സ്വീകരണങ്ങളേറ്റുവാങ്ങി ഇതാ ഈ വഴിത്താരയിലൂടെ... : Deepika.com Nattu Visesham

KOTTAYAM

സ്വീകരണങ്ങളേറ്റുവാങ്ങി ഇതാ ഈ വഴിത്താരയിലൂടെ...

Tuesday, April 16, 2024 10:38 PM IST

കെ. ഫ്രാന്‍സിസ് ജോര്‍ജ്

കോട്ടയം: കോട്ടയം പാര്‍ലമെന്‍റ് മണ്ഡലത്തിലെ യുഡിഎഫ് സ്ഥാനാര്‍ഥി അഡ്വ. കെ. ഫ്രാന്‍സിസ് ജോര്‍ജ് ഇന്നലെ കോട്ടയം മണ്ഡലത്തില്‍ പര്യടനം നടത്തി. യുഡിഎഫ് കേന്ദ്ര ഇലക്‌ഷന്‍ കമ്മിറ്റി ചെയര്‍മാന്‍ തിരുവഞ്ചൂര്‍ രാധാകൃഷ്ണന്‍ എംഎല്‍എ ഉദ്ഘാടനം ചെയ്തു. മണ്ഡലം പ്രസിഡന്‍റ് സാബു മാത്യു അധ്യക്ഷത വഹിച്ചു.

രാവിലെ കുമാരനല്ലൂര്‍ കിഴക്കേനടയില്‍നിന്ന് ആരംഭിച്ച പര്യടനം വെട്ടിക്കനാല്‍, വലിയാല്‍, പുല്ലരിക്കുന്ന്, നിര്‍മിതി തുടങ്ങിയ പ്രദേശങ്ങളിലൂടെ സഞ്ചരിച്ച് വെള്ളൂപറമ്പില്‍ സമാപിച്ചു. തുടര്‍ന്ന് വിജയപുരം ഭാഗത്തേക്ക് കടന്ന പര്യടനം മോസ്‌കോ, മഞ്ചാടി കവല, ചീനിക്കുഴി ജംഗ്ഷന്‍,ചേന്നാറ്റുപടി, തുരുത്തേല്‍ കവല, പൊയ്കമഠം അമ്പലം തുടങ്ങിയ സ്ഥലങ്ങള്‍ പിന്നിട്ട് കളത്തിപ്പടി ജംഗ്ഷനില്‍ സമാപിച്ചു.

തോമസ് ചാഴികാടന്‍

കോട്ടയം: കോട്ടയം പാര്‍ലമെന്‍റ് മണ്ഡലത്തിലെ എല്‍ഡിഎഫ് സ്ഥാനാര്‍ഥി തോമസ് ചാഴികാടന്‍ ഇന്നലെ കടുത്തുരുത്തി മണ്ഡലത്തിലെ വിവിധ പ്രദേശങ്ങളില്‍ പര്യടനം നടത്തി. നൂറുകണക്കിന് ഇരുചക്രവാഹനങ്ങളുടെ അകമ്പടിയോടെയായിരുന്നു പര്യടനം. വാദ്യമേളങ്ങളും പുലികളിയും കൊടിതോരണങ്ങളുമൊക്കെ പര്യടനത്തിനു മാറ്റുകൂട്ടി. കിടങ്ങൂര്‍, കടപ്ലാമറ്റം, കാണക്കാരി, മാഞ്ഞൂര്‍, കടുത്തുരുത്തി പഞ്ചായത്തുകളില്‍ വന്‍ സ്വീകരണമാണ് ലഭിച്ചത്.

രാവിലെ കിടങ്ങൂര്‍ പടിഞ്ഞാറേ കൂടല്ലൂരില്‍ കേരള കോണ്‍ഗ്രസ്-എം ചെയര്‍മാന്‍ ജോസ് കെ. മാണി എംപി പര്യടനം ഉദ്ഘാടനം ചെയ്തു. രാത്രി വൈകി പര്യടനം മാന്നാറില്‍ സമാപിച്ചു. ഇന്ന് ഏറ്റുമാനൂരിലാണ് ചാഴികാടന്‍റെ പര്യടനം.

തുഷാര്‍ വെള്ളാപ്പള്ളി

കോട്ടയം : കോട്ടയം പാര്‍ലമെന്‍റ് മണ്ഡലത്തിലെ എന്‍ഡിഎ സ്ഥാനാര്‍ഥി തുഷാര്‍ വെള്ളാപ്പള്ളി ഇന്നലെ പാലാ മണ്ഡലത്തില്‍ പര്യടനം നടത്തി. രാവിലെ ഭരണങ്ങാനം മണ്ഡലത്തില്‍ പ്രമുഖ വ്യക്തികളെ നേരില്‍ക്കണ്ട് വോട്ട് അഭ്യര്‍ഥിച്ചു.

ഉച്ചയ്ക്കു ബിജെപി സംസ്ഥാന അധ്യക്ഷന്‍ കെ. സുരേന്ദ്രന്‍ പങ്കെടുത്ത ബിജെപി നേതൃയോഗത്തിലും പങ്കെടുത്തു. വൈകുന്നേരം പാലാ മണ്ഡലത്തില്‍ സ്ഥാനാര്‍ഥി തുറന്ന ജീപ്പില്‍ പര്യടനം നടത്തി.

പര്യടനം തലനാടുനിന്ന് ആരംഭിച്ചു കൂരാലിയില്‍ സമാപിച്ചു. തുഷാര്‍ വെള്ളാപ്പള്ളി ജസ്റ്റീസ് കെ. ടി. തോമസിനെ അദ്ദേഹത്തിന്‍റെ വസതിയില്‍ സന്ദര്‍ശിക്കുകയും ചെയ്തു.