ചെങ്ങന്നൂര്: മാവേലിക്കര പാര്ലമെന്റിലെ സ്ഥാനാര്ഥികള് മൂന്നാം ഘട്ട പര്യടനവും പൂര്ത്തിയാക്കി. പര്യടന പരിപാടിയുടെ അവസാന ഘട്ടമെന്ന നിലയില് മൂന്നാംഘട്ട പ്രചാരണത്തിന് ആവേശമേറെയാണ്. മൂന്നു മുന്നണി സ്ഥാനാര്ഥികളും ഇന്നലെ ചെങ്ങന്നൂര് മണ്ഡലത്തില് പര്യടനം നടത്തിയെന്ന പ്രത്യേകതയുമുണ്ട്.
യുഡിഎഫ് സ്ഥാനാര്ഥി കൊടിക്കുന്നില് സുരേഷിന്റെ ചെങ്ങന്നൂരിലെ മൂന്നാം ഘട്ടം പര്യടനം ചെങ്ങന്നൂരിലാണ് ആരംഭിച്ചത്. വെണ്മണി കല്യാത്ര ജംഗ്ഷനില് മാത്യു കുഴല്നാടന് എംഎല്എ ഉദ്ഘാടനം ചെയ്തു. വെണ്മണി, ആല, മുളക്കുഴ പഞ്ചായത്തുകളിലെ നടക്കുന്ന പര്യടനത്തിനുശേഷം അറന്തകാട് ജംഗ്ഷനില് സമാപിച്ചു.
എല്ഡിഎഫ് സ്ഥാനാര്ഥി സി.എ. അരുണ്കുമാര് ചെങ്ങന്നൂര് മണ്ഡലത്തിലാണ് മൂന്നാം ഘട്ട പ്രചാരണം നടത്തിയത്. ചെങ്ങന്നൂര് മുളക്കുഴ വായനശാലാ ജംഗ്ഷനില്നിന്നാണ് പര്യടനം തുടങ്ങിയത്.
മാത്യു ടി. തോമസ് എംഎല്എ പര്യടന പരിപാടി ഉദ്ഘാടനം ചെയ്തു. വിവിധ സ്ഥലങ്ങളിലെ സ്വീകരണങ്ങള്ക്കുശേഷം ഉച്ചയോടെ പേരിശേരിയില് സമാപിച്ചു. ഭക്ഷണത്തിനും വിശ്രമത്തിനും ശേഷം കറുത്തേടത്തുനിന്നും ആരംഭിച്ചു.
ചെറുകോല്, വാഴ കൂട്ടംകടവ് തുടങ്ങിയ 20 ഓളം സ്വീകരണ കേന്ദ്രങ്ങളിലെ പര്യടനത്തിനുശേഷം വൈകിട്ട് പുല്ലന്താനത്ത് സമാപിച്ചു. സമാപന സമ്മേളനം ആര്ജെഡി സംസ്ഥാന കമ്മിറ്റിയംഗം ഗിരീഷ് ഇലഞ്ഞിമേല് ഉദ്ഘാടനം ചെയ്തു.
ചെങ്ങന്നൂര് മണ്ഡലത്തില് എന്ഡിഎ സ്ഥാനാര്ഥി ബൈജു കലാശാലയുടെ പര്യടന സ്വീകരണ പരിപാടി ആലാ അത്തലക്കടവ് ജംഗ്ഷനില് ബിജെപി മേഖല വൈസ് പ്രസിഡന്റ് എന്. പി. കൃഷ്ണകുമാര് ഉദ്ഘാടനം ചെയ്തു. മണക്കാല, സൂര്യ അരുണ്, രാധമ്മ സി. തുടങ്ങിയവര് പങ്കെടുത്തു. ആലാ, വെണ്മണി, മുളക്കുഴ എന്നീ പഞ്ചായത്തുകളില് പര്യടനം നടത്തി.
കൊടിക്കുന്നില് സുരേഷ് ഇന്ന് പായിപ്പാട്ടും തൃക്കൊടിത്താനത്തും
ചങ്ങനാശേരി: മാവേലിക്കര ലോക്സഭാ മണ്ഡലം യുഡിഎഫ് സ്ഥാനാര്ഥി കൊടിക്കുന്നില് സുരേഷ് ഇന്ന് ചങ്ങനാശേരി നിയോജകമണ്ഡലത്തിലെ പായിപ്പാട്, തൃക്കൊടിത്താനം മണ്ഡലങ്ങളില് പര്യടനം നടത്തും. രാവിലെ 7.30ന് ചങ്ങനാശേരി മാര്ക്കറ്റില് ചാണ്ടി ഉമ്മന് എംഎല്എക്കൊപ്പം റോഡ് ഷോ നടത്തും. ഐഎന് ടിയുസി യൂണിയനുകളുടെ നേതൃത്വത്തില് സ്വീകരണം നല്കും.
തുടര്ന്ന് പായിപ്പാട് കവലയില്നിന്നും പര്യടനത്തിന് തുടക്കം കുറിക്കും. ഫിഷ്മാര്ക്കറ്റ്, മുക്കാഞ്ഞിരം, പികെഇ ഹോട്ടല്, ചാമക്കാല, മുണ്ടുകോട്ട, മച്ചിപ്പള്ളി, കിങ്ങണംചിറ, കൊച്ചുപള്ളി, കിളിമല, കൊല്ലാപുരം, വേഷ്ണാല്, വഴി നാലുകോടിയില് പായിപ്പാട് മണ്ഡലത്തിലെ പര്യടനം സമാപിക്കും.
11ന് തൃക്കൊടിത്താനം മണ്ഡലത്തിലെ പര്യടനം മുക്കാട്ടുപ്പടിയില് ആരംഭിക്കും. ആരമല, രാജീവ് ഗാന്ധി കോളനി, കുന്നുംപുറം, മണിമുറി കുരിശടി, അമര പിആര്ഡിഎസ്, ആശാരിമുക്ക്, ചെമ്പുംപുറം, കോട്ടമുറി, നാല്ക്കവല, പൊട്ടശേരി, കടമാഞ്ചിറ, കൊടിനാട്ടുംകുന്ന്, ചേരിക്കല്, ഫ്രണ്ട്സ് ലൈബ്രറി, കൈലാത്തുപടി, വഴി പീടികപ്പടിയില് സമാപിക്കും.