പരിപാടിയിൽ പങ്കെടുക്കാനെത്തിയവർ
ഡിട്രോയിറ്റ്: നോർത്ത് അമേരിക്കൻ ഭദ്രാസനത്തിന്റെ 36-ാമത് കുടുംബസംഗമത്തോട് അനുബന്ധിച്ച് പ്രസിദ്ധീകരിക്കുന്ന സുവനീറിന്റെ പ്രവർത്തനങ്ങൾക്ക് ഔദ്യോഗിമായി തുടക്കം കുറിച്ചു.
ഡിട്രോയിറ്റ് മാർത്തോമ്മ പള്ളിയിൽ നടന്ന സമ്മേളനത്തിൽ ഭദ്രാസനാധ്യക്ഷൻ ഡോ. എബ്രഹാം മാർ പൗലോസ് എപ്പിസ്കോപ്പ സുവനീർ പ്രവർത്തനങ്ങളുടെ ഉദ്ഘാടനം നിർവഹിച്ചു.
അമേരിക്കൻ ഭദ്രാസനത്തിലെ ഇടവകകളുടെയും കുടുംബങ്ങളുടെയും വിശ്വാസജീവിതവും അനുഭവങ്ങളും ഓർമകളും ഒരുമിച്ചുചേർക്കുന്ന ഒരു ചരിത്രരേഖയായി സുവനീർ മാറുമെന്ന് ചടങ്ങ് ഉദ്ഘാടനം ചെയ്ത് കൊണ്ട് മാർ പൗലോസ് എപ്പിസ്കോപ്പ പ്രത്യാശ പ്രകടിപ്പിച്ചു.
കുടുംബസംഗമത്തിന്റെ സുവനീർ ഡിജിറ്റൽ ലിവിംഗ് സുവനീർ എന്ന തലത്തിൽകൂടി പ്രസിദ്ധീകരിക്കാൻ ആഗ്രഹിക്കുന്നതായി കൺവീനർ ജോൺ വർഗീസ് (ജോജി) തന്റെ സ്വാഗത പ്രസംഗത്തിൽ പറഞ്ഞു.
നോർത്ത് അമേരിക്കൻ ഭദ്രാസന കൗൺസിൽ അംഗം ഷോൺ തോമസിൽ നിന്നും ആദ്യ പരസ്യം സ്വീകരിച്ചു കൊണ്ട് തിരുമേനി സുവനീർ പ്രസിദ്ധീകരണത്തിനായുള്ള ഫണ്ട് സമാഹരണ പ്രവർത്തനങ്ങൾക്ക് തുടക്കം കുറിച്ചു.

തുടർന്ന് വർഗീസ് എബ്രഹാം (രാജു), മുൻ ഭദ്രാസന കൗൺസിൽ അംഗം ജയ വർഗീസ് എന്നിവരും അതിൽ പങ്കാളികളായി. കുടുംബസംഗമത്തിന്റെ ലോഗോയും ഡോ. എബ്രഹാം മാർ പൗലോസ് എപ്പിസ്കോപ്പ പ്രകാശനം ചെയ്തു.
റീജിയണൽ ആക്ടിവിറ്റി കമ്മിറ്റി ട്രഷറർ വിനോദ് തോമസ് കുടുംബസംഗമത്തിന്റെ ലോഗോയും പഠന വിഷയവും സദസിന് പരിചയപ്പെടുത്തി. ഫാമിലി കോൺഫറൻസ് കോ-കൺവീനർ അലൻ ജി. ജോൺ കോൺഫറൻസ് വിശദാംശങ്ങൾ നൽകി.
റവ. പി. ചാക്കോയുടെ പ്രാരഭ പ്രാർഥനയോടെ ആരംഭിച്ച സമ്മേളനത്തിൽ റവ. സാൻജോ പി. വർഗീസ് സമാപന പ്രാർഥനയും സുവനീർ കോകൺവീനർ ബോബൻ ജോർജ് നന്ദിയും രേഖപ്പെടുത്തി.
ഡിട്രോയിറ്റ് മാർത്തോമ്മ ഇടവക വികാരി റവ. ജോബിൻ ജോസ് ആശംസകൾ അറിയിച്ചു. സിമി വർഗീസ് എംസിയായി പരിപാടികൾ നിയന്ത്രിച്ചു.
സുവനീർ വിജയകരമാക്കുന്നതിന് ഭദ്രാസനത്തിലെ എല്ലാ ഇടവകകളുടെയും കുടുംബങ്ങളുടെയും സ്ഥാപനങ്ങളുടെയും സഹകരണവും പിന്തുണയും സുവനീർ കമ്മിറ്റി അഭ്യർഥിച്ചു.
Tags : FamilyConference NorthAmericanDiocese SouvenirLaunch Detroit MalayaliCommunity