അറസ്റ്റിലായ യൂസഫ്, ഷഫീഖ്, വിജുകുമാർ
ആലുവ: ബാറിൽ മദ്യപിക്കാനെത്തിയ യുവാവിനെ മദ്യം വാങ്ങിത്തരാനായി നെറ്റിയിൽ തോക്കുവച്ച് വധഭീഷണി മുഴക്കിയ കേസിൽ മൂന്ന് പേർ അറസ്റ്റിൽ. എടത്തല മുരിങ്ങാശേരി യൂസഫ് (50), ചുണങ്ങംവേലി മനയിൽ ഷഫീഖ് (45), കൊടികുത്തിമല കൊട്ടിയാറ വിജുകുമാർ, (46) എന്നിവരെയാണ് എടത്തല പൊലിസ് അറസ്റ്റ് ചെയ്തത്.
ബുധനാഴ്ച ഉച്ചയ്ക്ക് ചുണങ്ങംവേലിയിലെ ബാറിലായിരുന്നു സംഭവം. സൗത്ത് ഏഴിപ്രം സ്വദേശിയെയാണ് മദ്യം വാങ്ങിച്ചു കൊടുത്തില്ലെങ്കിൽ വെടിവച്ച് കൊല്ലുമെന്ന് പറഞ്ഞ് ഭീഷണിപ്പെടുത്തിയത്. ഷെഫീഖും യൂസഫുമാണ് ബാറിൽ ഉണ്ടായിരുന്നത്. വിജുകുമാറാണ് ഇവർക്ക് കൈവശമുണ്ടായിരുന്ന തോക്ക് നൽകിയത്.
യൂസഫിന്റെ എർട്ടിഗ കാർ പരിശോധിച്ചപ്പോൾ സീറ്റിനടിയിൽ നിന്ന് വടിവാളും കണ്ടെടുത്തു. കൊച്ചിൻ ബാങ്ക് പരിസരത്തെ ഗോഡൗണിൽനിന്ന് ഭീഷണിപ്പെടുത്താൻ ഉപയോഗിച്ച തോക്കും പെല്ലറ്റുകളും കസ്റ്റഡിയിലെടുത്തു. മൂന്നു പ്രതികളും കവർച്ചയടക്കം നിരവധി കേസുകളിൽ ഉൾപ്പെട്ടവരാണ്. യൂസഫിനെതിരേ ആലുവ, എടത്തല , ചേരാനല്ലൂർ, നെടുമ്പാശേരി സ്റ്റേഷനുകളിൽ ഏഴ് കേസുകളുണ്ട്. ഷഫീഖിനെതിരേ എടത്തല, കാസർഗോഡ് റയിൽവേ, അമ്പലമേട് സ്റ്റേഷനുകളിലായി ആറു കേസുകളും, വിജുകുമാറിനെതിരേ നെടുമ്പാശേരി, ആലുവ സ്റ്റേഷനുകളിലായി മൂന്നു കേസുകളുമുണ്ട്.
എസ്ഐമാരായ എസ്.എസ്. ശ്രീലാൽ, ഒ.എം. സെയ്തു, എ. സജീവ്, എഎസ്ഐ കെ.ബി. സജീവ്, സീനിയർ സിപിഒമാരായ നിഷാദ്, ലിജോ ജേക്കബ്, സിപിഒമാരായ ഫിറാഷ് , ഭവജേഷ്, ഹരീഷ് രാജ് എന്നിവരാണ് അന്വേഷണ സംഘത്തിലുണ്ടായിരുന്നത്.
Tags : three goons arrested