ടിപ്പറിൽനിന്നു മറിഞ്ഞുവീണ ഹിറ്റാച്ചി.
വടക്കാഞ്ചേരി: ടിപ്പറിൽ നിന്നു ഹിറ്റാച്ചി മറിഞ്ഞുവീണു. വിദ്യാർഥികളും മറ്റു യാത്രക്കാരും അദ്ഭുതകരമായി രക്ഷപ്പെട്ടു. റോഡ് നിർമാണത്തിലെ അപാകതയാണ് അപകടത്തിന് കാരണമെന്ന് നാട്ടുകാർ ആരോപിച്ചു.
ഇന്നലെ വൈകിട്ട് നാലോടെ പുന്നംപറമ്പിൽ സ്ഥിതി ചെയ്യുന്ന അമ്പലപ്പാട് സർവീസ് സഹകരണ ബാങ്കിന്റെ ബ്രാഞ്ച് ഓഫീസിലേക്ക് ടിപ്പറിൽ കൊണ്ടു പോകുകയായിരുന്ന ചെറിയ ജെസിബി മറിഞ്ഞുവീണ് ബാങ്കിന്റെ ഗ്ലാസ് ഉൾപ്പെടെയുള്ള ഭാഗം തകർന്നു. ഹിറ്റാച്ചി മറിയുന്ന സമയത്ത് മച്ചാട് സ്കൂൾ വിട്ട് നിരവധി വിദ്യാർഥികളും മറ്റു യാത്രക്കാരും ഉണ്ടായിരുന്നെങ്കിലും വൻ ദുരന്തം ഒഴിവായി.
പിച്ചി- വാഴാനി കോറിഡോറിന്റെയും പുന്നംപറമ്പ് പുല്ലാനിക്കാട് റോഡിന്റെയും നിർമാണത്തിലെ അപാകതയെ തുടർന്ന് പുന്നംപറമ്പ് സെന്ററിൽ അപകടം നിത്യസംഭവമാകുന്നു. റോഡ് നിർമാണത്തിലെ അപാകതയാണ് തുടർ അപകടങ്ങൾക്ക് കാരണമെന്നും അത് ഉടൻ ബന്ധപ്പെട്ടവർ ഇടപെട്ട് പരിഹരിക്കണമെന്നും സ്ഥലത്തുണ്ടായിരുന്ന ബാങ്ക് വൈസ് പ്രസിഡന്റ് കെ. ചന്ദ്രശേഖരൻ, ഡയർക്ടർമാരായ കുട്ടൻ മച്ചാട്, വർഗീസ് വാകയിൽ എന്നിവർ ആവശ്യപ്പെട്ടു.