വ്യാപാര സ്ഥാപനങ്ങളില്‍
വോട്ട് അഭ്യര്‍ഥിച്ച് യുഡിഎഫ്
പാലാ: കോട്ടയത്തെ യുഡിഎഫ് സ്ഥാനാര്‍ഥി അഡ്വ. കെ. ഫ്രാന്‍സിസ് ജോര്‍ജിന്‍റെ തെരഞ്ഞെടുപ്പ് പ്രചാരണാര്‍ഥം മാണി സി. കാപ്പനും യുഡിഎഫ് നേതാക്കളും പാലായിലെ വ്യാപാര സ്ഥാപനങ്ങളിലെത്തി വോട്ട് അഭ്യര്‍ഥിച്ചു.
നൂറുകണക്കിന് യുഡിഎഫ് പ്രവര്‍ത്തകരുടെ അകമ്പടിയോടെ നടത്തിയ പ്രചാരണത്തിന് ജോയി ഏബ്രഹാം, പ്രഫ. സതീശ് ചൊള്ളാനി, ജോര്‍ജ് പുളിങ്കാട്, എ.കെ. ചന്ദ്രമോഹന്‍, ബിജു പുന്നത്താനം എന്‍. സുരേഷ്, സി.ടി. രാജന്‍, തോമസ് ഉഴുന്നാലില്‍, കുര്യാക്കോസ് പടവന്‍, സന്തോഷ് കാവുകാട്ട്, ജോസ്മോന്‍ മുണ്ടയ്ക്കൽ തുടങ്ങിയവര്‍ നേതൃത്വം നല്‍കി.
ചാഴികാടന്‍റെ കടുത്തുരുത്തി
മണ്ഡലപര്യടനം ഇന്ന് സമാപിക്കും
കുറവിലങ്ങാട്: എൽഡിഎഫ് സ്ഥാനാർഥി തോമസ് ചാഴികാടന്‍റെ കടുത്തുരുത്തി മണ്ഡലപര്യടനം ഇന്നു സമാപിക്കും. ഇന്ന് കിടങ്ങൂർ, കടപ്ലാമറ്റം, കാണക്കാരി, മാഞ്ഞൂർ, കടുത്തുരുത്തി പഞ്ചായത്തുകളിലാണ് പര്യടനം. ഇന്ന് 7.30ന് കിടങ്ങൂർ പടിഞ്ഞാറേ കൂടല്ലൂരിൽ കേരള കോൺഗ്രസ്-എം ചെയർമാൻ ജോസ് കെ. മാണി എംപി പര്യടനം ഉദ്ഘാടനം ചെയ്യും.
മൂന്നിന് മാഞ്ഞൂർ പഞ്ചായത്തിലെ ചാമക്കാലായിൽ എത്തും. അഞ്ചിന് മാൻവെട്ടത്ത് മാഞ്ഞൂർ പഞ്ചായത്തിലെ പര്യടനം അവസാനിക്കും. കപിക്കാട് നീലിമലയിൽ നിന്നാണ് 5.10ന് കടുത്തുരുത്തി പഞ്ചായത്തിലെ പര്യടനം ആരംഭിക്കുന്നത്. കിടങ്ങൂരിൽനിന്ന് ഒൻപതിന് കടപ്ലാമറ്റത്തെ മാറിയിടത്ത് എത്തും. 10.10ന് കാണക്കാരിയിലെ കടപ്പൂരിൽ പര്യടനമെത്തും. മൂന്നിന് മാഞ്ഞൂരിലും 51.10ന് കടുത്തുരുത്തി പഞ്ചായത്തിലും പര്യടനം എത്തും. 8.30ന് മാന്നാറിൽ സമാപിക്കും.
തൊഴിലാളിക്ഷേമത്തിന്
ചാഴികാടന്‍ ജയിക്കണമെന്ന്
പാലാ: തൊഴിലാളി വര്‍ഗത്തിന്‍റെ ഉന്നമനത്തിനും മുന്നേറ്റത്തിനുമായി ഇടതുപക്ഷ സ്ഥാനാര്‍ഥി തോമസ് ചാഴികാടന്‍ വിജയിക്കണമെന്ന് കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി. ഇടതുപക്ഷ തൊഴിലാളി സംഗമം ഉദ്ഘാടനം ചെയ്യുകയായിരുന്നു അദ്ദേഹം.
