തെരഞ്ഞെടുപ്പുകാലത്ത് ലഹരിവ്യാപനം തടയാന്‍ ഊര്‍ജിതമായി എക്സൈസും പോലീസും : Deepika.com Nattu Visesham

KOTTAYAM

തെരഞ്ഞെടുപ്പുകാലത്ത് ലഹരിവ്യാപനം തടയാന്‍ ഊര്‍ജിതമായി എക്സൈസും പോലീസും

Sunday, April 14, 2024 7:03 AM IST

ചങ്ങനാശേരി: തെരഞ്ഞെടുപ്പുകാലത്ത് ലഹരിവ്യാപനം തടയാന്‍ എക്സൈസും പോലീസും പരിശോധനകള്‍ കര്‍ശനമാക്കി. തെരഞ്ഞെടുപ്പ് കമ്മീഷന്‍റെ നിര്‍ദേശപ്രകാരമാണ് പട്രോളിംഗും പരിശോധനയും കര്‍ശനമാക്കിയത്. ട്രെയിനുകള്‍, ഇന്‍റര്‍സ്റ്റേറ്റ് ടൂറിസ്റ്റ് ബസുകള്‍, കെഎസ്ആര്‍ടിസി ബസുകള്‍ തുടങ്ങിയവ കേന്ദ്രീകരിച്ചാണ് പരിശോധന കര്‍ശനമാക്കിയിരിക്കുന്നത്.

കഴിഞ്ഞദിവസം എക്‌സൈസും ആര്‍പിഎഫും ചേര്‍ന്ന് കോട്ടയത്ത് ട്രെയിനില്‍ നടത്തിയ പരിശോധനയില്‍ കഞ്ചാവുമായി യുവതിയേയും യുവാവിനേയും അറസ്റ്റ് ചെയ്തിരുന്നു. എക്‌സൈസിന്‍റെ പ്രത്യേക സ്‌ക്വാഡാണ് പരിശോധനയ്ക്ക് നേതൃത്വം നല്‍കുന്നത്.

ട്രെയിനിലെ മുഴുവന്‍ ബോഗികളും പരിശോധിക്കുന്ന രീതിയാണ് സംഘം അവലംബിച്ചിരിക്കുന്നത്. അതിര്‍ത്തി കടന്നെത്തുന്ന ഇന്‍റര്‍ സ്റ്റേറ്റ് ടൂറിസ്റ്റ്, കെഎസ്ആര്‍ടിസി ബസുകളിലും സംഘം പരിശോധന നടത്തുന്നുണ്ട്.

തൊഴിലാളി ക്യാമ്പുകള്‍ കേന്ദ്രീകരിച്ചും പരിശോധന

ഇതര സംസ്ഥാന തൊഴിലാളികളുടെ ക്യാമ്പുകള്‍ കേന്ദീകരിച്ചും എക്സൈസ്, പോലീസ് സംഘങ്ങളുടെ കൂട്ടായ പരിശോധന ആരംഭിച്ചിട്ടുണ്ട്. കഴിഞ്ഞദിവസം പായിപ്പാട് മുണ്ടുകോട്ട കുരിശടി ഭാഗത്തുനിന്നും 31 ഗ്രാം ബ്രൗണ്‍ഷുഗറുമായി ഇതര സംസ്ഥാന തൊഴിലാളി അറസ്റ്റിലായിരുന്നു.

എംഡിഎംഎ, ബ്രൗണ്‍ഷുഗര്‍ തുടങ്ങിയ മാരക രാസലഹരി വസ്തുക്കള്‍ വിപണനം ചെയ്യുന്ന സംഘങ്ങളെക്കുറിച്ച് അന്വേഷണ സംഘത്തിന് സൂചനകള്‍ ലഭിച്ചിട്ടുണ്ട്. ചങ്ങനാശേരി, പായിപ്പാട്, കറുകച്ചാല്‍ മേഖലകളില്‍ വന്‍തോതില്‍ നിരോധിത പുകയില ഉത്പന്നങ്ങള്‍ എത്തുന്നതായും സൂചനകളുമുണ്ട്.

ഇതേസമയം, മധ്യവേനല്‍ അവധിക്കാലത്ത് കളിക്കളങ്ങളിലും മൈതാനങ്ങളിലും കുട്ടികള്‍ക്കും യുവാക്കള്‍ക്കും ലഹരി വില്‍ക്കുന്നതിനുള്ള തയാറെടുപ്പുകളുമായി ചില ലഹരി മാഫിയ സംഘങ്ങള്‍ പ്രവര്‍ത്തിക്കുന്നതായും സൂചനകളുണ്ട്.