സ്റ്റാർലിംഗ് പക്ഷികൾ
റോം: റോമിന്റെ സന്ധ്യാകാശത്ത് അവ വരയ്ക്കുന്നത് ചലിക്കുന്ന ചിത്രങ്ങളാണ്. ഒരേ താളത്തിൽ വളഞ്ഞും തിരിഞ്ഞും തിരമാലകളെപ്പോലെ ഉയർന്നുതാഴ്ന്നും പറക്കുന്ന ആയിരക്കണക്കിന് സ്റ്റാർലിംഗ് പക്ഷികൾ കാഴ്ചക്കാരിൽ കൗതുകമുണർത്തുന്നു.
എന്നാൽ, ആകാശത്തെ ഈ മനോഹരദൃശ്യം അവസാനിച്ച് പക്ഷികൾ മരച്ചില്ലകളിൽ ചേക്കേറുന്നതോടെ താഴെ നഗരവാസികളുടെ മറ്റൊരു അനുഭവം തുടങ്ങുന്നു. കാഷ്ഠം നിറഞ്ഞ നടപ്പാതകളും മലിനമായ കാറുകളും ദുർഗന്ധവും ചേർന്ന നിത്യജീവിതത്തിന്റെ ബുദ്ധിമുട്ടുകൾ.
മൈനയുടെ കുടുംബത്തിൽപ്പെട്ട സ്റ്റാർലിംഗുകളുടെ വലിയ കൂട്ടങ്ങൾ ഏതാനും ആഴ്ചകളായി റോമിലെ വിവിധ പ്രദേശങ്ങളിൽ സാന്നിധ്യമറിയിക്കുന്നതായി താമസക്കാർ പറയുന്നു. പ്രത്യേകിച്ച് നഗരത്തിന്റെ വടക്കുകിഴക്കൻ മേഖലകളിലാണ് ഇവയുടെ കൂട്ടമായുള്ള ചേക്കേറൽ ജനജീവിതത്തെ കൂടുതൽ ബാധിക്കുന്നതെന്നാണ് പരാതികൾ.
സൂര്യൻ അസ്തമിക്കുമ്പോൾ, ഏതോ അദൃശ്യമായ ശക്തിയുടെ നിർദേശം അനുസരിക്കുന്നതുപോലെ പക്ഷിക്കൂട്ടങ്ങൾ നഗരത്തിലേക്കെത്തുന്നു. പകൽ ഭക്ഷണം തേടി ചുറ്റുമുള്ള ഗ്രാമപ്രദേശങ്ങളിൽ സഞ്ചരിക്കുന്ന ഇവ, രാത്രിയാകുന്നതോടെ നഗരത്തിലെ മരങ്ങളിലും കെട്ടിടങ്ങളിലെ ആന്റിനകളിലും ഒത്തുകൂടുന്നു. താരതമ്യേന ചൂടും അഭയവും ലഭിക്കുന്ന നഗരപരിസരം ഇവയ്ക്ക് രാത്രിത്താവളമാകുന്നു.
എന്നാൽ പക്ഷികൾക്ക് അഭയമാകുന്ന ഇടങ്ങൾ മനുഷ്യർക്ക് അസൗകര്യങ്ങളുടെ കേന്ദ്രങ്ങളായി മാറുകയാണ്. മരങ്ങൾക്കു താഴെ നിർത്തിയിട്ട വാഹനങ്ങൾ രാവിലെ കാഷ്ഠത്തിൽ പൊതിഞ്ഞുകിടക്കുന്നതും നടപ്പാതകൾ മലിനമാകുന്നതും പതിവാണെന്ന് പ്രദേശവാസികൾ പറയുന്നു. മഴ പെയ്യുമ്പോൾ അഴുക്ക് പരക്കുന്നതും വഴികൾ വഴുക്കുന്നതും കാൽനടയാത്ര കൂടുതൽ ദുഷ്കരമാക്കുന്നു.
രാവിലെ ജോലിക്കിറങ്ങുന്നതിനുമുമ്പ് കാർ കഴുകേണ്ടിവരുക, പുറത്തുപോകുമ്പോൾ വസ്ത്രങ്ങളിൽ കാഷ്ഠം വീഴാതിരിക്കാൻ ശ്രദ്ധിക്കുക, പതിവായി വാഹനം നിർത്തുന്ന സ്ഥലം ഉപേക്ഷിച്ച് മറ്റൊരിടം തേടുക തുടങ്ങി ചെറിയതെന്നു തോന്നുന്ന ഇത്തരം ബുദ്ധിമുട്ടുകൾ ആവർത്തിക്കുമ്പോൾ വലിയൊരു ദൈനംദിന പ്രശ്നമായി ഇത് മാറുന്നു.
