തിരുവനന്തപുരം നഗരത്തിരക്കുകളില്നിന്ന് അല്പം മാറി കവടിയാര് റോഡില് വെള്ളയമ്പലം ജംഗ്ഷനു സമീപം ഹരിതാഭമായി നിലകൊള്ളുന്ന കേരള ലോക്ഭവന്. കേരള ഗവര്ണറുടെ ഔദ്യോഗിക വസതിയായ ലോക്ഭവന് കേവലം ഭരണ ആവശ്യങ്ങള്ക്കുള്ള ഇടം മാത്രമല്ല, മറിച്ച് ചരിത്രവും പൈതൃകവും പ്രകൃതിഭംഗിയും ഒത്തുചേരുന്ന മനോഹരമായൊരു മന്ദിരം കൂടിയാണ്. 12 ഹെക്ടർ ഹരിതഭൂമി പക്ഷികളുടെ പ്രിയപ്പെട്ട ആവാസകേന്ദ്രമാണ്. ദേശീയ, അന്തര്ദേശീയതലങ്ങളിലെ വിശിഷ്്ട വ്യക്തികള്ക്ക് സ്വന്തം വീടിന്റെ ഊഷ്മളത പകരുന്ന ഇടം കൂടിയാണിത്.
തിരുവിതാംകൂര് മഹാരാജാവ് ഭരണനിര്വഹണം നടത്തിയിരുന്ന കവടിയാര് കൊട്ടാരവും അദ്ദേഹത്തിന്റെ പിന്മുറക്കാര് താമസിക്കുന്ന പ്രദേശവും ലോക്ഭവനു തൊട്ടടുത്താണ്. തിരു- കൊച്ചി സംസ്ഥാനത്തിന്റെ അതിഥിമന്ദിരമായി നിര്മിക്കപ്പെട്ടതാണ് ലോക്ഭവന് വളപ്പിലെ ഏറ്റവും പഴക്കമുള്ള കെട്ടിടം. കാലക്രമേണ അതിഥികളുടെ താമസത്തിനും ലോക്ഭവന്റെ വിവിധ ഓഫിസുകളുടെ പ്രവര്ത്തനങ്ങള്ക്കും ഈ കെട്ടിടം അപര്യാപ്തമായി. ഇതോടെ ആദ്യ കെട്ടിടത്തോടുചേര്ന്ന് പുതിയ ഭാഗങ്ങള് നിര്മിക്കുകയും വിപുലീകരണ പ്രവര്ത്തനങ്ങള് നടത്തുകയും ചെയ്തു.
കേരളീയ വാസ്തുശൈലിയുടെ സവിശേഷതകള് ഉള്ക്കൊള്ളുന്ന പ്രധാന കെട്ടിടത്തിന് വിക്ടോറിയന് വാസ്തുശൈലിയുടെ നേരിയ സ്വാധീനവുമുണ്ട്. ഉയര്ന്ന മേല്ക്കൂരകള്, വിശാലമായ മുറികള്, വലിയ ജനാലകള്, വാതിലുകള് എന്നിവ കെട്ടിടത്തിന് സവിശേഷമായ പ്രൗഢി പകരുന്നു. വിശാലമായ പുല്മേടുകളും മൃദുലമായ പച്ചപ്പരവതാനി വിരിച്ച പുല്ത്തകിടികളും ചേര്ന്ന് മനോഹര കാഴ്ചയാണ് സമ്മാനിക്കുന്നത്. വിവിധയിനം ആന്തൂറിയങ്ങളും ഓര്ക്കിഡുകളും വളരുന്ന ഹരിതഗൃഹങ്ങള് സൗന്ദര്യത്തിന് മാറ്റുകൂട്ടുന്നു. ഗവര്ണറുടെ ഓഫിസിനു അഭിമുഖമായുള്ള പ്രധാന പുല്ത്തകിടിയുടെ മധ്യത്തിലെ മനോഹരമായ ജലധാരയും ആകര്ഷണങ്ങളില് ഒന്നാണ്.
