പാലക്കാട്: സ്കൂൾ തുറക്കുന്നതിന് മുന്നോടിയായി ജില്ലാ പഞ്ചായത്ത് പരിധിയിലെ വിദ്യാലയങ്ങളുടെ നവീകരണത്തിനായി തുക അനുവദിച്ചതായി ജില്ലാ പഞ്ചായത്ത് പ്രസിഡന്റ് ടി.എം. ശശി. വിവിധ സ്കൂളുകളുടെ നവീകരണത്തിനായി 20000 രൂപ വീതമാണ് അനുവദിച്ചത്.
കഴിഞ്ഞ സാന്പത്തികവർഷത്തെ പദ്ധതികൾ എല്ലാം അന്തിമഘട്ടത്തിലാണ്. ജില്ലാ ഹോമിയോ ആശുപത്രി കെട്ടിടം നിലവിലുള്ള കെട്ടിടത്തിൽനിന്നും മാറ്റുന്നതിനുള്ള നടപടികൾ പുരോഗമിക്കുകയാണ്. ജില്ലാ ആശുപത്രിയിലെ അടിയന്തര സ്വഭാവമുള്ള അറ്റകുറ്റപ്പണികളും പുരോഗമിക്കുകയാണ്. ജില്ലാ പഞ്ചായത്ത് പരിസരത്തെ അപകടകരമായ മരങ്ങൾ മുറിക്കുന്നതിനായും യോഗത്തിൽ നിർദേശം നൽകി.
സ്കൂൾ വിദ്യാർഥികളിലെ ആത്മഹത്യാപ്രവണത കൂടി വരുന്ന സാഹചര്യത്തിൽ സ്കൂൾ കൗണ്സിലർമാരെ നിയമിക്കുന്നത്തിനുള്ള നടപടികൾ പുരോഗമിക്കുകയാണെന്നും യോഗത്തിൽ അറിയിച്ചു. ജില്ലാ പഞ്ചായത്ത് കൗണ്സിൽ ഹാളിൽ നടന്ന യോഗത്തിൽ എൻ. സരിത അധ്യക്ഷയായി.
പരിപാടിയിൽ വിവിധ സ്റ്റാൻഡിംഗ് കമ്മിറ്റി അധ്യക്ഷന്മാർ, ജില്ലാ പഞ്ചായത്ത് അംഗങ്ങൾ, വിവിധ ബ്ലോക്ക് പഞ്ചായത്ത് പ്രസിഡന്റുമാർ, ജില്ലാ പഞ്ചായത്ത് സെക്രട്ടറി എം. രാമൻകുട്ടി തുടങ്ങിയവർ പങ്കെടുത്തു. ജില്ലാ പഞ്ചായത്ത് പ്രസിഡന്റ് രാജിവെക്കുന്ന സാഹചര്യത്തിൽ ടി.എം. ശശിയുടെ നേതൃത്വത്തിൽ നടത്തുന്ന അവസാന ബോർഡ് മീറ്റിംഗ് ആയിരുന്നു.