പ്രകൃതിയുടെ മനോഹരമായൊരു സാന്നിധ്യത്തെ ആസ്വദിക്കണമെന്ന ആഗ്രഹത്തിനും സ്വന്തം പരിസരം വൃത്തിയായി നിലനിർത്തണമെന്ന ആവശ്യത്തിനുമിടയിലാണ് പല താമസക്കാരും.

പക്ഷികളെ ഉപദ്രവിക്കാതെ പരിഹാരം
ഈ സാഹചര്യത്തിൽ നഗരവാസികൾ ആവശ്യപ്പെടുന്നത് ഫലപ്രദമായ ഇടപെടലാണ്. പക്ഷികളെ ഉപദ്രവിക്കാതെ, ജനവാസകേന്ദ്രങ്ങളിലെ തിരക്കേറിയ ഇടങ്ങളിൽനിന്ന് അവയുടെ രാത്രിത്താവളം മാറ്റാൻ സഹായിക്കുന്ന നടപടികൾക്കാണ് പ്രാധാന്യം നൽകേണ്ടത്.
നഗര വന്യജീവികളെ കൈകാര്യം ചെയ്യുന്ന പരിശീലനം നേടിയ സംഘങ്ങളുടെ സഹായത്തോടെ നടപ്പാക്കാവുന്ന ഒരു മാർഗമാണ് പക്ഷികളുടെ അപകടസൂചനാശബ്ദങ്ങൾ പുനഃസൃഷ്ടിക്കുന്നത്. പ്രത്യേക ശബ്ദോപകരണങ്ങളിലൂടെ സ്റ്റാർലിംഗുകളുടെ മുന്നറിയിപ്പുവിളികൾ അവ ചേക്കേറുന്ന മരങ്ങൾക്കു സമീപം കേൾപ്പിക്കുമ്പോൾ, അവിടം സുരക്ഷിതമല്ലെന്ന തോന്നൽ പക്ഷികൾക്കുണ്ടാകുകയും മറ്റൊരു താവളം തേടാൻ പ്രേരണ ലഭിക്കുകയും ചെയ്യുന്നു. ചില സാഹചര്യങ്ങളിൽ നിയന്ത്രിതമായ പ്രകാശപ്രയോഗവും ഇത്തരം നടപടികൾക്കൊപ്പം ഉപയോഗിക്കാറുണ്ട്.

എന്നാൽ ഒരു തെരുവിൽനിന്ന് പക്ഷികളെ മാറ്റിയതുകൊണ്ടുമാത്രം പ്രശ്നം അവസാനിക്കണമെന്നില്ല. അവ സമീപത്തെ മറ്റൊരു ജനവാസമേഖലയിൽ ചേക്കേറിയാൽ ദുരിതം മറ്റൊരിടത്തേക്ക് മാറുക മാത്രമേ ചെയ്യൂ. അതിനാൽ പക്ഷികളുടെ സഞ്ചാരവും താവളങ്ങളും നിരീക്ഷിച്ചുകൊണ്ടുള്ള ഏകോപിതമായ ഇടപെടലിനൊപ്പം, മലിനമായ നടപ്പാതകളും പൊതുസ്ഥലങ്ങളും സമയബന്ധിതമായി ശുചീകരിക്കേണ്ടതുമുണ്ട്.
മുൻവർഷങ്ങളേക്കാൾ ഇത്തവണ പക്ഷികളുടെ സാന്നിധ്യം കൂടുതലാണെന്ന തോന്നൽ ചില താമസക്കാർ പങ്കുവയ്ക്കുന്നു. കാലാവസ്ഥയിലെ മാറ്റങ്ങളാകാം കാരണമെന്ന അനുമാനവും ഉയരുന്നുണ്ട്. എന്നാൽ കൃത്യമായ കണക്കുകളും പഠനങ്ങളും കൂടാതെ വർധനവോ അതിന്റെ കാരണമോ ഉറപ്പിച്ചുപറയാനാവില്ല.
റോമിന്റെ ആകാശത്ത് സ്റ്റാർലിംഗുകൾ തീർക്കുന്ന കൂട്ടപ്പറക്കൽ പ്രകൃതിയുടെ വിസ്മയകരമായൊരു കാഴ്ചയാണ്. ആ സൗന്ദര്യം നിലനിൽക്കുമ്പോൾത്തന്നെ, താഴെയുള്ള തെരുവുകളിൽ മനുഷ്യർക്ക് വൃത്തിയായും സുരക്ഷിതമായും ജീവിക്കാനും കഴിയണം. പക്ഷികളുടെ ചിറകുകൾക്കും നഗരവാസികളുടെ ജീവിതത്തിനും ഇടം നൽകുന്ന കരുതലുള്ള നഗരപരിപാലനമാണ് റോമിന് ഇന്ന് ആവശ്യം.
Tags : Rome Starling NewsUpdate Headlines Deepika DeepikaNewspaper