസ്ഥയിലേക്കു പോകുകയും പിന്നീട് വീണ്ടും മഴ ആരംഭിക്കുമ്പോള്‍ കൂട്ടമായി പ്രത്യക്ഷപ്പെടുകയുമാണ് ചെയ്യുന്നത്. അതിനാല്‍ മഴക്കാലം കഴിയുമ്പോള്‍ത്തന്നെ മണ്ണിളക്കിക്കൊടുത്താല്‍ ഒച്ചുകള്‍ മണ്ണിനടിയിലിട്ട മുട്ടകള്‍ നശിച്ചു പോവുകയും അടുത്ത മഴക്കാലത്ത് ഇവയുടെ വംശവര്‍ധന നിയന്ത്രിക്കാന്‍ കഴിയുകയും ചെയ്യും.

തെരുവുനായ്ക്കൾ വിലസുന്നു

വീട്ടുമുറ്റത്ത് കളിച്ചുകൊണ്ടിരുന്ന ഒമ്പതുവയസുകാരിക്കുനേരേ തെരുവുനായയുടെ ആക്രമണം കായംകുളം: വീട്ടുമുറ്റത്ത് കളിച്ചുകൊണ്ടിരുന്ന ഒമ്പതു വയസുകാരിക്കു നേരേ തെരുവുനായയുടെ ആക്രമണം. കറ്റാനം ഭരണിക്കാവ് പുതുക്കാട്ട് വീട്ടിൽ നിഷാദ് -ധന്യ ദമ്പതികളുടെ മകൾ ദയ (9) യ്ക്കാണ് കടിയേ റ്റത്. ഇന്നലെ രാവിലെ ആയിരുന്നു സംഭവം. കുട്ടിയുടെ കഴുത്തിലും മുഖത്തും പരിക്കേറ്റു. ഉടൻതന്നെ കറ്റാനത്തെ ആശുപത്രിയിൽ എത്തിച്ച് ചികിത്സ നൽകി. ഭരണിക്കാവ് പഞ്ചായത്തിൽ തെരുവുനായ ശല്യം രൂക്ഷമായിട്ടും പഞ്ചായത്ത് നടപടി സ്വീകരിക്കുന്നില്ലെന്ന് നാട്ടുകാർ ആരോപിച്ചു. പഞ്ചായത്തിലെ സ്‌കൂളുകൾക്കും അങ്ക ണവാടികൾക്കും സമീപം ഇപ്പോൾ തെരുവുനായ ശല്യം രൂക്ഷമാണ്. അതിനാൽ രക്ഷിതാക്കളും ആശങ്കയിലാണ്. മാന്നാറിൽ വീണ്ടും തെരുവുനായ ആക്രമണം മാന്നാർ: മാന്നാറിൽ വീണ്ടും തെരുവുനായ ആക്രമണം. ട്യൂഷൻ കഴിഞ്ഞ് മടങ്ങിയ വിദ്യാർഥിക്കാണ് തെരുവുനായ അക്രമണത്തിൽ പരിക്കേറ്റത്. മാന്നാർ കുട്ടമ്പേരൂർ പുല്ലാമഠത്തിൽ രാജേഷ്- അർച്ചന ദമ്പതികളുടെ മകൻ ആദിത്യൻ (14) തെരുവുനായ ആക്രമണത്തിൽ കാലിനു പരിക്കേറ്റു. ഇന്നലെ രാവിലെ ട്യൂഷൻ കഴിഞ്ഞ് വരുന്നവഴി കുട്ടമ്പേരൂർ പുതുക്കുളങ്ങര ഭാഗത്തുവച്ചാണ് ആക്രമണമുണ്ടായത്. ഉടൻതന്നെ മാവേലിക്കര ഗവ.ആശുപത്രിയിൽ എത്തിച്ച് പ്രാഥമിക ചികിൽസകൾക്കുശേഷം വണ്ടാനം മെഡിക്കൽ കോളജിൽ ചികിത്സ നൽകി. കുട്ടമ്പേരൂർ എസ്കെവി ഹൈസ്കൂൾ വിദ്യാർഥിയാണ്. നാളുകളായി കുട്ടമ്പേരൂരിലും പരിസരങ്ങളിലും തെരുവുനായ ശല്യം രൂക്ഷമാണെന്നും ഇതിനെതിരേ ഉന്നതാധികാരികൾക്കു പരാതി നൽകുമെന്നു എസ്കെവി ഹൈസ്കൂൾ മാനേജർ എം. സുധൻപിള്ള, സ്കൂൾ പ്രസിഡന്‍റ് വേണു കേശവ് എന്നിവർ പറഞ്ഞു.

സ്ഥലം ഉടമയുടെ അനുമതിയില്ലാതെ വൈദ്യുതിലൈൻ വലിക്കാൻ ശ്രമമെന്നു പരാതി

മുഹമ്മ: പാലിയേറ്റീവ് കെയർ ചികിത്സയിൽ കഴിയുന്ന രോഗികളുള്ള വീട്ടിൽ കെഎസ്ഇബി ഉദ്യാഗസ്ഥർ നിയമവിരുദ്ധമായി ലൈൻ വലിക്കാനെത്തിയതായി പരാതി. ജില്ലാ കളക്ടറുടെയും ആർഡിഒയുടെയും ഉത്തരവുണ്ടെന്ന് കളവ് പറഞ്ഞാണ് പോലീസുമായി ഉദ്യോഗസ്ഥരെത്തിയത്. ഉത്തരവുകൾ കാണിക്കാൻ പറഞ്ഞെങ്കിലും മറ്റ് പേപ്പറുകളാണ് ഉദ്യോഗസ്ഥർ കാണിച്ചതെന്ന് സ്ഥല ഉടമയായ മുഹമ്മ കായിപ്പുറം തോട്ടുങ്കൽ വീട്ടിൽ ടി.ജി. വിലാസൻ പറയുന്നു. ബലമായി ലൈൻ വലിക്കാൻ ശ്രമിക്കുന്നതിനിടെ ഉദ്യോഗസ്ഥർ തള്ളിയിട്ടതിനെത്തുടർന്ന് പരിക്കേറ്റ വിലാസൻ മുഹമ്മ ആശുപത്രിയിൽ ചികിത്സതേടി. വൈദ്യുതി ലൈൻ വലിക്കാൻ താൻ സമ്മതം കൊടുത്തിട്ടില്ലെന്ന് പറഞ്ഞിട്ടും ഉദ്യോഗസ്ഥർ പിന്നോട്ടു പോയില്ലെന്നും തന്നെയും കുടുംബാംഗങ്ങളേയും ഉപദ്രവിച്ചുകൊണ്ട് ലൈൻ വലിക്കാൻ ശ്രമിക്കുകയാണ് ഉണ്ടായതെന്നും കളക്ടർക്കും മുഖ്യമന്ത്രിക്കും വൈദ്യുതിമന്ത്രിക്കും നൽകിയ പരാതിയിൽ പറയുന്നു. മാറാരോഗികളും 24 മണിക്കൂറും പരസഹായം വേണമെന്ന് ഡോക്ടർമാർ നിർദേശിച്ചിട്ടുള്ളതുമായ ആൾക്കാരാണ് താനും ഭാര്യയുമെന്ന് പറഞ്ഞിട്ടും ഉദ്യോഗസ്ഥർ പിൻമാറിയില്ലെന്നും പറയുന്നു. സമ്മതപത്രം കാണിക്കാൻ പറഞ്ഞപ്പോൾ തട്ടാമുട്ടി മറുപടിയാണ് പറഞ്ഞതെന്നും വിലാസൻ കുറ്റപ്പെടുത്തുന്നു. എതിർകക്ഷിയുടെ പണക്കൊഴുപ്പാണ് നീയമം കാറ്റിൽ പറത്താൻ കാരണമെന്നും പരാതിയിൽ ആരോപിച്ചു. ഇതുമായി ബന്ധപ്പെട്ട് പരാതി നൽകാൻ മുഹമ്മ പോലീസ് സ്റ്റേഷനിൽ ചെന്നെങ്കിലും പരാതി സ്വീകരിയ്ക്കാൻ തയാറായില്ലെന്നും പരാതിയിൽ പറയുന്നു.

കായംകുളം നഗരസഭയിൽ പ്രത്യേക കൗൺസിൽ യോഗം കൂടിയത് വൻകിട ഭൂമാഫിയകൾക്കുവേണ്ടി: യുഡിഎഫ്

കായംകുളം: നഗരസഭയിൽ പ്രത്യേക കൗൺസിൽ യോഗം കൂടിയത് വൻകിട ഭൂമാഫിയകൾക്കുവേണ്ടിയാണെന്ന് യുഡിഎഫ് ആരോപിച്ചു. ഇന്നലെ നടന്ന കൗൺസിൽ യോഗത്തിൽ രണ്ടാമത്തെ അജണ്ട മാറ്റിവച്ചത് വൻകിട ഭൂമാഫിയകൾക്കുവേണ്ടിയാണെന്നാണ് യുഡിഎഫ് ആരോപണം. വൻകിട ഭൂമാഫികളുടെ താത്പര്യം സംരക്ഷിക്കുന്നതിനായി സ്ഥിരം സമിതി ചെയർപേഴ്‌സന്മാർ ഒത്തുചേർന്ന് നടത്തിയ ഹിഡൻ അജണ്ടയാണ് കൗൺസിൽ യോഗത്തിൽ നടപ്പാക്കാൻ ശ്രമിച്ചത്. നഗരസഭ 19-ാം വാർഡിൽ അങ്കണവാടിക്ക് സ്ഥലം വാങ്ങുന്നതിനുവേണ്ടിയുള്ള അജണ്ടയാണ് കൗൺസിൽ യോഗത്തിൽ വന്നത്. വികസനകാര്യ സ്ഥിരം സമിതി ചെയർപേഴ്സന്‍റെ വാർഡിൽ നിലമായി കിടക്കുന്ന വസ്തുവാണ് വാർഡ് കൗൺസിലർ നഗരസഭയെ കൊണ്ട് വാങ്ങിപ്പിക്കാൻ ശ്രമിക്കുന്നത്. ഈ വസ്തുവിനോട് ചേർന്നുകിടക്കുന്ന നിലം വികസനകാര്യ സ്ഥിരം സമിതി ചെയർപേഴ്സന്‍റെ ബന്ധുക്കളുടേതാണെന്നും ഈ വസ്തു നഗരസഭയെ കൊണ്ടു വാങ്ങിപ്പിച്ച ശേഷം ഇതിനോടൊപ്പം കിടക്കുന്ന വസ്തു നികത്താൻ വേണ്ടിയുള്ള ഗൂഢമായ തന്ത്രമാണ് വികസനകാര്യ സ്ഥിരം സമിതി ചെയർപേഴ്സൺ കൗൺസിൽ യോഗത്തിൽ ലക്ഷ്യമിട്ടതെന്നും യുഡിഎഫ് ആരോപിച്ചു. ഇതിനോടൊപ്പം ചേർന്നു കിടക്കുന്ന ബന്ധുക്കളുടെ വസ്തു നികത്തുന്നത് മറ്റൊരു സ്ഥിരം സമിതി ചെയർപേഴ്സന്‍റെ ബന്ധുവും റിയൽ എസ്റ്റേറ്റ് മാഫിയയായ ഒരാൾക്കുവേണ്ടിയാണെന്നും യുഡിഎഫ് ആരോപിച്ചു. നിലമായിട്ടുള്ള വസ്തു നഗരസഭയ്ക്കു വാങ്ങാൻ കഴിയില്ല എന്ന ഉത്തരവ് ഉണ്ടായിട്ടും തുടക്കത്തിൽ വില്ലേജ് ഓഫീസുകളിൽനിന്നും വാലുവേഷൻ എടുപ്പിച്ചിരുന്നു. എന്നാൽ, ഈ വാലുവേഷൻ സ്ഥിരം സമിതി ചെയർപേഴ്സൺമാരുടെ അധികാരം ഉപയോഗിച്ച് മാറ്റം വരുത്തി വീണ്ടും മറ്റൊരു വാലുവേഷൻ ഇന്നലെ നടന്ന കൗൺസിൽ യോഗത്തിൽ എടുപ്പിക്കാനായിരുന്നു ഉദ്ദേശം. വൻകിട ഭൂമാഫിയകൾക്കുവേണ്ടി നഗരസഭയെ വെട്ടിലാക്കാനാണ് ഈ സ്ഥിരം സമിതി ചെയർപേഴ്സൻമാർ ശ്രമിച്ചത്. അടിയന്തര പ്രാധാന്യം ഒന്നും തന്നെ ഇല്ലാത്ത ഈ അജണ്ടയ്ക്കുവേണ്ടി നഗരസഭാ ചെയർപേഴ്സനെ സമ്മർദം ചെലുത്തിയാണ് അടിയന്തര കൗൺസിൽ വിളിപ്പിച്ചത്. എന്നാൽ, ഇതിലെ പ്രശ്നം മനസിലാക്കി എൽഡിഎഫ് ഈ അജണ്ട മാറ്റിവയ്ക്കാൻ നിർദേശിച്ചു. സ്റ്റാൻഡിംഗ് കമ്മിറ്റി ചെയർപേഴ്സൻമാരുടെ ബന്ധുക്കൾക്കുവേണ്ടിയും അവരുടെ വസ്തു നികത്തി മറിച്ചുവിൽക്കുന്നതിനുമായിട്ടാണ് ഇവർ ഈ പ്രവൃത്തി നടത്തിയതെന്നും പ്രതിപക്ഷ യുഡിഎഫ് അംഗങ്ങൾ കൗൺസിൽ യോഗത്തിൽ ആരോപിച്ചു.

