‘മാ, ഐ ലവ് യു’. അമേരിക്കയിലെ കലിഫോര്ണിയയിലെ സാക്രമെന്റോയില്നിന്ന് സാന് ഡിയേഗോയിലേക്കു വരികയായിരുന്ന പസഫിക് സൗത്ത് വെസ്റ്റ് എയര്ലൈന്സിന്റെ ബോയിംഗ് 727 വിമാനം, വിമാനത്താവളത്തിനു സമീപം ഒരു സെസ്ന 172 ചെറുവിമാനവുമായി കൂട്ടിയിടിച്ചു. സൗത്ത് വെസ്റ്റ് വിമാനത്തിലുണ്ടായിരുന്ന 135 പേരും സെസ്നയിലെ രണ്ടു പേരും താഴെ നിന്നിരുന്ന ഏഴു പേരും മരിച്ച 1978 സെപ്റ്റംബര് 25ലെ ദുരന്തത്തില്, ബോയിംഗ് വിമാന പൈലറ്റുമാരില് ഒരാളുടെ അവസാന വാക്കുകളായിരുന്നു ഇത്.
ചെറുവിമാനവുമായി കൂട്ടിയിടിച്ച് നിയന്ത്രണം നഷ്ടപ്പെട്ട വിമാനം താഴേക്കു പതിച്ചുകൊണ്ടിരുന്ന സെക്കന്ഡുകളില് കോക്പിറ്റ് വോയ്സ് റെക്കോര്ഡറില് അവസാനമായി രേഖപ്പെടുത്തപ്പെട്ട രണ്ടു വാക്യങ്ങള് കൂടിയുണ്ടായിരുന്നു. ഒരു പൈലറ്റ്: ഇതാണ് അത്! ( This is it, baby!) മറ്റേ പൈലറ്റ് (യാത്രക്കാരോടുള്ള അറിയിപ്പ്): എല്ലാവരും മുറുകെ പിടിച്ചിരിക്കുക (Brace yourself).
അപകടത്തിനു നിമിഷങ്ങള് മുമ്പുവരെ പൈലറ്റുമാര് പറഞ്ഞതെല്ലാം രേഖപ്പെടുത്തുന്ന കോക്പിറ്റ് വോയ്സ് റെക്കോര്ഡറുകളും പൈലറ്റുമാരും വ്യോമഗതാഗത നിയന്ത്രകരും തമ്മിലുള്ള സംഭാഷണം പിടിച്ചെടുക്കുന്ന കണ്ട്രോള് ടവറിലെ സംവിധാനങ്ങളും അപകടം എങ്ങനെയുണ്ടായെന്ന അന്വേഷണത്തെ സഹായിക്കും. മാത്രവുമല്ല, മരണം തൊട്ടടുത്തെത്തിയെന്ന് ബോധ്യമാകുന്ന നിമിഷങ്ങളിലും ജോലിയോടും വിമാനത്തിലുള്ളവരോടുമുള്ള പൈലറ്റുമാരുടെ പ്രതിബദ്ധതയുടെ സാക്ഷ്യപത്രം കൂടിയാണ് ദുരന്തത്തിലെ ശബ്ദശേഷിപ്പുകള്.
ഈ മാസം ഒന്നിന് ബഹാമസിലെ നോര്ത്ത് ഇലൂത്ര ദ്വീപിലേക്കു പോകാന് ടെക്സസിലെ ആസ്റ്റിന് രാജ്യാന്തര വിമാനത്താവളത്തില്നിന്നു പറന്നുയര്ന്ന ലിയര്ജെറ്റ് ഇനം പ്രൈവറ്റ് ജെറ്റ്, മോശം കാലാവസ്ഥയില് അമേരിക്കയിലെ ഫ്ളോറിഡയില് തകര്ന്ന് രണ്ടു പൈലറ്റുമാരും ഏഴു യാത്രക്കാരും മരിച്ചു. അപകടത്തിനു തൊട്ടുമുമ്പുവരെ എടിസിയോട് പൈലറ്റുമാരില് ഒരാള് സംസാരിച്ചതിന്റെ ശബ്ദരേഖയാണ് ദുരന്തം തൊട്ടരികിലെത്തിയപ്പോഴും വൈമാനികര് ജോലിയിലുള്ള കൃത്യത കൈവിടില്ലെന്നതിനുള്ള അവസാന ഉദാഹരണം.