ഡിജിറ്റല് ഉദ്യാനം
രാജ്യത്തെ ലോക്ഭവനുകളില് ഡിജിറ്റല് ഉദ്യാനം സ്ഥാപിച്ച ആദ്യ ഗവർണർ മന്ദിരം എന്ന സവിശേഷതയും കേരള ലോക്ഭവനുണ്ട്. മരങ്ങളില് പതിപ്പിച്ചിരിക്കുന്ന ക്യു ആര് കോഡുകള് സ്കാന് ചെയ്താല് അവയെക്കുറിച്ചുള്ള വിവരങ്ങള് ലഭിക്കും. കേരള സര്വകലാശാലയിലെ സസ്യശാസ്ത്ര വിഭാഗത്തിന്റെ സഹകരണത്തോടെയാണ് പദ്ധതി നടപ്പാക്കിയത്. പ്രകൃതിയെ അടുത്തറിയാനും സസ്യലോകത്തെക്കുറിച്ച് അറിവ് നേടാനും സാങ്കേതികവിദ്യയെ പ്രയോജനപ്പെടുത്തുന്ന ഈ സംരംഭം ലോക്ഭവന്റെ ശ്രദ്ധേയ നേട്ടങ്ങളിലൊന്നാണ്.
3.24 ഹെക്ടർ വിസ്തൃതിയുള്ള ഉദ്യാനം സന്ദര്ശകരെ ആകര്ഷിക്കുന്ന മറ്റൊരു പ്രധാന കേന്ദ്രമാണ്. കൃത്രിമ വെള്ളച്ചാട്ടവും മൂന്ന് ഹരിതഗൃഹങ്ങളും ഉദ്യാനത്തിന്റെ മനോഹാരിത വര്ധിപ്പിക്കുന്നു. ഡെന്ഡ്രോബിയം, അരാണ്ട, അരാക്നിസ്, മൊക്കാറ, വാന്ഡ തുടങ്ങി വിവിധയിനം ഓര്ക്കിഡുകള് ഉദ്യാനത്തിന് വര്ണവൈവിധ്യമേകുന്നു. റോസാച്ചെടികളുടെയും ബിഗോണിയകളുടെയും മികച്ച ശേഖരവും ഇവിടെയുണ്ട്. മുളകളുടെ വൈവിധ്യം പരിചയപ്പെടുത്തുന്ന ബാംബു ഗാര്ഡനും ശ്രദ്ധയാകര്ഷിക്കുന്നു.
തമിഴ്നാട്ടിലെ ശുചീന്ദ്രത്തിനടുത്ത് മൈലാടിയില്നിന്ന് എത്തിച്ച മനോഹരമായ ശില്പങ്ങള് ഉദ്യാനത്തിന്റെ വിവിധ ഭാഗങ്ങളില് അനുയോജ്യമായ രീതിയില് സ്ഥാപിച്ചിട്ടുണ്ട്. കുട്ടികളുടെ പാര്ക്ക്, ടെന്നീസ് കോര്ട്ട്, ഷട്ടില് കോര്ട്ട് എന്നിവയും ലോക്ഭവന് വളപ്പിലുണ്ട്. സ്വാതന്ത്ര്യദിനം, റിപ്പബ്ലിക് ദിനം തുടങ്ങിയ വിശേഷാവസരങ്ങളില് ഗവര്ണര് ആതിഥേയത്വം വഹിക്കുന്ന ‘അറ്റ് ഹോം’ വിരുന്നുകള്ക്കും ലോക്ഭവന് ഉദ്യാനം വേദിയാകുന്നു.
