പഴുവിൽ തീർഥകേന്ദ്രം
പഴുവിൽ വിശുദ്ധ അന്തോണീസിന്റെ തീർഥകേന്ദ്രത്തിലെ ഊട്ടുതിരുനാൾ ആഘോഷിച്ചു. ആഘോഷമായ തിരുനാൾ പാട്ടുകുർബാനയ്ക്കു പറപ്പൂർ ഫൊറോന വികാരി ഫാ. സെബി പുത്തൂർ മുഖ്യകാർമികനായി. നെഹ്റുനഗർ ക്രിസ്തുരാജ് ഭവൻ സുപ്പീരിയർ ഫാ. ലിജോ ഐക്കരത്താഴെ തിരുനാൾസന്ദേശം നൽകി. തുടർന്നു നേർച്ച ഊട്ട് നടന്നു. വൈകീട്ട് നടന്ന വിശുദ്ധ കുർബാനയ്ക്ക് ചിറക്കേക്കോട് വികാരി റവ.ഡോ. വർഗീസ് ഊക്കൻ കാർമികത്വം വഹിച്ചു. പ്രദക്ഷിണത്തിനുശേഷം വർണമഴയും ബാന്ഡുവാദ്യവും നടന്നു. ഫൊറോന വികാരി റവ.ഡോ. വിൻസെന്റ് ചെറുവത്തൂർ, അസി.വികാരി ഫാ. ഫ്രാൻസിസ് കല്ലുംപുറത്ത്, ട്രസ്റ്റിമാരായ റാഫി ആലപ്പാട്ട്, ജെയിംസ് ചാലിശേരി, സോബി കുറ്റിക്കാട്ട്, ഡിനോ ദേവസി, തിരുനാൾ ജനറൽ കൺവീനർ ജോയ് ചാലിശേരി, വിവിധ കമ്മിറ്റി അംഗങ്ങൾ എന്നിവർ പരിപാടികൾക്കു നേതൃത്വംനൽകി. തിരുനാളിനോടനുബന്ധിച്ച് കാരുണ്യഭവനം പദ്ധതിപ്രകാരം ഒരു കുടുംബത്തിനു വീട് നിർമിച്ചുകൊടുക്കുന്നതിനുള്ള പ്രാരംഭ പ്രവർത്തനങ്ങൾ ആരംഭിച്ചു. എട്ടാമിടം 21നു നടക്കും.
മറ്റം പള്ളി
മറ്റം നിത്യസഹായമാതാവിന്റെ തിരുനാളിനോടനുബന്ധിച്ചുള്ള കിരീടം എഴുന്നള്ളിപ്പ് ആഘോഷമായി സമാപിച്ചു. തിരുനാൾദിനത്തിൽ നടന്ന ആഘോഷമായ പാട്ടുകുർബാനയ്ക്കു തൃശൂർ ലൂർദ് കത്തീഡ്രൽ അസി. വികാരി ഫാ. അനു ചാലിൽ മുഖ്യകാർമികത്വംവഹിച്ചു. റവ.ഡോ. അലക്സ് മരോട്ടിക്കൽ സന്ദേശംനൽകി.
ഫാ. ജോയൽ ചിറമൽ സഹകാർമികനായി. വൈകിട്ട് ഇടവക പള്ളിയിൽനിന്നു തീർഥകേന്ദ്രത്തിലേക്ക് ആഘോഷമായ കിരീടം എഴുന്നള്ളിപ്പ് നടന്നു. തിരുനാൾ ആഘോഷങ്ങൾക്കു വികാരി റവ.ഡോ. ഷാജു ഊക്കൻ, സഹവികാരി ഫാ. ജോയൽ ചിറമ്മൽ, ട്രസ്റ്റിമാരായ കെ.എൽ. ജോൺസൺ, പി.എം. വർഗീസ്, കെ.എഫ്. സൈമൺ, കെ.ആർ. ജിൻസൺ, ജനറൽ കൺവീനർ സി.ടി. ഫ്രാൻസിസ്, എം.വി. ആന്റണി എന്നിവർ നേതൃത്വംനൽകി.
തിരുത്തിപ്പറമ്പ് സെന്റ്
ജോസഫ് ദേവാലയം
വിശുദ്ധ യൗസേപ്പിതാവിന്റെയും വിശുദ്ധ മിഖായേൽ മാലാഖയുടെയും വിശുദ്ധ സെബസ്ത്യാനോസിന്റെയും സംയുക്ത തിരുനാൾ ഭക്തിസാന്ദ്രമായി. ഞായറാഴ്ച രാവിലെ നടന്ന വിശുദ്ധ കുർബാനയ്ക്ക് വികാരി ഫാ. ജോൺസൺ അരിമ്പൂർ മുഖ്യകാർമികനായി. തുടർന്ന് പ്രസുദേന്തിവാഴ്ച നടന്നു.