നഥാലിയ ഗഡീല ഫില്ഗേരസ് എന്ന ഇരുപതുകാരന് കോ-പൈലറ്റ് വിമാനം തകരുന്നതിന് നിമിഷങ്ങള് മുമ്പു വരെ വിമാനത്തിന്റെ വേഗം, ഉയരം, താഴേക്കു പതിക്കുന്നതിന്റെ നിരക്ക്, ചെരിവ് തുടങ്ങിയവയെല്ലാം കണ്ട്രോള് ടവറിലേക്ക് പറഞ്ഞുകൊണ്ടിരിക്കുകയായിരുന്നു. അതിവേഗം താഴേക്കു പതിക്കുമ്പോഴും നഥാലിയ പറഞ്ഞു 60 ഡിഗ്രി ചെരിവില് 22,000 അടി നിരക്കില് താഴുകയാണ് ഞങ്ങള്.
ഏറ്റവും ഒടുവില് പതനവേഗം മിനിറ്റില് 32,000 അടി നിരക്കിലെത്തുമ്പോഴും നഥാലിയ ക്യാപ്റ്റനോട് പറഞ്ഞു ‘ Look outside, Jack! Look outside!’. 35,000 അടി ഉയരത്തില് പറക്കുകയായിരുന്ന വിമാനം നിമിഷങ്ങള്കൊണ്ട് പതിനായിരം അടിക്കു പതിച്ചുവെന്നതിന്റെ വസ്തുതാപരമായ വിവരണം. അടുത്ത നിമിഷങ്ങളില് വിമാനം മയാമിയിലെ ഹൈവേയില് ഇടിച്ചിറങ്ങി തീഗോളമായി പൊട്ടിത്തെറിച്ചു.
അപകടസമയവും നഥാലിയ ടവറിലേക്ക് വിവരങ്ങള് അറിയിച്ചുകൊണ്ടിരുന്നു. ഇതേ സമയം ഫ്ളൈയിംഗ് ചുമതലയിലായിരുന്ന ക്യാപ്റ്റന് അന്പത്തിയഞ്ചുകാരന് ജെഫ് ഗ്രിഗറി വിമാനം രക്ഷിച്ചെടുക്കാനുള്ള അവസാന യജ്ഞത്തിലായിരുന്നു. ഇതിനൊപ്പം യേശുവിനെ വിളിച്ചു ജെഫ് ഉറക്കെ പ്രാര്ഥന ചൊല്ലുന്നത്, കണ്ട്രോള് ടവര് റിക്കോര്ഡിംഗില് അവ്യക്തമായി കേള്ക്കാം.
അമേരിക്കയിലെ ലോസ് ആഞ്ചലസില്നിന്ന് ഈജിപ്ത് തലസ്ഥാനമായ കെയ്റോയിലേക്ക് പറക്കുകയായിരുന്ന ഈജിപ്ത് എയര് ഫ്ളൈറ്റ് 990 അറ്റ്ലാന്റിക് സമുദ്രത്തില് തകര്ന്ന 1999 ഒക്ടോബര് 31 അപകടത്തിനുശേഷം വീണ്ടെടുത്ത കോക്പിറ്റ് വോയ്സ് റെക്കോര്ഡറിലെ അവസാന വാക്കുകള് ക്യാപ്റ്റന്റേതായിരുന്നു- ‘ Pull with me’. നിയന്ത്രണാതീതമായി താഴേക്കു പൊയ്ക്കൊണ്ടിരുന്ന വിമാനം ഉയര്ത്തിയെടുക്കാനുള്ള ശ്രമത്തില് കണ്ട്രോള് കോളം ചലിപ്പിക്കാനുള്ള ശ്രമത്തിനിടയില് പറഞ്ഞതെന്നു കരുതുന്ന ഈ വാക്കുകള്ക്കു മുമ്പ്, ഫസ്റ്റ് ഓഫിസര് (കോ-പൈലറ്റ്), ‘ഞാന് ദൈവത്തില് ആശ്രയിക്കുന്നു’ എന്ന് ആവര്ത്തിച്ചു പറയുന്നതു കേള്ക്കാമായിരുന്നു.