രാഷ്‌ട്രീയ, ഭരണ രംഗങ്ങളില്‍ ചെറുപ്പക്കാര്‍ കടന്നുവരണം: മാര്‍ തോമസ് തറയില്‍

ചങ്ങനാശേരി: രാഷ്‌ട്രീയ, ഭരണ രംഗങ്ങളില്‍ പ്രബുദ്ധരും പ്രഗത്ഭരുമായ ചെറുപ്പക്കാര്‍ കടന്നുവരണമെന്ന് ആര്‍ച്ച്ബിഷപ് മാര്‍ തോമസ് തറയില്‍. അതിരൂപത കത്തോലിക്ക കോണ്‍ഗ്രസ് എക്‌സലന്‍ഷ്യ സീസണ്‍ -3 മെറിറ്റ് അവാര്‍ഡ്-2025, മാര്‍ ജോസഫ് പവ്വത്തില്‍ സ്മാരക ഹെറിറ്റേജ് ക്വിസ് മത്സരത്തിലെ വിജയികള്‍ക്കുള്ള സമ്മാനങ്ങളും നൽകു ന്നതോടനുബന്ധിച്ചുള്ള സമ്മേളനം ഉദ്ഘാടനം ചെയ്യുകയായിരുന്നു ആര്‍ച്ച്ബിഷപ്. അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷത വഹിച്ചു. അതിരൂപതാ വികാരി ജനറാള്‍ മോണ്‍. ആന്‍റണി എത്തയ്ക്കാട്ട്, കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ എന്നിവര്‍ മുഖ്യപ്രഭാഷണങ്ങള്‍ നടത്തി. അതിരൂപതാ ഡയറക്ടര്‍ ഫാ. സെബാസ്റ്റ്യന്‍ ചാമക്കാല അനുമോദനസന്ദേശം നല്‍കി. ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, ടോമിച്ചന്‍ അയ്യരുകുളങ്ങര, കുഞ്ഞ് കളപ്പുര, ഷിജി ജോണ്‍സണ്‍, രാജേഷ് ജോണ്‍, ജേക്കബ് നിക്കോളാസ്, ജോര്‍ജുകുട്ടി മുക്കത്ത്, റോസിലിന്‍ കുരുവിള, സെബാസ്റ്റ്യന്‍ വര്‍ഗീസ് എന്നിവര്‍ പ്രസംഗിച്ചു.

അമ്പലപ്പുഴ സിപിഐയിൽ പൊട്ടിത്തെറി

അമ്പലപ്പുഴ: മണ്ഡലം സമ്മേളനത്തിനു പിന്നാലെ അമ്പലപ്പുഴ സിപിഐയില്‍ പൊട്ടിത്തെറി. നിരവധി പ്രവര്‍ത്തകര്‍ പാര്‍ട്ടി വിടാനൊരുങ്ങുന്നു. പുതിയ മണ്ഡലം സെക്രട്ടറിയുമായുള്ള അഭിപ്രായ വ്യത്യാസത്തെത്തുടര്‍ന്നാണ് ഭൂരിഭാഗം ലോക്കല്‍ കമ്മിറ്റികളില്‍നിന്നും അംഗങ്ങള്‍ രാജിവയ്ക്കാന്‍ തയാറെടുക്കുന്നത്. പാര്‍ട്ടിക്ക് വിധേയമാകാതെ പ്രവര്‍ത്തിച്ച മുന്‍ പഞ്ചായത്ത് പ്രസിഡന്‍റ് കൂടിയായ വനിതാ പ്രവര്‍ത്തകയെ ഏകപക്ഷീയമായി ലോക്കല്‍ കമ്മിറ്റി സെക്രട്ടറിയാക്കിയതാണ് ഇപ്പോഴത്തെ പൊട്ടിത്തെറിക്ക് കാരണം. മണ്ഡലം സെക്രട്ടറിയാണ് ഇതിനു പിന്നിലെന്നാണ് പാര്‍ട്ടിപ്രവര്‍ത്തകര്‍ ആരോപിക്കുന്നത്. പഞ്ചായത്ത് പ്രസിഡന്‍റായിരുന്നപ്പോഴും അമ്പലപ്പുഴ ക്ഷേത്രോപദേശക സമിതി പ്രസിഡന്‍റായിരുന്നപ്പോഴും പാര്‍ട്ടിയോട് കൂടിയാലോചനയില്ലാതെയാണ് ഇവര്‍ പ്രവര്‍ത്തിച്ചിരുന്നതെന്ന ആരോപണം നിലനില്‍ക്കെയാണ് ഈ വനിതാ പ്രവര്‍ത്തകയെ ലോക്കല്‍ കമ്മിറ്റി സെക്രട്ടറിയാക്കിയത്. ഇവര്‍ക്ക് കാരണം കാണിക്കല്‍ നോട്ടീസ് നല്‍കിയെങ്കിലും ഇതിന് മറുപടി പോലും നല്‍കിയിട്ടില്ല. ഇതിനിടയിലാണ് എല്‍സി സെക്രട്ടറിയാക്കിയത്. പലയിടങ്ങളിലെയും നിലം നികത്തല്‍ ചോദ്യം ചെയ്ത ഏതാനും അംഗങ്ങളെ പുതിയ മണ്ഡലം കമ്മിറ്റിയില്‍ ഉള്‍പ്പെടുത്താതിരുന്നതും മണ്ഡലം സെക്രട്ടറിയാണെന്നാണ് അതൃപ്തരായ അണികള്‍ പറയുന്നത്. മണ്ഡലം സമ്മേളനത്തിന് മുന്‍പ് കൂടിയ മണ്ഡലം കമ്മിറ്റിക്കിടെ ജില്ലാക്കമ്മിറ്റിയംഗം, മറ്റൊരു നേതാവ് എന്നിവരെ മറ്റൊരു നേതാവ് മര്‍ദിച്ചിട്ടും യാതൊരു നടപടിയും സ്വീകരിച്ചില്ല. മണ്ഡലം സമ്മേളനത്തില്‍ പങ്കെടുക്കേണ്ട പ്രതിനിധികളുടെ എണ്ണം കുറഞ്ഞത് മണ്ഡലം സെക്രട്ടറിയുമായുള്ള അഭിപ്രായ വ്യത്യാസത്തെത്തുടര്‍ന്നാണ്. മുന്‍ ജില്ലാ പഞ്ചായത്തംഗം ഉള്‍പ്പെടെ പല മുതിര്‍ന്ന നേതാക്കളും പാര്‍ട്ടി വിട്ടു പോകാന്‍ കാരണമായത് ഈ അഭിപ്രായ വ്യത്യാസം മൂലമാണെന്നാണ് പ്രവര്‍ത്തകര്‍ പറയുന്നത്. കൂടാതെ പാര്‍ട്ടിയില്‍ സാമ്പത്തിക അച്ചടക്കം തീരെയില്ലാതായതും വിമര്‍ശനത്തിന് കാരണമായിട്ടുണ്ട്. അവധിയെടുത്ത കാലയളവിലെ അലവന്‍സ് കൃത്യമായി സെക്രട്ടറി വാങ്ങിയെന്നാണ് ആരോപണം. പാര്‍ട്ടിയിലെ ഈ അഭിപ്രായ വ്യത്യാസം വരുന്ന തദ്ദേശ സ്വയം ഭരണ തെരഞ്ഞെടുപ്പില്‍ പാര്‍ട്ടിയെ പ്രതികൂലമായി ബാധിക്കുമെന്നാണ് പ്രവര്‍ത്തകര്‍ പറയുന്നത്. പുറക്കാട്, തോട്ടപ്പള്ളി, പുന്നപ്ര തുടങ്ങിയ ലോക്കല്‍ കമ്മിറ്റികളില്‍നിന്ന് നിരവധി പ്രവര്‍ത്തകര്‍ പാര്‍ട്ടി വിടാന്‍ തീരുമാനിച്ചിരിക്കുകയാണ്. അമ്പലപ്പുഴ തെക്ക്, പുറക്കാട്, തോട്ടപ്പള്ളി എന്നിവിടങ്ങളിലെ മുതിര്‍ന്ന നേതാക്കള്‍ മണ്ഡലം സെക്രട്ടറിയുമായുള്ള അഭിപ്രായഭിന്നതയെത്തുടര്‍ന്ന് മണ്ഡലം കമ്മിറ്റിയില്‍നിന്ന് ഒഴിവായിരിക്കുകയാണ്. മറ്റ് ചിലര്‍ രാജിസന്നദ്ധതയും അറിയിച്ചിരിക്കുകയാണ്. മുതിര്‍ന്ന നേതാക്കളടക്കം പാര്‍ട്ടി വിടാന്‍ തീരുമാനിച്ചിട്ടും ജില്ലാ നേതൃത്വം ഒരു ഇടപെടലും നടത്തിയിട്ടില്ല എന്നാണ് പ്രവര്‍ത്തകരുടെ പരാതി.

