ഏരൂർ പഞ്ചായത്തിൽ സമഗ്ര മാലിന്യ പരിപാലന റിപ്പോർട്ട് പ്രകാശനം ചെയ്യുന്നു.
ഏരൂർ: മാലിന്യ പരിപാലന രംഗത്ത് കഴിഞ്ഞ കാലങ്ങളിൽ നടത്തിയ പ്രവർത്തനങ്ങളുടെ തുടർച്ചയായി ജൈവ മാലിന്യ പരിപാലനം, ദ്രവമാലിന്യ സംസ്കരണം എന്നിവയ്ക്ക് കൂടുതൽ പ്രാധാന്യം കൊടുത്തു കൊണ്ടുള്ള സമഗ്ര മാലിന്യ പരിപാലനത്തിന് കൊല്ലം ജില്ലയിൽ ഏരൂർ പഞ്ചായത്തിൽ തുടക്കമായി.
ഉറവിട മാലിന്യ സംസ്കരണത്തിന്റെ ഭാഗമായി പഞ്ചായത്ത് നടപ്പിലാക്കിയ ബയോബിന്നുകളുടെ പരിപാലനം, ആവശ്യമായ ഇ നോക്കുലം ലഭ്യമാക്കൽ, ഏറോബിക് കമ്പോസ്റ്റിംഗ് യൂണിറ്റുകൾ പ്രവർത്തനക്ഷമമാക്കുക, ദ്രവമാലിന്യ സംസ്കരണത്തിന് ആവശ്യമായ സോക്ക്പിറ്റുകളുടെ നിർമാണം, 100 ശതമാനം അജൈവ മാലിന്യ ശേഖരണം എന്നിവയാണ് 2026-31 കാലയളവിൽ പഞ്ചായത്ത് ലക്ഷ്യമിടുന്നത്. ഇതിന്റെ ഭാഗമായി ഐആർടിസി ഹരിത സഹായ സ്ഥാപനത്തിന്റെ നേതൃത്വത്തിൽ തയാറാക്കിയ സമഗ്ര മാലിന്യ പരിപാലന റിപ്പോർട്ടിന്റെ പ്രകാശനഗ്രാമപഞ്ചായത്ത് പ്രസിഡന്റ് ആതിര പ്രവീൺ നിർവഹിച്ചു.
സ്കൂൾ കോളജ് വിദ്യാർഥികളുടെ നേതൃത്വത്തിൽ സാനിട്ടറി നാപ്കിനുകളുടെ മാലിന്യ പ്രശ്നം കുറക്കുന്നതിനായി മെൻസ്ട്രുവൽ കപ്പുകളുടെ ഉപയോഗം പ്രചാരത്തിലെത്തിക്കുന്നതിനുള്ള കാമ്പയിന് നവംബർ മാസം തുടക്കം കുറിക്കും.
തദ്ദേശസ്ഥാപന പരിധിയിലുള്ള മുഴുവൻ പൊതുസ്ഥലങ്ങളും റോഡരികുകളും നിർമലം പുതു യുഗം കാമ്പയിന്റെ ഭാഗമായി ജനപ്രതിനിധികളുടെ പൊതുജനങ്ങളുടെയും കൂട്ടായ്മയിൽ വൃത്തിയാക്കും. ജലാശയങ്ങൾ മലിനീകരിക്കാതിരിക്കാനുള്ള ബഹുജന ബോധവത്ക്കരണ പ്രവർത്തങ്ങൾ വാർഡടിസ്ഥാനത്തിൽ സംഘടിപ്പിക്കും. പഞ്ചായത്തിനെ മാലിന്യമുക്തമാക്കുന്നതിനുള്ള പ്രവർത്തനങ്ങൾക്ക് ഐആർടിസി ഹരിത സഹായ സ്ഥാപനം സാങ്കേതിക സഹായം നല്കും.
ഗ്രാമപഞ്ചായത്ത് വൈസ് പ്രസിഡന്റ് അഡ്വ.പി.ആർ. ബാലചന്ദ്രൻ ചടങ്ങിൽ അധ്യക്ഷനായി. ഐആർടിസി കോ - ഒാർഡിനേറ്റർ ആർ. രേവതി റിപ്പോർട്ട് അവതരിപ്പിച്ചു.
ആരോഗ്യ സ്റ്റാൻഡിംഗ് കമ്മറ്റി ചെയർ പേഴ്സൺ ജെസി മേരി, വികസനകാര്യ സ്റ്റാൻഡിംഗ് കമ്മിറ്റി അധ്യക്ഷ അനിത ബിജു, ക്ഷേമകാര്യ സ്റ്റാൻഡിംഗ് കമ്മിറ്റി സോമശേഖരപിള്ള ജനപ്രതിനിധികൾ, ഐആർടിസി ജില്ലാ കോഡിനേറ്റർ എം.എസ്. സൂര്യ, അസി. സെക്രട്ടറി, ഗ്രാമപഞ്ചായത്ത് ഉദ്യോഗസ്ഥർ, ഹെൽത്ത് ഇൻസ്പെക്ടർ എന്നിവർ ചടങ്ങിൽ പ്രസംഗിച്ചു.ൃ
Tags : Panchayat Nttuvishesham Districtnews