അറിവിന്റെ ലോകം തുറക്കുന്ന ഗ്രന്ഥശാല
ആറായിരം പുസ്തകങ്ങളുള്ള ഗ്രന്ഥശാലയും ലോക്ഭവന്റെ സവിശേഷതയാണ്. വിവിധ വിജ്ഞാനമേഖലകളെയും താത്പര്യമുണര്ത്തുന്ന വിഷയങ്ങളെയും ആസ്പദമാക്കിയുള്ള പുസ്തകങ്ങള് ഇവിടെ സൂക്ഷിച്ചിരിക്കുന്നു. ലോക്ഭവന് ഉദ്യോഗസ്ഥര്ക്കും ജീവനക്കാര്ക്കുമായി നിര്മിച്ച നിരവധി ക്വാര്ട്ടേഴ്സുകളും വളപ്പിലുണ്ട്. അസിസ്റ്റന്റ് ഡെപ്യൂട്ടി സെക്രട്ടറിമാരുടെ ക്വാര്ട്ടേഴ്സുകള് കവടിയാര് റോഡിലാണ് സ്ഥിതിചെയ്യുന്നത്. ലോക്ഭവന് ഡിസ്പെന്സറി, ഇലക്ട്രിക്കല് ഓഫിസ്, ലോക്ഭവന് എംപ്ലോയീസ് കോ-ഓപ്പറേറ്റീവ് സൊസൈറ്റി എന്നിവയും ഇവിടെയുണ്ട്.
ലോക്ഭവന്റെ പേരില് മാത്രമായി പ്രവര്ത്തിക്കുന്ന തപാല് ഓഫിസാണ് ‘ദ കേരള ഗവര്ണേഴ്സ് ക്യാമ്പ് പോസ്റ്റ് ഓഫിസ്’. സ്പീഡ് പോസ്റ്റ് ഉള്പ്പടെ തപാല് സേവനങ്ങള് ലഭ്യമാക്കുന്ന ഈ ഓഫിസ് ലോക്ഭവന്റെ ദൈനംദിന പ്രവര്ത്തനങ്ങളില് പ്രധാന പങ്കുവഹിക്കുന്നു. ഭരണപരമായ പ്രാധാന്യത്തിനപ്പുറം പ്രകൃതിയെയും പൈതൃകത്തെയും അറിവിനെയും ചേര്ത്തുപിടിക്കുന്ന ഈ ഇടം, തലസ്ഥാനനഗരിയുടെ സാംസ്കാരികവും ചരിത്രപരവുമായ വ്യക്തിത്വത്തിന്റെ മനോഹര പ്രതീകം കൂടിയാണ്.
ഗവര്ണറുടെ ഭരണഘടനാപരമായ ചുമതലകള് കാര്യക്ഷമമായി നിര്വഹിക്കുന്നതിന് സഹായകമാകുന്നത് ലോക്ഭവനിലെ വിവിധ വിഭാഗങ്ങള് ഏകോപിച്ചു പ്രവര്ത്തിക്കുന്ന ഭരണസംവിധാനമാണ്. ഗവര്ണറുടെ സെക്രട്ടേറിയറ്റ് മുതല് ഗാര്ഹിക വിഭാഗം വരെയും പൊതുജനസമ്പര്ക്ക വിഭാഗം മുതല് സുരക്ഷാ വിഭാഗം വരെയും വിപുലമായ സംവിധാനത്തിലെ ഓരോ വിഭാഗത്തിനും വ്യക്തമായ ചുമതലകളുണ്ട്.
ചുമതലകളുടെ ഏകോപന കേന്ദ്രം
ഗവര്ണറുടെ സെക്രട്ടേറിയറ്റിന്റെയും ഗവര്ണറുടെ ഗാര്ഹിക വിഭാഗത്തിന്റെയും വകുപ്പ് മേധാവി എന്ന നിലയില് ഗവര്ണറുടെ സെക്രട്ടറി ഈ രണ്ട് ഓഫിസുകളുടെയും പ്രവര്ത്തനങ്ങള്ക്ക് നേതൃത്വം നല്കുന്നു. ഗവര്ണറുടെ ഭരണഘടനാപരമായ ചുമതലകള് ഉള്പ്പടെ ഔദ്യോഗിക പ്രവര്ത്തനങ്ങള്ക്ക് ആവശ്യമായ സെക്രട്ടേറിയല് സഹായം ഉറപ്പാക്കുകയാണ് ഈ വിഭാഗത്തിന്റെ പ്രധാന ഉത്തരവാദിത്വം. നിയമസഭ, ഹൈക്കോടതി, പബ്ലിക് സര്വീസ് കമ്മിഷന് എന്നിവയുമായി ബന്ധപ്പെട്ട ഭരണഘടനാപരമായ കാര്യങ്ങള്, സര്ക്കാര് വകുപ്പുകളില്നിന്ന് ഗവര്ണറുടെ പരിഗണനയ്ക്കായി സമര്പ്പിക്കുന്ന വിഷയങ്ങള് തുടങ്ങിയവയുടെ നടപടിക്രമങ്ങളും ഏകോപനവും സെക്രട്ടേറിയറ്റ് നിര്വഹിക്കുന്നു.
