മങ്കട: മങ്കട ടൗണിൽ അടിക്കടി ഉണ്ടാകുന്ന വൈദ്യുതി പ്രശ്നങ്ങൾക്ക് ശാശ്വതപരിഹാരം കാണണമെന്നും നേരത്തേ പ്രഖ്യാപിച്ച ഫീഡർ ഉടൻ സ്ഥാപിക്കണമെന്നും കേരള വ്യാപാരി വ്യവസായി ഏകോപന സമിതി മങ്കട യൂണിറ്റ് ആവശ്യപ്പെട്ടു.
അപ്രഖ്യാപിത വൈദ്യുതി മുടക്കവും മറ്റു പ്രശ്നങ്ങളും വ്യാപാരികൾക്കും മറ്റും വലിയ സാന്പത്തിക നഷ്ടങ്ങൾ വരുന്നുന്നതായി ചൂണ്ടിക്കാട്ടി കഴിഞ്ഞവർഷം കെഎസ്ഇബിയിൽ പരാതി നൽകിയിരുന്നു.
ഇതിനെത്തുടർന്ന് മങ്കടയ്ക്ക് പ്രത്യേകം ഫീഡർ അനുവദിക്കാമെന്ന് എഇ വാക്ക് നൽകിയിരുന്നു. എന്നാൽ നടപടികളൊന്നും ഉണ്ടായില്ല.പ്രശ്നം പരിഹരിക്കപ്പെടാത്ത സാഹചര്യത്തിൽ വ്യാപാരി വ്യവസായി മങ്കട യൂണിറ്റ് മങ്കട അസിസ്റ്റന്റ് എൻജിനിയർ, പെരിന്തൽമണ്ണ എക്സിക്യൂട്ടീവ് എൻജിനിയർ, ഡെപ്യൂട്ടി ചീഫ് എൻജിനിയർ മഞ്ചേരി, എംഎൽഎ എന്നിവർക്ക് വീണ്ടും നിവേദനം നൽകി.
യൂണിറ്റ് പ്രസിഡന്റ് യു.പി. മുനീർ ബാബു, സെക്രട്ടറി സക്കീർ നോബിൾ, ആക്ടിംഗ് പ്രസിഡന്റ് മാജ് എന്ന മുഹമ്മദ്കുട്ടി, കെ.ടി. യൂസഫ്, ജവഹർ അലി വൈറ്റ്മാർട്ട്, നാരായണൻ രാഗം, സി.ടി. ജൈസൽ, മുനീർ വർണം, ടി.ടി. ഹാരിസ് ബാബു, ഇബ്രാഹിം എ. വണ് എന്നിവർ പങ്കെടുത്തു.