ജോസുകുട്ടി പൂവേലില്‍ അധ്യക്ഷത വഹിച്ചു. ഇടതുപക്ഷ തൊഴിലാളി യൂണിയന്‍ നേതാക്കളായ ഷാര്‍ളി മാത്യു, ടി.ആര്‍. തങ്കച്ചന്‍, സിബി ജോസഫ്, ഷാജു തുരുത്തേല്‍, ടോബിന്‍ കെ. അലക്സ് എന്നിവര്‍ പ്രസംഗിച്ചു.
എൽഡിഎഫ്
കുടുംബസംഗമം
പാലാ: കുടുംബസംഗമത്തിലേക്ക് ശ്രദ്ധതിരിച്ച് ഇടതുമുന്നണി. ബൂത്തുകളെ പലഭാഗങ്ങളായി തിരിച്ച് കുടുംബയോഗങ്ങള്‍ സജീവമാക്കിയിരിക്കുകയാണ് മുന്നണി നേതൃത്വം. മന്ത്രി വി.എന്‍. വാസവനും കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണിയും കുടുംബസമ്മേളനങ്ങളില്‍ പങ്കെടുക്കുന്നുണ്ട്. മുന്നണി ഘടകകക്ഷി നേതാക്കള്‍ക്ക് ഓരോ ബൂത്തുകളുടേയും ചുമതല നല്‍കിയാണ് കുടുംബസംഗമങ്ങൾ ക്രമീകരിച്ചിരിക്കുന്നത്. രാമപുരത്ത് മൂന്നും കടനാട്ടിലും കൊഴുവനാലിലും ഓരോ കുടുംബസംഗമങ്ങളിലുമാണ് മന്ത്രി വി.എന്‍. വാസവന്‍ പങ്കെടുത്തത്.
പത്മജ വേണുഗോപാല്‍
പാലായില്‍
പാലാ: സ്ത്രീകള്‍ക്ക് ഏറ്റവും കൂടുതല്‍ കരുതല്‍ നല്‍കുന്ന ഭരണാധികാരിയാണ് നരേന്ദ്രമോദിയെന്ന് ബിജെപി നേതാവ് പത്മജ വേണുഗോപാല്‍. കോട്ടയത്തെ എന്‍ഡിഎ സ്ഥാനാര്‍ഥി തുഷാര്‍ വെള്ളാപ്പള്ളിയുടെ തെരഞ്ഞെടുപ്പ് പ്രചാരണത്തിന്‍റെ ഭാഗമായി പാലാ മണ്ഡലത്തിലെ വെള്ളിയേപ്പള്ളിയില്‍ നടന്ന കുടുംബസംഗമം ഉദ്ഘാടനം ചെയ്ത് പ്രസംഗിക്കുകയായിരുന്നു അവര്‍. തെരഞ്ഞെടുപ്പിനു ശേഷം കോണ്‍ഗ്രസില്‍നിന്ന് ബിജെപിയിലേക്ക് വലിയ ഒഴുക്കുണ്ടാകുമെന്നും കേരളം ബിജെപിക്ക് അനുകൂലമായ സംസ്ഥാനമായി മാറുമെന്നും അവര്‍ പറഞ്ഞു.
ബിജെപി സംസ്ഥാന സമിതിയംഗവും മുത്തോലി പഞ്ചായത്ത് പ്രസിഡന്‍റുമായ രണ്‍ജിത്ത് ജി. മീനാഭവന്‍ അധ്യക്ഷത വഹിച്ചു. ബിഡിജെഎസ് സംസ്ഥാന വൈസ് പ്രസിഡന്‍റ് അഡ്വ. സിനില്‍ മുണ്ടപ്പള്ളി, പാലാ മണ്ഡലം പ്രസിഡന്‍റ് ബിനീഷ് ചൂണ്ടച്ചേരി തുടങ്ങിയവര്‍ പ്രസംഗിച്ചു.