വൈദികര്‍ക്കെതിരേ കേസെടുത്ത നടപടി പിന്‍വലിക്കണം: ഫാ.സേവ്യര്‍ കുടിയാംശേരി

ആലപ്പുഴ: കടൽകയറ്റം മൂലം ദുരിതമനുഭവിക്കുന്ന തീരദേശവാസികള്‍ക്കായി കൊച്ചി ബിഒടി പാലത്തിനരുകില്‍ ആലപ്പുഴ, കൊച്ചി രൂപതകളിലെ വൈദികര്‍ സമാധാനപരമായി ഉപവാസമിരുന്നതിന് കേസെടുത്തതു പോലീസിന്‍റെ ഭാഗത്തുനിന്നുള്ള ധിക്കാരപരമായ നടപടിയാണ്. ആര്‍ക്കും ഒരുപദ്രവവും സൃഷ്ടിക്കാതെ ഉപവാസമിരിക്കുന്നവര്‍ക്കെതിരേ ലോകത്തെവിടെയെങ്കിലും കേസെടുക്കുമോ. പോലീസിന്‍റെ ഭാഗത്തുനിന്നുണ്ടായ തെറ്റായ നടപടി തിരുത്താന്‍ സര്‍ക്കാര്‍ ഇടപെടണമെന്നും അദ്ദേഹം ആവശ്യപ്പെട്ടു. മാത്രമല്ല വൈദികരെ ഇങ്ങനെയൊരു ഉപവാസത്തിലേക്കു വലിച്ചിഴച്ച സാഹചര്യം പഠിച്ച് തീരജനതയേയും തീരത്തേയും സംരക്ഷിക്കുകയാണു വേണ്ടത്. കടല്‍ഭിത്തി ഇല്ലാത്ത ഇടങ്ങളില്‍ കടല്‍ഭിത്തി നിര്‍മിക്കാന്‍ ആവശ്യമായ നടപടി സ്വീകരിക്കണം. തീരവാസികളുടെ പേരിലുള്ള സ്ഥലം കടലെടുത്തുപോയതിന് സര്‍ക്കാര്‍ നഷ്ടപരിഹാരം നല്‍കേണ്ടതാണ്. കപ്പലപകടംമൂലം കടലിന്‍റെ ആവാസവ്യവസ്ഥ തകര്‍ന്നിരിക്കുന്നു. കടലില്‍ മീനില്ലാതായി. കപ്പലപകടംമൂലം കടലില്‍ കറങ്ങിനടക്കുന്ന കണ്ടെയ്‌നറുകളുടെ അവശിഷ്ടങ്ങളില്‍ തട്ടി വലകള്‍ നഷ്ടപ്പെടുന്നു. മഴയും കാറ്റും കടല്‍കയറ്റവും ദുരിതങ്ങള്‍ക്കുമേല്‍ ദുരിതം വിതയ്ക്കുന്നു. മീന്‍പിടുത്തക്കാര്‍ക്കുണ്ടാകുന്ന നിരവധിയായ പ്രശ്‌നങ്ങള്‍ക്കെല്ലാം കാരണം മനുഷ്യനിര്‍മിതമായ ദുരന്തങ്ങളാണെന്നും അദ്ദേഹം ചൂണ്ടിക്കാട്ടി. ഇതറിയാമായിരുന്നിട്ടും ഉറക്കം നടിക്കുന്ന സര്‍ക്കാരിനെ ഉണര്‍ത്താന്‍ വേണ്ടി സമാധാനപരമായി ഉപവാസമിരുന്ന വൈദികര്‍ക്കെതിരേ എടുത്ത കേസുകള്‍ പിന്‍വലിക്കുകയും തീരവാസികളേയും തീരത്തേയും കടലിനേയും സംരക്ഷിക്കുകയും ചെയ്യാന്‍ സര്‍ക്കാര്‍ തയാറാകണമെന്നും ഫാ. കുടിയാംശേരി പ്രസ്താവനയില്‍ ചൂണ്ടിക്കാട്ടി.

വൈദ്യുതാഘാതമേറ്റ് പോത്തുകൾ ചത്തു

തുറവൂര്‍: മരം വീണ് മറിഞ്ഞ വൈദ്യുതിത്തൂണിലെ കമ്പികളില്‍നിന്ന് വൈദ്യുതാഘാതമേറ്റ് പോത്തുകള്‍ ചത്തു. കോടംതുരുത്ത് പഞ്ചായത്ത് അഞ്ചാം വാര്‍ഡ് നെടുംചിറ നികര്‍ത്ത് ബാബുവിന്‍റെ രണ്ടു പോത്തുകളാണ് ചത്തത്. വീടിനു സമീപത്തെ പുരയിടത്തില്‍ കെട്ടിയിരുന്ന പോത്തുകളാണ് ശനിയാഴ്ച പുലര്‍ച്ചെ ചത്തുകിടക്കുന്നത് കണ്ടത്. പുലര്‍ച്ചെയുണ്ടായ കാറ്റിലാണ് അടയ്ക്കാമരം വീണ് വൈദ്യുതി തൂണുകള്‍ മറിഞ്ഞത്. കമ്പികള്‍ പൊട്ടാതിരുന്നതാണ് വൈദ്യുതാഘാതമേല്‍ക്കാന്‍ കാരണം.

റോബോട്ടിക്‌സ് പഠനം പത്താം ക്ലാസിലെ കുട്ടികള്‍ക്ക് ഉറപ്പാക്കും: കൈറ്റ് സിഇഒ

ആലപ്പുഴ: ഈ അധ്യയനവര്‍ഷം പത്താം ക്ലാസിലെ മുഴുവന്‍ കുട്ടികള്‍ക്കും നിര്‍മിത ബുദ്ധിയും റോബോട്ടിക്‌സും പഠിക്കാനും പ്രായോഗിക പരീക്ഷണങ്ങള്‍ നടത്താനും അവസരമൊരുക്കിയിട്ടുണ്ടെന്ന് കേരള ഇന്‍ഫ്രാസ്ട്രക്ചര്‍ ആന്‍ഡ് ടെക്‌നോളജി ഫോര്‍ എഡ്യൂക്കേഷന്‍ (കൈറ്റ്) സിഇഒ കെ. അന്‍വര്‍ സാദത്ത് പറഞ്ഞു. ആലപ്പുഴ സെന്‍റ് ജോസഫ്‌സ് ഗേള്‍സ് ഹയര്‍ സെക്കൻഡറി സ്‌കൂളില്‍ ലിറ്റില്‍ കൈറ്റ്‌സ് നോഡല്‍ ഓഫീസര്‍മാര്‍ക്കള്ള ജില്ലാതല ശില്പശാലയില്‍ മുഖ്യപ്രഭാഷണം ഓണ്‍ലൈനായി നടത്തുകയായിരുന്നു അദ്ദേഹം. പൊതുവിദ്യാലയങ്ങളിലെ കുട്ടികളുടെ ഐടി കൂട്ടായ്മയായ ലിറ്റില്‍ കൈറ്റ്‌സ് ഐ.ടി ക്ലബ്ബുകള്‍ വഴി ഭിന്നശേഷി വിഭാഗം കുട്ടികള്‍ക്ക് ഡിജിറ്റല്‍ സംവിധാനങ്ങളുപയോഗിച്ച് കൈത്താങ്ങ് ഒരുക്കുന്നതിന് മുന്തിയ പരിഗണന നല്‍കുമെന്നുംഅദ്ദേഹം പറഞ്ഞു. ജില്ലയില്‍ പ്രവര്‍ത്തിക്കുന്ന 158 യൂണിറ്റുകളില്‍നിന്നു 316 മാസ്റ്റര്‍/മിസ്ട്രസ്മാര്‍ പങ്കെടുത്തു. ലിറ്റില്‍ കൈറ്റ്‌സ് യൂണിറ്റുകളുടെ ഈ വര്‍ഷത്തെ പ്രവര്‍ത്തനങ്ങള്‍ക്ക് ദിശാബോധം നല്‍കുന്ന തരത്തിലുള്ള വിവിധ അവതരണങ്ങളും സെഷനുകളും ഉള്‍പ്പെട്ടതായിരുന്നു ശില്പശാല. ജില്ലാതലത്തിലെയും സംസ്ഥാനതലത്തിലെയും മികച്ച ലിറ്റില്‍ കൈറ്റ്‌സ് പ്രവര്‍ത്തന മാതൃകകള്‍, ആശയ പ്രചാരണരംഗത്ത് സ്‌കൂള്‍ വിക്കിയുടെ പ്രസക്തി, വിദ്യാലയ പ്രവര്‍ത്തനങ്ങളില്‍ ലിറ്റില്‍ കൈറ്റ്‌സിന്‍റെ സ്ഥാനം തുടങ്ങി വിവിധ അവതരണങ്ങളും ചര്‍ച്ചകളും നടന്നു. വിദ്യാലയങ്ങളിലെ റോബോട്ടിക്‌സ് പഠനത്തിന് ലിറ്റില്‍ കൈറ്റ്‌സ് യൂണിറ്റുകള്‍ ചെയ്യേണ്ട പിന്തുണാപ്രവര്‍ത്തനങ്ങളെക്കുറിച്ചും വിശദമായി ചര്‍ച്ച ചെയ്തു. ചര്‍ച്ചകളില്‍ ഉയര്‍ന്നുവന്ന നിര്‍ദേശങ്ങള്‍ക്ക് സമാപന സെഷനില്‍ കൈറ്റ് സിഇഒ വിശദീകരണം നല്‍കി. കൈറ്റ് ജില്ലാ കോ-ഓര്‍ഡിനേറ്റര്‍ എം. സുനില്‍കുമാര്‍, മാസ്റ്റര്‍ ട്രെയിനര്‍ ടി. സജിത്ത് തുടങ്ങിയവര്‍ പ്രസംഗിച്ചു.

മത്സ്യത്തൊഴിലാളികളുടെ ക്ഷേമത്തിന് സര്‍ക്കാര്‍ ചെലവഴിച്ചത് 165 കോടി: മന്ത്രി സജി ചെറിയാന്‍

ആലപ്പുഴ: കഴിഞ്ഞ സാമ്പത്തിക വര്‍ഷം മാത്രം 165 കോടിരൂപ മത്സ്യത്തൊഴിലാളികളുടെ ക്ഷേമത്തിനായി വിനിയോഗിച്ചതായി മന്ത്രി സജി ചെറിയാന്‍ പറഞ്ഞു. മത്സ്യത്തൊഴിലാളികളുടെയും അനുബന്ധ തൊഴിലാളികളുടെയും കുട്ടികള്‍ക്ക് കേരള മത്സ്യത്തൊഴിലാളി ക്ഷേമനിധി ബോര്‍ഡ് നല്‍കിവരുന്ന 2024-25 വര്‍ഷത്തെ വിദ്യാഭ്യാസ, കായിക പ്രോത്സാഹന അവാര്‍ഡ് വിതരണം ലിയോ തേര്‍ട്ടീന്ത് എച്ച്എസ്എസ് ഓഡിറ്റോറിയത്തില്‍ നിര്‍വഹിച്ച് സംസാരിക്കുകയായിരുന്നു അദ്ദേഹം. മത്സ്യത്തൊഴിലാളികളുടെ മക്കള്‍ വിദ്യാഭ്യാസരംഗത്ത് ചരിത്രനേട്ടമാണ് കൈവരിച്ചത്. അഞ്ചു വര്‍ഷത്തിനുള്ളില്‍ വിദ്യാകിരണം പദ്ധതിയുടെ ഭാഗമായി 53.52 കോടി രൂപ സംസ്ഥാന സര്‍ക്കാര്‍ ചെലവഴിച്ചിട്ടുണ്ട്. മെഡിക്കല്‍, എന്‍ജിനിയറിംഗ്, മറ്റ് അനുബന്ധ കോഴ്‌സുകളിലേക്ക് മത്സ്യത്തൊഴിലാളി മേഖലയില്‍നിന്ന് ആയിരക്കണക്കിന് കുട്ടികളാണ് കടന്നുവന്നതെന്നും മന്ത്രി കൂട്ടിച്ചേർത്തു. പഠനത്തിലും കായിക മത്സരങ്ങളിലും ഉന്നതവിജയം കരസ്ഥമാക്കുന്നതിന് പ്രചോദനം നല്‍കുക എന്ന ലക്ഷ്യത്തോടുകൂടിയാണ് മത്സ്യത്തൊഴിലാളി ക്ഷേമനിധി ബോര്‍ഡ് കുട്ടികള്‍ക്ക് അവാര്‍ഡുകള്‍ നല്‍കി വരുന്നത്. ജില്ലയില്‍ എസ്എസ്എല്‍സിക്ക് മുഴുവന്‍ വിഷയങ്ങള്‍ക്കും എ പ്ലസ് നേടിയ 222 വിദ്യാര്‍ഥികള്‍, ഒന്‍പത് എ പ്ലസ് നേടിയ 83 വിദ്യാര്‍ഥികള്‍, എട്ട് എ പ്ലസ് നേടിയ 75 വിദ്യാര്‍ഥികള്‍, പ്ലസ് ടുവിന് എല്ലാ വിഷയങ്ങള്‍ക്കും എ പ്ലസ് നേടിയ 60 വിദയാര്‍ഥികള്‍, കായിക രംഗത്ത് മികവ് പുലര്‍ത്തിയ ഏഴു കുട്ടികള്‍ എന്നിവര്‍ക്കാണ് അവാര്‍ഡുകള്‍ വിതരണം ചെയ്തത്. പി.പി. ചിത്തരഞ്ജന്‍ എംഎല്‍എ അധ്യക്ഷനായി. ജില്ലാ ആന്‍റി നര്‍ക്കോട്ടിക് സെല്‍ ഉദ്യോഗസ്ഥന്‍ ജി. ശാന്തകുമാര്‍ ലഹരി ബോധവത്കരണ ക്ലാസ് നയിച്ചു. നഗരസഭാ ചെയര്‍പെഴ്‌സണ്‍ കെ.കെ. ജയമ്മ, മത്സ്യബോര്‍ഡ് ചെയര്‍മാന്‍ കൂട്ടായി ബഷീര്‍, മത്സ്യബോര്‍ഡ് കമ്മീഷണര്‍ എച്ച്. സലീം, മത്സ്യബോര്‍ഡ് അംഗങ്ങളായ സക്കീര്‍ അലങ്കാരത്ത്, കെ.കെ. രമേശന്‍ തുടങ്ങിയവര്‍ പങ്കെടുത്തു.

