കോട്ടയം: വിഴിഞ്ഞം തുറമുഖം വഴി കോട്ടയം ഇന്ലാന്ഡ് കണ്ടെയ്നര് ഡിപ്പോ(ഐസിഡി) യി ലേക്ക് ആദ്യ പ്രധാന ഇറക്കുമതി ചരക്കുനീക്കം. എംആര്എഫിനായി ആഫ്രിക്കയില്നിന്ന് 60 കണ്ടെയ്നര് സ്വാഭാവിക റബര് വിഴിഞ്ഞം അന്താരാഷ്ട്ര തുറമുഖം വഴി കോട്ടയം പോര്ട്ടിലൂടെ ഇറക്കുമതി നടത്തുന്നതോടെ കോട്ടയം ഇന്ലാന്ഡ് കണ്ടെയ്നര് ഡിപ്പോയുടെ (ഐസിഡി) വികസനത്തില് നിര്ണായക മുന്നേറ്റത്തിനു വഴിയൊരുങ്ങുന്നു.
എംആര്എഫിനായി ആഫ്രിക്കയില്നിന്ന് ഇറക്കുമതി ചെയ്യുന്ന ഏകദേശം 1,500 ടണ് പ്രകൃതിദത്ത റബറാണ് കോട്ടയം ഐസിഡിയില് എത്തിക്കുന്നത്. മൂന്ന് ബില് ഓഫ് ലേഡിംഗുകളിലായി 20 കണ്ടെയ്നറുകള് വീതമാണ് ചരക്കുനീക്കം ക്രമീകരിച്ചിരിക്കുന്നത്.
പുതിയ ചരക്കുനീക്ക സംവിധാനം എംആര്എഫിന്റെ ചരക്കുഗതാഗത സമയവും പ്രവര്ത്തനച്ചെലവും കുറയ്ക്കുന്നതിനൊപ്പം പ്രവര്ത്തനക്ഷമത വര്ധിപ്പിക്കാനും സഹായിക്കും. നിലവില് മുംബൈ വഴി ട്രാന്സ്ഷിപ്മെന്റ് നടത്തി എത്തിക്കുന്ന ചരക്കുകള് ലക്ഷ്യസ്ഥാനത്തെത്താന് ഏകദേശം ഒരു മാസം വരെ എടുക്കും. ഈ കാലതാമസം ഒഴിവാക്കുന്നതിനായി പോര്ട്ട് ഓഫ് ഡെസ്റ്റിനേഷന് ആയി വിഴിഞ്ഞം തുറമുഖത്തെ തെരഞ്ഞെടുത്തിരിക്കുകയാണ് എംആര്എഫ്. വിഴിഞ്ഞത്തുനിന്നു കണ്ടെയ്നറുകള് കോട്ടയം ഐസിഡിയിലെത്തിച്ചായിരിക്കും തുടര്നടപടികള് പൂര്ത്തിയാക്കുക.
കോട്ടയം ഐസിഡിയില് ഓരോ ബില് ഓഫ് ലേഡിംഗിന് കീഴിലുള്ള 20 കണ്ടെയ്നറുകളിലെയും ചരക്കുകള് കസ്റ്റംസ് പരിശോധനയ്ക്കും മറ്റ് നിര്ബന്ധിത ക്ലിയറന്സ് നടപടികള്ക്കും വിധേയമാക്കും. കസ്റ്റംസിന്റെ ഔട്ട് ഓഫ് ചാര്ജ് അനുമതി ലഭിച്ചശേഷം അതേ ട്രക്കുകളില് തന്നെ കണ്ടെയ്നറുകള് കൊച്ചിയിലെ എംആര്എഫിന്റെ കേന്ദ്രീകൃത വെയര്ഹൗസിലേക്ക് കൊണ്ടുപോകും. ഇതുവഴി ഉത്പാദനത്തിനാവശ്യമായ അസംസ്കൃത വസ്തുക്കള് വേഗത്തില് ലഭ്യമാക്കാനും ഫാക്ടറികളുടെ പ്രവര്ത്തനക്ഷമതയും ഉത്പാദനവും വര്ധിപ്പിക്കാനും സാധിക്കുമെന്നാണു പ്രതീക്ഷിക്കുന്നത്.
ഇറക്കുമതി ചരക്കുനീക്കത്തിലൂടെ ലഭിക്കുന്ന ഒഴിഞ്ഞ കണ്ടെയ്നറുകള് കയറ്റുമതി ആവശ്യങ്ങള്ക്കായി പ്രയോജനപ്പെടുത്താനാകുമെന്നതാണ് ഈ സംവിധാനത്തിന്റെ മറ്റൊരു പ്രധാന നേട്ടം. നിലവില് കയറ്റുമതിക്കാര് കൊച്ചിയില്നിന്ന് ഒഴിഞ്ഞ കണ്ടെയ്നറുകള് കോട്ടയത്തേക്ക് എത്തിച്ചാണു ചരക്കുകള് നിറയ്ക്കുന്നത്.
ഇറക്കുമതിയും കയറ്റുമതിയും പരസ്പരം ബന്ധിപ്പിച്ചുള്ള ഈ ചരക്കുനീക്ക മാതൃക ഇറക്കുമതിക്കാര്ക്കും കയറ്റുമതിക്കാര്ക്കും ലോജിസ്റ്റിക്സ് സേവനദാതാക്കള്ക്കും ഒരുപോലെ പ്രയോജനകരമായ ചെലവുകുറഞ്ഞ സംവിധാനം ഒരുക്കുമെന്നാണു പ്രതീക്ഷിക്കുന്നത്.
മുഖ്യമന്ത്രിയുടെ നേതൃത്വത്തിലും ദീര്ഘവീക്ഷണത്തിലും വിഭാവനം ചെയ്ത മിഷന് സമുദ്രയുടെ ലക്ഷ്യങ്ങളുമായി ചേര്ന്നുനില്ക്കുന്ന ഈ സംരംഭം സസ്ഥാനത്തിന്റെ സമുദ്രവ്യാപാര-ചരക്കുഗതാഗത സാധ്യതകള് ശക്തിപ്പെടുത്തുന്നതിനും സഹായകമാകും.