ചീര എല്ലാത്തരത്തിലും മനുഷ്യശരീരത്തിനു വളരെ ഗുണംചെയ്യുന്ന ഒരു പച്ചക്കറിയാണ്. അത് ചെമന്ന ചീരയാണെങ്കിൽ അത്യുത്തമം.
1. ചീര കട്ലറ്റ്സ്
ചെമന്ന ചീര കഴുകി അരിഞ്ഞത് 3 കപ്പ്, ഉരുളക്കിഴങ്ങ് പുഴുങ്ങി പൊടിച്ചത് 2 കപ്പ്, പെരുംജീരകം പൊടിച്ചതും കുരുമുളകുപൊടിയും പട്ട പൊടിച്ചതും ഓരോ സ്പൂൺ വീതം. ഒരു സവാള പൊടിയായി അരിഞ്ഞത്, 2 പച്ചമുളക് അരിഞ്ഞത്, ഇഞ്ചിയും വെളുത്തുള്ളിയും അരിഞ്ഞത് ഓരോ സ്പൂൺ വീതം. ഒരു മുട്ടയുടെ വെള്ള, ഉപ്പ്, ആവശ്യത്തിന് എണ്ണ.
ഉണ്ടാക്കുന്ന വിധം:
* 2 സ്പൂൺ എണ്ണ ചൂടാക്കി അരിഞ്ഞുവച്ചതെല്ലാം വഴറ്റി അരിഞ്ഞ ചീര ചേർത്തിളക്കുക. ഇതും നല്ലതുപോലെ ഇളക്കി വറ്റിക്കഴിഞ്ഞാൽ ബാക്കിയുള്ളതെല്ലാം ചേർത്തിളക്കുക.
*ഇറക്കിവച്ച് കൈകൊണ്ടും എല്ലാം കൂടി നല്ലതുപോലെ ചേർത്തിളക്കുക.
*മുട്ടയുടെ വെള്ള അടിച്ച് വയ്ക്കുക.
*കുഴച്ചുവച്ച കൂട്ടിൽനിന്നും കുറേശെ എടുത്ത് ഉരുളകളാക്കി കൈവെള്ളയിൽവച്ച് കട്ലറ്റ് രൂപത്തിലാക്കി വയ്ക്കുക. ഇത് വട്ടത്തിലോ ചതുരത്തിലോ ആകാം.
* ഒരു നോൺ സ്റ്റിക് പാൻ ചൂടാക്കി അല്പം എണ്ണ ചൂടാക്കി ഇതിലേക്ക് ഒരോ കട്ലറ്റ് മുട്ടവെള്ളയിൽ മുക്കി ചൂടെണ്ണയിൽ ഇട്ട് ഇരുവശവും മൂപ്പിച്ച് എടുത്ത് മാറ്റുക. സവാള വട്ടത്തിൽ അരിഞ്ഞത് അലങ്കരിച്ച് വിളന്പാം.
2. ചീര തോരൻ
ചീര കൊത്തി അരിഞ്ഞത് 2 കപ്പ്, തേങ്ങാ ചുരണ്ടിയത് 1 കപ്പ്, ജീരകം 1 സ്പൂൺ, പച്ചമുളക് 2, സവാള അരിഞ്ഞത് 3 ടേബിൾ സ്പൂൺ, ഉപ്പ്, മഞ്ഞപൊടി, 3 ടേബിൾ സ്പൂൺ എണ്ണ.
ഉണ്ടാക്കുന്ന വിധം:
* 2 സ്പൂൺ എണ്ണയൊഴിച്ച് സവാള വഴറ്റുക. ഇതിലേക്ക് ചീര ചേർത്തിളക്കി ഒന്നുവാടിക്കഴിഞ്ഞാൽ തേങ്ങയും ജീരകവും പച്ചമുളകും ചേർത്തിളക്കുക. തീകുറച്ച് ആവശ്യത്തിന് ഉപ്പും ചേർത്തിളക്കി നല്ലതുപോലെ ഇളക്കി യോജിപ്പിച്ച് വെന്തുകഴിഞ്ഞാൽ ഇറക്കിവയ്ക്കാം.
* ബാക്കിയുള്ള എണ്ണ ചൂടാക്കി ഒരു സ്പൂൺ കടുകും ഒരു ഉണക്കമുളകും ഇട്ട് പൊട്ടിയാൽ വെന്ത ചീരയിലേക്കു ചേർത്തിളക്കുക.
ഓമന ജേക്കബ്, ചങ്ങനാശേരി