മാന്നാറിൽ തെരുവുനായ്ക്കൾ വിലസുന്നു

മാന്നാര്‍: തെരുവുനായ ആക്രമണത്തിനു വിധേയരാകുന്നവരുടെ എണ്ണം ദിനംപ്രതി വര്‍ധിക്കുന്നു. അടുത്തനാളുകളില്‍ തെരുവുനായ അക്രമത്തില്‍ പരിക്കേറ്റ് ചികിത്സതേടിയത് ഒരു ഡസനിലധികം പേരാണ്. മാന്നാറില്‍ തെരുവുനായ ശല്യം അതിരൂക്ഷമായിരിക്കുകയാണ്. മാന്നാര്‍ പഞ്ചായത്ത് നാലാം വാര്‍ഡില്‍ ടെലഫോണ്‍ എക്‌സ്‌ചേഞ്ചിന് തെക്കുവശത്തായി കൊല്ലശേരി, പൂന്തോണി, കുറ്റിയില്‍ ഭാഗങ്ങളിലും മാന്നാര്‍ ടൗണിലും തെരുവുനായകള്‍ അലഞ്ഞുതിരിഞ്ഞ് നടക്കുന്നത് പതിവു കാഴ്ചയാണ്. ഏത് നിമിഷവും ഇത്തരം നായകള്‍ ആക്രമണകാരികളായി മാറാം. നാട്ടുകാര്‍ ഭീതിയിലാണ് കഴിയുന്നത്. തെരുവുനായ ഇന്നലെ നിരവധിപ്പേരെ ആക്രമിച്ച് പരിക്കേല്‍പ്പിച്ചു. മാന്നാര്‍ കുട്ടംമ്പേരൂര്‍ കുറ്റിയില്‍ താഴ്ചയില്‍ രാജേന്ദ്രന്‍ ഉള്‍പ്പെടെ അഞ്ചുപേർക്ക് നായയുടെ കടിയേറ്റു. ഇവര്‍ മാവേലിക്കര ജില്ലാ ആശുപത്രിയില്‍ ചികിത്സതേടി. തൊഴിലുറപ്പ് തൊഴിലാളിയായ 65 വയസുള്ള പൂന്തോണിക്കിഴക്കേതില്‍ ശങ്കരിയമ്മക്ക് കഴിഞ്ഞ ആഴ്ചയിലാണ് കടിയേറ്റത്. മാന്നാര്‍ സാമൂഹ്യ ആരോഗ്യ കേന്ദ്രത്തില്‍നിന്ന് ഐഡിആര്‍വി എടുത്തശേഷം മാവേലിക്കര ജില്ലാ ആശുപത്രിയില്‍ സിറം എടുക്കാന്‍ ടെസ്റ്റ് ചെയ്തപ്പോള്‍ അലര്‍ജി ആയതിനാല്‍ ആലപ്പുഴ മെഡിക്കല്‍ കോളജിലെത്തി നാലായിരം രൂപ മുടക്കി മെഡിക്കല്‍ സ്റ്റോറില്‍നിന്നു മരുന്നു വാങ്ങി ഇഞ്ചക്ഷന്‍ എടുക്കേണ്ടിവന്നു. തൊഴിലുറപ്പ് തൊഴിലാളിയായ എഴുപത്താറ് വയസുള്ള കുറ്റിയില്‍ വീട്ടില്‍ ഓമനാമ്മ, എഴുപതു വയസുള്ള ആന്‍റണി, തേയില വില്‍ക്കാനായി എത്തിയയാള്‍ തുടങ്ങി നിരവധി പേര്‍ക്ക് പട്ടിയുടെ കൈയേറ്റിട്ടുണ്ട്. സ്‌കൂളുകളില്‍ പോകുന്ന കുട്ടികള്‍ക്കും വഴിയാത്രക്കാര്‍ക്കും നാട്ടുകാര്‍ക്കും ഭീഷണിയായ തെരുവുനായ ശല്യത്തിന് അറുതി വരുത്താന്‍ അടിയന്തര നടപടികള്‍ ഉണ്ടാകണമെന്നാണ് പൊതു ആവശ്യം.

ഫാ. മാർട്ടിൻ വാഴച്ചിറ ചരമവാര്‍ഷികവും അനുസ്മരണ സമ്മേളനവും

പുളിങ്കുന്ന്: സ്‌കോര്‍ട്‌ലന്‍ഡില്‍ മരിച്ച ഫാ. മാര്‍ട്ടിന്‍ വാഴച്ചിറ ചരമവാര്‍ഷികവും അനുസ്മരണ സമ്മേളനവും അദ്ദേഹത്തിന്‍റെ ഇടവക പള്ളിയായ പുളിങ്കുന്ന് സെന്‍റ് മേരീസ് ഫൊറോന വലിയ പള്ളിയില്‍ നടത്തി. ചങ്ങനാശേരി എസ്ബി കോളജ് പ്രിന്‍സിപ്പല്‍ റവ.ഡോ. ടെഡി കാഞ്ഞൂപ്പറമ്പില്‍ സമ്മേളനം ഉദ്ഘാടനം ചെയ്തു. ഫൊറോനാ വികാരി റവ.ഡോ. ടോം പുത്തന്‍കളം അധ്യക്ഷത വഹിച്ചു. ചടങ്ങിനോടനുബന്ധിച്ചു പുളിങ്കുന്ന് സെന്‍റ് ജോസഫ് ഹയര്‍ സെക്കന്‍ഡറി സ്‌കൂള്‍ പ്രധാനാധ്യാപകന്‍ ഫാ. ജോസഫ് കുറുപ്പശേരി പ്ലസ്ടു പരീക്ഷയില്‍ മികച്ച വിജയം നേടിയ കുട്ടികളെയും പുളിങ്കുന്ന് ഫൊറോനാ അസിസ്റ്റന്‍റ് വികാരി ഫാ. ടിബിന്‍ ഒറ്റാറയ്ക്കല്‍ എസ്എസ്എല്‍സി പരീക്ഷയില്‍ മികച്ച വിജയം കൈവരിച്ച കുട്ടികളെയും ആദരിച്ചു. പുളിങ്കുന്ന് പഞ്ചായത്ത് സെക്രട്ടറി ആഷ്‌ലി നായര്‍ സിവില്‍ സര്‍വീസ് പരീക്ഷയില്‍ മികച്ച വിജയം നേടിയ അഞ്ജലി പ്രദീപിനെ ആദരിച്ചു. ഫെറോനാ അസിസ്റ്റന്‍റ് വികാരി ഫാ. വര്‍ഗീസ് താന്നിക്കാപ്പാറ കുട്ടികള്‍ക്കു പഠനോപകരണങ്ങള്‍ വിതരണം ചെയ്തു. പുളിങ്കുന്ന് സെന്‍റ് സെബാസ്റ്റ്യന്‍സ് ആശ്രമം പ്രിയോര്‍ ഫാ. ജോസ് കോനാട്ട്, കെ. ഗോപകുമാര്‍, ബാബു വലിയവീടന്‍, ജോസഫ് കെ. നെല്ലുവേലി, ജോസഫ് ചേക്കോടന്‍, സുധീപ് വി. നായര്‍, ലാല്‍ വയലാര്‍, കെ.പി. മാത്യു കളത്തില്‍, സംഘാടക സമിതി കണ്‍വീനര്‍ ജോഷി കൊല്ലാറ, ചെയര്‍മാന്‍ ജോണ്‍ സി. ടിറ്റോ എന്നിവര്‍ പ്രസംഗിച്ചു. ഇന്നു ഭൗതിക ശരീരം അടക്കം ചെയ്തിട്ടുള്ള ചെത്തിപ്പുഴ തിരുഹ്യദയ പള്ളിയില്‍ രാവിലെ ഏഴിനു വിശുദ്ധ കുര്‍ബാനയും മറ്റു തിരുക്കര്‍മങ്ങളും നടക്കും.

വീടിന്‍റെ താക്കോൽ ദാനം നടത്തി

അമ്പലപ്പുഴ: കോണ്‍ഗ്രസിന്‍റെ വിദേശ മലയാളി സംഘടനയായ ഒഐസിസി പുറക്കാട് പഞ്ചായത്ത് 16-ാം വാര്‍ഡില്‍ നിർമിച്ചു നല്‍കിയ വീടിന്‍റെ താക്കോല്‍ ദാന ഉദ്ഘാടനം എഐസിസി ജനറല്‍ സെക്രട്ടറി കെ.സി. വേണുഗോപാല്‍ എംപി നിര്‍വഹിച്ചു. ബ്ലോക്ക് കോണ്‍ഗ്രസ് കമ്മിറ്റി പ്രസിഡന്‍റ് ടി.എ. ഹാമിദ് അധ്യക്ഷത വഹിച്ചു. കെപിസിസി ജനറല്‍ സെക്രട്ടറി എം.ജെ. ജോബ്, എം. ലിജു, അനില്‍ ബോസ്, ടിജിന്‍ ജോസഫ്, എസ്. സുബാഹു, പി. സാബു, എ.ആര്‍. കണ്ണന്‍, എം.വി. രഘു, ആര്‍.വി. ഇടവന, എന്‍. ഷിനോയ, പി.കെ. മോഹനന്‍, സിറാജ് പുറക്കാട്, എസ്. രാധാകൃഷ്ണന്‍, കമലോല്‍ഭവന്‍, വി. ദില്‍ജിത്ത്, സിനോ വിജയരാജ് തുടങ്ങിയവര്‍ പ്രസംഗിച്ചു.

ടികെ റോഡില്‍ കുരുക്ക്; തിരുവല്ല യാത്ര ദുരിതത്തില്‍

തിരുവല്ല: പത്തനംതിട്ട ജില്ലയുടെ ഹൃദയ പാതയായ ടികെ റോഡില്‍ നിന്നും എംസി റോഡിലേക്കുള്ള യാത്ര ദുരിതപൂര്‍ണം. ടികെ റോഡില്‍ കറ്റോട് - മഞ്ഞാടി ഭാഗത്തെ കലുങ്കുപണികള്‍ കാരണമാണ് ടികെ റോഡ് കുരുക്കിലായത്. മാസങ്ങള്‍ക്കു മുമ്പ് ആരംഭിച്ചതാണ് പണികൾ. മഴക്കാലമായതോടെ ഇത് ഇഴയുകയാണ്. ഒരുഭാഗത്തെ ഗതാഗതം തടസപ്പെടുത്തി നിര്‍മാണം നടത്താനായിരുന്നു തീരുമാനമെങ്കിലും നടപടികള്‍ പ്രായോഗികായില്ല. തിരുവല്ലയിലേക്കുള്ള വാഹനങ്ങള്‍ മനയ്ക്കച്ചിറയില്‍ വഴിതിരിച്ചുവിടാന്‍ നിര്‍ദേശമുണ്ടായെങ്കിലും ബസുകള്‍ ഉള്‍പ്പെടെ തിരിഞ്ഞുപോകാന്‍ തയാറാകാതെ വന്നതോടെ കുരുക്ക് വര്‍ധിച്ചു. മനയ്ക്കച്ചിറ വഴി കിഴക്കന്‍മുത്തൂരിലെത്തി തിരുവല്ല ബൈപാസ് കടന്ന് ടൗണിലെത്തുമ്പോഴുണ്ടാകുന്ന കാലതാമസവും കുരുക്കും കാരണമാണ് ടികെ റോഡുവഴി തന്നെ വാഹനങ്ങള്‍ നീങ്ങിയത്. ഇതോടെ മണിക്കൂറുകള്‍ നീളുന്ന ഗതാഗതക്കുരുക്ക് മിക്കദിവസങ്ങളിലും ഉണ്ടാകുന്നു.