ഹൈക്കോടതി ചീഫ് ജസ്റ്റീസ്, ലോകായുക്ത, ഉപ ലോകായുക്ത, തദ്ദേശ സ്വയംഭരണ സ്ഥാപനങ്ങളുടെ ഓംബുഡ്സ്മാന് എന്നിവരുടെ സത്യപ്രതിജ്ഞാ ചടങ്ങുകളുമായി ബന്ധപ്പെട്ട പ്രവര്ത്തനങ്ങളും സെക്രട്ടേറിയറ്റിന്റെ ചുമതലയില്പ്പെടുന്നു. സര്വകലാശാലകളുടെ ചാന്സലര് എന്ന നിലയില് ഗവര്ണര് നിര്വഹിക്കേണ്ട ചുമതലകള്ക്കും ഈ വിഭാഗം സഹായം നല്കുന്നു. മുന് സൈനികരുടെ പുനരധിവാസത്തിനായുള്ള പ്രത്യേക ഫണ്ട്, സര്ക്കാര് രൂപീകരിക്കുന്ന വിവിധ സമിതികള് എന്നിവയുടെ ചെയര്മാന് അല്ലെങ്കില് രക്ഷാധികാരി എന്ന നിലയിലുള്ള ഗവര്ണറുടെ പ്രവര്ത്തനങ്ങള്ക്കും ആവശ്യമായ പിന്തുണ സെക്രട്ടേറിയറ്റ് ഉറപ്പാക്കുന്നു.
ഗവര്ണറുടെ ഗാര്ഹിക വിഭാഗം
ലോക്ഭവനിലെ ദൈനംദിന ഗാര്ഹിക പ്രവര്ത്തനങ്ങള് കാര്യക്ഷമമായി നടത്തുകയെന്നതാണ് ഗാര്ഹിക വിഭാഗത്തിന്റെ പ്രധാന ദൗത്യം. ഗവര്ണറുടെയും മന്ത്രിസഭയുടെയും ഔദ്യോഗിക ചടങ്ങുകള് മുതല് വിശിഷ്ടാതിഥികളുടെ സ്വീകരണം വരെ വിവിധ പ്രവര്ത്തനങ്ങള് ഈ വിഭാഗം ഏകോപിപ്പിക്കുന്നു. മന്ത്രിസഭയുടെ സത്യപ്രതിജ്ഞാ ചടങ്ങിന്റെ ഏകോപനവും ഗാര്ഹിക വിഭാഗത്തിന്റെ ചുമതലയാണ്.
ഗവര്ണര്, ലോക്ഭവനിലെ ഔദ്യോഗിക അതിഥികള് എന്നിവര്ക്കുള്ള ഭക്ഷണക്രമീകരണങ്ങള്, ഔദ്യോഗിക ചടങ്ങുകള്, യോഗങ്ങള്, സ്വീകരണങ്ങള്, അത്താഴവിരുന്നുകള് എന്നിവയുടെ നടത്തിപ്പ് ഈ വിഭാഗം നിര്വഹിക്കുന്നു. വിശിഷ്ടാതിഥികളുടെ സന്ദര്ശനവുമായി ബന്ധപ്പെട്ട ക്രമീകരണങ്ങള്, പ്രൊട്ടോകോൾ, സാംസ്കാരിക പരിപാടികളുടെ നടത്തിപ്പ്, ഗവര്ണറുടെ യാത്രാക്രമീകരണങ്ങള് എന്നിവയും ഉത്തരവാദിത്വങ്ങളില് ഉള്പ്പെടുന്നു.