1987 നവംബര് 28ന് തായ്പേയില്നിന്ന് സൗത്ത് ആഫ്രിക്കയിലെ ജൊഹാനസ്ബര്ഗിലേക്കുള്ള പറക്കലിനിടെ സൗത്ത് ആഫ്രിക്കന് എയര്വേയ്സിന്റെ ഫ്ളൈറ്റ് നമ്പര് എസ്എ 295 ഇന്ത്യന് മഹാസമുദ്രത്തില് പതിച്ച് 159 പേര് മരിച്ച അപകടം അന്വേഷിച്ച സമിതിക്ക് കോക്പിറ്റ് വോയ്സ് റിക്കോര്ഡറിലെ ശബ്ദരേഖയുടെ ഒടുവില് കേള്ക്കാന് കഴിഞ്ഞത് ഒരു ചോദ്യം മാത്രമായിരുന്നു- ‘ഇപ്പോള് എന്താണ് സംഭവിക്കുന്നത്?’
വിമാനത്തിന്റെ ചരക്ക് അറയിലുണ്ടായ തീപിടിത്തം മൂലമുണ്ടായ പുക കോക്പിറ്റിലും കാബിനിലും നിറഞ്ഞ് ഇലക്ട്രോണിക് സംവിധാനങ്ങള് പ്രവര്ത്തിക്കാതായതാണ് അപകടകാരണമെന്ന് വ്യക്തമായെങ്കിലും എങ്ങനെയാണ് തീപിടിത്തം ഉണ്ടായതെന്ന് ഒരിക്കലും കണ്ടെത്താന് കഴിഞ്ഞില്ല. 1970 ജൂലൈ അഞ്ചിന് കാനഡയിലെ ടൊറൊന്റോ വിമാനത്താവളത്തില് ഇടിച്ചിറങ്ങി ഇന്ധനടാങ്ക് തകര്ന്ന് തീപിടിച്ച് ഒന്പതു വിമാനജോലിക്കാരും നൂറു യാത്രക്കാരും മരിച്ച എയര് കാനഡ ഫ്ളൈറ്റ് 621 അപകടത്തില്, അവസാനം രേഖപ്പെടുത്തപ്പെട്ട വാക്കുകള്, ‘നമുക്ക് ഒരു ചിറക് നഷ്ടമായി’ എന്നതായിരുന്നു.
2010 ജനുവരി 25ന് മധ്യധരണ്യാഴിയില് പതിച്ച് വിമാനത്തിലുണ്ടായിരുന്ന 90 പേരും മരിച്ച എത്യോപ്യന് എയര്ലൈന്സ് ഫ്ളൈറ്റ് 409 അപകടത്തില് പൈലറ്റുമാരില് ഒരാളുടേതായിരുന്നു അവസാന വാക്കുകള്- ‘നമ്മള് തീര്ന്നു. ദൈവമേ, ഞങ്ങളോടു കരുണയുണ്ടാകണമേ’. 1979 നവംബര് 28ന് അന്റാര്ട്ടിക്കയിലെ മൗണ്ട് എറേബസില് ഇടിച്ചുതകര്ന്ന് 237 യാത്രക്കാരും 20 വിമാനജോലിക്കാരും മരിച്ച എയര് ന്യൂസിലന്ഡ് ഫ്ളൈറ്റ് 901 അപകടത്തില്, ക്യാപ്റ്റന് പറഞ്ഞത്, ‘Go-around power please’ എന്നായിരുന്നു.
പര്വതത്തില് ഇടിക്കാന് പോകുന്ന വേഗം ഉയര്ത്തിയെടുക്കാൻ കൂടുതല് ശക്തി എന്ജിനുകള്ക്കു കൊടുക്കണമെന്ന് ഫ്ളൈറ്റ് എന്ജിനിയറോട് ആവശ്യപ്പെടുന്നതായിരുന്നു ആ വാക്കുകള്. മലയ്ക്കു നേരേ വൻ വേഗത്തില് പറന്നടുത്തുകൊണ്ടിരിക്കുമ്പോള് മരണം സെക്കന്ഡുകള് അകലെയാണെന്ന തിരിച്ചറിവിലും വിമാനം രക്ഷിച്ചെടുക്കുന്നതിനുള്ള മാര്ഗം ആലോചിക്കുകയും അതിനുള്ള നിര്ദേശം നല്കുകയും ചെയ്യാന് കഴിയുന്നത്, പറത്തല് വെറുമൊരു ജോലി എന്നതില് ഉപരിയായി വ്യക്തിത്വത്തിന്റെ ഭാഗം തന്നെയായി തീര്ന്നതിനാലാണ് എന്നു വ്യക്തം.
Tags : Sunday Deepika Pilots courage disaster