നവജാത ശിശുവിന്‍റെ മരണം: സമഗ്ര അന്വേഷണത്തിനു നിര്‍ദേശം

പത്തനംതിട്ട: നവജാതശിശുവിന്‍റെ മരണത്തിൽ സമഗ്ര അന്വേഷണം നിര്‍ദേശിച്ച് മുഖ്യമന്ത്രിയുടെ ഓഫീസ്. പത്തനംതിട്ട മെഴുവേലിയില്‍ ഒരു ദിവസം മാത്രം പ്രായമുള്ള നവജാത ശിശുവിനെ മരിച്ചനിലയില്‍ കണ്ടെത്തിയ സംഭവത്തില്‍ സമഗ്ര അന്വേഷണത്തിന് മുഖ്യമന്ത്രിയുടെ ഓഫീസ് നിര്‍ദേശം നല്‍കി. നവജാതശിശുവിനെ കൊലപ്പെടുത്തിയ സംഭവത്തിലെ മുഴുവന്‍ ദുരൂഹതകളിലും സമഗ്ര അന്വേഷണത്തിനു പ്രത്യേക അന്വേഷണ സംഘത്തെ നിയോഗിക്കമെന്നാവശ്യപ്പെട്ട് ഹൈക്കോടതി അഭിഭാഷകനും പൊതു പ്രവര്‍ത്തകനുമായ കുളത്തൂര്‍ ജയ്സിംഗ് നല്‍കിയ പരാതിയിന്‍മേല്‍ ആവശ്യമായ നടപടി സ്വീകരിക്കുവാന്‍ സംസ്ഥാന പോലീസ് മേധാവിക്കു മുഖ്യമന്ത്രിയുടെ ഓഫീസ നിര്‍ദേശം നല്‍കുകയായിരുന്നു. സംഭവത്തില്‍ ഇലവുംതിട്ട പോലീസ് കുഞ്ഞിന്‍റെ അമ്മയ്‌ക്കെതിരേ കൊലക്കുറ്റം ചുമത്തി കേസ് എടുത്തിട്ടുണ്ട്. അവിവാഹിതയായ സ്ത്രീ പ്രസവിച്ച ഒരു ദിവസം പ്രായമുള്ള നവജാത ശിശുവിനെ വലിച്ചെറിഞ്ഞു കൊലപ്പെടുത്താന്‍ മറ്റാരുടെയെങ്കിലും പ്രേരണയോ പ്രോത്സാഹനമോ ഭീഷണിയോ ഉണ്ടായിട്ടുണ്ടോയെന്നതടക്കം സംഭവത്തിലെ മുഴുവന്‍ ദുരൂഹതകളുംഅന്വേഷിക്കണമെന്നാണ് അഡ്വ. കുളത്തൂര്‍ ജയ്സിംഗിന്‍റെ പരാതിയില്‍ ആവശ്യപ്പെടുന്നത്.

നില്‍പ്പ് സമരം

ആലപ്പുഴ: വെള്ളക്കെട്ട് രൂക്ഷമായ സാഹചര്യത്തില്‍ പള്ളിക്കൂട്ടുമ്മ-നീലംപേരൂര്‍ റോഡ് ഉയര്‍ത്തി നിര്‍മിച്ച് ഗതാഗതതടസം നീക്കാന്‍ അടിയന്തര നടപടി സ്വകരിക്കണമെന്ന് കേരള കോണ്‍ഗ്രസ് ഉന്നതാധികരസമിതിയഗം ജോസ് കോയിപ്പള്ളി. ചമ്പക്കുളം യുഡിഎഫ് പ്രവര്‍ത്തകര്‍ നടത്തിയ നില്‍പ്പ് സമരം ഉദ്ഘാടനം ചെയ്യകയായിരുന്നു അദ്ദേഹം. മോളി അലക്‌സ്, മാത്തുക്കുട്ടി ജോസഫ്, ആന്‍റോ കെ.സി, കെ. വി. ജോസഫ്, തങ്കച്ചന്‍ വലിയവീട്, ദിലീപ് പുതുശേരി, ബാബുക്കുട്ടി തന്നിയത്, ജോജോ കെ.സി, ലീനാ മാത്യു തുടങ്ങിയവര്‍ സമരത്തിനു നേതൃത്വം നല്‍കി.

വെള്ളം കയറി; റെയില്‍വേ അടിപ്പാതകള്‍ അടച്ചു

തിരുവല്ല: കുറ്റൂര്‍ -മനയ്ക്കച്ചിറ റോഡിലെയും തിരുമൂലപുരം -കറ്റോട് റോഡിലെയും റെയില്‍വേ അടിപ്പാതകളില്‍ വെള്ളം കയറിയതിനെതുടര്‍ന്ന് അടച്ചിട്ട റോഡ് ആഴ്ചകള്‍ കഴിഞ്ഞിട്ടും തുറന്നു കൊടുക്കാനായിട്ടില്ല. നിത്യേന നൂറുകണക്കിന് വാഹനങ്ങള്‍ കടന്നുപോകുന്ന പാതകളില്‍ ഈ വാഹനങ്ങള്‍ കൂടാതെ ടികെ റോഡില്‍ മഞ്ഞാടിയില്‍ നടക്കുന്ന കലുങ്ക് നിര്‍മാണത്തെ തുടര്‍ന്ന് വലിയ വാഹനങ്ങള്‍ ഉള്‍പ്പെടെ തിരിച്ചുവിട്ടിരുന്നതും ഈ റോഡുകളിലൂടെ ആയിരുന്നു. അടിപ്പാതയില്‍ വെള്ളം കയറിയതിനെ തുടര്‍ന്ന ഇതുവഴിയുള്ള ഗതാഗതം റെയില്‍വേ ഗേറ്റിട്ട് നിരോധിച്ചിരിക്കുകയാണ്. മഴ തുടരുന്നതിനാല്‍ അടിപ്പാതയിലെ വെള്ളം കുറഞ്ഞിട്ടില്ല. മോട്ടോര്‍ ഉപയോഗിച്ച് വെള്ളം വറ്റിക്കാന്‍ റെയില്‍വേ തയാറാകാത്തതിനാല്‍ ഇപ്പോഴും ഗേറ്റുകള്‍ അടഞ്ഞു കിടക്കുകയാണ്. നടപ്പാതകളിലൂടെ ഇരുചക്രവാഹനങ്ങള്‍ കടന്നുപോകുന്നുണ്ട്. കുറ്റൂര്‍ റെയില്‍വേ അടിപ്പാതയില്‍ റോഡിന് തെക്കുവശത്തായി വീതി കൂട്ടിയ ഫുട്പാത്തിലൂടെ വലിയ കാറുകള്‍ ഉള്‍പ്പെടെ കടത്തി വിടാനാകുമെങ്കിലും ഈ ഭാഗത്തും രൂക്ഷമായ ഗതാഗതക്കുരുക്കും തര്‍ക്കങ്ങളും പതിവായി മാറിയിരിക്കുകയാണ്. തിരുമൂലപുരം ഇരുവെള്ളിപ്ര റെയില്‍വേ ഗേറ്റും അടഞ്ഞുകിടക്കുകയാണ്. മഞ്ഞാടിയില്‍നിന്ന് ഇതുവഴി എംസി റോഡിലേക്ക് എത്തിക്കൊണ്ടിരുന്ന വാഹനങ്ങള്‍ തിരുവല്ല ടൗണ്‍ ചുറ്റി സഞ്ചരിക്കുയാണ്.

മത്സ്യത്തൊഴിലാളികളെയും തീരദേശവാസികളെയും സർക്കാർ ദുരിതത്തിലാക്കുന്നു: മഹിളാ കോൺഗ്രസ്

ആലപ്പുഴ: സംസ്ഥാനത്തിന്‍റെ സൈന്യം എന്ന് വിശേഷിപ്പിക്കപ്പെട്ട മത്സ്യത്തൊഴിലാളികളെയും തീരദേശവാസികളെയും പിണറായി സർക്കാർ ദുരിതത്തിൽ മുക്കിക്കൊല്ലുകയാണെന്ന് മഹിളാ കോൺഗ്രസ് സംസ്ഥാന പ്രസിഡന്‍റ് ജെബി മേത്തർ എം പി. മഹിള സാഹസ് കേരള യാത്രയ്ക്ക് അരൂർ, എഴുപുന്ന, കോടം തുരുത്ത്, കുത്തിയതോട്, തുറവൂർ അരൂക്കുറ്റി, പെരുമ്പളം, പാണാവള്ളി, തൈക്കാട്ടുശേരി, പള്ളിപ്പുറം എന്നിവിടങ്ങളിലെ സ്വീകരണ യോഗങ്ങളിൽ പ്രസംഗി ക്കുകയായിരുന്നു അവർ. തീരദേശം മുഴുവൻ കടലാക്രമണ ഭീഷണിയിലകപ്പെട്ടിട്ടും സർക്കാർ മത്സ്യത്തൊഴിലാളികൾക്കും തീരദേശവാസികൾക്കും യാതൊരു സഹായവും നൽകുന്നില്ല. ദുരിതമനുഭവിക്കുന്ന മത്സ്യത്തൊഴിലാളികളെ ആശ്വസിപ്പിക്കാൻ മുഖ്യമന്ത്രിയോ വകുപ്പു മന്ത്രിയോ പോകാത്തത് ദുഃഖകരമാണ്. കടലാക്രമണത്തിൽ വീടും വഞ്ചിയും വള്ളവും നഷ്ടപ്പെട്ടവർക്ക് സഹായം നൽകണം. സൗജന്യ റേഷൻ, ധനസഹായം, പ്രത്യേക പാക്കേജ് എന്നിവ ഉടൻ നടപ്പിൽ വരുത്തണമെന്നും അവർ ആവശ്യപ്പെട്ടു. രാഷ്‌ട്രീയകാര്യസമിതിയംഗം ഷാനിമോൾ ഉസ്മാൻ, കെപിസിസി വൈസ് പ്രസിഡന്‍റ് വി. പി. സജീന്ദ്രൻ, കെപിസിസി ജനറൽ സെക്രട്ടറി എ.എ. ഷുക്കൂർ, കെപിസിസി ജനറൽ സെക്രട്ടറി എം. ജെ. ജേക്കബ്, സെക്രട്ടറി എസ്. ശരത് എന്നിവർ വിവിധ സ്വീകരണ സമ്മേളനങ്ങൾ ഉദ്ഘാടനം ചെയ്തു. ജില്ലയിൽ ഇന്നലെ ആരംഭിച്ച യാത്ര 138 മണ്ഡലങ്ങളിൽ പര്യടനം പൂർത്തിയാക്കി 30ന് ചെങ്ങന്നൂരിൽ സമാപിക്കും.

