കൊച്ചിന് ഷിപ്യാര്ഡ് ലിമിറ്റഡ് പോളാര്സ്റ്റാര് മാരിടൈം ലിമിറ്റഡിനായി നിര്മിക്കുന്ന എഎസ്ടിഡിഎസ് 70 ടണ് ബൊള്ളാര്ഡ് പുള് ടാഗിന്റെ കീല് ഇടൽ ചടങ്ങ് പോളാ
കൊച്ചി: കൊച്ചിന് ഷിപ്യാര്ഡ് ലിമിറ്റഡ്(സിഎസ്എൽ) പോളാര്സ്റ്റാര് മാരിടൈം ലിമിറ്റഡിനായി നിര്മിക്കുന്ന രണ്ട് എഎസ്ടിഡിഎസ് 70 ടണ് ബൊള്ളാര്ഡ് പുള് ടഗുകളില് ആദ്യത്തേതിന്റെ കീല് ഇടൽ ചടങ്ങ് നടത്തി. പോളാര്സ്റ്റാര് മാരിടൈം മാനേജ്മെന്റ് കണ്സള്ട്ടന്റ് ഭവേഷ് ബജാജ് കീല് സ്ഥാപിച്ചു. കൊച്ചിന് ഷിപ്യാര്ഡ് ചെയര്മാനും മാനേജിംഗ് ഡയറക്ടറുമായ വി.ജെ. ജോസ് സന്നിഹിതനായിരുന്നു.
33 മീറ്റര് നീളവും 12.2 മീറ്റര് വീതിയുമുള്ള ടഗുകള് റോബര്ട്ട് അലന് ലിമിറ്റഡ് രൂപകല്പന ചെയ്തവയാണ്. 1,838 കിലോവാട്ട് ശേഷിയുള്ള രണ്ട് പ്രധാന എന്ജിനുകളാണ് ഓരോ കപ്പലിലും സജ്ജീകരിക്കുന്നത്. നിലവില് കൊച്ചിന് ഷിപ്യാര്ഡ് ഗ്രൂപ്പിന്റെ ഓര്ഡര് ബുക്കില് 17 എഎസ്ടിഡിഎസ് ടഗുകളും 6 ഗ്രീന് ടഗുകളും ഉള്പ്പെടുന്നു. പോളാര്സ്റ്റാര് മാരിടൈമിനായി കേന്ദ്ര സര്ക്കാരിന്റെ ഗ്രീന് ടഗ് ട്രാന്സിഷന് പ്രോഗ്രാമിനു കീഴില് രണ്ട് ഗ്രീന് ടഗുകളും സിഎസ്എല് നിര്മിച്ചുവരികയാണ്.
ആധുനിക ടഗ് നിര്മാണത്തിലൂടെയും സുസ്ഥിരമായ സമുദ്ര ഗതാഗത സംവിധാനങ്ങളുടെ വികസനത്തിലൂടെയും രാജ്യത്തെ തുറമുഖസമുദ്ര മേഖലകളുടെ വളര്ച്ചയ്ക്ക് സംഭാവന നല്കാനുള്ള സിഎസ്എല്ലിന്റെ പ്രതിബദ്ധതയുടെ ഭാഗമാണ് പദ്ധതിയെന്നും അധികൃതർ വ്യക്തമാക്കി.