സ്ത്രീകള്ക്കായുള്ള സൗജന്യ യാത്രാപദ്ധതിയുടെ ഭാഗമായി കെഎസ്ആര്ടിസി ബസില് ജീവനക്കാര് സ്റ്റിക്കര് പതിക്കുന്നു.
കൊച്ചി: വനിതകള്ക്ക് സൗജന്യയാത്രയൊരുക്കുന്ന കെഎസ്ആര്ടിസിയുടെ പ്രിയദര്ശിനി ഓര്ഡിനറി ബസ് സര്വീസുകള് ജില്ലയില് ഇന്ന് ആരംഭിക്കും. ജില്ലാതല ഉദ്ഘാടനം എറണാകുളം ജെട്ടി ഡിപ്പോയില് ഇന്ന് രാവിലെ ഒന്പതിന് ഹൈബി ഈഡന് എംപി നിര്വഹിക്കും. ടി.ജെ. വിനോദ് എംഎല്എ, മേയര് അഡ്വ. വി.കെ. മിനിമോള് തുടങ്ങിയവര് പങ്കെടുക്കും.
എറണാകുളം ജെട്ടി ഡിപ്പോയില് നിന്നു പുറപ്പെടുന്ന ഗുരുവായൂര് ഓര്ഡിനറി ബസിലെ യാത്രക്കാര്ക്ക് സൗജന്യ ടിക്കറ്റുകള് വിതരണം ചെയ്താകും പദ്ധതിയുടെ ഉദ്ഘാടനം. ചേരാനല്ലൂര് പഞ്ചായത്തില് നിന്നുള്ള വനിതാ അംഗങ്ങള് ആദ്യയാത്രയില് പങ്കുചേരും. ജില്ലയിലെ വിവിധ ഡിപ്പോകളിലായി 263 ഓളം ഓര്ഡിനറി ബസുകളാണ് പദ്ധതിയുടെ ഭാഗമാകുന്നത്.
തൃക്കാക്കര നിയോജക മണ്ഡലതല ഉദ്ഘാടനം കാക്കനാട് ബസ് സ്റ്റാന്ഡില് ഉമ തോമസ് എം.എല്.എ നിര്വഹിക്കും. വൈപ്പിന് നിയോജക മണ്ഡലത്തിലെ ഉദ്ഘാടനം വൈപ്പിന് കാളമുക്ക് ജംഗ്ഷനിലും കൊച്ചി മണ്ഡലത്തിലെ ഉദ്ഘാടനം തോപ്പുംപടിയിലുമാ നടക്കുക.
Tags : Local News Nattuvishesham Ernakulam