അനൂപിന്‍റെ വീട് എന്ന സ്വപ്നം സഫലമാക്കി മാവേലിക്കര എംവിഡി

മാവേലിക്കര: ഉപജീവനമാർഗമായി ലോട്ടറി വ്യാപാരം നടത്തുന്ന ഭിന്നശേഷി യുവാവ് അനൂപിന്‍റെ സ്വന്തമായ ഒരു വീട് എന്ന സ്വപ്നം പൂവണിയുന്നു. എല്ലുകൾ പൊടിയുന്ന അപൂർവ രോഗം ബാധിച്ച അനൂപ് ഇലക്‌ട്രിക് വീൽചെയറിൽ മാവേലിക്കര ആർടി ഓഫീസിലും പരിസരത്തും ലോട്ടറി വില്പന നടത്തിയാണ് ഉപജീവനമാർഗം കണ്ടെത്തുന്നത്. അതോടൊപ്പം ആർടി ഓഫീസിൽ എത്തുന്ന പൊതുജനങ്ങൾക്ക് റോഡ് സുരക്ഷാ സന്ദേശം നൽകുന്നതിലൂടെ അനൂപ് ശ്രദ്ധേയനായിരുന്നു. അനൂപിന്‍റെ നിസഹായാവസ്ഥ മനസിലാക്കിയ മാവേലിക്കര ജോയിന്‍റ് ആർടിഒയും ഉദ്യോഗസ്ഥരും മുൻകൈയെടുത്ത് വിവിധ സംഘടനകൾവഴി അനൂപിന്‍റെ ഇലക്‌ട്രിക് വീൽചെയറിന് റെയിൻ ഷീൽഡ്, പുതിയ ടയറുകൾ എന്നിവ നൽകിയിരുന്നു. ഗതാഗത മന്ത്രി ഗണേഷ് കുമാർ മാവേലിക്കരയിൽ എത്തിയപ്പോൾ അനൂപിനെ കാണുകയും ലോട്ടറി റാക്ക് സമ്മാനിക്കുകയും ചെയ്തിരുന്നു. ചെറിയൊരു വാടകവീട്ടിൽ ഒരുപാട് യാതനകൾ സഹിച്ചാണ് അനൂപ് ജീവിതം തള്ളിനീക്കിയിരുന്നത്. വെള്ളക്കെട്ട് നിറഞ്ഞ ഇടുങ്ങിയ വഴിയിലൂടെയാണ് അനൂപ് വീട്ടിലേക്ക് പൊയ്ക്കൊണ്ടിരുന്നത്. മഴപെയ്താൽ വെള്ളത്തിൽ മുങ്ങിയിരുന്ന വഴി ആയതിനാൽ ആഴ്ചകളോളം യാതൊരു വരുമാനവും ഇല്ലാതെ വീട്ടിൽ ഇരിക്കേണ്ട സ്ഥിതിയായിരുന്നു. അനൂപിന്‍റെ ദുരവസ്ഥ ജോയിന്‍റ് ആർടിഒയുടെയും ഉദ്യോഗസ്ഥരുടെയും കണ്ണിൽപ്പെട്ടു. അനൂപിന് സ്വന്തമായൊരു വീട് എന്ന സ്വപ്നം സാക്ഷാത്കരിക്കാൻ ശ്രമങ്ങൾ തുടങ്ങി. അനൂപിന്‍റെ കഥയറിഞ്ഞ് സുമനസുകൾ വസ്തുവും വീട് നിർമിക്കാൻ സഹായവും വാഗ്ദാനം ചെയ്തു. കട്ടച്ചിറ ജോൺ എഫ്. കെന്നഡി മെമ്മോറിയൽ സ്കൂൾ മാനേജ്മെന്‍റും അധ്യാപകരും കുട്ടികളും ചേർന്ന് വസ്തുവിനുള്ള പണം സ്വരൂപിച്ചു. പാലക്കാട് ഒറ്റപ്പാലത്തുള്ള ചാരിറ്റബിൾ ഓർഗനൈസേഷൻ സിഎംഎൻ ട്രസ്റ്റ് വീട് നിർമിച്ചു നൽകാമെന്ന് ഉറപ്പു നൽകി. കരുനാഗപ്പള്ളിയിലെ ഗ്രാൻഡ് ടെക് ബിൽഡേഴ്സ് വീടിന്‍റെ നിർമാണച്ചുമതല ഏറ്റെടുത്തതോടെ അനൂപിന്‍റെ സ്വപ്നം പൂവണിയുകയായി. ജൂലൈ ആദ്യവാരം വീടിന്‍റെ നിർമാണപ്രവർത്തനങ്ങൾ ആരംഭിക്കുമെന്ന് മാവേലിക്കര ജോയിന്‍റ് ആർടിഒ എം.ജി. മനോജ് അറിയിച്ചു. അനൂപിന്‍റെ സ്വപ്നം സാക്ഷാത്കരിക്കാൻ സുമനസുകൾ കഴിയുന്ന സേവനങ്ങൾ ചെയ്യണമെന്നും അദ്ദേഹം കൂട്ടിച്ചേർത്തു.

കുട്ടനാട്ടില്‍ ജീവിതം വഴിമുട്ടി

എടത്വ: മഴയുടെ ശക്തി കുറഞ്ഞതോടെ കുട്ടനാട്ടില്‍ ജലനിരപ്പ് താഴ്ന്നുതുടങ്ങി. എന്നാൽ വെള്ളക്കെട്ടില്‍ പൊറുതിമുട്ടിയിരിക്കുകയാണ് കുട്ടനാടന്‍ ജനത. നിനച്ചിരിക്കാതെ രണ്ടാമതുമെത്തിയ ശക്തമായ മഴയിലും കിഴക്കന്‍ വെള്ളത്തിന്‍റെ വരവിലും കുട്ടനാട് വീണ്ടും മുങ്ങി. ദുരിതബാധിതരായ കുട്ടനാടന്‍ ജനതയുടെ ദൈനംദിന ജീവിതം വഴിമുട്ടിയ അവസ്ഥയിലാണ്. കുട്ടനാട്ടിലെ നാമമാത്ര പ്രദേശങ്ങള്‍ ഒഴിച്ചാല്‍ ഒട്ടുമിക്ക സ്ഥലങ്ങളും വെള്ളക്കെട്ടിലാണ്. വാഹന ഗതാഗതം നിലച്ചിരിക്കുകയാണ്. വീയപുരം-എടത്വ, നീരേറ്റുപുറം-മുട്ടാര്‍-കിടങ്ങറ റോഡുകള്‍ വെള്ളത്തില്‍ മുങ്ങിയതോടെ കെഎസ്ആര്‍ടിസി സര്‍വീസുകള്‍ നിര്‍ത്തി. ചെറുവാഹനങ്ങളുട സര്‍വീസുകള്‍ നിലച്ചിട്ട് ദിവസങ്ങള്‍ പിന്നിടുന്നു. വീടുകളില്‍ വെള്ളം കയറിയെങ്കിലും ദുരിതാശ്വാസ ക്യാമ്പുകള്‍ ഇക്കുറി ആരംഭിച്ചില്ല. കുട്ടനാട്ടിലെ നിര്‍മാണമേഖലകള്‍ ഉള്‍പ്പെടെയുള്ള തൊഴില്‍മേഖലകള്‍ വെള്ളപ്പൊക്കത്തത്തുടര്‍ന്ന് അടഞ്ഞതോടെ സാധാരണക്കാരുടെ ജീവിതം വഴിമുട്ടിയിരി ക്കുകയാണ്. ദുരിത മേഖലകളില്‍ ഭക്ഷണം എത്തിക്കുന്നതിനോ കഞ്ഞിവീഴ്ത്തല്‍ കേന്ദ്രങ്ങള്‍ ആരംഭിക്കുന്നതിനോ സര്‍ക്കാര്‍തലത്തില്‍ യാതൊരു നടപടിയും സ്വീകരിക്കുന്നില്ല. നിരന്തരമായ വെള്ളപ്പൊക്കത്തെ പ്രതിരോധിക്കാന്‍ കഴിയാതെ എല്ലാം ഇട്ടെറിഞ്ഞ് ബന്ധുവീടുകളില്‍ അഭയം തേടുന്നവരാണ് കുട്ടനാട്ടില്‍ അധികവും. നിരന്തര വെള്ളപ്പൊക്കം മൂലം ക്ഷീരകര്‍ഷകരും തൊഴിലില്‍നിന്ന് പിന്‍മാറുന്ന സാഹചര്യമാണ്. നാല്‍ക്കാലികളെ സംരക്ഷിക്കാന്‍ യാതൊരു സംവിധാനവും ഇല്ലാത്തതിനാല്‍ വിറ്റു കാശാക്കുകയാണ് കര്‍ഷകര്‍. പാടശേഖര താമസക്കാരും കടുത്ത പ്രതിസന്ധിയാണ് നേരിടുന്നത്. ചില പാടശേഖരങ്ങള്‍ വെള്ളത്തില്‍ മുങ്ങിയാല്‍ അടുത്ത കൃഷിക്ക് പമ്പിംഗ് ആരംഭിക്കുന്നതുവരെ പ്രദേശവാസികള്‍ വെള്ളത്തിലാകും. പാടശേഖര പുറംബണ്ടുകള്‍ ബലപ്പെടുത്തിയും ജലാശയങ്ങള്‍ ആഴംകൂട്ടിയും വെള്ളപ്പൊക്കത്തെ ഒരു പരിധിവരെ പ്രതിരോധിക്കാമെന്നിരിക്കെ വകുപ്പു തലത്തില്‍ കുട്ടനാട്ടുകാരെ സഹായിക്കാന്‍ യാതൊരു സംവിധാനവും ഏര്‍പ്പെടുത്തുന്നില്ല. ഇക്കുറി കുട്ടനാട്ടില്‍നിന്ന് വെള്ളം ഒഴുകിപ്പോകാന്‍ താമസിക്കുന്നതും ദുരിതം ഇരട്ടിച്ചിട്ടുണ്ട്. ഒരാഴ്ചയായി ഇതേ ദുരിതം അനുഭവിക്കുകയാണ്. തോട്ടപ്പള്ളി സ്പില്‍വേ വഴി കടലിലേക്കുള്ള ഒഴുക്ക് കുറഞ്ഞിട്ടുണ്ട്. പൊഴിയില്‍ മണ്ണടിഞ്ഞ് ഒഴുക്ക് തടസപ്പെടുന്നതാണ് കുട്ടനാട്ടിലെ ജലനിരപ്പിന് കാര്യമായ മാറ്റം സംഭവിക്കാത്തതെന്ന് ആരോപണമുണ്ട്.

ദേശീയപാതയിൽ മൂന്നു കോടിയുടെ കവർച്ച: രണ്ടു പേർ പിടിയിൽ

കായംകുളം: ദേശീയപാതയിൽ ചേപ്പാട് സിനിമാ സ്‌റ്റൈലിൽ മൂന്നുകോടി തട്ടിയെടുത്ത സംഭവത്തിൽ രണ്ടു പേർ പിടിയിൽ.തമിഴ്നാട് തിരുപ്പൂർ സ്വദേശികളായ രണ്ടു പേരെയാണ് സിസിടിവി കേന്ദ്രീകരിച്ച് നടത്തിയ അന്വേഷണത്തിനൊടുവിൽ പിടികൂടിയത്. ഇവർ നിരവധി തട്ടിപ്പ്, കവർച്ച ക്വട്ടേഷൻ ആക്രമണ കേസുകളിലെ പ്രതികളാണന്നു പോലീസ് കണ്ടെത്തി. പ്രതികളെ കായംകുളം ഡിവൈഎസ്പി ബാബുക്കുട്ടന്‍റെ നേതൃത്വത്തിലുള്ള പോലീസ് സംഘം ചോദ്യംചെയ്തു വരികയാണ്. കഴിഞ്ഞയാഴ്ചയാണ് കോയമ്പത്തൂരിൽനിന്ന് കൊല്ലത്തേക്ക് പാഴ്സൽ ലോറിയിൽ കൊണ്ടുപോയ മൂന്നു കോടിയോളം രൂപ രണ്ടു കാറുകളിലായെത്തിയ സംഘം തട്ടിയെടുത്തത്. ചേപ്പാട് രാമപുരത്ത് കഴിഞ്ഞയാഴ്ച പുലർച്ചെ നാലിനായിരുന്നു സംഭവം. ലോറിക്കു കുറുകെ കാർ നിർത്തിയ സംഘം ഡ്രൈവറെ ആക്രമിച്ച ശേഷമാണ് പണം തട്ടിയെടുത്തത്. ഇവർ രക്ഷപ്പെട്ടതിനു ശേഷം ഡ്രൈവർ ലോറിയുമായി കൊല്ലത്തെത്തി പണം ഏറ്റുവാങ്ങാനിരുന്ന കൊല്ലത്തെ ജ്വല്ലറി ഉടമയെ വിവരം അറിയിച്ചു. ഇയാൾ കരീലക്കുളങ്ങര പോലീസിൽ പരാതി നൽകിയതോടെയാണ് സംഭവം പുറംലോകമറിഞ്ഞത്. കരീലക്കുളങ്ങര പോലീസും ജില്ലാ പോലീസ് മേധാവിയുടെ സ്ക്വാഡ് ഉൾപ്പെടെയുള്ള സംഘവും പണം തട്ടിയെടുത്ത സംഘത്തക്കുറിച്ച് അന്വേഷണം നടത്തിയെങ്കിലും സൂചനയൊന്നും ലഭിച്ചില്ല. കോയമ്പത്തൂർ സ്വദേശിയായ ഡ്രൈവറെ പോലീസ് ചോദ്യം ചെയ്തെങ്കിലും ഇയാളിൽനിന്നു ലഭിച്ച വിവരങ്ങൾ പൂർണമായി വിശ്വാസത്തിലെടുക്കാതെയാണ് അന്വേഷണം നടത്തിയത്. പാഴ്സലിൽ പണമാണെന്ന് ഡ്രൈവർക്ക് നേരത്തേ അറിയാമായിരുന്നോ എന്നതടക്കമുള്ള വിശദാംശങ്ങളും പോലീസ് പരിശോധിച്ചു. കൊല്ലത്തെ വ്യാപാരി കോയമ്പത്തൂരിൽ സ്വർണ വ്യാപാരവുമായി ബന്ധമുള്ളവരുമായി നടത്തിയ ഇടപാടിന്‍റെ ഭാഗമായാണ് അവിടെനിന്ന് പാഴ്സൽ എന്ന വ്യാജേന ചാക്കിൽ പണം അയച്ചതെന്നാണ് പോലീസിന്‍റെ നിഗമനം. സംഭവസ്ഥലത്തെ സിസിടിവി ദൃശ്യങ്ങൾ പോലീസ് പരിശോധിച്ചതിൽനിന്നു ലഭിച്ച നിർണായക വിവരങ്ങളുടെ അടിസ്ഥാനത്തിലാണ് രണ്ട് പ്രതികൾ വലയിലായത്.

