അനധികൃത മദ്യവില്പന തടയുന്നതിനുള്ള സമരമാര്ഗങ്ങള് ആലോചിക്കുന്നതിന് പണപ്പാടിക്ക് സമീപം സംഘടിച്ച സ്ത്രീകള്.
സുല്ത്താന് ബത്തേരി: ജനങ്ങളുടെ സ്വൈര ജീവിതം കെടുത്തുന്ന അനധികൃത മദ്യവില്പനയ്ക്കെതിരേ തെരുവിലിറങ്ങി നാട്ടുകാര്. നൂല്പ്പുഴ കല്ലൂര് 67 പണപ്പാടി, തേക്കുംപറ്റ പ്രദേശങ്ങളിലെ സ്ത്രീകളും കുട്ടികളുമടക്കമുള്ളവരാണ് അനധികൃത മദ്യവില്പനയ്ക്കെതിരേ രംഗത്തെത്തിയത്. ആഭ്യന്തരമന്ത്രിക്ക് അടക്കം പരാതി നല്കിയിട്ടും മദ്യവില്പന തടയാന് നടപടിയില്ലാത്തതില് പ്രതിഷേധിച്ച് പൊലിസ് സ്റ്റേഷനിലേക്കും എക്സൈസ് ഓഫിസിലേക്കും മാര്ച്ച് നടത്താനുള്ള ഒരുക്കത്തിലാണ് നാട്ടുകാര്.
കല്ലൂര് 67 പണപ്പാടി, തേക്കുംപറ്റ എന്നിവിടങ്ങളില് രാപകല് വ്യത്യാസമില്ലാതെയാണ് മദ്യക്കച്ചവടവും ഉപഭോഗവും. ഇത് നാട്ടുകാരെ ദുരിതത്തിലാക്കുകയാണ്. കുട്ടികള്ക്കും സ്ത്രീകള്ക്കും വഴിനടക്കാന് കഴിയാത്ത സ്ഥിതിയാണ്. ബിവറേജസ് ഔട്ട്ലെറ്റുകളില്നിന്നും കര്ണാടകയില്നിന്നും കൊണ്ടുവരുന്ന മദ്യമാണ് ഇവിടെ വില്പനയ്ക്ക് എത്തുന്നത്. കഞ്ചാവ്, രാസലഹരി വില്പനയും നടക്കുന്നുണ്ടെന്നാണ് നാട്ടുകാരുടെ സംശയം. രണ്ടുവര്ഷംമുമ്പ് വീട്ടമ്മമാര് സംഘടിച്ച് അനധികൃത മദ്യവില്പനക്കാരെ അടിച്ചോടിച്ചിരുന്നു. എന്നാല് മാസങ്ങള്ക്കുശേഷം ഇവര് വീണ്ടും തലപൊക്കുകയാണുണ്ടായത്.
അനധികൃത മദ്യവില്പന തടഞ്ഞില്ലെങ്കില് സമരം: സിപിഎം
സുല്ത്താന് ബത്തേരി: കല്ലൂര് 67 പണപ്പാടി, തേക്കുംപറ്റ പ്രദേശങ്ങളിലെ അനധികൃത മദ്യവില്പന തടയാന് അടിയന്തര നടപടികള് ഉണ്ടാകുന്നില്ലെങ്കില് ആക്ഷന് കമ്മിറ്റി രൂപീകരിച്ച് ശക്തമായ സമരത്തിന് സിപിഎം നൂല്പ്പുഴ ലോക്കല് കമ്മിറ്റി നേതൃത്വം നല്കുമെന്ന് സെക്രട്ടറി വി.എസ്. ഷാരിസ് പറഞ്ഞു. ജനങ്ങളടെ സമാധാനം കെടുത്തുന്ന അനധികൃത മദ്യവില്പനയ്ക്കെതിരേ പൊലിസ്, എക്സൈസ് ഉദ്യോഗസ്ഥര് ഉണര്ന്നുപ്രവര്ത്തിക്കണമെന്ന് ആദിവാസി വനിതാപ്രസ്ഥാനം സംസ്ഥാന പ്രസിഡന്റ് ഡോ. കെ. അമ്മിണി ആവശ്യപ്പെട്ടു.
Tags : Illegal liquor sales Nattuvishesham DistrictNews disrupt people's peaceful lives