ആഘോഷമായ തിരുനാൾ പാട്ടുകുർബാനയ്ക്ക് അടാട്ട് പള്ളി വികാരി ഫാ. ജോമോൻ ഇമ്മട്ടി മുഖ്യകാർമികനായി. ഫാ. ബാസ്റ്റിൻ പുന്നോലിപ്പറമ്പിൽ തിരുനാൾസന്ദേശം നൽകി. വൈകീട്ടു നടന്ന വിശുദ്ധ കുർബാനയ്ക്ക് മുണ്ടത്തിക്കോട് പള്ളി വികാരി ഫാ. ഫ്രാങ്കോ പുത്തിരി കാർമികനായി. തുടർന്ന് തിരുനാൾപ്രദക്ഷിണവും ഫാൻസി വെടിക്കെട്ടും ഉണ്ടായി. ഇന്നലെ ഇടവകയിലെ പരേതർക്കുവേണ്ടിയുള്ള ദിവ്യബലി, ഒപ്പീസ് എന്നിവയും നടന്നു. രാത്രി ഗാനമേളയുണ്ടായി. ചടങ്ങുകൾക്കു വികാരി ഫാ. ജോൺസൺ അരിമ്പൂർ, ജനറൽ കൺവീനർ തോമസ് ചിരിയങ്കണ്ടത്ത്, കൈക്കാരൻമാരായ പ്രിൻസൺ ചിരിയങ്കണ്ടത്ത്, ദേവസി ചിരിയങ്കണ്ടത്ത്, ഫ്രാൻസിസ് ചെറുവത്തൂർ എന്നിവർ നേതൃത്വംനൽകി.
ആറ്റുപുറം സെന്റ്
ആന്റണീസ് പള്ളി
സംയുക്ത തിരുനാൾ സമാപിച്ചു. തിരുനാൾ പാട്ടുകുർബാനയ്ക്ക് വികാരി ജനറാൾ ഫാ. ജോസ് കോനിക്കര മുഖ്യകാർമികനായിരുന്നു. ഫാ. ജോസ് ചിറപ്പണത്ത് സന്ദേശം നൽകി.
തുടർന്നുനടന്ന പ്രദക്ഷിണത്തിനു വികാരി ഫാ. ഡെന്നീസ് മാറോക്കി, ജനറൽ കൺവീനർ എം.കെ. കുരിയാക്കോസ്, ട്രസ്റ്റിമാരായ ബാബു എടക്കളത്തൂർ, ജോഷി ചൊവ്വല്ലൂർ, കൺവീനർ ജോബി വെള്ളറ തുടങ്ങിയവർ നേതൃത്വംനൽകി.
തയ്യൂർ നിത്യസഹായമാതാ
ദേവാലയം
ദേവാലയത്തിൽ എട്ടാമിടവും ഇടവകദിനവും മതബോധനദിനവും സംയുക്തമായി ആഘോഷിച്ചു. തൃശൂർ അതിരൂപത മതബോധന ഡയറക്ടർ റവ.ഡോ. ഫ്രാൻസിസ് ആളൂർ കാർമികത്വവും പൊതുസമ്മേളനം ഉദ്ഘാടനവും നിര്വഹിച്ചു. തയ്യൂർ ഇടവകവികാരി ഫാ. ഗ്രിജോ വിൻസെന്റ് മുരിങ്ങാത്തേരി അധ്യക്ഷത വഹിച്ചു.
മികച്ച മാർക്ക് വാങ്ങിയവർക്ക് കാഷ് അവാർഡും ട്രോഫിയും നൽകി. വ്യത്യസ്തമേഖലയിൽ കഴിവ് തെളിയിച്ചവരെയും ആദരിച്ചു. മദർ കൊച്ചുത്രേസ്യ വട്ടോലി, നടത്തുകൈക്കാരൻ ബൈജു ചിരിയങ്കണ്ടത്ത്, തിരുനാൾ കൺവീനർ എ.എൽ. വിൻസെന്റ്, സെക്രട്ടറി പി.എ. ജിജു, പ്രസിഡന്റ് സി.ജി. സെബി, മതബോധന പ്രിൻസിപ്പല് റോസി തോമസ്, വിബിൻ തുടങ്ങിയവർ നേതൃത്വം വഹിച്ചു.