ലോക്ഭവനിലെ കെട്ടിടങ്ങള്, ഫര്ണിച്ചറുകള്, വിവിധ സംവിധാനങ്ങള് എന്നിവയുടെ പരിപാലനം, വാഹനങ്ങളുടെ നിയന്ത്രണവും അറ്റകുറ്റപ്പണിയും, ഗാര്ഹിക വിഭാഗത്തിന്റെ ബജറ്റ് എസ്റ്റിമേറ്റുകളുടെ പരിശോധന, ഗവര്ണറുടെ അലവന്സുകളും പ്രത്യേകാവകാശങ്ങളും സംബന്ധിച്ച നിയമങ്ങള്ക്കു കീഴില് ലഭിക്കുന്ന ഗ്രാന്റുകളുടെ വിനിയോഗ നിയന്ത്രണം എന്നിവയും കംപ്ട്രോളറുടെ നേരിട്ടുള്ള ചുമതലയിലാണ്.
സാമ്പത്തിക അച്ചടക്കം
ഗവര്ണറുടെ സെക്രട്ടേറിയറ്റിനും ഗാര്ഹിക വിഭാഗത്തിനും പൊതുവായി പ്രവര്ത്തിക്കുന്ന വിഭാഗമാണ് അക്കൗണ്ട്സ് വിഭാഗം. ചെലവുകളുടെ നിയന്ത്രണം, ബജറ്റ് തയാറാക്കല്, ശമ്പളവും അലവന്സുകളും വിതരണം ചെയ്യുന്നതിനുള്ള നടപടികള് എന്നിവയാണ് പ്രധാന ചുമതലകള്. ലോക്ഭവനിലെ വിവിധ വിഭാഗങ്ങളുടെ സാമ്പത്തിക ആവശ്യങ്ങള് ക്രമീകരിക്കുകയും പൊതുധനത്തിന്റെ വിനിയോഗത്തില് കൃത്യതയും സുതാര്യതയും ഉറപ്പാക്കുകയും ചെയ്യുന്നതില് അക്കൗണ്ട്സ് വിഭാഗത്തിന് നിര്ണായക പങ്കുണ്ട്.
യാത്രകളും ഔദ്യോഗിക പരിപാടികളും
ഗവര്ണറുടെ യാത്രകളുമായി ബന്ധപ്പെട്ട എല്ലാ ക്രമീകരണങ്ങളും ഏകോപിപ്പിക്കുന്നത് ടൂര് വിഭാഗമാണ്. വിവിധ ചടങ്ങുകളിലേക്കുള്ള ക്ഷണങ്ങള് സ്വീകരിക്കുന്നതും നിരസിക്കുന്നതും സംബന്ധിച്ച കത്തിടപാടുകള്, ഗവര്ണറുടെ ദൈനംദിന പരിപാടികള് നിശ്ചയിക്കല്, ഔദ്യോഗിക പരിപാടികളുടെ ഡയറി സൂക്ഷിക്കല് എന്നിവയും ഈ വിഭാഗത്തിന്റെ ചുമതലകളാണ്. ഗവര്ണറുടെ യാത്രകളുമായി ബന്ധപ്പെട പ്രോട്ടോകോൾ നടപടികളും ടൂര് വിഭാഗം കൈകാര്യം ചെയ്യുന്നു.
യാത്രയ്ക്കായി ടിക്കറ്റുകള് ബുക്ക് ചെയ്യുക, യാത്രയ്ക്കു പുറപ്പെടുമ്പോഴും തിരിച്ചെത്തുമ്പോഴും ലഗേജുകള് കൈകാര്യം ചെയ്യുന്നതിനുള്ള ക്രമീകരണങ്ങള് ഏര്പ്പെടുത്തുക തുടങ്ങിയവയും ഇതിന്റെ പരിധിയില്പ്പെടുന്നു. ഭരണഘടനാപരമായ ചുമതലകളുടെ നിര്വഹണം മുതല് ഔദ്യോഗിക ചടങ്ങുകളുടെ നടത്തിപ്പ് വരെയും സാമ്പത്തികനിയന്ത്രണം മുതല് സുരക്ഷയും ആരോഗ്യപരിചരണവും വരെയും വിപുലമായ പ്രവര്ത്തന മേഖലയാണ് കേരള ലോക്ഭവനുള്ളത്.
Tags : Sunday Deepika Kerala Lokbhavan History