ആശാൻ കലുങ്ക്-മാവിളപ്പടി റോഡിൽ ഒരാഴ്ചയ്ക്കിടെ നാല് അപകടം

ചാരുംമൂട്: നിർമാണം നടന്നുവരുന്ന പാലമേൽ ആശാൻ കലുങ്ക് - മാവിളപ്പടി റോഡിൽ അപകടങ്ങൾ വർധിച്ചു. ഒരാഴ്ചയ്ക്കിടെ നടന്നത് നാല് അപകടങ്ങളാണ്. കഴിഞ്ഞ ദിവസം കോടംപറമ്പ് ഗുരുമന്ദിരത്തിനു സമീപത്തെ ചപ്പാത്തിൽ കഴിഞ്ഞദിവസം രാത്രി നിയന്ത്രണം വിട്ട സ്‌കൂട്ടർ മറിഞ്ഞ് ഒരാൾക്ക് ഗുരുതര പരിക്കേറ്റിരുന്നു. അടൂർ പഴകുളം ബിന്ദു ഭവനത്തിൽ ബിനു (48) ഗുരുതര പരിക്കുകളോടെ ആശുപത്രിയിലാണ്. ശക്തമായ കാറ്റും മഴയും ഉണ്ടായിരുന്നതിനാൽ റോഡിലെ വെള്ളം നിറഞ്ഞു കിടന്ന ചപ്പാത്തിൽ സ്‌കൂട്ടർ മറിയുകയായിരുന്നു. സമീപവാസികളാണ് ഇയാളെ ഉടൻ ആശുപത്രിയിൽ എത്തിച്ചത്. അശാസ്ത്രീയ റോഡ് നിർമാണം ഈ ഭാഗത്ത് മുന്നറിയിപ്പു ബോർഡുകളോ അപായസൂചനയോ ഇല്ല. റോഡിന്‍റെ നിർമാണം തുടങ്ങിയനാൾ മുതൽ അശാസ്ത്രീയമായ റോഡ് നിർമാണത്തിനെതിരേ റോഡിനെക്കുറിച്ചുള്ള ആക്ഷേപങ്ങളും ഉയർന്നിരുന്നു. കഴിഞ്ഞ ദിവസം മറ്റപ്പള്ളി നല്ലവീട്ടിൽ രാജൻ (71) വെറ്റിലയുമായി പന്തളം ചന്തയിലേക്ക് സ്‌കൂട്ടറിൽ പോകുന്നതിനിടെ റോഡിൽ തെന്നി വീണ് കൈകാലുകൾ ഒടിഞ്ഞു. പ്രധാനമന്ത്രി ഗ്രാമീണ സഡക് യോജന പദ്ധതിയിൽപ്പെടുത്തി 4.80 കോടി രൂപ മുടക്കി റോഡു നിർമാണം ആരംഭിച്ചിട്ട് ഒന്നര വർഷമായെങ്കിലും കരാറുകാരൻ വേഗത്തിൽ നിർമാണം നടത്തുന്നില്ലെന്ന പരാതിയുണ്ട്. ഒത്തുകളി മാവിളപ്പടി - ആശാൻ കലുങ്ക്, മാമ്മൂട്-പയ്യനല്ലൂർ എന്നീ റോഡുകളാണ് നിർമാണത്തിലുള്ളത്. ഇതിൽ ഒന്നാം സെ‌ക‌്ഷൻ മാവിളപ്പടി ആശാൻ കലുങ്ക് റോഡിന്‍റെ ടാറിംഗ് ഏറെക്കുറെ പൂർത്തിയാക്കി. മാമ്മൂട് - പയ്യനല്ലൂർ റോഡിന്‍റെ നിർമാണം ഇപ്പോൾ നടക്കുന്നില്ല. ഇതുവഴി യാത്ര ചെയ്യുന്നവർ ദുരിതത്തിലാണ്. അശാസ്ത്രീയമായ റോഡുനിർമാണത്തിൽ കരാറുകാരനും ഉദ്യോഗസ്ഥരും ഒത്തുകളിക്കുകയാണെന്നും ജില്ലാ കളക്ടർ അടിയന്തരമായി ഇടപെടണമെന്നും നാട്ടുകാർ ആവശ്യപ്പെട്ടു. നിർ മാണം പൂർത്തിയായ സ്ഥലത്ത് ഒരു മാസം തികയുംമുമ്പേ ടാറിംഗ് ഇളകിയത് നാട്ടുകാരുടെ പ്രതിഷേധത്തിന് ഇടയാക്കിയിരുന്നു.

കായിപ്പുറം-പൂജവെളി റോഡ് തകർന്നു; നാട്ടുകാർ ദുരിതത്തിൽ

മുഹമ്മ: മുഹമ്മ പഞ്ചായത്ത് മൂന്നാം വാർഡിലെ പൂജവെളി മഹാവിഷ്ണു ക്ഷേത്രം - കായിപ്പുറം അനന്തശയനേശ്വര ക്ഷേത്രം റോഡ് നാട്ടുകാരുടെ നടുവൊടിക്കുന്നു. പത്തു വർഷത്തിലധികമായി തകർന്നു കിടക്കുന്ന റോഡിലൂടെ സ്കൂൾ കുട്ടികൾ ഉൾപ്പെടെ നൂറുകണക്കിനാളുകളാണ് ദിവസവും സഞ്ചരിക്കുന്നത്. കുണ്ടും കുഴിയും നിറഞ്ഞ റോഡിൽ വിദ്യാർഥികൾ അപകടത്തിൽപ്പെടുന്നതായുള്ള പരാതികൾ വർധിക്കുകയാണെങ്കിലും നടപടി കടലാസിലാണ്. മഴ കനത്തതോടെ ക്ഷേത്രങ്ങളിലേക്കും സിഎംഎസ് എൽപി സ്കൂളിലേക്കുമുള്ളവർ റോഡിലൂടെ നീന്തിയാണ് സഞ്ചരിക്കുന്നത്. പല ഭാഗങ്ങളും കുളം പോലെയാണ്. മത്സ്യ - കയർ മേഖലകളുമായി ബന്ധപ്പെട്ട വാഹനങ്ങളും മേഖലയിൽ എത്താനാവാതെ വിഷമിക്കുന്നു. ഒന്നര കിലോമീറ്ററുള്ള റോഡ് ഇരുളിലായിരുന്നു. നാട്ടുകാരുടെ പരാതി ഏറിയതിനെത്തുടർന്ന് കഴിഞ്ഞയിടെയാണ് ലൈറ്റുകൾ സ്ഥാപിച്ചത്. റോഡുപണി നടത്തിയില്ലെങ്കിൽ സമരം തുടങ്ങുമെന്ന് നാട്ടുകാർ പറയുന്നു.

കൗൺസിൽ മിനിറ്റ്സിലെ തിരുത്തൽ: നഗരസഭ മുൻ ചെയർപേഴ്സൺ കോടതിയിൽ കീഴടങ്ങി

ചെങ്ങന്നൂർ: ചെങ്ങന്നൂർ നഗരസഭയുടെ മുൻ യുഡിഎഫ് ചെയർപേഴ്സണും 27-ാം വാർഡ് കോൺഗ്രസ് അംഗവുമായ മറിയാമ്മ ജോൺ ഫിലിപ്പ്, കൗൺസിലിന്‍റെ മിനിറ്റ്സ് വ്യാജമായി നിർമിച്ച കേസിൽ ചെങ്ങന്നൂർ ജുഡീഷൽ ഫസ്റ്റ് ക്ലാസ് മജിസ്ട്രേട്ട് കോടതിയിൽ കീഴടങ്ങി. ഔദ്യോഗിക രേഖകൾ വ്യാജമായി നിർമിച്ചു എന്ന് കാണിച്ച് അന്നത്തെ നഗരസഭാ സെക്രട്ടറിയായിരുന്ന സ്റ്റാലിൻ നാരായണൻ നൽകിയ സ്വകാര്യ അന്യായത്തിലാണ് ക്രിമിനൽ നടപടി സ്വീകരിച്ചത്. കേസിനാസ്പദമായ സംഭവം നഗരസഭയുടെ ഉടമസ്ഥതയിലുള്ള ശാസ്താംപുറം മാർക്കറ്റ് ഷോപ്പിംഗ് കോംപ്ലക്സിലെ കടമുറികളിൽ നടന്ന അനധികൃത നിർമാണവുമായി ബന്ധപ്പെട്ടാണ്. നഗരസഭാ യുഡിഎഫ് അംഗവും കേരള കോൺഗ്രസ് ജോസഫ് വിഭാഗം സംസ്ഥാന നേതാവുമായ രാജൻ കണ്ണാട്ടിന്‍റെ മകൻ മാത്യു കെ. തോമസ് ലൈസൻസിയായ കടമുറികളിലാണ് പ്രശ്നങ്ങൾ ഉടലെടുത്തത്. കടമുറികളിലെ ഇന്‍റീരിയർ ജോലികൾ ചെയ്യുന്നതിനെന്ന പേരിൽ മാത്യു കെ. തോമസ് നഗരസഭയിൽ അപേക്ഷ നൽകിയിരുന്നു. എന്നാൽ, അപേക്ഷയ്ക്ക് വിരുദ്ധമായി മുറികളുടെ ഘടനതന്നെ മാറ്റുന്നു എന്ന പരാതി ലഭിച്ചു. ഇതേത്തുടർന്ന്, 2021 മാർച്ച് 31ന് ചേർന്ന കൗൺസിൽ യോഗത്തിൽ എൽഡിഎഫ്, ബിജെപി അംഗങ്ങൾ പ്രതിഷേധമുയർത്തി. വിഷയത്തിൽ റിപ്പോർട്ട് നൽകുന്നതിനായി എൻജിനിയറിംഗ് വിഭാഗം ഉദ്യോഗസ്ഥരും കൗൺസിൽ അംഗങ്ങളും അടങ്ങുന്ന ഒൻപതംഗ സബ് കമ്മിറ്റി രൂപീകരിച്ചു. നഗരസഭയ്ക്ക് നൽകിയ അപേക്ഷയ്ക്ക് വിരുദ്ധമായി അനധികൃത നിർമാണം നടന്നതായി സബ് കമ്മിറ്റി കണ്ടെത്തി. ഈ റിപ്പോർട്ട് ലഭിക്കുന്നതിനു മുൻപ്, മാത്യു കെ. തോമസിന് അനുകൂലമായി കൗൺസിൽ മിനിറ്റ്സ് തിരുത്തുന്നതിന് ചെയർപേഴ്സൺ സെക്രട്ടറിയോട് ആവശ്യപ്പെട്ടു. എന്നാൽ, സെക്രട്ടറി ഇതിനെ എതിർത്തു. തുടർന്ന്, കൗൺസിൽ നടപടികൾക്കുള്ള മിനിറ്റ്സ് തിരുത്തുകയും മിനിറ്റ്സ് തയാറാക്കുന്ന ഔദ്യോഗിക സോഫ്റ്റ്‌വെയർ ഉപയോഗിക്കാതെ നിയമവിരുദ്ധമായ മിനിറ്റ്സ് നൽകാൻ ഉത്തരവിടുകയും ചെയ്തു എന്നാണ് കേസ്. നേരത്തേ കോടതിയിൽ ഹാജരാകാൻ നിർദേശിച്ചെങ്കിലും മറിയാമ്മ ജോൺ ഹാജരാകാതിരുന്നതിനെത്തുടർന്നാണ് വാറണ്ട് പുറപ്പെടുവിച്ചത്. ഇതേത്തുടർന്നാണ് ഇന്നലെ അവർ ചെങ്ങന്നൂർ ജുഡീഷൽ ഫസ്റ്റ് ക്ലാസ് മജിസ്ട്രേട്ട് കോടതിയിൽ കീഴടങ്ങിയത്.

