മുണ്ടാറിലെ ബൂത്തില്‍ പോളിംഗ് ഉദ്യോഗസ്ഥർ ഇക്കുറി ഹൗസ് ബോട്ടിലെത്തും : Deepika.com Nattu Visesham

KOTTAYAM

മുണ്ടാറിലെ ബൂത്തില്‍ പോളിംഗ് ഉദ്യോഗസ്ഥർ ഇക്കുറി ഹൗസ് ബോട്ടിലെത്തും

Thursday, April 18, 2024 6:48 AM IST

കടുത്തുരുത്തി: മുണ്ടാറിലെ ബൂത്തില്‍ ഇത്തവണ വോട്ടെടുപ്പിനായി വോട്ടിംഗ് മെഷീനടക്കമുള്ള തെരഞ്ഞെടുപ്പ് സാമഗ്രികളുമായി പോളിംഗ് ഉദ്യോഗസ്ഥരെത്തുക ഹൗസ് ബോട്ടില്‍. മുന്‍കാലങ്ങളില്‍ വള്ളങ്ങളിലായിരുന്നു തെരഞ്ഞെടുപ്പ് ഉദ്യോഗസ്ഥര്‍ പോളിംഗ് സാമഗ്രികളുമായി വോട്ടെടുപ്പിനായി മുണ്ടാറില്‍ വന്നു പോയിരുന്നത്.

വൈക്കം നിയോജകമണ്ഡലത്തിലെ കല്ലറ പഞ്ചായത്ത് ഒന്നാം വാര്‍ഡായ മുണ്ടാര്‍ 48-ാം നമ്പര്‍ അങ്കണവാടിയില്‍ 137-ാം നമ്പര്‍ ബൂത്താണ് പ്രവർത്തിക്കുന്നത്. പോളിംഗ് അവസാനിച്ച് ഉദ്യോഗസ്ഥ സംഘം മടങ്ങുന്നതും ഹൗസ് ബോട്ടില്‍ തന്നെയാണ്. വാഹനം എത്താത്തതുമൂലം ഹൗസ് ബോട്ടില്‍ പോളിംഗ് ഉദ്യോഗസ്ഥരെത്തുന്ന വൈക്കം മണ്ഡലത്തിലെ ഏക ബൂത്താണ് മുണ്ടാറിലേത്.

ജില്ലാ വരണാധികാരിയായ കളക്ടറുടെ പ്രത്യേക നിര്‍ദേശപ്രകാരമാണ് ഉദ്യോഗസ്ഥരുടെ യാത്ര ഹൗസ് ബോട്ടിലാക്കിയത്. 25ന് ഉച്ചയ്ക്ക് എഴുമാന്തുരുത്ത് ബോട്ട് ജെട്ടിയില്‍നിന്നു പോളിംഗ് സാമഗ്രികളുമായി എഴുമാംകായലിലൂടെ അഞ്ച് മിനിറ്റോളം ഹൗസ് ബോട്ടില്‍ സഞ്ചരിച്ചാകും ഉദ്യോഗസ്ഥര്‍ ബൂത്തിലെത്തുക.

സുരക്ഷാ പരിശോധനയുടെ ഭാഗമായി ജില്ലാ വരണാധികാരി വി. വിഗ്‌നേശ്വരി, ജില്ലാ പോലീസ് മേധാവി കെ. കാര്‍ത്തിക്, വൈക്കം തഹസീല്‍ദാര്‍ കെ.ആര്‍. മനോജ്, വൈക്കം എആര്‍ഒ സൂസമ്മ ജോര്‍ജ്, തെരഞ്ഞെടുപ്പ് ചുമതലയുള്ള മറ്റ് ഉദ്യോഗസ്ഥരും സുരക്ഷാ ഉദ്യോഗസ്ഥരും കഴിഞ്ഞദിവസം ബൂത്തിലെത്തിയിരുന്നു.