തൊടിയൂർ ഗവ. എൽപിഎസിൽ നടന്ന ശിശുദിനാഘോഷത്തിൽ പങ്കെടുത്ത കുട്ടികൾ.
തൊടിയൂർ: ശിശുദിനത്തോടനുബന്ധിച്ച് ഭരണഘടനയുടെ കൈയെഴുത്ത് പ്രതി തൊട്ടറിഞ്ഞ് തൊടിയൂർ ഗവ.എൽപിഎസിലെ കുരുന്നുകൾ. ശിശുദിനാഘോഷ പരിപാടിയുടെ ഉദ്ഘാടകനായെത്തിയ സംസ്ഥാന യൂത്ത് പ്രമോഷൻ കൗൺസിൽ ചെയർമാനും പ്രകൃതി മിത്ര വനമിത്ര പുരസ്കാര ജേതാവുമായ സുമൻജിത്ത് മിഷയാണ് തന്റെ പക്കലുള്ള ഭരണഘടനയുടെ കൈയെഴുത്ത് പ്രതി തൊട്ടറിയാൻ കുട്ടികൾക്ക് അവസരം ഒരുക്കിയത്.
പരിപാടിയുടെ ഭാഗമായി കുട്ടികളുടെ പാർലമെന്റ് സംഘടിപ്പിക്കുകയും ഭരണഘടനയുടെ ആമുഖം സ്കൂളിൽ സ്ഥാപിക്കുകയും ചെയ്തു.
രണ്ടാം ക്ലാസ് വിദ്യാർഥി ജഗന്നാഥ് പണ്ഡിറ്റ് ജവഹർലാൽ നെഹ്റുവിന്റെ വേഷത്തിൽ കുട്ടികളുടെ പ്രധാനമന്ത്രിയായി. നാലാം ക്ലാസ് വിദ്യാർഥി മുഹമ്മദ് സയാനായിരുന്നു പ്രതിപക്ഷ നേതാവ്. എ.അബ്ദുല്ല സ്പീക്കറായി കുട്ടികളുടെ പാർലമെന്റ് നിയന്ത്രിച്ചു.
നൈഷാന, മിത്രമേഘന, പവിത്ര മനോജ്, ആദിത്യൻ, ദേവിക, സൂര്യ നാരായണൻ എന്നിവർ വിവിധ മന്ത്രിമാരും എംപി മാരുമായി ചോദ്യങ്ങൾ ചോദിക്കുകയും മറുപടി പറയുകയും ചെയ്തു.
ഹെഡ്മാസ്റ്റർ സി. അജിത്കുമാർ, അധ്യാപകരായ ഷാൻ ഇബ്രാഹിം, നീന ഹനീഫ, നൂർജഹാൻ, ആർ.പി മാളു, റീന, അഖില, ഷാഹിദ എന്നിവർ പരിപാടിക്ക് നേതൃത്വം നൽകി.
Tags : Childrens Day Nttuvishesham Districtnews