സുവർണതൂലിക പുരസ്‌കാരം ഉണ്ണിക്കൃഷ്ണൻ മുതുകുളത്തിന്

ഹരിപ്പാട്: മികച്ച നാടകരചനയ്ക്കുള്ള സുവർണതൂലിക പുരസ്‌കാരം ഉണ്ണിക്കൃഷ്ണൻ മുതുകുളം രചിച്ച നീലാംബരിക്ക് ലഭിച്ചു. പുലിറ്റ്സർ ബുക്സ് ആണ് ഈ നാടകംപ്രസിദ്ധീകരിച്ചത്. കവിയുംഎഴുത്തുകാരനുമായ ഉണ്ണിക്കൃഷ്ണൻ മുതുകുളം, കാവ്യസമാഹാരങ്ങൾ, നോവൽ, പഠനം, ബാലസാഹിത്യം, ഫോക്‌ലോർ, നാടകം എന്നീ മേഖലകളിൽ ഇരുപത്തിയൊന്നു കൃതികളുടെ രചയിതാവാണ്. അടു ത്തമാസം കൊല്ലത്തു നടക്കുന്ന സമ്മേളനത്തിൽ പുരസ്‌കാരം സമ്മാനിക്കും.

ബന്ദിപ്പൂവ്, വാടാമല്ലി കൃഷി ആരംഭിച്ചു

ചെങ്ങന്നൂർ: ഓണം ലക്ഷ്യമിട്ട് ചെങ്ങന്നൂർ നഗരസഭയുടെ ഒമ്പതാം വാർഡിൽ ബന്ദിപ്പൂവും വാടാമല്ലി കൃഷിയും ആരംഭിച്ചു. ഇടനാട് വെൽനസ് സെന്‍ററിനും ഇടനാട് ജെബി സ്കൂളിനും സമീപമുള്ള ഒരേക്കർ സ്ഥലത്താണ് തൊഴിലുറപ്പ് പദ്ധതിയുടെ കീഴിൽ പൂക്കൃഷി നടത്തുന്നത്. നഗരസഭാ ചെയർപേഴ്സൺ അഡ്വ. ശോഭ വർഗീസ് തൊഴിലുറപ്പ് തൊഴിലാളികൾക്ക് ബന്ദിപ്പൂ തൈകൾ കൈമാറി പദ്ധതി ഉദ്ഘാടനം ചെയ്തു. വൈസ് ചെയർമാൻ കെ. ഷിബുരാജൻ അധ്യക്ഷനായി.

മിഷൻ ചൈതന്യം പ്രസരിപ്പിക്കുന്നവരായി മിഷൻലീഗ് അംഗങ്ങൾ മാറണം: മാർ ജോസഫ് പെരുന്തോട്ടം

ആലപ്പുഴ: മിഷൻ ചൈതന്യം പ്രസരിപ്പിക്കുന്നവരായി മിഷൻ ലീഗ് അംഗങ്ങൾ മാറണമെന്ന് ആർച്ച് ബിഷപ് മാർ ജോസഫ് പെരുന്തോട്ടം. ആലപ്പുഴ മേഖല ചെറുപുഷ്പ മിഷൻ ലീഗ് പ്രവർത്തനവർഷം ഉദ്ഘാടനവും പുതിയ ഭാരവാഹികളുടെ സത്യപ്രതിജ്ഞയും ഈ വർഷം വിശുദ്ധ കുർബാന സ്വീകരിച്ച കുട്ടികളുടെ സംഗമമായ എയ്ഞ്ചൽസ് മീറ്റും ഉന്നതവിജയം കരസ്ഥമാക്കിയ മിഷൻ ലീഗ് പ്രവർത്തകർക്ക് അനുമോദനവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ചെറുപുഷ്പ മിഷൻലീഗിലൂടെ അനേകം വൈദികരെയും സന്യാസിനികളെയും മിഷൻ ചൈതന്യമുള്ള അനേകം അല്മായ മിഷനറിമാരെയും സഭയ്ക്കും സമൂഹത്തിനും നൽകാൻ കഴിഞ്ഞിട്ടുണ്ടെന്ന് അദ്ദേഹം പ്രസ്താവിച്ചു. പഴവങ്ങാടി മാർ സ്ലീവ ഫൊറോന പള്ളിയിൽ നടന്ന പരിപാടിയിൽ മിഷൻ ലീഗ് ആലപ്പുഴ മേഖല പ്രസിഡന്‍റ് മാസ്റ്റർ ആഞ്ചലോ മൈക്കിൾ അധ്യക്ഷത വഹിച്ചു. പുതിയ വർഷത്തെ മാർഗരേഖ മാർ ജോസഫ് പെരുന്തോട്ടം ഫൊറോന വികാരി ഫാ.മാത്യു നടമുഖത്തിന് നൽകി പ്രകാശനം ചെയ്തു. ഫാ.മാത്യു നടമുഖത്ത് അനുഗ്രഹ പ്രഭാഷണം നടത്തി. അതിരൂപത ഓർഗനൈസിംഗ് സെക്രട്ടറി എബിൻ ജോസഫ്, മുൻ മേഖലാ ഓർഗനൈസിംഗ് പ്രസിഡന്‍റ് ജെറിൻ ജോസഫ്, ഫാ.യോഹന്നാൻ കട്ടത്തറ, ഫാ.സെബാസ്റ്റ്യൻ മാമ്പ്ര, സി.മെറിൻ മൂന്നാറ്റും മുഖം, സിറിയക് തലച്ചെല്ലൂർ, സ്റ്റെഫിൻ ചാക്കോ തുടങ്ങിയവർ പ്രസംഗിച്ചു.

റോഡും തോടും തിരിച്ചറിയാതെ പാരേത്തോട്-വട്ടടി റോഡ്

എടത്വ: വെള്ളം ഉയര്‍ന്നാല്‍ ഉടന്‍ റോഡ് തോടായി മാറും. പാരേത്തോട്-വട്ടടി റോഡില്‍ യാത്ര ദുഷ്‌കരം. പ്രധാനമന്ത്രി ഗ്രാമീണ സഡക്ക് യോജന പദ്ധതി പ്രകാരം നിര്‍മിച്ച പാരേത്തോട്-വട്ടടി റോഡാണ് വെള്ളത്തില്‍ മുങ്ങുന്നത്. അടിക്കടിയുണ്ടാവുന്ന വെള്ളക്കെട്ടുമൂലം തലവടി തെക്ക് ഭാഗത്തുള്ളവര്‍ക്ക് എടത്വ-ആലംതുരുത്തി റോഡിലും എടത്വ-പൊടിയാടി റോഡിലും എത്താന്‍ സാധിക്കാതായിരിക്കുകയാണ്. തലവടി ഹയര്‍ സെക്കൻഡറി സ്‌കൂളിലെ നിരവധി വിദ്യാര്‍ഥികള്‍ ഈ റോഡിനെയാണ് ആശ്രയിക്കുന്നത്. മറ്റു സ്ഥലങ്ങളില്‍ വെള്ളം ഇറങ്ങിയാലും ഇവിടെനിന്ന് വെള്ളം ഇറങ്ങാറില്ല. മാത്രമല്ല റോഡിന്‍റെ ഒരു വശം തോടായതിനാല്‍ റോഡും തോടും തിരിച്ചറിയാത്ത അവസ്ഥയുമാണ്. റോഡിന്‍റെ വശങ്ങള്‍ ഇടിഞ്ഞ് അപകടം ഒഴിവാക്കാന്‍ അധികൃതര്‍ നടപടി സ്വീകരിക്കണമെന്ന് പൊതു പ്രവര്‍ത്തകന്‍ ഡോ. ജോണ്‍സണ്‍ വി. ഇടിക്കുള ആവശ്യപ്പെട്ടു.

ആരോഗ്യ ബോധവത്കരണ കാമ്പയിൻ സമാപിച്ചു

അമ്പലപ്പുഴ: പുന്നപ്ര തെക്ക് പഞ്ചായത്തും കുടുംബാരോഗ്യ കേന്ദ്രവും സംയുക്തമായി സംഘടിപ്പിച്ച ആരോഗ്യ ബോധവത്കരണ കാമ്പയിൻ സമാപിച്ചു. പഞ്ചായത്തിലെ മുഴുവൻ സ്കൂളുകളിലേയും വിദ്യാർഥികളെ പങ്കെടുപ്പിച്ച് ‘മുളയിലെ നുള്ളാം ജീവിതശൈലി രോഗങ്ങളെ സുഖകരമാക്കാം ഭാവി ജീവിതത്തെ’ എന്ന പേരിൽ നടത്തിയ കാമ്പയിന്‍റെ സമാപനം എച്ച്.സലാം എം എൽ എ ഉദ്ഘാടനം ചെയ്തു. പുന്നപ്ര ഗവ. ജെ.ബി സ്കൂൾ ഓഡിറ്റോറിയത്തിൽ സംഘടിപ്പിച്ച പരിപാടിയിൽ പ്രസിഡന്‍റ് പി. ജി. സൈസ് അധ്യക്ഷനായി.

കിന്‍ഡര്‍ ആശുപത്രിയില്‍ യോഗ ദിനാചരണം

ചേർത്തല: കിൻഡർ ആശുപത്രിയുടെ നേതൃത്യത്തിൽ അന്താരാഷ്ട്ര യോഗദിനത്തോടനുബന്ധിച്ച് ഗർഭിണികൾക്കായുള്ള പ്രിനറ്റൽ യോഗ ക്ലബ്ബിന്‍റെ ഉദ്ഘാടനവും യോഗാദിനാചരണവും യോഗ കോ-ഓർഡിനേറ്റർ ഡോ. നിമ്മി അലക്സാണ്ടർ നിര്‍വഹിച്ചു. രോഗികളുടെ ശാരീരികമായ ആരോഗ്യം മാത്രമല്ല മാനസിക ആരോഗ്യവും മെച്ചപ്പെടുത്തുക എന്ന ലക്ഷ്യത്തോടുകൂടിയാണ് യോഗ ദിനത്തിൽ ഗർഭിണികളുടെ പ്രിനറ്റൽ യോഗ ക്ലബ് ആരംഭിച്ചത്. എല്ലാ ശനിയാഴ്ചകളിലും ഗർഭിണികൾക്കുവേണ്ടിയുള്ള യോഗ സെഷനുകൾ നടത്തും. സൗജന്യമായി നടത്തപ്പെടുന്ന യോഗ ക്ലബ്ബിലേക്ക് കിൻഡറിലെ ഗർഭിണികൾക്ക് മാത്രമല്ല മറ്റ് ആശുപത്രിയിലെ ഗർഭിണികൾക്കും പങ്കുചേരാമെന്നും ഓൺലൈൻ യോഗ ചെയ്യുന്നതിനുള്ള ലിങ്കുകൾ വാട്സ്ആപ്പ് ഗ്രൂപ്പുകളിലൂടെ ഷെയർ ചെയ്യുമെന്നും ആശുപത്രി അധികൃതർ അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]